Sri Kamakshi Stotram

shrI kAmAkShI stotram

shloka 1

kalpAnokahapuShpajAlavilasannIlAlakAM mAtRRikAM

kAntAM ka~njadalekShaNAM kalimalapradhvaMsinIM kAlikAm |

kAnchInUpurahAradAmasubhagAM kAnchIpurInAyikAM

kAmAkShIM karikumbhasannibhakuchAM vande maheshapriyAm || 1 ||

kAshAbhAM shukabhAsurAM pravilasatkoshAtakI sannibhAM

chandrArkAnalalochanAM suruchirAla~NkArabhUShojjvalAm |

brahmashrIpativAsavAdimunibhiH saMsevitA~NghridvayAM

kAmAkShIM gajarAjamandagamanAM vande maheshapriyAm || 2 ||

aiM klIM sauriti yAM vadanti munayastattvArtharUpAM parAM

vAchAmAdimakAraNaM hRRidi sadA dhyAyanti yAM yoginaH |

bAlAM phAlavilochanAM navajapAvarNAM suShumnAshritAM

kAmAkShIM kalitAvataMsasubhagAM vande maheshapriyAm || 3 ||

yatpAdAmbujareNuleshamanishaM labdhvA vidhatte vidhi-

-rvishvaM tatparipAti viShNurakhilaM yasyAH prasAdAchchiram |

rudraH saMharati kShaNAttadakhilaM yanmAyayA mohitaH

kAmAkShImatichitrachArucharitAM vande maheshapriyAm || 4 ||

sUkShmAtsUkShmatarAM sulakShitatanuM kShAntAkSharairlakShitAM

vIkShAshikShitarAkShasAM tribhuvanakShema~NkarImakShayAm |

sAkShAllakShaNalakShitAkSharamayIM dAkShAyaNIM sAkShiNIM

kAmAkShIM shubhalakShaNaiH sulalitAM vande maheshapriyAm || 5 ||

oNkArANgaNadIpikAmupaniShatprAsAdapArAvatIM

AmnAyAmbudhichandrikAmaghatamaHpradhvaMsahaMsaprabhAm |

kAnchIpaTTaNapanjarAntarashukIM kAruNyakallolinIM

kAmAkShIM shivakAmarAjamahiShIM vande maheshapriyAm || 6 ||

hrI~NkArAtmakavarNamAtrapaThanAdaindrIM shriyaM tanvatIM

chinmAtrAM bhuvaneshvarImanudinaM bhikShApradAnakShamAm |

vishvAghaughanivAriNIM vimalinIM vishvambharAM mAtRRikAM

kAmAkShIM paripUrNachandravadanAM vande maheshapriyAm || 7 ||

vAgdevIti cha yAM vadanti munayaH kShIrAbdhikanyeti cha

kShoNIbhRRittanayeti cha shrutigiro yAM Amananti sphuTam |

ekAnekaphalapradAM bahuvidhA.a.akArAstanUstanvatIM

kAmAkShIM sakalArtibha~njanaparAM vande maheshapriyAm || 8 ||

mAyAmAdimakAraNaM trijagatAmArAdhitA~NghridvayAM

AnandAmRRitavArirAshinilayAM vidyAM vipashchiddhiyAm |

mAyAmAnuSharUpiNIM maNilasanmadhyAM mahAmAtRRikAM

kAmAkShIM karirAjamandagamanAM vande maheshapriyAm || 9 ||

kAntA kAmadughA karIndragamanA kAmArivAmA~NkagA

kalyANI kalitAvatArasubhagA kastUrikAcharchitA

kampAtIrarasAlamUlanilayA kAruNyakallolinI

kalyANAni karotu me bhagavatI kA~nchIpurIdevatA || 10 ||

iti shrI kAmAkShI stotram |