શ્રિ દત્તાત્રેય વજ્ર કવચમ્

ઋષય ઊચુઃ ।

કથં સઙ્કલ્પસિદ્ધિઃ સ્યાદ્વેદવ્યાસ કલૌયુગે ।

ધર્માર્થકામમોક્ષાણાં સાધનં કિમુદાહૃતમ્ ॥ 1 ॥

વ્યાસ ઉવાચ ।

શૃણ્વન્તુ ઋષયસ્સર્વે શીઘ્રં સઙ્કલ્પસાધનમ્ ।

સકૃદુચ્ચારમાત્રેણ ભોગમોક્ષપ્રદાયકમ્ ॥ 2 ॥

ગૌરીશૃઙ્ગે હિમવતઃ કલ્પવૃક્ષોપશોભિતમ્ ।

દીપ્તે દિવ્યમહારત્ન હેમમણ્ડપમધ્યગમ્ ॥ 3 ॥

રત્નસિંહાસનાસીનં પ્રસન્નં પરમેશ્વરમ્ ।

મન્દસ્મિતમુખામ્ભોજં શઙ્કરં પ્રાહ પાર્વતી ॥ 4 ॥

શ્રીદેવી ઉવાચ ।

દેવદેવ મહાદેવ લોકશઙ્કર શઙ્કર ।

મન્ત્રજાલાનિ સર્વાણિ યન્ત્રજાલાનિ કૃત્સ્નશઃ ॥ 5 ॥

તન્ત્રજાલાન્યનેકાનિ મયા ત્વત્તઃ શ્રુતાનિ વૈ ।

ઇદાનીં દ્રષ્ટુમિચ્છામિ વિશેષેણ મહીતલમ્ ॥ 6 ॥

ઇત્યુદીરિતમાકર્ણ્ય પાર્વત્યા પરમેશ્વરઃ ।

કરેણામૃજ્ય સન્તોષાત્ પાર્વતીં પ્રત્યભાષત ॥ 7 ॥

મયેદાનીં ત્વયા સાર્ધં વૃષમારુહ્ય ગમ્યતે ।

ઇત્યુક્ત્વા વૃષમારુહ્ય પાર્વત્યા સહ શઙ્કરઃ ॥ 8 ॥

યયૌ ભૂમણ્ડલં દ્રષ્ટું ગૌર્યાશ્ચિત્રાણિ દર્શયન્ ।

ક્વચિત્ વિન્ધ્યાચલપ્રાન્તે મહારણ્યે સુદુર્ગમે ॥ 9 ॥

તત્ર વ્યાહર્તુમાયાન્તં ભિલ્લં પરશુધારિણમ્ ।

વધ્યમાનં મહાવ્યાઘ્રં નખદંષ્ટ્રાભિરાવૃતમ્ ॥ 10 ॥

અતીવ ચિત્રચારિત્ર્યં વજ્રકાયસમાયુતમ્ ।

અપ્રયત્નમનાયાસમખિન્નં સુખમાસ્થિતમ્ ॥ 11 ॥

પલાયન્તં મૃગં પશ્ચાદ્વ્યાઘ્રો ભીત્યા પલાયતઃ ।

એતદાશ્ચર્યમાલોક્ય પાર્વતી પ્રાહ શઙ્કરમ્ ॥ 12 ॥

શ્રી પાર્વત્યુવાચ ।

કિમાશ્ચર્યં કિમાશ્ચર્યમગ્રે શમ્ભો નિરીક્ષ્યતામ્ ।

ઇત્યુક્તઃ સ તતઃ શમ્ભુર્દૃષ્ટ્વા પ્રાહ પુરાણવિત્ ॥ 13 ॥

શ્રી શઙ્કર ઉવાચ ।

ગૌરિ વક્ષ્યામિ તે ચિત્રમવાઙ્માનસગોચરમ્ ।

અદૃષ્ટપૂર્વમસ્માભિર્નાસ્તિ કિઞ્ચિન્ન કુત્રચિત્ ॥ 14 ॥

મયા સમ્યક્ સમાસેન વક્ષ્યતે શૃણુ પાર્વતિ ।

અયં દૂરશ્રવા નામ ભિલ્લઃ પરમધાર્મિકઃ ॥ 15 ॥

સમિત્કુશપ્રસૂનાનિ કન્દમૂલફલાદિકમ્ ।

પ્રત્યહં વિપિનં ગત્વા સમાદાય પ્રયાસતઃ ॥ 16 ॥

પ્રિયે પૂર્વં મુનીન્દ્રેભ્યઃ પ્રયચ્છતિ ન વાઞ્છતિ ।

તેઽપિ તસ્મિન્નપિ દયાં કુર્વતે સર્વમૌનિનઃ ॥ 17 ॥

દલાદનો મહાયોગી વસન્નેવ નિજાશ્રમે ।

કદાચિદસ્મરત્ સિદ્ધં દત્તાત્રેયં દિગમ્બરમ્ ॥ 18 ॥

દત્તાત્રેયઃ સ્મર્તૃગામી ચેતિહાસં પરીક્ષિતુમ્ ।

તત્‍ક્ષણાત્ સોઽપિ યોગીન્દ્રો દત્તાત્રેયઃ સમુત્થિતઃ ॥ 19 ॥

તં દૃષ્ટ્વાશ્ચર્યતોષાભ્યાં દલાદનમહામુનિઃ ।

સમ્પૂજ્યાગ્રે વિષીદન્તં દત્તાત્રેયમુવાચ તમ્ ॥ 20 ॥

મયોપહૂતઃ સમ્પ્રાપ્તો દત્તાત્રેય મહામુને ।

સ્મર્તૃગામી ત્વમિત્યેતત્ કિં વદન્તી પરીક્ષિતુમ્ ॥ 21 ॥

મયાદ્ય સંસ્મૃતોઽસિ ત્વમપરાધં ક્ષમસ્વ મે ।

દત્તાત્રેયો મુનિં પ્રાહ મમ પ્રકૃતિરીદૃશી ॥ 22 ॥

અભક્ત્યા વા સુભક્ત્યા વા યઃ સ્મરેન્નામનન્યધીઃ ।

તદાનીં તમુપાગમ્ય દદામિ તદભીપ્સિતમ્ ॥ 23 ॥

દત્તાત્રેયો મુનિં પ્રાહ દલાદનમુનીશ્વરમ્ ।

યદિષ્ટં તદ્વૃણીષ્વ ત્વં યત્ પ્રાપ્તોઽહં ત્વયા સ્મૃતઃ ॥ 24 ॥

દત્તાત્રેયં મુનિં પ્રાહ મયા કિમપિ નોચ્યતે ।

ત્વચ્ચિત્તે યત્ સ્થિતં તન્મે પ્રયચ્છ મુનિપુઙ્ગવ ॥ 25 ॥

શ્રી દત્તાત્રેય ઉવાચ ।

મમાસ્તિ વજ્રકવચં ગૃહાણેત્યવદન્મુનિમ્ ।

તથેત્યઙ્ગીકૃતવતે દલાદમુનયે મુનિઃ ॥ 26 ॥

સ્વવજ્રકવચં પ્રાહ ઋષિચ્છન્દઃ પુરસ્સરમ્ ।

ન્યાસં ધ્યાનં ફલં તત્ર પ્રયોજનમશેષતઃ ॥ 27 ॥

અસ્ય શ્રીદત્તાત્રેય વજ્રકવચ સ્તોત્રમન્ત્રસ્ય, કિરાતરૂપી મહારુદ્રૃષિઃ, અનુષ્ટુપ્ છન્દઃ, શ્રીદત્તાત્રેયો દેવતા, દ્રાં બીજમ્, આં શક્તિઃ, ક્રૌં કીલકમ્.

ૐ આત્મને નમઃ

ૐ દ્રીં મનસે નમઃ

ૐ આં દ્રીં શ્રીં સૌઃ

ૐ ક્લાં ક્લીં ક્લૂં ક્લૈં ક્લૌં ક્લઃ

શ્રી દત્તાત્રેય પ્રસાદ સિદ્ધ્યર્થે જપે વિનિયોગઃ

કરન્યાસઃ ।

ૐ દ્રાં અઙ્ગુષ્ઠાભ્યાં નમઃ ।

ૐ દ્રીં તર્જનીભ્યાં નમઃ ।

ૐ દ્રૂં મધ્યમાભ્યાં નમઃ ।

ૐ દ્રૈં અનામિકાભ્યાં નમઃ ।

ૐ દ્રૌં કનિષ્ઠિકાભ્યાં નમઃ ।

ૐ દ્રઃ કરતલકરપૃષ્ઠાભ્યાં નમઃ ।

હૃદયાદિન્યાસઃ ।

ૐ દ્રાં હૃદયાય નમઃ ।

ૐ દ્રીં શિરસે સ્વાહા ।

ૐ દ્રૂં શિખાયૈ વષટ્ ।

ૐ દ્રૈં કવચાય હુમ્ ।

ૐ દ્રૌં નેત્રત્રયાય વૌષટ્ ।

ૐ દ્રઃ અસ્ત્રાય ફટ્ ।

ૐ ભૂર્ભુવસ્સુવરોમિતિ દિગ્બન્ધઃ ।

ધ્યાનમ્ ।

જગદઙ્કુરકન્દાય સચ્ચિદાનન્દમૂર્તયે ।

દત્તાત્રેયાય યોગીન્દ્રચન્દ્રાય પરમાત્મને ॥ 1 ॥

કદા યોગી કદા ભોગી કદા નગ્નઃ પિશાચવત્ ।

દત્તાત્રેયો હરિઃ સાક્ષાત્ ભુક્તિમુક્તિપ્રદાયકઃ ॥ 2 ॥

વારાણસીપુરસ્નાયી કॊલ્હાપુરજપાદરઃ ।

માહુરીપુરભીક્ષાશી સહ્યશાયી દિગમ્બરઃ ॥ 3 ॥

ઇન્દ્રનીલ સમાકારઃ ચન્દ્રકાન્તિસમદ્યુતિઃ ।

વૈઢૂર્ય સદૃશસ્ફૂર્તિઃ ચલત્કિઞ્ચિજ્જટાધરઃ ॥ 4 ॥

સ્નિગ્ધધાવલ્ય યુક્તાક્ષોઽત્યન્તનીલ કનીનિકઃ ।

ભ્રૂવક્ષઃશ્મશ્રુનીલાઙ્કઃ શશાઙ્કસદૃશાનનઃ ॥ 5 ॥

હાસનિર્જિત નિહારઃ કણ્ઠનિર્જિત કમ્બુકઃ ।

માંસલાંસો દીર્ઘબાહુઃ પાણિનિર્જિતપલ્લવઃ ॥ 6 ॥

વિશાલપીનવક્ષાશ્ચ તામ્રપાણિર્દલોદરઃ ।

પૃથુલશ્રોણિલલિતો વિશાલજઘનસ્થલઃ ॥ 7 ॥

રમ્ભાસ્તમ્ભોપમાનોરુઃ જાનુપૂર્વૈકજઙ્ઘકઃ ।

ગૂઢગુલ્ફઃ કૂર્મપૃષ્ઠો લસત્વાદોપરિસ્થલઃ ॥ 8 ॥

રક્તારવિન્દસદૃશ રમણીય પદાધરઃ ।

ચર્મામ્બરધરો યોગી સ્મર્તૃગામી ક્ષણેક્ષણે ॥ 9 ॥

જ્ઞાનોપદેશનિરતો વિપદ્ધરણદીક્ષિતઃ ।

સિદ્ધાસનસમાસીન ઋજુકાયો હસન્મુખઃ ॥ 10 ॥

વામહસ્તેન વરદો દક્ષિણેનાભયઙ્કરઃ ।

બાલોન્મત્ત પિશાચીભિઃ ક્વચિદ્ યુક્તઃ પરીક્ષિતઃ ॥ 11 ॥

ત્યાગી ભોગી મહાયોગી નિત્યાનન્દો નિરઞ્જનઃ ।

સર્વરૂપી સર્વદાતા સર્વગઃ સર્વકામદઃ ॥ 12 ॥

ભસ્મોદ્ધૂલિત સર્વાઙ્ગો મહાપાતકનાશનઃ ।

ભુક્તિપ્રદો મુક્તિદાતા જીવન્મુક્તો ન સંશયઃ ॥ 13 ॥

એવં ધ્યાત્વાઽનન્યચિત્તો મદ્વજ્રકવચં પઠેત્ ।

મામેવ પશ્યન્સર્વત્ર સ મયા સહ સઞ્ચરેત્ ॥ 14 ॥

દિગમ્બરં ભસ્મસુગન્ધ લેપનં

ચક્રં ત્રિશૂલં ઢમરું ગદાયુધમ્ ।

પદ્માસનં યોગિમુનીન્દ્રવન્દિતં

દત્તેતિનામસ્મરણેન નિત્યમ્ ॥ 15 ॥

પઞ્ચોપચારપૂજા ।

ૐ લં પૃથિવીતત્ત્વાત્મને શ્રીદત્તાત્રેયાય નમઃ ।

ગન્ધં પરિકલ્પયામિ।

ૐ હં આકાશતત્ત્વાત્મને શ્રીદત્તાત્રેયાય નમઃ ।

પુષ્પં પરિકલ્પયામિ ।

ૐ યં વાયુતત્ત્વાત્મને શ્રીદત્તાત્રેયાય નમઃ ।

ધૂપં પરિકલ્પયામિ ।

ૐ રં વહ્નિતત્ત્વાત્મને શ્રીદત્તાત્રેયાય નમઃ ।

દીપં પરિકલ્પયામિ ।

ૐ વં અમૃત તત્ત્વાત્મને શ્રીદત્તાત્રેયાય નમઃ ।

અમૃતનૈવેદ્યં પરિકલ્પયામિ ।

ૐ સં સર્વતત્ત્વાત્મને શ્રીદત્તાત્રેયાય નમઃ ।

તામ્બૂલાદિસર્વોપચારાન્ પરિકલ્પયામિ ।

(અનન્તરં ‘ૐ દ્રાં…’ ઇતિ મૂલમન્ત્રં અષ્ટોત્તરશતવારં (108) જપેત્)

અથ વજ્રકવચમ્ ।

ૐ દત્તાત્રેયાય શિરઃપાતુ સહસ્રાબ્જેષુ સંસ્થિતઃ ।

ફાલં પાત્વાનસૂયેયઃ ચન્દ્રમણ્ડલમધ્યગઃ ॥ 1 ॥

કૂર્ચં મનોમયઃ પાતુ હં ક્ષં દ્વિદલપદ્મભૂઃ ।

જ્યોતિરૂપોઽક્ષિણીપાતુ પાતુ શબ્દાત્મકઃ શ્રુતી ॥ 2 ॥

નાસિકાં પાતુ ગન્ધાત્મા મુખં પાતુ રસાત્મકઃ ।

જિહ્વાં વેદાત્મકઃ પાતુ દન્તોષ્ઠૌ પાતુ ધાર્મિકઃ ॥ 3 ॥

કપોલાવત્રિભૂઃ પાતુ પાત્વશેષં મમાત્મવિત્ ।

સર્વાત્મા ષોડશારાબ્જસ્થિતઃ સ્વાત્માઽવતાદ્ ગલમ્ ॥ 4 ॥

સ્કન્ધૌ ચન્દ્રાનુજઃ પાતુ ભુજૌ પાતુ કૃતાદિભૂઃ ।

જત્રુણી શત્રુજિત્ પાતુ પાતુ વક્ષસ્થલં હરિઃ ॥ 5 ॥

કાદિઠાન્તદ્વાદશારપદ્મગો મરુદાત્મકઃ ।

યોગીશ્વરેશ્વરઃ પાતુ હૃદયં હૃદયસ્થિતઃ ॥ 6 ॥

પાર્શ્વે હરિઃ પાર્શ્વવર્તી પાતુ પાર્શ્વસ્થિતઃ સ્મૃતઃ ।

હઠયોગાદિયોગજ્ઞઃ કુક્ષિં પાતુ કૃપાનિધિઃ ॥ 7 ॥

ડકારાદિ ફકારાન્ત દશારસરસીરુહે ।

નાભિસ્થલે વર્તમાનો નાભિં વહ્ન્યાત્મકોઽવતુ ॥ 8 ॥

વહ્નિતત્ત્વમયો યોગી રક્ષતાન્મણિપૂરકમ્ ।

કટિં કટિસ્થબ્રહ્માણ્ડવાસુદેવાત્મકોઽવતુ ॥ 9 ॥

વકારાદિ લકારાન્ત ષટ્પત્રામ્બુજબોધકઃ ।

જલતત્ત્વમયો યોગી સ્વાધિષ્ઠાનં મમાવતુ ॥ 10 ॥

સિદ્ધાસન સમાસીન ઊરૂ સિદ્ધેશ્વરોઽવતુ ।

વાદિસાન્ત ચતુષ્પત્રસરોરુહ નિબોધકઃ ॥ 11 ॥

મૂલાધારં મહીરૂપો રક્ષતાદ્ વીર્યનિગ્રહી ।

પૃષ્ઠં ચ સર્વતઃ પાતુ જાનુન્યસ્તકરામ્બુજઃ ॥ 12 ॥

જઙ્ઘે પાત્વવધૂતેન્દ્રઃ પાત્વઙ્ઘ્રી તીર્થપાવનઃ ।

સર્વાઙ્ગં પાતુ સર્વાત્મા રોમાણ્યવતુ કેશવઃ ॥ 13 ॥

ચર્મ ચર્મામ્બરઃ પાતુ રક્તં ભક્તિપ્રિયોઽવતુ ।

માંસં માંસકરઃ પાતુ મજ્જાં મજ્જાત્મકોઽવતુ ॥ 14 ॥

અસ્થીનિ સ્થિરધીઃ પાયાન્મેધાં વેધાઃ પ્રપાલયેત્ ।

શુક્રં સુખકરઃ પાતુ ચિત્તં પાતુ દૃઢાકૃતિઃ ॥ 15 ॥

મનોબુદ્ધિમહઙ્કારં હૃષીકેશાત્મકોઽવતુ ।

કર્મેન્દ્રિયાણિ પાત્વીશઃ પાતુ જ્ઞાનેન્દ્રિયાણ્યજઃ ॥ 16 ॥

બન્ધૂન્ બન્ધૂત્તમઃ પાયાચ્છત્રુભ્યઃ પાતુ શત્રુજિત્ ।

ગૃહારામધનક્ષેત્રપુત્રાદીન્ શઙ્કરોઽવતુ ॥ 17 ॥

ભાર્યાં પ્રકૃતિવિત્ પાતુ પશ્વાદીન્ પાતુ શાર્‍ઙ્ગભૃત્ ।

પ્રાણાન્ પાતુ પ્રધાનજ્ઞો ભક્ષ્યાદીન્ પાતુ ભાસ્કરઃ ॥ 18 ॥

સુખં ચન્દ્રાત્મકઃ પાતુ દુઃખાત્ પાતુ પુરાન્તકઃ ।

પશૂન્ પશુપતિઃ પાતુ ભૂતિં ભૂતેશ્વરો મમ ॥ 19 ॥

પ્રાચ્યાં વિષહરઃ પાતુ પાત્વાગ્નેય્યાં મખાત્મકઃ ।

યામ્યાં ધર્માત્મકઃ પાતુ નૈરૃત્યાં સર્વવૈરિહૃત્ ॥ 20 ॥

વરાહઃ પાતુ વારુણ્યાં વાયવ્યાં પ્રાણદોઽવતુ ।

કૌબેર્યાં ધનદઃ પાતુ પાત્વૈશાન્યાં મહાગુરુઃ ॥ 21 ॥

ઊર્ધ્વં પાતુ મહાસિદ્ધઃ પાત્વધસ્તાજ્જટાધરઃ ।

રક્ષાહીનં તુ યત્ સ્થાનં રક્ષત્વાદિમુનીશ્વરઃ ॥ 22 ॥

કરન્યાસઃ ।

ૐ દ્રાં અઙ્ગુષ્ઠાભ્યાં નમઃ ।

ૐ દ્રીં તર્જનીભ્યાં નમઃ ।

ૐ દ્રૂં મધ્યમાભ્યાં નમઃ ।

ૐ દ્રૈં અનામિકાભ્યાં નમઃ ।

ૐ દ્રૌં કનિષ્ઠિકાભ્યાં નમઃ ।

ૐ દ્રઃ કરતલકરપૃષ્ઠાભ્યાં નમઃ ।

હૃદયાદિન્યાસઃ ।

ૐ દ્રાં હૃદયાય નમઃ ।

ૐ દ્રીં શિરસે સ્વાહા ।

ૐ દ્રૂં શિખાયૈ વષટ્ ।

ૐ દ્રૈં કવચાય હુમ્ ।

ૐ દ્રૌં નેત્રત્રયાય વૌષટ્ ।

ૐ દ્રઃ અસ્ત્રાય ફટ્ ।

ૐ ભૂર્ભુવસ્સુવરોમિતિ દિગ્વિમોકઃ ।

ફલશૃતિ ॥

એતન્મે વજ્રકવચં યઃ પઠેત્ શૃણુયાદપિ ।

વજ્રકાયશ્ચિરઞ્જીવી દત્તાત્રેયોઽહમબ્રુવમ્ ॥ 23 ॥

ત્યાગી ભોગી મહાયોગી સુખદુઃખવિવર્જિતઃ ।

સર્વત્ર સિદ્ધસઙ્કલ્પો જીવન્મુક્તોઽદ્યવર્તતે ॥ 24 ॥

ઇત્યુક્ત્વાન્તર્દધે યોગી દત્તાત્રેયો દિગમ્બરઃ ।

દલાદનોઽપિ તજ્જપ્ત્વા જીવન્મુક્તઃ સ વર્તતે ॥ 25 ॥

ભિલ્લો દૂરશ્રવા નામ તદાનીં શ્રુતવાનિદમ્ ।

સકૃચ્છ્રવણમાત્રેણ વજ્રાઙ્ગોઽભવદપ્યસૌ ॥ 26 ॥

ઇત્યેતદ્ વજ્રકવચં દત્તાત્રેયસ્ય યોગિનઃ ।

શ્રુત્વા શેષં શમ્ભુમુખાત્ પુનરપ્યાહ પાર્વતી ॥ 27 ॥

શ્રી પાર્વત્યુવાચ ।

એતત્ કવચ માહાત્મ્યં વદ વિસ્તરતો મમ ।

કુત્ર કેન કદા જાપ્યં કિયજ્જાપ્યં કથં કથમ્ ॥ 28 ॥

ઉવાચ શમ્ભુસ્તત્ સર્વં પાર્વત્યા વિનયોદિતમ્ ।

શ્રીપરમેશ્વર ઉવાચ ।

શૃણુ પાર્વતિ વક્ષ્યામિ સમાહિતમનાવિલમ્ ॥ 29 ॥

ધર્માર્થકામમોક્ષાણામિદમેવ પરાયણમ્ ।

હસ્ત્યશ્વરથપાદાતિ સર્વૈશ્વર્ય પ્રદાયકમ્ ॥ 30 ॥

પુત્રમિત્રકલત્રાદિ સર્વસન્તોષસાધનમ્ ।

વેદશાસ્ત્રાદિવિદ્યાનાં વિધાનં પરમં હિ તત્ ॥ 31 ॥

સઙ્ગીત શાસ્ત્ર સાહિત્ય સત્કવિત્વ વિધાયકમ્ ।

બુદ્ધિ વિદ્યા સ્મૃતિ પ્રજ્ઞા મતિ પ્રૌઢિપ્રદાયકમ્ ॥ 32 ॥

સર્વસન્તોષકરણં સર્વદુઃખનિવારણમ્ ।

શત્રુસંહારકં શીઘ્રં યશઃકીર્તિવિવર્ધનમ્ ॥ 33 ॥

અષ્ટસઙ્ખ્યા મહારોગાઃ સન્નિપાતાસ્ત્રયોદશ ।

ષણ્ણવત્યક્ષિરોગાશ્ચ વિંશતિર્મેહરોગકાઃ ॥ 34 ॥

અષ્ટાદશતુ કુષ્ઠાનિ ગુલ્માન્યષ્ટવિધાન્યપિ ।

અશીતિર્વાતરોગાશ્ચ ચત્વારિંશત્તુ પૈત્તિકાઃ ॥ 35 ॥

વિંશતિઃ શ્લેષ્મરોગાશ્ચ ક્ષયચાતુર્થિકાદયઃ ।

મન્ત્રયન્ત્રકુયોગાદ્યાઃ કલ્પતન્ત્રાદિનિર્મિતાઃ ॥ 36 ॥

બ્રહ્મરાક્ષસ વેતાલકૂષ્માણ્ડાદિ ગ્રહોદ્ભવાઃ ।

સઙ્ગજા દેશકાલસ્થાસ્તાપત્રયસમુત્થિતાઃ ॥ 37 ॥

નવગ્રહસમુદ્ભૂતા મહાપાતક સમ્ભવાઃ ।

સર્વે રોગાઃ પ્રણશ્યન્તિ સહસ્રાવર્તનાદ્ ધ્રુવમ્ ॥ 38 ॥

અયુતાવૃત્તિમાત્રેણ વન્ધ્યા પુત્રવતી ભવેત્ ।

અયુતદ્વિતયાવૃત્ત્યા હ્યપમૃત્યુજયો ભવેત્ ॥ 39 ॥

અયુતત્રિતયાચ્ચૈવ ખેચરત્વં પ્રજાયતે ।

સહસ્રાયુતદર્વાક્ સર્વકાર્યાણિ સાધયેત્ ॥ 40 ॥

લક્ષાવૃત્ત્યા સર્વસિદ્ધિર્ભવત્યેવ ન સંશયઃ ॥ 41 ॥

વિષવૃક્ષસ્ય મૂલેષુ તિષ્ઠન્ વૈ દક્ષિણામુખઃ ।

કુરુતે માસમાત્રેણ વૈરિણં વિકલેન્દ્રિયમ્ ॥ 42 ॥

ઔદુમ્બરતરોર્મૂલે વૃદ્ધિકામેન જાપ્યતે ।

શ્રીવૃક્ષમૂલે શ્રીકામી તિન્ત્રિણી શાન્તિકર્મણિ ॥ 43 ॥

ઓજસ્કામોઽશ્વત્થમૂલે સ્ત્રીકામૈઃ સહકારકે ।

જ્ઞાનાર્થી તુલસીમૂલે ગર્ભગેહે સુતાર્થિભિઃ ॥ 44 ॥

ધનાર્થિભિસ્તુ સુક્ષેત્રે પશુકામૈસ્તુ ગોષ્ઠકે ।

દેવાલયે સર્વકામૈસ્તત્કાલે સર્વદર્શિતમ્ ॥ 45 ॥

નાભિમાત્રજલે સ્થિત્વા ભાનુમાલોક્ય યો જપેત્ ।

યુદ્ધે વા શાસ્ત્રવાદે વા સહસ્રેણ જયો ભવેત્ ॥ 46 ॥

કણ્ઠમાત્રે જલે સ્થિત્વા યો રાત્રૌ કવચં પઠેત્ ।

જ્વરાપસ્મારકુષ્ઠાદિ તાપજ્વરનિવારણમ્ ॥ 47 ॥

યત્ર યત્ સ્યાત્ સ્થિરં યદ્યત્ પ્રસક્તં તન્નિવર્તતે ।

તેન તત્ર હિ જપ્તવ્યં તતઃ સિદ્ધિર્ભવેદ્ધ્રુવમ્ ॥ 48 ॥

ઇત્યુક્તવાન્ શિવો ગૌર્વૈ રહસ્યં પરમં શુભમ્ ।

યઃ પઠેત્ વજ્રકવચં દત્તાત્રેય સમો ભવેત્ ॥ 49 ॥

એવં શિવેન કથિતં હિમવત્સુતાયૈ

પ્રોક્તં દલાદમુનયેઽત્રિસુતેન પૂર્વમ્ ।

યઃ કોઽપિ વજ્રકવચં પઠતીહ લોકે

દત્તોપમશ્ચરતિ યોગિવરશ્ચિરાયુઃ ॥ 50 ॥

ઇતિ શ્રી રુદ્રયામલે હિમવત્ખણ્ડે મન્ત્રશાસ્ત્રે ઉમામહેશ્વરસંવાદે શ્રી દત્તાત્રેય વજ્રકવચસ્તોત્રં સમ્પૂર્ણમ્ ॥