శ్రీ లక్ష్మీ హృదయ స్తోత్రమ్

శ్రీ లక్ష్మీ హృదయ స్తోత్రమ్

శ్లోక 1

అస్య శ్రీ మహాలక్ష్మీహృదయస్తోత్ర మహామన్త్రస్య భార్గవ ఋషిః, అనుష్టుపాదీని నానాఛన్దాంసి, ఆద్యాది శ్రీమహాలక్ష్మీర్దేవతా, శ్రీం బీజం, హ్రీం శక్తిః, ఐం కీలకం, ఆద్యాదిమహాలక్ష్మీ ప్రసాదసిద్ధ్యర్థం జపే వినియోగః ॥

ఋష్యాదిన్యాసః –

ఓం భార్గవృషయే నమః శిరసి ।

ఓం అనుష్టుపాదినానాఛన్దోభ్యో నమో ముఖే ।

ఓం ఆద్యాదిశ్రీమహాలక్ష్మీ దేవతాయై నమో హృదయే ।

ఓం శ్రీం బీజాయ నమో గుహ్యే ।

ఓం హ్రీం శక్తయే నమః పాదయోః ।

ఓం ఐం కీలకాయ నమో నాభౌ ।

ఓం వినియోగాయ నమః సర్వాఙ్గే ।

కరన్యాసః –

ఓం శ్రీం అఙ్గుష్ఠాభ్యాం నమః ।

ఓం హ్రీం తర్జనీభ్యాం నమః ।

ఓం ఐం మధ్యమాభ్యాం నమః ।

ఓం శ్రీం అనామికాభ్యాం నమః ।

ఓం హ్రీం కనిష్ఠికాభ్యాం నమః ।

ఓం ఐం కరతల కరపృష్ఠాభ్యాం నమః ।

అఙ్గన్యాసః –

ఓం శ్రీం హృదయాయ నమః ।

ఓం హ్రీం శిరసే స్వాహా ।

ఓం ఐం శిఖాయై వషట్ ।

ఓం శ్రీం కవచాయ హుమ్ ।

ఓం హ్రీం నేత్రత్రయాయ వౌషట్ ।

ఓం ఐం అస్త్రాయ ఫట్ ।

ఓం శ్రీం హ్రీం ఐం ఇతి దిగ్బన్ధః ।

అథ ధ్యానమ్ ।

హస్తద్వయేన కమలే ధారయన్తీం స్వలీలయా ।

హారనూపురసంయుక్తాం లక్ష్మీం దేవీం విచిన్తయే ॥

కౌశేయపీతవసనామరవిన్దనేత్రాం

పద్మద్వయాభయవరోద్యతపద్మహస్తామ్ ।

ఉద్యచ్ఛతార్కసదృశీం పరమాఙ్కసంస్థాం

ధ్యాయేద్విధీశనతపాదయుగాం జనిత్రీమ్ ॥

పీతవస్త్రాం సువర్ణాఙ్గీం పద్మహస్తద్వాయాన్వితామ్ ।

లక్ష్మీం ధ్యాత్వేతి మన్త్రేణ స భవేత్పృథివీపతిః ॥

మాతులుఙ్గం గదాం ఖేటం పాణౌ పాత్రం చ బిభ్రతీ ।

నాగం లిఙ్గం చ యోనిం చ బిభ్రతీం చైవ మూర్ధని ॥

[ ఇతి ధ్యాత్వా మానసోపచారైః సమ్పూజ్య ।

శఙ్ఖచక్రగదాహస్తే శుభ్రవర్ణే సువాసినీ ।

మమ దేహి వరం లక్ష్మీః సర్వసిద్ధిప్రదాయినీ ।

ఇతి సమ్ప్రార్థ్య ఓం శ్రీం హ్రీం ఐం మహాలక్ష్మ్యై కమలధారిణ్యై సింహవాహిన్యై స్వాహా ఇతి మన్త్రం జప్త్వా పునః పూర్వవద్ధృదయాది షడఙ్గన్యాసం కృత్వా స్తోత్రం పఠేత్ । ]

స్తోత్రమ్ ।

వన్దే లక్ష్మీం పరమశివమయీం శుద్ధజామ్బూనదాభాం

తేజోరూపాం కనకవసనాం సర్వభూషోజ్జ్వలాఙ్గీమ్ ।

బీజాపూరం కనకకలశం హేమపద్మం దధానా-

-మాద్యాం శక్తిం సకలజననీం విష్ణువామాఙ్కసంస్థామ్

శ్లోక 2

శ్రీమత్సౌభాగ్యజననీం స్తౌమి లక్ష్మీం సనాతనీమ్ ।

సర్వకామఫలావాప్తిసాధనైకసుఖావహామ్

॥ 1 ॥

శ్లోక 3

స్మరామి నిత్యం దేవేశి త్వయా ప్రేరితమానసః ।

త్వదాజ్ఞాం శిరసా ధృత్వా భజామి పరమేశ్వరీమ్

॥ 2 ॥

శ్లోక 4

సమస్తసమ్పత్సుఖదాం మహాశ్రియం

సమస్తసౌభాగ్యకరీం మహాశ్రియమ్ ।

సమస్తకల్యాణకరీం మహాశ్రియం

భజామ్యహం జ్ఞానకరీం మహాశ్రియమ్

॥ 3 ॥

శ్లోక 5

విజ్ఞానసమ్పత్సుఖదాం సనాతనీం

విచిత్రవాగ్భూతికరీం మనోహరామ్ ।

అనన్తసమ్మోదసుఖప్రదాయినీం

నమామ్యహం భూతికరీం హరిప్రియామ్

॥ 4 ॥

శ్లోక 6

సమస్తభూతాన్తరసంస్థితా త్వం

సమస్తభోక్త్రీశ్వరి విశ్వరూపే ।

తన్నాస్తి యత్త్వద్వ్యతిరిక్తవస్తు

త్వత్పాదపద్మం ప్రణమామ్యహం శ్రీః

॥ 5 ॥

శ్లోక 7

దారిద్ర్య దుఃఖౌఘతమోపహన్త్రీ

త్వత్పాదపద్మం మయి సన్నిధత్స్వ ।

దీనార్తివిచ్ఛేదనహేతుభూతైః

కృపాకటాక్షైరభిషిఞ్చ మాం శ్రీః

॥ 6 ॥

శ్లోక 8

అమ్బ ప్రసీద కరుణాసుధయార్ద్రదృష్ట్యా

మాం త్వత్కృపాద్రవిణగేహమిమం కురుష్వ ।

ఆలోకయ ప్రణతహృద్గతశోకహన్త్రీ

త్వత్పాదపద్మయుగలం ప్రణమామ్యహం శ్రీః

॥ 7 ॥

శ్లోక 9

శాన్త్యై నమోఽస్తు శరణాగతరక్షణాయై

కాన్త్యై నమోఽస్తు కమనీయగుణాశ్రయాయై ।

క్షాన్త్యై నమోఽస్తు దురితక్షయకారణాయై

దాత్ర్యై నమోఽస్తు ధనధాన్యసమృద్ధిదాయై

॥ 8 ॥

శ్లోక 10

శక్త్యై నమోఽస్తు శశిశేఖరసంస్తుతాయై

రత్యై నమోఽస్తు రజనీకరసోదరాయై ।

భక్త్యై నమోఽస్తు భవసాగరతారకాయై

మత్యై నమోఽస్తు మధుసూదనవల్లభాయై

॥ 9 ॥

శ్లోక 11

లక్ష్మ్యై నమోఽస్తు శుభలక్షణలక్షితాయై

సిద్ధ్యై నమోఽస్తు శివసిద్ధసుపూజితాయై ।

ధృత్యై నమోఽస్త్వమితదుర్గతిభఞ్జనాయై

గత్యై నమోఽస్తు వరసద్గతిదాయికాయై

॥ 10 ॥

శ్లోక 12

దేవ్యై నమోఽస్తు దివి దేవగణార్చితాయై

భూత్యై నమోఽస్తు భువనార్తివినాశనాయై ।

ధాత్ర్యై నమోఽస్తు ధరణీధరవల్లభాయై

పుష్ట్యై నమోఽస్తు పురుషోత్తమవల్లభాయై

॥ 11 ॥

శ్లోక 13

సుతీవ్రదారిద్ర్యవిదుఃఖహన్త్ర్యై

నమోఽస్తు తే సర్వభయాపహన్త్ర్యై ।

శ్రీవిష్ణువక్షఃస్థలసంస్థితాయై

నమో నమః సర్వవిభూతిదాయై

॥ 12 ॥

శ్లోక 14

జయతు జయతు లక్ష్మీర్లక్షణాలఙ్కృతాఙ్గీ

జయతు జయతు పద్మా పద్మసద్మాభివన్ద్యా ।

జయతు జయతు విద్యా విష్ణువామాఙ్కసంస్థా

జయతు జయతు సమ్యక్సర్వసమ్పత్కరీ శ్రీః

॥ 13 ॥

శ్లోక 15

జయతు జయతు దేవీ దేవసఙ్ఘాభిపూజ్యా

జయతు జయతు భద్రా భార్గవీ భాగ్యరూపా ।

జయతు జయతు నిత్యా నిర్మలజ్ఞానవేద్యా

జయతు జయతు సత్యా సర్వభూతాన్తరస్థా

॥ 14 ॥

శ్లోక 16

జయతు జయతు రమ్యా రత్నగర్భాన్తరస్థా

జయతు జయతు శుద్ధా శుద్ధజామ్బూనదాభా ।

జయతు జయతు కాన్తా కాన్తిమద్భాసితాఙ్గీ

జయతు జయతు శాన్తా శీఘ్రమాగచ్ఛ సౌమ్యే

॥ 15 ॥

శ్లోక 17

యస్యాః కలాయాః కమలోద్భవాద్యా

రుద్రాశ్చ శక్ర ప్రముఖాశ్చ దేవాః ।

జీవన్తి సర్వేఽపి సశక్తయస్తే

ప్రభుత్వమాప్తాః పరమాయుషస్తే

॥ 16 ॥

శ్లోక 18

లిలేఖ నిటిలే విధిర్మమ లిపిం విసృజ్యాన్తరం

త్వయా విలిఖితవ్యమేతదితి తత్ఫలప్రాప్తయే ।

తదన్తరఫలేస్ఫుటం కమలవాసినీ శ్రీరిమాం

సమర్పయ సముద్రికాం సకలభాగ్యసంసూచికామ్

॥ 17 ॥

శ్లోక 19

కలయా తే యథా దేవి జీవన్తి సచరాచరాః ।

తథా సమ్పత్కరే లక్ష్మి సర్వదా సమ్ప్రసీద మే

॥ 18 ॥

శ్లోక 20

యథా విష్ణుర్ధ్రువే నిత్యం స్వకలాం సన్న్యవేశయత్ ।

తథైవ స్వకలాం లక్ష్మి మయి సమ్యక్ సమర్పయ

॥ 19 ॥

శ్లోక 21

సర్వసౌఖ్యప్రదే దేవి భక్తానామభయప్రదే ।

అచలాం కురు యత్నేన కలాం మయి నివేశితామ్

॥ 20 ॥

శ్లోక 22

ముదాస్తాం మత్ఫాలే పరమపదలక్ష్మీః స్ఫుటకలా

సదా వైకుణ్ఠశ్రీర్నివసతు కలా మే నయనయోః ।

వసేత్సత్యే లోకే మమ వచసి లక్ష్మీర్వరకలా

శ్రియః శ్వేతద్వీపే నివసతు కలా మే స్వకరయోః

॥ 21 ॥

శ్లోక 23

తావన్నిత్యం మమాఙ్గేషు క్షీరాబ్ధౌ శ్రీకలా వసేత్ ।

సూర్యాచన్ద్రమసౌ యావద్యావల్లక్ష్మీపతిః శ్రియాః

॥ 22 ॥

శ్లోక 24

సర్వమఙ్గలసమ్పూర్ణా సర్వైశ్వర్యసమన్వితా ।

ఆద్యాది శ్రీర్మహాలక్ష్మీ త్వత్కలా మయి తిష్ఠతు

॥ 23 ॥

శ్లోక 25

అజ్ఞానతిమిరం హన్తుం శుద్ధజ్ఞానప్రకాశికా ।

సర్వైశ్వర్యప్రదా మేఽస్తు త్వత్కలా మయి సంస్థితా

॥ 24 ॥

శ్లోక 26

అలక్ష్మీం హరతు క్షిప్రం తమః సూర్యప్రభా యథా ।

వితనోతు మమ శ్రేయస్త్వత్కలా మయి సంస్థితా

॥ 25 ॥

శ్లోక 27

ఐశ్వర్యమఙ్గలోత్పత్తిస్త్వత్కలాయాం నిధీయతే ।

మయి తస్మాత్కృతార్థోఽస్మి పాత్రమస్మి స్థితేస్తవ

॥ 26 ॥

శ్లోక 28

భవదావేశభాగ్యార్హో భాగ్యవానస్మి భార్గవి ।

త్వత్ప్రసాదాత్పవిత్రోఽహం లోకమాతర్నమోఽస్తు తే

॥ 27 ॥

శ్లోక 29

పునాసి మాం త్వత్కలయైవ యస్మా-

-దతః సమాగచ్ఛ మమాగ్రతస్త్వమ్ ।

పరం పదం శ్రీర్భవ సుప్రసన్నా

మయ్యచ్యుతేన ప్రవిశాదిలక్ష్మీః

॥ 28 ॥

శ్లోక 30

శ్రీవైకుణ్ఠస్థితే లక్ష్మి సమాగచ్ఛ మమాగ్రతః ।

నారాయణేన సహ మాం కృపాదృష్ట్యాఽవలోకయ

॥ 29 ॥

శ్లోక 31

సత్యలోకస్థితే లక్ష్మి త్వం మమాగచ్ఛ సన్నిధిమ్ ।

వాసుదేవేన సహితా ప్రసీద వరదా భవ

॥ 30 ॥

శ్లోక 32

శ్వేతద్వీపస్థితే లక్ష్మి శీఘ్రమాగచ్ఛ సువ్రతే ।

విష్ణునా సహితే దేవి జగన్మాతః ప్రసీద మే

॥ 31 ॥

శ్లోక 33

క్షీరామ్బుధిస్థితే లక్ష్మి సమాగచ్ఛ సమాధవా ।

త్వత్కృపాదృష్టిసుధయా సతతం మాం విలోకయ

॥ 32 ॥

శ్లోక 34

రత్నగర్భస్థితే లక్ష్మి పరిపూర్ణే హిరణ్మయే ।

సమాగచ్ఛ సమాగచ్ఛ స్థిత్వాఽఽశు పురతో మమ

॥ 33 ॥

శ్లోక 35

స్థిరా భవ మహాలక్ష్మి నిశ్చలా భవ నిర్మలే ।

ప్రసన్నే కమలే దేవి ప్రసన్నహృదయా భవ

॥ 34 ॥

శ్లోక 36

శ్రీధరే శ్రీమహాభూతే త్వదన్తఃస్థం మహానిధిమ్ ।

శీఘ్రముద్ధృత్య పురతః ప్రదర్శయ సమర్పయ

॥ 35 ॥

శ్లోక 37

వసున్ధరే శ్రీవసుధే వసుదోగ్ధ్రి కృపామయే ।

త్వత్కుక్షిగతసర్వస్వం శీఘ్రం మే సమ్ప్రదర్శయ

॥ 36 ॥

శ్లోక 38

విష్ణుప్రియే రత్నగర్భే సమస్తఫలదే శివే ।

త్వద్గర్భగతహేమాదీన్ సమ్ప్రదర్శయ దర్శయ

॥ 37 ॥

శ్లోక 39

రసాతలగతే లక్ష్మి శీఘ్రమాగచ్ఛ మే పురః ।

న జానే పరమం రూపం మాతర్మే సమ్ప్రదర్శయ

॥ 38 ॥

శ్లోక 40

ఆవిర్భవ మనోవేగాచ్ఛీఘ్రమాగచ్ఛ మే పురః ।

మా వత్స భైరిహేత్యుక్త్వా కామం గౌరివ రక్ష మామ్

॥ 39 ॥

శ్లోక 41

దేవి శీఘ్రం సమాగచ్ఛ ధరణీగర్భసంస్థితే ।

మాతస్త్వద్భృత్యభృత్యోఽహం మృగయే త్వాం కుతూహలాత్

॥ 40 ॥

శ్లోక 42

ఉత్తిష్ఠ జాగృహి త్వం మే సముత్తిష్ఠ సుజాగృహి ।

అక్షయాన్ హేమకలశాన్ సువర్ణేన సుపూరితాన్

॥ 41 ॥

శ్లోక 43

నిక్షేపాన్మే సమాకృష్య సముద్ధృత్య మమాగ్రతః ।

సమున్నతాననా భూత్వా సమాధేహి ధరాన్తరాత్

॥ 42 ॥

శ్లోక 44

మత్సన్నిధిం సమాగచ్ఛ మదాహితకృపారసాత్ ।

ప్రసీద శ్రేయసాం దోగ్ధ్రీ లక్ష్మీర్మే నయనాగ్రతః

॥ 43 ॥

శ్లోక 45

అత్రోపవిశ లక్ష్మి త్వం స్థిరా భవ హిరణ్మయే ।

సుస్థిరా భవ సమ్ప్రీత్యా ప్రసీద వరదా భవ

॥ 44 ॥

శ్లోక 46

ఆనీతాంస్తు తథా దేవి నిధీన్మే సమ్ప్రదర్శయ ।

అద్య క్షణేన సహసా దత్త్వా సంరక్ష మాం సదా

॥ 45 ॥

శ్లోక 47

మయి తిష్ఠ తథా నిత్యం యథేన్ద్రాదిషు తిష్ఠసి ।

అభయం కురు మే దేవి మహాలక్ష్మీర్నమోఽస్తు తే

॥ 46 ॥

శ్లోక 48

సమాగచ్ఛ మహాలక్ష్మి శుద్ధజామ్బూనదప్రభే ।

ప్రసీద పురతః స్థిత్వా ప్రణతం మాం విలోకయ

॥ 47 ॥

శ్లోక 49

లక్ష్మీర్భువం గతా భాసి యత్ర యత్ర హిరణ్మయీ ।

తత్ర తత్ర స్థితా త్వం మే తవ రూపం ప్రదర్శయ

॥ 48 ॥

శ్లోక 50

క్రీడన్తీ బహుధా భూమౌ పరిపూర్ణకృపామయి ।

మమ మూర్ధని తే హస్తమవిలమ్బితమర్పయ

॥ 49 ॥

శ్లోక 51

ఫలద్భాగ్యోదయే లక్ష్మి సమస్తపురవాసినీ ।

ప్రసీద మే మహాలక్ష్మి పరిపూర్ణమనోరథే

॥ 50 ॥

శ్లోక 52

అయోధ్యాదిషు సర్వేషు నగరేషు సమాస్థితే ।

వైభవైర్వివిధైర్యుక్తైః సమాగచ్ఛ ముదాన్వితే

॥ 51 ॥

శ్లోక 53

సమాగచ్ఛ సమాగచ్ఛ మమాగ్రే భవ సుస్థిరా ।

కరుణారసనిష్యన్దనేత్రద్వయ విలాసినీ

॥ 52 ॥

శ్లోక 54

॥ 53 ॥ [నిష్పన్న]

సన్నిధత్స్వ మహాలక్ష్మి త్వత్పాణిం మమ మస్తకే ।

కరుణాసుధయా మాం త్వమభిషిఞ్చ్య స్థిరం కురు

శ్లోక 55

సర్వరాజగృహే లక్ష్మి సమాగచ్ఛ బలాన్వితే । [ముదాన్వితే]

స్థిత్వాఽఽశు పురతో మేఽద్య ప్రసాదేనాఽభయం కురు

॥ 54 ॥

శ్లోక 56

సాదరం మస్తకే హస్తం మమ త్వం కృపయార్పయ ।

సర్వరాజగృహే లక్ష్మి త్వత్కలా మయి తిష్ఠతు

॥ 55 ॥

శ్లోక 57

ఆద్యాది శ్రీమహాలక్ష్మి విష్ణువామాఙ్కసంస్థితే ।

ప్రత్యక్షం కురు మే రూపం రక్ష మాం శరణాగతమ్

॥ 56 ॥

శ్లోక 58

ప్రసీద మే మహాలక్ష్మి సుప్రసీద మహాశివే ।

అచలా భవ సమ్ప్రీత్యా సుస్థిరా భవ మద్గృహే

॥ 57 ॥

శ్లోక 59

యావత్తిష్ఠన్తి వేదాశ్చ యావచ్చన్ద్రదివాకరౌ ।

యావద్విష్ణుశ్చ యావత్త్వం తావత్కురు కృపాం మయి

॥ 58 ॥

శ్లోక 60

చాన్ద్రీకలా యథా శుక్లే వర్ధతే సా దినే దినే ।

తథా దయా తే మయ్యేవ వర్ధతామభివర్ధతామ్

॥ 59 ॥

శ్లోక 61

యథా వైకుణ్ఠనగరే యథా వై క్షీరసాగరే ।

తథా మద్భవనే తిష్ఠ స్థిరం శ్రీవిష్ణునా సహ

॥ 60 ॥

శ్లోక 62

యోగినాం హృదయే నిత్యం యథా తిష్ఠసి విష్ణునా ।

తథా మద్భవనే తిష్ఠ స్థిరం శ్రీవిష్ణునా సహ

॥ 61 ॥

శ్లోక 63

నారాయణస్య హృదయే భవతీ యథాస్తే

నారాయణోఽపి తవ హృత్కమలే యథాస్తే ।

నారాయణస్త్వమపి నిత్యముభౌ తథైవ

తౌ తిష్ఠతాం హృది మమాపి దయాన్వితౌ శ్రీః

॥ 62 ॥

శ్లోక 64

విజ్ఞానవృద్ధిం హృదయే కురు శ్రీః

సౌభాగ్యవృద్ధిం కురు మే గృహే శ్రీః ।

దయాసువృద్ధిం కురుతాం మయి శ్రీః

సువర్ణవృద్ధిం కురు మే గృహే శ్రీః

॥ 63 ॥

శ్లోక 65

న మాం త్యజేథాః శ్రితకల్పవల్లి

సద్భక్తచిన్తామణికామధేనో ।

విశ్వస్య మాతర్భవ సుప్రసన్నా

గృహే కలత్రేషు చ పుత్రవర్గే

॥ 64 ॥

శ్లోక 66

ఆద్యాదిమాయే త్వమజాణ్డబీజం

త్వమేవ సాకారనిరాకృతిస్త్వమ్ ।

త్వయా ధృతాశ్చాబ్జభవాణ్డసఙ్ఘా-

-శ్చిత్రం చరిత్రం తవ దేవి విష్ణోః

॥ 65 ॥

శ్లోక 67

బ్రహ్మరుద్రాదయో దేవా వేదాశ్చాపి న శక్నుయుః ।

మహిమానం తవ స్తోతుం మన్దోఽహం శక్నుయాం కథమ్

॥ 66 ॥

శ్లోక 68

అమ్బ త్వద్వత్సవాక్యాని సూక్తాసూక్తాని యాని చ ।

తాని స్వీకురు సర్వజ్ఞే దయాలుత్వేన సాదరమ్

॥ 67 ॥

శ్లోక 69

భవతీం శరణం గత్వా కృతార్థాః స్యుః పురాతనాః ।

ఇతి సఞ్చిన్త్య మనసా త్వామహం శరణం వ్రజే

॥ 68 ॥

శ్లోక 70

అనన్తా నిత్యసుఖినస్త్వద్భక్తాస్త్వత్పరాయణాః ।

ఇతి వేదప్రమాణాద్ధి దేవి త్వాం శరణం వ్రజే

॥ 69 ॥

శ్లోక 71

తవ ప్రతిజ్ఞా మద్భక్తా న నశ్యన్తీత్యపి క్వచిత్ ।

ఇతి సఞ్చిన్త్య సఞ్చిన్త్య ప్రాణాన్ సన్ధారయామ్యహమ్

॥ 70 ॥

శ్లోక 72

త్వదధీనస్త్వహం మాతస్త్వత్కృపా మయి విద్యతే ।

యావత్సమ్పూర్ణకామః స్యాత్తావద్దేహి దయానిధే

॥ 71 ॥

శ్లోక 73

క్షణమాత్రం న శక్నోమి జీవితుం త్వత్కృపాం వినా ।

న జీవన్తీహ జలజా జలం త్యక్త్వా జలగ్రహాః

॥ 72 ॥

శ్లోక 74

యథా హి పుత్రవాత్సల్యాజ్జననీ ప్రస్నుతస్తనీ ।

వత్సం త్వరితమాగత్య సమ్ప్రీణయతి వత్సలా

॥ 73 ॥

శ్లోక 75

యది స్యాం తవ పుత్రోఽహం మాతా త్వం యది మామకీ ।

దయాపయోధరస్తన్యసుధాభిరభిషిఞ్చ మామ్

॥ 74 ॥

శ్లోక 76

మృగ్యో న గుణలేశోఽపి మయి దోషైకమన్దిరే ।

పాంసూనాం వృష్టిబిన్దూనాం దోషాణాం చ న మే మతిః

॥ 75 ॥

శ్లోక 77

పాపినామహమేవాగ్ర్యో దయాలూనాం త్వమగ్రణీః ।

దయనీయో మదన్యోఽస్తి తవ కోఽత్ర జగత్త్రయే

॥ 76 ॥

శ్లోక 78

విధినాహం న సృష్టశ్చేన్న స్యాత్తవ దయాలుతా ।

ఆమయో వా న సృష్టశ్చేదౌషధస్య వృథోదయః

॥ 77 ॥

శ్లోక 79

కృపా మదగ్రజా కిం తే అహం కిం వా తదగ్రజః ।

విచార్య దేహి మే విత్తం తవ దేవి దయానిధే

॥ 78 ॥

శ్లోక 80

మాతా పితా త్వం గురుసద్గతిః శ్రీ-

-స్త్వమేవ సఞ్జీవనహేతుభూతా ।

అన్యం న మన్యే జగదేకనాథే

త్వమేవ సర్వం మమ దేవి సత్యే

॥ 79 ॥

శ్లోక 81

ఆద్యాదిలక్ష్మీర్భవ సుప్రసన్నా

విశుద్ధవిజ్ఞానసుఖైకదోగ్ధ్రీ ।

అజ్ఞానహన్త్రీ త్రిగుణాతిరిక్తా

ప్రజ్ఞాననేత్రీ భవ సుప్రసన్నా

॥ 80 ॥

శ్లోక 82

అశేషవాగ్జాడ్యమలాపహన్త్రీ

నవం నవం స్పష్టసువాక్ప్రదాయినీ ।

మమేహ జిహ్వాగ్ర సురఙ్గనర్తకీ [నర్తినీ]

భవ ప్రసన్నా వదనే చ మే శ్రీః

॥ 81 ॥

శ్లోక 83

సమస్తసమ్పత్సువిరాజమానా

సమస్తతేజశ్చయభాసమానా ।

విష్ణుప్రియే త్వం భవ దీప్యమానా

వాగ్దేవతా మే నయనే ప్రసన్నా

॥ 82 ॥

శ్లోక 84

సర్వప్రదర్శే సకలార్థదే త్వం

ప్రభాసులావణ్యదయాప్రదోగ్ధ్రీ ।

సువర్ణదే త్వం సుముఖీ భవ శ్రీ-

-ర్హిరణ్మయీ మే నయనే ప్రసన్నా

॥ 83 ॥

శ్లోక 85

సర్వార్థదా సర్వజగత్ప్రసూతిః

సర్వేశ్వరీ సర్వభయాపహన్త్రీ ।

సర్వోన్నతా త్వం సుముఖీ భవ శ్రీ-

-ర్హిరణ్మయీ మే నయనే ప్రసన్నా

॥ 84 ॥

శ్లోక 86

సమస్తవిఘ్నౌఘవినాశకారిణీ

సమస్తభక్తోద్ధరణే విచక్షణా ।

అనన్తసౌభాగ్యసుఖప్రదాయినీ

హిరణ్మయీ మే నయనే ప్రసన్నా

॥ 85 ॥

శ్లోక 87

దేవి ప్రసీద దయనీయతమాయ మహ్యం

దేవాధినాథభవదేవగణాభివన్ద్యే ।

మాతస్తథైవ భవ సన్నిహితా దృశోర్మే

పత్యా సమం మమ ముఖే భవ సుప్రసన్నా

॥ 86 ॥

శ్లోక 88

మా వత్స భైరభయదానకరోఽర్పితస్తే

మౌలౌ మమేతి మయి దీనదయానుకమ్పే ।

మాతః సమర్పయ ముదా కరుణాకటాక్షం

మాఙ్గల్యబీజమిహ నః సృజ జన్మ మాతః

॥ 87 ॥

శ్లోక 89

కటాక్ష ఇహ కామధుక్తవ మనస్తు చిన్తామణిః

కరః సురతరుః సదా నవనిధిస్త్వమేవేన్దిరే ।

భవే తవ దయారసో మమ రసాయనం చాన్వహం

ముఖం తవ కలానిధిర్వివిధవాఞ్ఛితార్థప్రదమ్

॥ 88 ॥

శ్లోక 90

యథా రసస్పర్శనతోఽయసోఽపి

సువర్ణతా స్యాత్కమలే తథా తే ।

కటాక్షసంస్పర్శనతో జనానా-

-మమఙ్గలానామపి మఙ్గలత్వమ్

॥ 89 ॥

శ్లోక 91

దేహీతి నాస్తీతి వచః ప్రవేశా-

-ద్భీతో రమే త్వాం శరణం ప్రపద్యే ।

అతః సదాఽస్మిన్నభయప్రదా త్వం

సహైవ పత్యా మయి సన్నిధేహి

॥ 90 ॥

శ్లోక 92

కల్పద్రుమేణ మణినా సహితా సురమ్యా

శ్రీస్తే కలా మయి రసేన రసాయనేన ।

ఆస్తాం యతో మమ శిరఃకరదృష్టిపాద-

-స్పృష్టాః సువర్ణవపుషః స్థిరజఙ్గమాః స్యుః

॥ 91 ॥

శ్లోక 93

ఆద్యాదివిష్ణోః స్థిరధర్మపత్నీ

త్వమేవ పత్యా మయి సన్నిధేహి ।

ఆద్యాదిలక్ష్మి త్వదనుగ్రహేణ

పదే పదే మే నిధిదర్శనం స్యాత్

॥ 92 ॥

శ్లోక 94

ఆద్యాదిలక్ష్మీహృదయం పఠేద్యః

స రాజ్యలక్ష్మీమచలాం తనోతి ।

మహాదరిద్రోఽపి భవేద్ధనాఢ్య-

-స్తదన్వయే శ్రీః స్థిరతాం ప్రయాతి

॥ 93 ॥

శ్లోక 95

యస్య స్మరణమాత్రేణ తుష్టా స్యాద్విష్ణువల్లభా ।

తస్యాభీష్టం దదత్యాశు తం పాలయతి పుత్రవత్

॥ 94 ॥

శ్లోక 96

ఇదం రహస్యం హృదయం సర్వకామఫలప్రదమ్ ।

జపః పఞ్చసహస్రం తు పురశ్చరణముచ్యతే

॥ 95 ॥

శ్లోక 97

త్రికాలమేకకాలం వా నరో భక్తిసమన్వితః ।

యః పఠేచ్ఛృణుయాద్వాపి స యాతి పరమాం శ్రియమ్

॥ 96 ॥

శ్లోక 98

మహాలక్ష్మీం సముద్దిశ్య నిశి భార్గవవాసరే ।

ఇదం శ్రీహృదయం జప్త్వా పఞ్చవారం ధనీ భవేత్

॥ 97 ॥

శ్లోక 99

అనేన హృదయేనాన్నం గర్భిణ్యా అభిమన్త్రితమ్ ।

దదాతి తత్కులే పుత్రో జాయతే శ్రీపతిః స్వయమ్

॥ 98 ॥

శ్లోక 100

నరేణ వాఽథవా నార్యా లక్ష్మీహృదయమన్త్రితే ।

జలే పీతే చ తద్వంశే మన్దభాగ్యో న జాయతే

॥ 99 ॥

శ్లోక 101

య ఆశ్వినే మాసి చ శుక్లపక్షే

రమోత్సవే సన్నిహితే సుభక్త్యా ।

పఠేత్తథైకోత్తరవారవృద్ధ్యా

లభేత్స సౌవర్ణమయీం సువృష్టిమ్

॥ 100 ॥

శ్లోక 102

య ఏకభక్తోఽన్వహమేకవర్షం

విశుద్ధధీః సప్తతివారజాపీ ।

స మన్దభాగ్యోఽపి రమాకటాక్షా-

-ద్భవేత్సహస్రాక్షశతాధికశ్రీః

॥ 101 ॥

శ్లోక 103

శ్రీశాఙ్ఘ్రిభక్తిం హరిదాసదాస్యం

ప్రసన్నమన్త్రార్థదృఢైకనిష్ఠామ్ ।

గురోః స్మృతిం నిర్మలబోధబుద్ధిం

ప్రదేహి మాతః పరమం పదం శ్రీః

॥ 102 ॥

శ్లోక 104

పృథ్వీపతిత్వం పురుషోత్తమత్వం

విభూతివాసం వివిధార్థసిద్ధిమ్ ।

సమ్పూర్ణకీర్తిం బహువర్షభోగం

ప్రదేహి మే లక్ష్మి పునః పునస్త్వమ్

॥ 103 ॥

శ్లోక 105

వాదార్థసిద్ధిం బహులోకవశ్యం

వయః స్థిరత్వం లలనాసుభోగమ్ ।

పౌత్రాదిలబ్ధిం సకలార్థసిద్ధిం

ప్రదేహి మే భార్గవి జన్మజన్మని

॥ 104 ॥

శ్లోక 106

సువర్ణవృద్ధిం కురు మే గృహే శ్రీః

సుధాన్యవృద్ధిం కురూ మే గృహే శ్రీః ।

కల్యాణవృద్ధిం కురు మే గృహే శ్రీః

విభూతివృద్ధిం కురు మే గృహే శ్రీః

॥ 105 ॥

శ్లోక 107

ధ్యాయేల్లక్ష్మీం ప్రహసితముఖీం కోటిబాలార్కభాసాం

విద్యుద్వర్ణామ్బరవరధరాం భూషణాఢ్యాం సుశోభామ్ ।

బీజాపూరం సరసిజయుగం బిభ్రతీం స్వర్ణపాత్రం

భర్త్రాయుక్తాం ముహురభయదాం మహ్యమప్యచ్యుతశ్రీః

॥ 106 ॥

శ్లోక 108

గుహ్యాతిగుహ్యగోప్త్రీ త్వం గృహాణాస్మత్కృతం జపమ్ ।

సిద్ధిర్భవతు మే దేవి త్వత్ప్రసాదాన్మయి స్థితా

॥ 107 ॥

శ్లోక 109

ఇతి శ్రీఅథర్వణరహస్యే శ్రీలక్ష్మీహృదయస్తోత్రం సమ్పూర్ణమ్ ॥