Sri Kamakshi Stotram

zrI kAmAkSI stotram

zloka 1

kalpAnokahapuSpajAlavilasannIlAlakAM mAtRkAM

kAntAM kaJjadalekSaNAM kalimalapradhvaMsinIM kAlikAm |

kAJcInUpurahAradAmasubhagAM kAJcIpurInAyikAM

kAmAkSIM karikumbhasannibhakucAM vande mahezapriyAm || 1 ||

kAzAbhAM zukabhAsurAM pravilasatkozAtakI sannibhAM

candrArkAnalalocanAM surucirAlaGkArabhUSojjvalAm |

brahmazrIpativAsavAdimunibhiH saMsevitAGghridvayAM

kAmAkSIM gajarAjamandagamanAM vande mahezapriyAm || 2 ||

aiM klIM sauriti yAM vadanti munayastattvArtharUpAM parAM

vAcAmAdimakAraNaM hRdi sadA dhyAyanti yAM yoginaH |

bAlAM phAlavilocanAM navajapAvarNAM suSumnAzritAM

kAmAkSIM kalitAvataMsasubhagAM vande mahezapriyAm || 3 ||

yatpAdAmbujareNulezamanizaM labdhvA vidhatte vidhi-

-rvizvaM tatparipAti viSNurakhilaM yasyAH prasAdAcciram |

rudraH saMharati kSaNAttadakhilaM yanmAyayA mohitaH

kAmAkSImaticitracArucaritAM vande mahezapriyAm || 4 ||

sUkSmAtsUkSmatarAM sulakSitatanuM kSAntAkSarairlakSitAM

vIkSAzikSitarAkSasAM tribhuvanakSemaGkarImakSayAm |

sAkSAllakSaNalakSitAkSaramayIM dAkSAyaNIM sAkSiNIM

kAmAkSIM zubhalakSaNaiH sulalitAM vande mahezapriyAm || 5 ||

oGkArAGgaNadIpikAmupaniSatprAsAdapArAvatIM

AmnAyAmbudhicandrikAmaghatamaHpradhvaMsahaMsaprabhAm |

kAJcIpaTTaNapaJjarAntarazukIM kAruNyakallolinIM

kAmAkSIM zivakAmarAjamahiSIM vande mahezapriyAm || 6 ||

hrIGkArAtmakavarNamAtrapaThanAdaindrIM zriyaM tanvatIM

cinmAtrAM bhuvanezvarImanudinaM bhikSApradAnakSamAm |

vizvAghaughanivAriNIM vimalinIM vizvambharAM mAtRkAM

kAmAkSIM paripUrNacandravadanAM vande mahezapriyAm || 7 ||

vAgdevIti ca yAM vadanti munayaH kSIrAbdhikanyeti ca

kSoNIbhRttanayeti ca zrutigiro yAM Amananti sphuTam |

ekAnekaphalapradAM bahuvidhA''kArAstanUstanvatIM

kAmAkSIM sakalArtibhaJjanaparAM vande mahezapriyAm || 8 ||

mAyAmAdimakAraNaM trijagatAmArAdhitAGghridvayAM

AnandAmRtavArirAzinilayAM vidyAM vipazciddhiyAm |

mAyAmAnuSarUpiNIM maNilasanmadhyAM mahAmAtRkAM

kAmAkSIM karirAjamandagamanAM vande mahezapriyAm || 9 ||

kAntA kAmadughA karIndragamanA kAmArivAmAGkagA

kalyANI kalitAvatArasubhagA kastUrikAcarcitA

kampAtIrarasAlamUlanilayA kAruNyakallolinI

kalyANAni karotu me bhagavatI kAJcIpurIdevatA || 10 ||

iti zrI kAmAkSI stotram |