Sri Lakshmi Hrudaya Stotram

śrī lakṣmī hṛdaya stotram

asya śrī mahālakṣmīhṛdayastotra mahāmantrasya bhārgava ṛṣiḥ, anuṣṭupādīni nānāchandāṃsi, ādyādi śrīmahālakṣmīrdevatā, śrīṃ bījaṃ, hrīṃ śaktiḥ, aiṃ kīlakaṃ, ādyādimahālakṣmī prasādasiddhyarthaṃ jape viniyogaḥ ||

ṛṣyādinyāsaḥ –

oṃ bhārgavṛṣaye namaḥ śirasi |

oṃ anuṣṭupādinānāchandobhyo namo mukhe |

oṃ ādyādiśrīmahālakṣmī devatāyai namo hṛdaye |

oṃ śrīṃ bījāya namo guhye |

oṃ hrīṃ śaktaye namaḥ pādayoḥ |

oṃ aiṃ kīlakāya namo nābhau |

oṃ viniyogāya namaḥ sarvāṅge |

karanyāsaḥ –

oṃ śrīṃ aṅguṣṭhābhyāṃ namaḥ |

oṃ hrīṃ tarjanībhyāṃ namaḥ |

oṃ aiṃ madhyamābhyāṃ namaḥ |

oṃ śrīṃ anāmikābhyāṃ namaḥ |

oṃ hrīṃ kaniṣṭhikābhyāṃ namaḥ |

oṃ aiṃ karatala karapṛṣṭhābhyāṃ namaḥ |

aṅganyāsaḥ –

oṃ śrīṃ hṛdayāya namaḥ |

oṃ hrīṃ śirase svāhā |

oṃ aiṃ śikhāyai vaṣaṭ |

oṃ śrīṃ kavacāya hum |

oṃ hrīṃ netratrayāya vauṣaṭ |

oṃ aiṃ astrāya phaṭ |

oṃ śrīṃ hrīṃ aiṃ iti digbandhaḥ |

atha dhyānam |

hastadvayena kamale dhārayantīṃ svalīlayā |

hāranūpurasaṃyuktāṃ lakṣmīṃ devīṃ vicintaye ||

kauśeyapītavasanāmaravindanetrāṃ

padmadvayābhayavarodyatapadmahastām |

udyacchatārkasadṛśīṃ paramāṅkasaṃsthāṃ

dhyāyedvidhīśanatapādayugāṃ janitrīm ||

pītavastrāṃ suvarṇāṅgīṃ padmahastadvāyānvitām |

lakṣmīṃ dhyātveti mantreṇa sa bhavetpṛthivīpatiḥ ||

mātuluṅgaṃ gadāṃ kheṭaṃ pāṇau pātraṃ ca bibhratī |

nāgaṃ liṅgaṃ ca yoniṃ ca bibhratīṃ caiva mūrdhani ||

[ iti dhyātvā mānasopacāraiḥ sampūjya |

śaṅkhacakragadāhaste śubhravarṇe suvāsinī |

mama dehi varaṃ lakṣmīḥ sarvasiddhipradāyinī |

iti samprārthya oṃ śrīṃ hrīṃ aiṃ mahālakṣmyai kamaladhāriṇyai siṃhavāhinyai svāhā iti mantraṃ japtvā punaḥ pūrvavaddhṛdayādi ṣaḍaṅganyāsaṃ kṛtvā stotraṃ paṭhet | ]

stotram |

vande lakṣmīṃ paramaśivamayīṃ śuddhajāmbūnadābhāṃ

tejorūpāṃ kanakavasanāṃ sarvabhūṣojjvalāṅgīm |

bījāpūraṃ kanakakalaśaṃ hemapadmaṃ dadhānā-

-mādyāṃ śaktiṃ sakalajananīṃ viṣṇuvāmāṅkasaṃsthām || 1 ||

śrīmatsaubhāgyajananīṃ staumi lakṣmīṃ sanātanīm |

sarvakāmaphalāvāptisādhanaikasukhāvahām || 2 ||

smarāmi nityaṃ deveśi tvayā preritamānasaḥ |

tvadājñāṃ śirasā dhṛtvā bhajāmi parameśvarīm || 3 ||

samastasampatsukhadāṃ mahāśriyaṃ

samastasaubhāgyakarīṃ mahāśriyam |

samastakalyāṇakarīṃ mahāśriyaṃ

bhajāmyahaṃ jñānakarīṃ mahāśriyam || 4 ||

vijñānasampatsukhadāṃ sanātanīṃ

vicitravāgbhūtikarīṃ manoharām |

anantasammodasukhapradāyinīṃ

namāmyahaṃ bhūtikarīṃ haripriyām || 5 ||

samastabhūtāntarasaṃsthitā tvaṃ

samastabhoktrīśvari viśvarūpe |

tannāsti yattvadvyatiriktavastu

tvatpādapadmaṃ praṇamāmyahaṃ śrīḥ || 6 ||

dāridrya duḥkhaughatamopahantrī

tvatpādapadmaṃ mayi sannidhatsva |

dīnārtivicchedanahetubhūtaiḥ

kṛpākaṭākṣairabhiṣiñca māṃ śrīḥ || 7 ||

amba prasīda karuṇāsudhayārdradṛṣṭyā

māṃ tvatkṛpādraviṇagehamimaṃ kuruṣva |

ālokaya praṇatahṛdgataśokahantrī

tvatpādapadmayugalaṃ praṇamāmyahaṃ śrīḥ || 8 ||

śāntyai namo'stu śaraṇāgatarakṣaṇāyai

kāntyai namo'stu kamanīyaguṇāśrayāyai |

kṣāntyai namo'stu duritakṣayakāraṇāyai

dātryai namo'stu dhanadhānyasamṛddhidāyai || 9 ||

śaktyai namo'stu śaśiśekharasaṃstutāyai

ratyai namo'stu rajanīkarasodarāyai |

bhaktyai namo'stu bhavasāgaratārakāyai

matyai namo'stu madhusūdanavallabhāyai || 10 ||

lakṣmyai namo'stu śubhalakṣaṇalakṣitāyai

siddhyai namo'stu śivasiddhasupūjitāyai |

dhṛtyai namo'stvamitadurgatibhañjanāyai

gatyai namo'stu varasadgatidāyikāyai || 11 ||

devyai namo'stu divi devagaṇārcitāyai

bhūtyai namo'stu bhuvanārtivināśanāyai |

dhātryai namo'stu dharaṇīdharavallabhāyai

puṣṭyai namo'stu puruṣottamavallabhāyai || 12 ||

sutīvradāridryaviduḥkhahantryai

namo'stu te sarvabhayāpahantryai |

śrīviṣṇuvakṣaḥsthalasaṃsthitāyai

namo namaḥ sarvavibhūtidāyai || 13 ||

jayatu jayatu lakṣmīrlakṣaṇālaṅkṛtāṅgī

jayatu jayatu padmā padmasadmābhivandyā |

jayatu jayatu vidyā viṣṇuvāmāṅkasaṃsthā

jayatu jayatu samyaksarvasampatkarī śrīḥ || 14 ||

jayatu jayatu devī devasaṅghābhipūjyā

jayatu jayatu bhadrā bhārgavī bhāgyarūpā |

jayatu jayatu nityā nirmalajñānavedyā

jayatu jayatu satyā sarvabhūtāntarasthā || 15 ||

jayatu jayatu ramyā ratnagarbhāntarasthā

jayatu jayatu śuddhā śuddhajāmbūnadābhā |

jayatu jayatu kāntā kāntimadbhāsitāṅgī

jayatu jayatu śāntā śīghramāgaccha saumye || 16 ||

yasyāḥ kalāyāḥ kamalodbhavādyā

rudrāśca śakra pramukhāśca devāḥ |

jīvanti sarve'pi saśaktayaste

prabhutvamāptāḥ paramāyuṣaste || 17 ||

lilekha niṭile vidhirmama lipiṃ visṛjyāntaraṃ

tvayā vilikhitavyametaditi tatphalaprāptaye |

tadantaraphalesphuṭaṃ kamalavāsinī śrīrimāṃ

samarpaya samudrikāṃ sakalabhāgyasaṃsūcikām || 18 ||

kalayā te yathā devi jīvanti sacarācarāḥ |

tathā sampatkare lakṣmi sarvadā samprasīda me || 19 ||

yathā viṣṇurdhruve nityaṃ svakalāṃ sannyaveśayat |

tathaiva svakalāṃ lakṣmi mayi samyak samarpaya || 20 ||

sarvasaukhyaprade devi bhaktānāmabhayaprade |

acalāṃ kuru yatnena kalāṃ mayi niveśitām || 21 ||

mudāstāṃ matphāle paramapadalakṣmīḥ sphuṭakalā

sadā vaikuṇṭhaśrīrnivasatu kalā me nayanayoḥ |

vasetsatye loke mama vacasi lakṣmīrvarakalā

śriyaḥ śvetadvīpe nivasatu kalā me svakarayoḥ || 22 ||

tāvannityaṃ mamāṅgeṣu kṣīrābdhau śrīkalā vaset |

sūryācandramasau yāvadyāvallakṣmīpatiḥ śriyāḥ || 23 ||

sarvamaṅgalasampūrṇā sarvaiśvaryasamanvitā |

ādyādi śrīrmahālakṣmī tvatkalā mayi tiṣṭhatu || 24 ||

ajñānatimiraṃ hantuṃ śuddhajñānaprakāśikā |

sarvaiśvaryapradā me'stu tvatkalā mayi saṃsthitā || 25 ||

alakṣmīṃ haratu kṣipraṃ tamaḥ sūryaprabhā yathā |

vitanotu mama śreyastvatkalā mayi saṃsthitā || 26 ||

aiśvaryamaṅgalotpattistvatkalāyāṃ nidhīyate |

mayi tasmātkṛtārtho'smi pātramasmi sthitestava || 27 ||

bhavadāveśabhāgyārho bhāgyavānasmi bhārgavi |

tvatprasādātpavitro'haṃ lokamātarnamo'stu te || 28 ||

punāsi māṃ tvatkalayaiva yasmā-

-dataḥ samāgaccha mamāgratastvam |

paraṃ padaṃ śrīrbhava suprasannā

mayyacyutena praviśādilakṣmīḥ || 29 ||

śrīvaikuṇṭhasthite lakṣmi samāgaccha mamāgrataḥ |

nārāyaṇena saha māṃ kṛpādṛṣṭyā'valokaya || 30 ||

satyalokasthite lakṣmi tvaṃ mamāgaccha sannidhim |

vāsudevena sahitā prasīda varadā bhava || 31 ||

śvetadvīpasthite lakṣmi śīghramāgaccha suvrate |

viṣṇunā sahite devi jaganmātaḥ prasīda me || 32 ||

kṣīrāmbudhisthite lakṣmi samāgaccha samādhavā |

tvatkṛpādṛṣṭisudhayā satataṃ māṃ vilokaya || 33 ||

ratnagarbhasthite lakṣmi paripūrṇe hiraṇmaye |

samāgaccha samāgaccha sthitvā''śu purato mama || 34 ||

sthirā bhava mahālakṣmi niścalā bhava nirmale |

prasanne kamale devi prasannahṛdayā bhava || 35 ||

śrīdhare śrīmahābhūte tvadantaḥsthaṃ mahānidhim |

śīghramuddhṛtya purataḥ pradarśaya samarpaya || 36 ||

vasundhare śrīvasudhe vasudogdhri kṛpāmaye |

tvatkukṣigatasarvasvaṃ śīghraṃ me sampradarśaya || 37 ||

viṣṇupriye ratnagarbhe samastaphalade śive |

tvadgarbhagatahemādīn sampradarśaya darśaya || 38 ||

rasātalagate lakṣmi śīghramāgaccha me puraḥ |

na jāne paramaṃ rūpaṃ mātarme sampradarśaya || 39 ||

āvirbhava manovegācchīghramāgaccha me puraḥ |

mā vatsa bhairihetyuktvā kāmaṃ gauriva rakṣa mām || 40 ||

devi śīghraṃ samāgaccha dharaṇīgarbhasaṃsthite |

mātastvadbhṛtyabhṛtyo'haṃ mṛgaye tvāṃ kutūhalāt || 41 ||

uttiṣṭha jāgṛhi tvaṃ me samuttiṣṭha sujāgṛhi |

akṣayān hemakalaśān suvarṇena supūritān || 42 ||

nikṣepānme samākṛṣya samuddhṛtya mamāgrataḥ |

samunnatānanā bhūtvā samādhehi dharāntarāt || 43 ||

matsannidhiṃ samāgaccha madāhitakṛpārasāt |

prasīda śreyasāṃ dogdhrī lakṣmīrme nayanāgrataḥ || 44 ||

atropaviśa lakṣmi tvaṃ sthirā bhava hiraṇmaye |

susthirā bhava samprītyā prasīda varadā bhava || 45 ||

ānītāṃstu tathā devi nidhīnme sampradarśaya |

adya kṣaṇena sahasā dattvā saṃrakṣa māṃ sadā || 46 ||

mayi tiṣṭha tathā nityaṃ yathendrādiṣu tiṣṭhasi |

abhayaṃ kuru me devi mahālakṣmīrnamo'stu te || 47 ||

samāgaccha mahālakṣmi śuddhajāmbūnadaprabhe |

prasīda purataḥ sthitvā praṇataṃ māṃ vilokaya || 48 ||

lakṣmīrbhuvaṃ gatā bhāsi yatra yatra hiraṇmayī |

tatra tatra sthitā tvaṃ me tava rūpaṃ pradarśaya || 49 ||

krīḍantī bahudhā bhūmau paripūrṇakṛpāmayi |

mama mūrdhani te hastamavilambitamarpaya || 50 ||

phaladbhāgyodaye lakṣmi samastapuravāsinī |

prasīda me mahālakṣmi paripūrṇamanorathe || 51 ||

ayodhyādiṣu sarveṣu nagareṣu samāsthite |

vaibhavairvividhairyuktaiḥ samāgaccha mudānvite || 52 ||

samāgaccha samāgaccha mamāgre bhava susthirā |

karuṇārasaniṣyandanetradvaya vilāsinī || 53 || [niṣpanna]

sannidhatsva mahālakṣmi tvatpāṇiṃ mama mastake |

karuṇāsudhayā māṃ tvamabhiṣiñcya sthiraṃ kuru || 54 ||

sarvarājagṛhe lakṣmi samāgaccha balānvite | [mudānvite]

sthitvā''śu purato me'dya prasādenā'bhayaṃ kuru || 55 ||

sādaraṃ mastake hastaṃ mama tvaṃ kṛpayārpaya |

sarvarājagṛhe lakṣmi tvatkalā mayi tiṣṭhatu || 56 ||

ādyādi śrīmahālakṣmi viṣṇuvāmāṅkasaṃsthite |

pratyakṣaṃ kuru me rūpaṃ rakṣa māṃ śaraṇāgatam || 57 ||

prasīda me mahālakṣmi suprasīda mahāśive |

acalā bhava samprītyā susthirā bhava madgṛhe || 58 ||

yāvattiṣṭhanti vedāśca yāvaccandradivākarau |

yāvadviṣṇuśca yāvattvaṃ tāvatkuru kṛpāṃ mayi || 59 ||

cāndrīkalā yathā śukle vardhate sā dine dine |

tathā dayā te mayyeva vardhatāmabhivardhatām || 60 ||

yathā vaikuṇṭhanagare yathā vai kṣīrasāgare |

tathā madbhavane tiṣṭha sthiraṃ śrīviṣṇunā saha || 61 ||

yogināṃ hṛdaye nityaṃ yathā tiṣṭhasi viṣṇunā |

tathā madbhavane tiṣṭha sthiraṃ śrīviṣṇunā saha || 62 ||

nārāyaṇasya hṛdaye bhavatī yathāste

nārāyaṇo'pi tava hṛtkamale yathāste |

nārāyaṇastvamapi nityamubhau tathaiva

tau tiṣṭhatāṃ hṛdi mamāpi dayānvitau śrīḥ || 63 ||

vijñānavṛddhiṃ hṛdaye kuru śrīḥ

saubhāgyavṛddhiṃ kuru me gṛhe śrīḥ |

dayāsuvṛddhiṃ kurutāṃ mayi śrīḥ

suvarṇavṛddhiṃ kuru me gṛhe śrīḥ || 64 ||

na māṃ tyajethāḥ śritakalpavalli

sadbhaktacintāmaṇikāmadheno |

viśvasya mātarbhava suprasannā

gṛhe kalatreṣu ca putravarge || 65 ||

ādyādimāye tvamajāṇḍabījaṃ

tvameva sākāranirākṛtistvam |

tvayā dhṛtāścābjabhavāṇḍasaṅghā-

-ścitraṃ caritraṃ tava devi viṣṇoḥ || 66 ||

brahmarudrādayo devā vedāścāpi na śaknuyuḥ |

mahimānaṃ tava stotuṃ mando'haṃ śaknuyāṃ katham || 67 ||

amba tvadvatsavākyāni sūktāsūktāni yāni ca |

tāni svīkuru sarvajñe dayālutvena sādaram || 68 ||

bhavatīṃ śaraṇaṃ gatvā kṛtārthāḥ syuḥ purātanāḥ |

iti sañcintya manasā tvāmahaṃ śaraṇaṃ vraje || 69 ||

anantā nityasukhinastvadbhaktāstvatparāyaṇāḥ |

iti vedapramāṇāddhi devi tvāṃ śaraṇaṃ vraje || 70 ||

tava pratijñā madbhaktā na naśyantītyapi kvacit |

iti sañcintya sañcintya prāṇān sandhārayāmyaham || 71 ||

tvadadhīnastvahaṃ mātastvatkṛpā mayi vidyate |

yāvatsampūrṇakāmaḥ syāttāvaddehi dayānidhe || 72 ||

kṣaṇamātraṃ na śaknomi jīvituṃ tvatkṛpāṃ vinā |

na jīvantīha jalajā jalaṃ tyaktvā jalagrahāḥ || 73 ||

yathā hi putravātsalyājjananī prasnutastanī |

vatsaṃ tvaritamāgatya samprīṇayati vatsalā || 74 ||

yadi syāṃ tava putro'haṃ mātā tvaṃ yadi māmakī |

dayāpayodharastanyasudhābhirabhiṣiñca mām || 75 ||

mṛgyo na guṇaleśo'pi mayi doṣaikamandire |

pāṃsūnāṃ vṛṣṭibindūnāṃ doṣāṇāṃ ca na me matiḥ || 76 ||

pāpināmahamevāgryo dayālūnāṃ tvamagraṇīḥ |

dayanīyo madanyo'sti tava ko'tra jagattraye || 77 ||

vidhināhaṃ na sṛṣṭaścenna syāttava dayālutā |

āmayo vā na sṛṣṭaścedauṣadhasya vṛthodayaḥ || 78 ||

kṛpā madagrajā kiṃ te ahaṃ kiṃ vā tadagrajaḥ |

vicārya dehi me vittaṃ tava devi dayānidhe || 79 ||

mātā pitā tvaṃ gurusadgatiḥ śrī-

-stvameva sañjīvanahetubhūtā |

anyaṃ na manye jagadekanāthe

tvameva sarvaṃ mama devi satye || 80 ||

ādyādilakṣmīrbhava suprasannā

viśuddhavijñānasukhaikadogdhrī |

ajñānahantrī triguṇātiriktā

prajñānanetrī bhava suprasannā || 81 ||

aśeṣavāgjāḍyamalāpahantrī

navaṃ navaṃ spaṣṭasuvākpradāyinī |

mameha jihvāgra suraṅganartakī [nartinī]

bhava prasannā vadane ca me śrīḥ || 82 ||

samastasampatsuvirājamānā

samastatejaścayabhāsamānā |

viṣṇupriye tvaṃ bhava dīpyamānā

vāgdevatā me nayane prasannā || 83 ||

sarvapradarśe sakalārthade tvaṃ

prabhāsulāvaṇyadayāpradogdhrī |

suvarṇade tvaṃ sumukhī bhava śrī-

-rhiraṇmayī me nayane prasannā || 84 ||

sarvārthadā sarvajagatprasūtiḥ

sarveśvarī sarvabhayāpahantrī |

sarvonnatā tvaṃ sumukhī bhava śrī-

-rhiraṇmayī me nayane prasannā || 85 ||

samastavighnaughavināśakāriṇī

samastabhaktoddharaṇe vicakṣaṇā |

anantasaubhāgyasukhapradāyinī

hiraṇmayī me nayane prasannā || 86 ||

devi prasīda dayanīyatamāya mahyaṃ

devādhināthabhavadevagaṇābhivandye |

mātastathaiva bhava sannihitā dṛśorme

patyā samaṃ mama mukhe bhava suprasannā || 87 ||

mā vatsa bhairabhayadānakaro'rpitaste

maulau mameti mayi dīnadayānukampe |

mātaḥ samarpaya mudā karuṇākaṭākṣaṃ

māṅgalyabījamiha naḥ sṛja janma mātaḥ || 88 ||

kaṭākṣa iha kāmadhuktava manastu cintāmaṇiḥ

karaḥ surataruḥ sadā navanidhistvamevendire |

bhave tava dayāraso mama rasāyanaṃ cānvahaṃ

mukhaṃ tava kalānidhirvividhavāñchitārthapradam || 89 ||

yathā rasasparśanato'yaso'pi

suvarṇatā syātkamale tathā te |

kaṭākṣasaṃsparśanato janānā-

-mamaṅgalānāmapi maṅgalatvam || 90 ||

dehīti nāstīti vacaḥ praveśā-

-dbhīto rame tvāṃ śaraṇaṃ prapadye |

ataḥ sadā'sminnabhayapradā tvaṃ

sahaiva patyā mayi sannidhehi || 91 ||

kalpadrumeṇa maṇinā sahitā suramyā

śrīste kalā mayi rasena rasāyanena |

āstāṃ yato mama śiraḥkaradṛṣṭipāda-

-spṛṣṭāḥ suvarṇavapuṣaḥ sthirajaṅgamāḥ syuḥ || 92 ||

ādyādiviṣṇoḥ sthiradharmapatnī

tvameva patyā mayi sannidhehi |

ādyādilakṣmi tvadanugraheṇa

pade pade me nidhidarśanaṃ syāt || 93 ||

ādyādilakṣmīhṛdayaṃ paṭhedyaḥ

sa rājyalakṣmīmacalāṃ tanoti |

mahādaridro'pi bhaveddhanāḍhya-

-stadanvaye śrīḥ sthiratāṃ prayāti || 94 ||

yasya smaraṇamātreṇa tuṣṭā syādviṣṇuvallabhā |

tasyābhīṣṭaṃ dadatyāśu taṃ pālayati putravat || 95 ||

idaṃ rahasyaṃ hṛdayaṃ sarvakāmaphalapradam |

japaḥ pañcasahasraṃ tu puraścaraṇamucyate || 96 ||

trikālamekakālaṃ vā naro bhaktisamanvitaḥ |

yaḥ paṭhecchṛṇuyādvāpi sa yāti paramāṃ śriyam || 97 ||

mahālakṣmīṃ samuddiśya niśi bhārgavavāsare |

idaṃ śrīhṛdayaṃ japtvā pañcavāraṃ dhanī bhavet || 98 ||

anena hṛdayenānnaṃ garbhiṇyā abhimantritam |

dadāti tatkule putro jāyate śrīpatiḥ svayam || 99 ||

nareṇa vā'thavā nāryā lakṣmīhṛdayamantrite |

jale pīte ca tadvaṃśe mandabhāgyo na jāyate || 100 ||

ya āśvine māsi ca śuklapakṣe

ramotsave sannihite subhaktyā |

paṭhettathaikottaravāravṛddhyā

labhetsa sauvarṇamayīṃ suvṛṣṭim || 101 ||

ya ekabhakto'nvahamekavarṣaṃ

viśuddhadhīḥ saptativārajāpī |

sa mandabhāgyo'pi ramākaṭākṣā-

-dbhavetsahasrākṣaśatādhikaśrīḥ || 102 ||

śrīśāṅghribhaktiṃ haridāsadāsyaṃ

prasannamantrārthadṛḍhaikaniṣṭhām |

guroḥ smṛtiṃ nirmalabodhabuddhiṃ

pradehi mātaḥ paramaṃ padaṃ śrīḥ || 103 ||

pṛthvīpatitvaṃ puruṣottamatvaṃ

vibhūtivāsaṃ vividhārthasiddhim |

sampūrṇakīrtiṃ bahuvarṣabhogaṃ

pradehi me lakṣmi punaḥ punastvam || 104 ||

vādārthasiddhiṃ bahulokavaśyaṃ

vayaḥ sthiratvaṃ lalanāsubhogam |

pautrādilabdhiṃ sakalārthasiddhiṃ

pradehi me bhārgavi janmajanmani || 105 ||

suvarṇavṛddhiṃ kuru me gṛhe śrīḥ

sudhānyavṛddhiṃ kurū me gṛhe śrīḥ |

kalyāṇavṛddhiṃ kuru me gṛhe śrīḥ

vibhūtivṛddhiṃ kuru me gṛhe śrīḥ || 106 ||

dhyāyellakṣmīṃ prahasitamukhīṃ koṭibālārkabhāsāṃ

vidyudvarṇāmbaravaradharāṃ bhūṣaṇāḍhyāṃ suśobhām |

bījāpūraṃ sarasijayugaṃ bibhratīṃ svarṇapātraṃ

bhartrāyuktāṃ muhurabhayadāṃ mahyamapyacyutaśrīḥ || 107 ||

guhyātiguhyagoptrī tvaṃ gṛhāṇāsmatkṛtaṃ japam |

siddhirbhavatu me devi tvatprasādānmayi sthitā || 108 ||

iti śrīatharvaṇarahasye śrīlakṣmīhṛdayastotraṃ sampūrṇam ||