Sri Hari Stotram (Jagajjalapalam)

zrI hari stotram (jagajjAlapAlam)

zloka 1

jagajjAlapAlaM kanatkaNThamAlaM

zaraccandraphAlaM mahAdaityakAlam |

nabhonIlakAyaM durAvAramAyaM

supadmAsahAyaM bhaje'haM bhaje'ham || 1 ||

sadAmbhodhivAsaM galatpuSpahAsaM

jagatsannivAsaM zatAdityabhAsam |

gadAcakrazastraM lasatpItavastraM

hasaccAruvaktraM bhaje'haM bhaje'ham || 2 ||

ramAkaNThahAraM zrutivrAtasAraM

jalAntarvihAraM dharAbhArahAram |

cidAnandarUpaM manojJasvarUpaM

dhRtAnekarUpaM bhaje'haM bhaje'ham || 3 ||

jarAjanmahInaM parAnandapInaM

samAdhAnalInaM sadaivAnavInam |

jagajjanmahetuM surAnIkaketuM

trilokaikasetuM bhaje'haM bhaje'ham || 4 ||

kRtAmnAyagAnaM khagAdhIzayAnaM

vimukternidAnaM harArAtimAnam |

svabhaktAnukUlaM jagadvRkSamUlaM

nirastArtazUlaM bhaje'haM bhaje'ham || 5 ||

samastAmarezaM dvirephAbhakezaM

jagadbimbalezaM hRdAkAzavezam |

sadA divyadehaM vimuktAkhilehaM

suvaikuNThagehaM bhaje'haM bhaje'ham || 6 ||

surAlIbaliSThaM trilokIvariSThaM

gurUNAM gariSThaM svarUpaikaniSTham |

sadA yuddhadhIraM mahAvIravIraM

bhavAmbhodhitIraM bhaje'haM bhaje'ham || 7 ||

ramAvAmabhAgaM talAlagnanAgaM

kRtAdhInayAgaM gatArAgarAgam |

munIndraissugItaM suraissamparItaM

guNaughairatItaM bhaje'haM bhaje'ham || 8 ||

phalazruti |

idaM yastu nityaM samAdhAya cittaM

paThedaSTakaM kaNThahAraM murAreH |

sa viSNorvizokaM dhruvaM yAti lokaM

jarAjanmazokaM punarvindate no || 9 ||

iti zrI paramahaMsasvAmi brahmAnandaviracitaM zrIharistotram ||