Sri Devi Atharva Sheersham

ଶ୍ରୀ ଦେଵ୍ଯଥର୍ଵଶୀର୍ଷମ୍

ଶ୍ଲୋକ 1

ଓଁ ସର୍ଵେ ଵୈ ଦେଵା ଦେଵୀମୁପତସ୍ଥୁଃ କାସି ତ୍ଵ-ମ୍ମହାଦେଵୀତି

ଶ୍ଲୋକ 2

ସା-ଽବ୍ରଵୀଦହ-ମ୍ବ୍ରହ୍ମସ୍ଵରୂପିଣୀ ।

ମତ୍ତଃ ପ୍ରକୃତିପୁରୁଷାତ୍ମକ-ଞ୍ଜଗତ୍ ।

ଶୂନ୍ଯ-ଞ୍ଚାଶୂନ୍ଯ-ଞ୍ଚ

॥ 1 ॥

ଶ୍ଲୋକ 3

ଅହମାନନ୍ଦାନାନନ୍ଦୌ ।

ଅହଂ-ଵିଁଜ୍ଞାନାଵିଜ୍ଞାନେ ।

ଅହ-ମ୍ବ୍ରହ୍ମାବ୍ରହ୍ମଣି ଵେଦିତଵ୍ଯେ ।

ଅହ-ମ୍ପଞ୍ଚଭୂତାନ୍ଯପଞ୍ଚଭୂତାନି ।

ଅହମଖିଲ-ଞ୍ଜଗତ୍

॥ 2 ॥

ଶ୍ଲୋକ 4

ଵେଦୋ-ଽହମଵେଦୋ-ଽହମ୍ ।

ଵିଦ୍ଯା-ଽହମଵିଦ୍ଯା-ଽହମ୍ ।

ଅଜା-ଽହମନଜା-ଽହମ୍ ।

ଅଧଶ୍ଚୋର୍ଧ୍ଵ-ଞ୍ଚ ତିର୍ଯକ୍ଚାହମ୍

॥ 3 ॥

ଶ୍ଲୋକ 5

ଅହଂ ରୁଦ୍ରେଭିର୍ଵସୁଭିଶ୍ଚରାମି ।

ଅହମାଦିତ୍ଯୈରୁତ ଵିଶ୍ଵଦେଵୈଃ ।

ଅହ-ମ୍ମିତ୍ରାଵରୁଣାଵୁଭୌ ବିଭର୍ମି ।

ଅହମିନ୍ଦ୍ରାଗ୍ନୀ ଅହମଶ୍ଵିନାଵୁଭୌ

॥ 4 ॥

ଶ୍ଲୋକ 6

ଅହଂ ସୋମ-ନ୍ତ୍ଵଷ୍ଟାର-ମ୍ପୂଷଣ-ମ୍ଭଗ-ନ୍ଦଧାମି ।

ଅହଂ-ଵିଁଷ୍ଣୁମୁରୁକ୍ରମ-ମ୍ବ୍ରହ୍ମାଣମୁତ ପ୍ରଜାପତି-ନ୍ଦଧାମି

॥ 5 ॥

ଶ୍ଲୋକ 7

ଅ॒ହ-ନ୍ଦ॑ଧାମି॒ ଦ୍ରଵି॑ଣଂ ହ॒ଵିଷ୍ମ॑ତେ ସୁପ୍ରା॒ଵ୍ଯେ॒3 ଯଜ॑ମାନାଯ ସୁନ୍ଵ॒ତେ ।

ଅ॒ହଂ ରାଷ୍ଟ୍ରୀ॑ ସ॒ଙ୍ଗମ॑ନୀ॒ ଵସୂ॑ନା-ଞ୍ଚିକି॒ତୁଷୀ॑ ପ୍ରଥ॒ମା ଯ॒ଜ୍ଞିଯା॑ନାମ୍ ।

ଅ॒ହଂ ସୁ॑ଵେ ପି॒ତର॑ମସ୍ଯ ମୂ॒ର୍ଧନ୍ମମ॒ ଯୋନି॑ର॒ପ୍ସ୍ଵନ୍ତ-ସ୍ସ॑ମୁ॒ଦ୍ରେ ।

ଯ ଏଵଂ-ଵେଁଦ । ସ ଦେଵୀଂ ସମ୍ପଦମାପ୍ନୋତି

॥ 6 ॥

ଶ୍ଲୋକ 8

ତେ ଦେଵା ଅବ୍ରୁଵନ୍

ନମୋ ଦେଵ୍ଯୈ ମହାଦେଵ୍ଯୈ ଶିଵାଯୈ ସତତ-ନ୍ନମଃ ।

ନମଃ ପ୍ରକୃତ୍ଯୈ ଭଦ୍ରାଯୈ ନିଯତାଃ ପ୍ରଣତା-ସ୍ସ୍ମ ତାମ୍

॥ 7 ॥

ଶ୍ଲୋକ 9

ତାମ॒ଗ୍ନିଵ॑ର୍ଣା॒-ନ୍ତପ॑ସା ଜ୍ଵଲ॒ନ୍ତୀଂ-ଵୈଁ॑ରୋଚ॒ନୀ-ଙ୍କ॑ର୍ମଫ॒ଲେଷୁ॒ ଜୁଷ୍ଟା᳚ମ୍ ।

ଦୁ॒ର୍ଗା-ନ୍ଦେ॒ଵୀଂ ଶର॑ଣ-ମ୍ପ୍ରପ॑ଦ୍ଯାମହେ-ଽସୁରାନ୍ନାଶଯିତ୍ର୍ଯୈ ତେ ନମଃ

॥ 8 ॥

ଶ୍ଲୋକ 10

(ଋ.ଵେ.8.100.11)

ଦେ॒ଵୀଂ-ଵାଁଚ॑ମଜନଯନ୍ତ ଦେ॒ଵାସ୍ତାଂ-ଵିଁ॒ଶ୍ଵରୂ॑ପାଃ ପ॒ଶଵୋ॑ ଵଦନ୍ତି ।

ସା ନୋ॑ ମ॒ନ୍ଦ୍ରେଷ॒ମୂର୍ଜ॒-ନ୍ଦୁହା॑ନା ଧେ॒ନୁର୍ଵାଗ॒ସ୍ମାନୁପ॒ ସୁଷ୍ଟୁ॒ତୈତୁ॑

॥ 9 ॥

ଶ୍ଲୋକ 11

କାଲରାତ୍ରୀ-ମ୍ବ୍ରହ୍ମସ୍ତୁତାଂ-ଵୈଁଷ୍ଣଵୀଂ ସ୍କନ୍ଦମାତରମ୍ ।

ସରସ୍ଵତୀମଦିତି-ନ୍ଦକ୍ଷଦୁହିତର-ନ୍ନମାମଃ ପାଵନାଂ ଶିଵାମ୍

॥ 10 ॥

ଶ୍ଲୋକ 12

ମହାଲକ୍ଷ୍ମ୍ଯୈ ଚ ଵିଦ୍ମହେ ସର୍ଵଶକ୍ତ୍ଯୈ ଚ ଧୀମହି ।

ତନ୍ନୋ ଦେଵୀ ପ୍ରଚୋଦଯାତ୍

॥ 11 ॥

ଶ୍ଲୋକ 13

ଅଦିତିର୍​ହ୍ଯଜନିଷ୍ଟ ଦକ୍ଷ ଯା ଦୁହିତା ତଵ ।

ତା-ନ୍ଦେଵା ଅନ୍ଵଜାଯନ୍ତ ଭଦ୍ରା ଅମୃତବନ୍ଧଵଃ

॥ 12 ॥

ଶ୍ଲୋକ 14

କାମୋ ଯୋନିଃ କମଲା ଵଜ୍ରପାଣି-

ର୍ଗୁହା ହସା ମାତରିଶ୍ଵାଭ୍ରମିନ୍ଦ୍ରଃ ।

ପୁନର୍ଗୁହା ସକଲା ମାଯଯା ଚ

ପୁରୂଚ୍ଯୈଷା ଵିଶ୍ଵମାତାଦିଵିଦ୍ଯୋମ୍

॥ 13 ॥

ଶ୍ଲୋକ 15

ଏଷା-ଽଽତ୍ମଶକ୍ତିଃ ।

ଏଷା ଵିଶ୍ଵମୋହିନୀ ।

ପାଶାଙ୍କୁଶଧନୁର୍ବାଣଧରା ।

ଏଷା ଶ୍ରୀମହାଵିଦ୍ଯା ।

ଯ ଏଵଂ-ଵେଁଦ ସ ଶୋକ-ନ୍ତରତି

॥ 14 ॥

ଶ୍ଲୋକ 16

ନମସ୍ତେ ଅସ୍ତୁ ଭଗଵତି ମାତରସ୍ମାନ୍ପାହି ସର୍ଵତଃ

॥ 15 ॥

ଶ୍ଲୋକ 17

ସୈଷାଷ୍ଟୌ ଵସଵଃ ।

ସୈଷୈକାଦଶ ରୁଦ୍ରାଃ ।

ସୈଷା ଦ୍ଵାଦଶାଦିତ୍ଯାଃ ।

ସୈଷା ଵିଶ୍ଵେଦେଵା-ସ୍ସୋମପା ଅସୋମପାଶ୍ଚ ।

ସୈଷା ଯାତୁଧାନା ଅସୁରା ରକ୍ଷାଂସି ପିଶାଚା ଯକ୍ଷା ସିଦ୍ଧାଃ ।

ସୈଷା ସତ୍ତ୍ଵରଜସ୍ତମାଂସି ।

ସୈଷା ବ୍ରହ୍ମଵିଷ୍ଣୁରୁଦ୍ରରୂପିଣୀ ।

ସୈଷା ପ୍ରଜାପତୀନ୍ଦ୍ରମନଵଃ ।

ସୈଷା ଗ୍ରହନକ୍ଷତ୍ରଜ୍ଯୋତୀଂଷି । କଲାକାଷ୍ଠାଦିକାଲରୂପିଣୀ ।

ତାମହ-ମ୍ପ୍ରଣୌମି ନିତ୍ଯମ୍ ।

ପାପାପହାରିଣୀ-ନ୍ଦେଵୀ-ମ୍ଭୁକ୍ତିମୁକ୍ତିପ୍ରଦାଯିନୀମ୍ ।

ଅନନ୍ତାଂ-ଵିଁଜଯାଂ ଶୁଦ୍ଧାଂ ଶରଣ୍ଯାଂ ଶିଵଦାଂ ଶିଵାମ୍

॥ 16 ॥

ଶ୍ଲୋକ 18

ଵିଯଦୀକାରସଂ​ଯୁଁକ୍ତଂ-ଵୀଁତିହୋତ୍ରସମନ୍ଵିତମ୍ ।

ଅର୍ଧେନ୍ଦୁଲସିତ-ନ୍ଦେଵ୍ଯା ବୀଜଂ ସର୍ଵାର୍ଥସାଧକମ୍

॥ 17 ॥

ଶ୍ଲୋକ 19

ଏଵମେକାକ୍ଷର-ମ୍ବ୍ରହ୍ମ ଯତଯ-ଶ୍ଶୁଦ୍ଧଚେତସଃ ।

ଧ୍ଯାଯନ୍ତି ପରମାନନ୍ଦମଯା ଜ୍ଞାନାମ୍ବୁରାଶଯଃ

॥ 18 ॥

ଶ୍ଲୋକ 20

ଵାଙ୍ମାଯା ବ୍ରହ୍ମସୂସ୍ତସ୍ମା-ଥ୍ଷଷ୍ଠଂ-ଵଁକ୍ତ୍ରସମନ୍ଵିତମ୍ ।

ସୂର୍ଯୋ-ଽଵାମଶ୍ରୋତ୍ରବିନ୍ଦୁସଂ​ଯୁଁକ୍ତଷ୍ଟାତ୍ତୃତୀଯକଃ ।

ନାରାଯଣେନ ସମ୍ମିଶ୍ରୋ ଵାଯୁଶ୍ଚାଧରଯୁକ୍ତତଃ ।

ଵିଚ୍ଚେ ନଵାର୍ଣକୋ-ଽର୍ଣ-ସ୍ସ୍ଯାନ୍ମହଦାନନ୍ଦଦାଯକଃ

॥ 19 ॥

ଶ୍ଲୋକ 21

ହୃତ୍ପୁଣ୍ଡରୀକମଧ୍ଯସ୍ଥା-ମ୍ପ୍ରାତସ୍ସୂର୍ଯସମପ୍ରଭାମ୍ ।

ପାଶାଙ୍କୁଶଧରାଂ ସୌମ୍ଯାଂ-ଵଁରଦାଭଯହସ୍ତକାମ୍ ।

ତ୍ରିନେତ୍ରାଂ ରକ୍ତଵସନା-ମ୍ଭକ୍ତକାମଦୁଘା-ମ୍ଭଜେ

॥ 20 ॥

ଶ୍ଲୋକ 22

ନମାମି ତ୍ଵା-ମ୍ମହାଦେଵୀ-ମ୍ମହାଭଯଵିନାଶିନୀମ୍ ।

ମହାଦୁର୍ଗପ୍ରଶମନୀ-ମ୍ମହାକାରୁଣ୍ଯରୂପିଣୀମ୍

॥ 21 ॥

ଶ୍ଲୋକ 23

ଯସ୍ଯା-ସ୍ସ୍ଵରୂପ-ମ୍ବ୍ରହ୍ମାଦଯୋ ନ ଜାନନ୍ତି ତସ୍ମାଦୁଚ୍ଯତେ ଅଜ୍ଞେଯା ।

ଯସ୍ଯା ଅନ୍ତୋ ନ ଲଭ୍ଯତେ ତସ୍ମାଦୁଚ୍ଯତେ ଅନନ୍ତା ।

ଯସ୍ଯା ଲକ୍ଷ୍ଯ-ନ୍ନୋପଲକ୍ଷ୍ଯତେ ତସ୍ମାଦୁଚ୍ଯତେ ଅଲକ୍ଷ୍ଯା ।

ଯସ୍ଯା ଜନନ-ନ୍ନୋପଲଭ୍ଯତେ ତସ୍ମାଦୁଚ୍ଯତେ ଅଜା ।

ଏକୈଵ ସର୍ଵତ୍ର ଵର୍ତତେ ତସ୍ମାଦୁଚ୍ଯତେ ଏକା ।

ଏକୈଵ ଵିଶ୍ଵରୂପିଣୀ ତସ୍ମାଦୁଚ୍ଯତେ ନୈକା ।

ଅତ ଏଵୋଚ୍ଯତେ ଅଜ୍ଞେଯାନନ୍ତାଲକ୍ଷ୍ଯାଜୈକା ନୈକେତି

॥ 22 ॥

ଶ୍ଲୋକ 24

ମନ୍ତ୍ରାଣା-ମ୍ମାତୃକା ଦେଵୀ ଶବ୍ଦାନା-ଞ୍ଜ୍ଞାନରୂପିଣୀ ।

ଜ୍ଞାନାନା-ଞ୍ଚିନ୍ମଯାତୀତା ଶୂନ୍ଯାନାଂ ଶୂନ୍ଯସାକ୍ଷିଣୀ ।

ଯସ୍ଯାଃ ପରତର-ନ୍ନାସ୍ତି ସୈଷା ଦୁର୍ଗା ପ୍ରକୀର୍ତିତା

॥ 23 ॥

ଶ୍ଲୋକ 25

ତା-ନ୍ଦୁର୍ଗା-ନ୍ଦୁର୍ଗମା-ନ୍ଦେଵୀ-ନ୍ଦୁରାଚାରଵିଘାତିନୀମ୍ ।

ନମାମି ଭଵଭୀତୋ-ଽହଂ ସଂସାରାର୍ଣଵତାରିଣୀମ୍

॥ 24 ॥

ଶ୍ଲୋକ 26

ଇଦମଥର୍ଵଶୀର୍​ଷଂ-ଯୋଁ-ଽଧୀତେ ସ ପଞ୍ଚାଥର୍ଵଶୀର୍​ଷଜପଫଲମାପ୍ନୋତି ।

ଇଦମଥର୍ଵଶୀର୍​ଷମଜ୍ଞାତ୍ଵା ଯୋ-ଽର୍ଚାଂ ସ୍ଥାପଯତି ।

ଶତଲକ୍ଷ-ମ୍ପ୍ରଜପ୍ତ୍ଵା-ଽପି ସୋ-ଽର୍ଚାସିଦ୍ଧି-ନ୍ନ ଵିନ୍ଦତି ।

ଶତମଷ୍ଟୋତ୍ତର-ଞ୍ଚାସ୍ଯ ପୁରଶ୍ଚର୍ଯାଵିଧି-ସ୍ସ୍ମୃତଃ ।

ଦଶଵାର-ମ୍ପଠେଦ୍ଯସ୍ତୁ ସଦ୍ଯଃ ପାପୈଃ ପ୍ରମୁଚ୍ଯତେ ।

ମହାଦୁର୍ଗାଣି ତରତି ମହାଦେଵ୍ଯାଃ ପ୍ରସାଦତଃ । 26 ॥

ସାଯମଧୀଯାନୋ ଦିଵସକୃତ-ମ୍ପାପ-ନ୍ନାଶଯତି ।

ପ୍ରାତରଧୀଯାନୋ ରାତ୍ରିକୃତ-ମ୍ପାପ-ନ୍ନାଶଯତି ।

ସାଯ-ମ୍ପ୍ରାତଃ ପ୍ରଯୁଞ୍ଜାନୋ ଅପାପୋ ଭଵତି ।

ନିଶୀଥେ ତୁରୀଯସନ୍ଧ୍ଯାଯା-ଞ୍ଜପ୍ତ୍ଵା ଵାକ୍ସିଦ୍ଧିର୍ଭଵତି ।

ନୂତନାଯା-ମ୍ପ୍ରତିମାଯା-ଞ୍ଜପ୍ତ୍ଵା ଦେଵତାସାନ୍ନିଧ୍ଯ-ମ୍ଭଵତି ।

ପ୍ରାଣପ୍ରତିଷ୍ଠାଯା-ଞ୍ଜପ୍ତ୍ଵା ପ୍ରାଣାନା-ମ୍ପ୍ରତିଷ୍ଠା ଭଵତି ।

ଭୌମାଶ୍ଵିନ୍ଯା-ମ୍ମହାଦେଵୀସନ୍ନିଧୌ ଜପ୍ତ୍ଵା ମହାମୃତ୍ଯୁ-ନ୍ତରତି ।

ସ ମହାମୃତ୍ଯୁ-ନ୍ତରତି ।

ଯ ଏଵଂ-ଵେଁଦ ।

ଇତ୍ଯୁପନିଷତ୍

॥ 25 ॥

ଶ୍ଲୋକ 27

ଇତି ଦେଵ୍ଯଥର୍ଵଶୀର୍​ଷମ୍ ।