SrI Durga Sapta Shloki

shrI durgA sapta shlokI

shloka 1

shiva uvAcha |

devI tvaM bhaktasulabhe sarvakAryavidhAyini |

kalau hi kAryasiddhyarthamupAyaM brUhi yatnataH ||

devyuvAcha |

shRRiNu deva pravakShyAmi kalau sarveShTasAdhanam |

mayA tavaiva snehenApyambAstutiH prakAshyate ||

asya shrI durgA saptashlokI stotramantrasya nArAyaNa RRiShiH, anuShTup ChandaH, shrI mahAkAlI mahAlakShmI mahAsarasvatyo devatAH, shrI durgA prItyarthaM saptashlokI durgApAThe viniyogaH |

j~nAninAmapi chetAMsi devI bhagavatI hi sA |

balAdAkRRiShya mohAya mahAmAyA prayachChati || 1 ||

durge smRRitA harasi bhItimasheShajantoH

svasthaiH smRRitA matimatIva shubhAM dadAsi |

dAridryaduHkha bhayahAriNi kA tvadanyA

sarvopakArakaraNAya sadArdra chittA || 2 ||

sarvamaNgalamANgalye shive sarvArthasAdhike |

sharaNye tryambake gaurI nArAyaNi namo.astu te || 3 ||

sharaNAgatadInArtaparitrANaparAyaNe |

sarvasyArtihare devi nArAyaNi namo.astu te || 4 ||

sarvasvarUpe sarveshe sarvashaktisamanvite |

bhayebhyastrAhi no devi durge devi namo.astu te || 5 ||

rogAnasheShAnapahaMsi tuShTA-

ruShTA tu kAmAn sakalAnabhIShTAn |

tvAmAshritAnAM na vipannarANAM

tvAmAshritA hyAshrayatAM prayAnti || 6 ||

sarvabAdhAprashamanaM trailokyasyAkhileshvari |

evameva tvayA kAryamasmadvairi vinAshanam || 7 ||

iti shrI durgA saptashlokI |