Sri Dattatreya Vajra Kavacham

shri dattAtreya vajra kavacham

shloka 1

RRiShaya UchuH |

kathaM sa~NkalpasiddhiH syAdvedavyAsa kalauyuge |

dharmArthakAmamokShANAM sAdhanaM kimudAhRRitam || 1 ||

vyAsa uvAcha |

shRRiNvantu RRiShayassarve shIghraM sa~NkalpasAdhanam |

sakRRiduchchAramAtreNa bhogamokShapradAyakam || 2 ||

gaurIshRRi~Nge himavataH kalpavRRikShopashobhitam |

dIpte divyamahAratna hemamaNDapamadhyagam || 3 ||

ratnasiMhAsanAsInaM prasannaM parameshvaram |

mandasmitamukhAmbhojaM sha~NkaraM prAha pArvatI || 4 ||

shrIdevI uvAcha |

devadeva mahAdeva lokashaNkara shaNkara |

mantrajAlAni sarvANi yantrajAlAni kRRitsnashaH || 5 ||

tantrajAlAnyanekAni mayA tvattaH shrutAni vai |

idAnIM draShTumichChAmi visheSheNa mahItalam || 6 ||

ityudIritamAkarNya pArvatyA parameshvaraH |

kareNAmRRijya santoShAt pArvatIM pratyabhAShata || 7 ||

mayedAnIM tvayA sArdhaM vRRiShamAruhya gamyate |

ityuktvA vRRiShamAruhya pArvatyA saha sha~NkaraH || 8 ||

yayau bhUmaNDalaM draShTuM gauryAshchitrANi darshayan |

kvachit vindhyAchalaprAnte mahAraNye sudurgame || 9 ||

tatra vyAhartumAyAntaM bhillaM parashudhAriNam |

vadhyamAnaM mahAvyAghraM nakhadaMShTrAbhirAvRRitam || 10 ||

atIva chitrachAritryaM vajrakAyasamAyutam |

aprayatnamanAyAsamakhinnaM sukhamAsthitam || 11 ||

palAyantaM mRRigaM pashchAdvyAghro bhItyA palAyataH |

etadAshcharyamAlokya pArvatI prAha sha~Nkaram || 12 ||

shrI pArvatyuvAcha |

kimAshcharyaM kimAshcharyamagre shambho nirIkShyatAm |

ityuktaH sa tataH shambhurdRRiShTvA prAha purANavit || 13 ||

shrI sha~Nkara uvAcha |

gauri vakShyAmi te chitramavA~NmAnasagocharam |

adRRiShTapUrvamasmAbhirnAsti ki~nchinna kutrachit || 14 ||

mayA samyak samAsena vakShyate shRRiNu pArvati |

ayaM dUrashravA nAma bhillaH paramadhArmikaH || 15 ||

samitkushaprasUnAni kandamUlaphalAdikam |

pratyahaM vipinaM gatvA samAdAya prayAsataH || 16 ||

priye pUrvaM munIndrebhyaH prayachChati na vA~nChati |

te.api tasminnapi dayAM kurvate sarvamauninaH || 17 ||

dalAdano mahAyogI vasanneva nijAshrame |

kadAchidasmarat siddhaM dattAtreyaM digambaram || 18 ||

dattAtreyaH smartRRigAmI chetihAsaM parIkShitum |

tat{}kShaNAt so.api yogIndro dattAtreyaH samutthitaH || 19 ||

taM dRRiShTvAshcharyatoShAbhyAM dalAdanamahAmuniH |

sampUjyAgre viShIdantaM dattAtreyamuvAcha tam || 20 ||

mayopahUtaH samprApto dattAtreya mahAmune |

smartRRigAmI tvamityetat kiM vadantI parIkShitum || 21 ||

mayAdya saMsmRRito.asi tvamaparAdhaM kShamasva me |

dattAtreyo muniM prAha mama prakRRitirIdRRishI || 22 ||

abhaktyA vA subhaktyA vA yaH smarennAmananyadhIH |

tadAnIM tamupAgamya dadAmi tadabhIpsitam || 23 ||

dattAtreyo muniM prAha dalAdanamunIshvaram |

yadiShTaM tadvRRiNIShva tvaM yat prApto.ahaM tvayA smRRitaH || 24 ||

dattAtreyaM muniM prAha mayA kimapi nochyate |

tvachchitte yat sthitaM tanme prayachCha munipu~Ngava || 25 ||

shrI dattAtreya uvAcha |

mamAsti vajrakavachaM gRRihANetyavadanmunim |

tathetya~NgIkRRitavate dalAdamunaye muniH || 26 ||

svavajrakavachaM prAha RRiShichChandaH purassaram |

nyAsaM dhyAnaM phalaM tatra prayojanamasheShataH || 27 ||

asya shrIdattAtreya vajrakavacha stotramantrasya, kirAtarUpI mahArudrRRiShiH, anuShTup ChandaH, shrIdattAtreyo devatA, drAM bIjam, AM shaktiH, krauM kIlakam.

OM Atmane namaH

OM drIM manase namaH

OM AM drIM shrIM sauH

OM klAM klIM klUM klaiM klauM klaH

shrI dattAtreya prasAda siddhyarthe jape viniyogaH

karanyAsaH |

OM drAM a~NguShThAbhyAM namaH |

OM drIM tarjanIbhyAM namaH |

OM drUM madhyamAbhyAM namaH |

OM draiM anAmikAbhyAM namaH |

OM drauM kaniShThikAbhyAM namaH |

OM draH karatalakarapRRiShThAbhyAM namaH |

hRRidayAdinyAsaH |

OM drAM hRRidayAya namaH |

OM drIM shirase svAhA |

OM drUM shikhAyai vaShaT |

OM draiM kavachAya hum |

OM drauM netratrayAya vauShaT |

OM draH astrAya phaT |

OM bhUrbhuvassuvaromiti digbandhaH |

dhyAnam |

jagada~NkurakandAya sachchidAnandamUrtaye |

dattAtreyAya yogIndrachandrAya paramAtmane || 1 ||

kadA yogI kadA bhogI kadA nagnaH pishAchavat |

dattAtreyo hariH sAkShAt bhuktimuktipradAyakaH || 2 ||

vArANasIpurasnAyI kòlhApurajapAdaraH |

mAhurIpurabhIkShAshI sahyashAyI digambaraH || 3 ||

indranIla samAkAraH chandrakAntisamadyutiH |

vaiDhUrya sadRRishasphUrtiH chalatki~nchijjaTAdharaH || 4 ||

snigdhadhAvalya yuktAkSho.atyantanIla kanInikaH |

bhrUvakShaHshmashrunIlANkaH shashANkasadRRishAnanaH || 5 ||

hAsanirjita nihAraH kaNThanirjita kambukaH |

mAMsalAMso dIrghabAhuH pANinirjitapallavaH || 6 ||

vishAlapInavakShAshcha tAmrapANirdalodaraH |

pRRithulashroNilalito vishAlajaghanasthalaH || 7 ||

rambhAstambhopamAnoruH jAnupUrvaikaja~NghakaH |

gUDhagulphaH kUrmapRRiShTho lasatvAdoparisthalaH || 8 ||

raktAravindasadRRisha ramaNIya padAdharaH |

charmAmbaradharo yogI smartRRigAmI kShaNekShaNe || 9 ||

j~nAnopadeshanirato vipaddharaNadIkShitaH |

siddhAsanasamAsIna RRijukAyo hasanmukhaH || 10 ||

vAmahastena varado dakShiNenAbhaya~NkaraH |

bAlonmatta pishAchIbhiH kvachid yuktaH parIkShitaH || 11 ||

tyAgI bhogI mahAyogI nityAnando nira~njanaH |

sarvarUpI sarvadAtA sarvagaH sarvakAmadaH || 12 ||

bhasmoddhUlita sarvA~Ngo mahApAtakanAshanaH |

bhuktiprado muktidAtA jIvanmukto na saMshayaH || 13 ||

evaM dhyAtvA.ananyachitto madvajrakavachaM paThet |

mAmeva pashyansarvatra sa mayA saha sa~ncharet || 14 ||

digambaraM bhasmasugandha lepanaM

chakraM trishUlaM DhamaruM gadAyudham |

padmAsanaM yogimunIndravanditaM

dattetinAmasmaraNena nityam || 15 ||

pa~nchopachArapUjA |

OM laM pRRithivItattvAtmane shrIdattAtreyAya namaH |

gandhaM parikalpayAmi|

OM haM AkAshatattvAtmane shrIdattAtreyAya namaH |

puShpaM parikalpayAmi |

OM yaM vAyutattvAtmane shrIdattAtreyAya namaH |

dhUpaM parikalpayAmi |

OM raM vahnitattvAtmane shrIdattAtreyAya namaH |

dIpaM parikalpayAmi |

OM vaM amRRita tattvAtmane shrIdattAtreyAya namaH |

amRRitanaivedyaM parikalpayAmi |

OM saM sarvatattvAtmane shrIdattAtreyAya namaH |

tAmbUlAdisarvopachArAn parikalpayAmi |

(anantaraM ‘OM drAM…’ iti mUlamantraM aShTottarashatavAraM (108) japet)

atha vajrakavacham |

OM dattAtreyAya shiraHpAtu sahasrAbjeShu saMsthitaH |

phAlaM pAtvAnasUyeyaH chandramaNDalamadhyagaH || 1 ||

kUrchaM manomayaH pAtu haM kShaM dvidalapadmabhUH |

jyotirUpo.akShiNIpAtu pAtu shabdAtmakaH shrutI || 2 ||

nAsikAM pAtu gandhAtmA mukhaM pAtu rasAtmakaH |

jihvAM vedAtmakaH pAtu dantoShThau pAtu dhArmikaH || 3 ||

kapolAvatribhUH pAtu pAtvasheShaM mamAtmavit |

sarvAtmA ShoDashArAbjasthitaH svAtmA.avatAd galam || 4 ||

skandhau chandrAnujaH pAtu bhujau pAtu kRRitAdibhUH |

jatruNI shatrujit pAtu pAtu vakShasthalaM hariH || 5 ||

kAdiThAntadvAdashArapadmago marudAtmakaH |

yogIshvareshvaraH pAtu hRRidayaM hRRidayasthitaH || 6 ||

pArshve hariH pArshvavartI pAtu pArshvasthitaH smRRitaH |

haThayogAdiyogaj~naH kukShiM pAtu kRRipAnidhiH || 7 ||

DakArAdi phakArAnta dashArasarasIruhe |

nAbhisthale vartamAno nAbhiM vahnyAtmako.avatu || 8 ||

vahnitattvamayo yogI rakShatAnmaNipUrakam |

kaTiM kaTisthabrahmANDavAsudevAtmako.avatu || 9 ||

vakArAdi lakArAnta ShaTpatrAmbujabodhakaH |

jalatattvamayo yogI svAdhiShThAnaM mamAvatu || 10 ||

siddhAsana samAsIna UrU siddheshvaro.avatu |

vAdisAnta chatuShpatrasaroruha nibodhakaH || 11 ||

mUlAdhAraM mahIrUpo rakShatAd vIryanigrahI |

pRRiShThaM cha sarvataH pAtu jAnunyastakarAmbujaH || 12 ||

jaNghe pAtvavadhUtendraH pAtvaNghrI tIrthapAvanaH |

sarvA~NgaM pAtu sarvAtmA romANyavatu keshavaH || 13 ||

charma charmAmbaraH pAtu raktaM bhaktipriyo.avatu |

mAMsaM mAMsakaraH pAtu majjAM majjAtmako.avatu || 14 ||

asthIni sthiradhIH pAyAnmedhAM vedhAH prapAlayet |

shukraM sukhakaraH pAtu chittaM pAtu dRRiDhAkRRitiH || 15 ||

manobuddhimaha~NkAraM hRRiShIkeshAtmako.avatu |

karmendriyANi pAtvIshaH pAtu j~nAnendriyANyajaH || 16 ||

bandhUn bandhUttamaH pAyAchChatrubhyaH pAtu shatrujit |

gRRihArAmadhanakShetraputrAdIn sha~Nkaro.avatu || 17 ||

bhAryAM prakRRitivit pAtu pashvAdIn pAtu shAr{}~NgabhRRit |

prANAn pAtu pradhAnaj~no bhakShyAdIn pAtu bhAskaraH || 18 ||

sukhaM chandrAtmakaH pAtu duHkhAt pAtu purAntakaH |

pashUn pashupatiH pAtu bhUtiM bhUteshvaro mama || 19 ||

prAchyAM viShaharaH pAtu pAtvAgneyyAM makhAtmakaH |

yAmyAM dharmAtmakaH pAtu nairRRityAM sarvavairihRRit || 20 ||

varAhaH pAtu vAruNyAM vAyavyAM prANado.avatu |

kauberyAM dhanadaH pAtu pAtvaishAnyAM mahAguruH || 21 ||

UrdhvaM pAtu mahAsiddhaH pAtvadhastAjjaTAdharaH |

rakShAhInaM tu yat sthAnaM rakShatvAdimunIshvaraH || 22 ||

karanyAsaH |

OM drAM a~NguShThAbhyAM namaH |

OM drIM tarjanIbhyAM namaH |

OM drUM madhyamAbhyAM namaH |

OM draiM anAmikAbhyAM namaH |

OM drauM kaniShThikAbhyAM namaH |

OM draH karatalakarapRRiShThAbhyAM namaH |

hRRidayAdinyAsaH |

OM drAM hRRidayAya namaH |

OM drIM shirase svAhA |

OM drUM shikhAyai vaShaT |

OM draiM kavachAya hum |

OM drauM netratrayAya vauShaT |

OM draH astrAya phaT |

OM bhUrbhuvassuvaromiti digvimokaH |

phalashRRiti ||

etanme vajrakavachaM yaH paThet shRRiNuyAdapi |

vajrakAyashchira~njIvI dattAtreyo.ahamabruvam || 23 ||

tyAgI bhogI mahAyogI sukhaduHkhavivarjitaH |

sarvatra siddhasa~Nkalpo jIvanmukto.adyavartate || 24 ||

ityuktvAntardadhe yogI dattAtreyo digambaraH |

dalAdano.api tajjaptvA jIvanmuktaH sa vartate || 25 ||

bhillo dUrashravA nAma tadAnIM shrutavAnidam |

sakRRichChravaNamAtreNa vajrA~Ngo.abhavadapyasau || 26 ||

ityetad vajrakavachaM dattAtreyasya yoginaH |

shrutvA sheShaM shambhumukhAt punarapyAha pArvatI || 27 ||

shrI pArvatyuvAcha |

etat kavacha mAhAtmyaM vada vistarato mama |

kutra kena kadA jApyaM kiyajjApyaM kathaM katham || 28 ||

uvAcha shambhustat sarvaM pArvatyA vinayoditam |

shrIparameshvara uvAcha |

shRRiNu pArvati vakShyAmi samAhitamanAvilam || 29 ||

dharmArthakAmamokShANAmidameva parAyaNam |

hastyashvarathapAdAti sarvaishvarya pradAyakam || 30 ||

putramitrakalatrAdi sarvasantoShasAdhanam |

vedashAstrAdividyAnAM vidhAnaM paramaM hi tat || 31 ||

sa~NgIta shAstra sAhitya satkavitva vidhAyakam |

buddhi vidyA smRRiti praj~nA mati prauDhipradAyakam || 32 ||

sarvasantoShakaraNaM sarvaduHkhanivAraNam |

shatrusaMhArakaM shIghraM yashaHkIrtivivardhanam || 33 ||

aShTasa~NkhyA mahArogAH sannipAtAstrayodasha |

ShaNNavatyakShirogAshcha viMshatirmeharogakAH || 34 ||

aShTAdashatu kuShThAni gulmAnyaShTavidhAnyapi |

ashItirvAtarogAshcha chatvAriMshattu paittikAH || 35 ||

viMshatiH shleShmarogAshcha kShayachAturthikAdayaH |

mantrayantrakuyogAdyAH kalpatantrAdinirmitAH || 36 ||

brahmarAkShasa vetAlakUShmANDAdi grahodbhavAH |

sa~NgajA deshakAlasthAstApatrayasamutthitAH || 37 ||

navagrahasamudbhUtA mahApAtaka sambhavAH |

sarve rogAH praNashyanti sahasrAvartanAd dhruvam || 38 ||

ayutAvRRittimAtreNa vandhyA putravatI bhavet |

ayutadvitayAvRRittyA hyapamRRityujayo bhavet || 39 ||

ayutatritayAchchaiva khecharatvaM prajAyate |

sahasrAyutadarvAk sarvakAryANi sAdhayet || 40 ||

lakShAvRRittyA sarvasiddhirbhavatyeva na saMshayaH || 41 ||

viShavRRikShasya mUleShu tiShThan vai dakShiNAmukhaH |

kurute mAsamAtreNa vairiNaM vikalendriyam || 42 ||

audumbaratarormUle vRRiddhikAmena jApyate |

shrIvRRikShamUle shrIkAmI tintriNI shAntikarmaNi || 43 ||

ojaskAmo.ashvatthamUle strIkAmaiH sahakArake |

j~nAnArthI tulasImUle garbhagehe sutArthibhiH || 44 ||

dhanArthibhistu sukShetre pashukAmaistu goShThake |

devAlaye sarvakAmaistatkAle sarvadarshitam || 45 ||

nAbhimAtrajale sthitvA bhAnumAlokya yo japet |

yuddhe vA shAstravAde vA sahasreNa jayo bhavet || 46 ||

kaNThamAtre jale sthitvA yo rAtrau kavachaM paThet |

jvarApasmArakuShThAdi tApajvaranivAraNam || 47 ||

yatra yat syAt sthiraM yadyat prasaktaM tannivartate |

tena tatra hi japtavyaM tataH siddhirbhaveddhruvam || 48 ||

ityuktavAn shivo gaurvai rahasyaM paramaM shubham |

yaH paThet vajrakavachaM dattAtreya samo bhavet || 49 ||

evaM shivena kathitaM himavatsutAyai

proktaM dalAdamunaye.atrisutena pUrvam |

yaH ko.api vajrakavachaM paThatIha loke

dattopamashcharati yogivarashchirAyuH || 50 ||

iti shrI rudrayAmale himavatkhaNDe mantrashAstre umAmaheshvarasaMvAde shrI dattAtreya vajrakavachastotraM sampUrNam ||