Sree Lalita Sahasra Nama Stotram
Sree Lalita Sahasra Nama Stotram
zrI lalitA sahasra nAma stotram
zloka 1
om ||
asya zrI lalitA divya sahasranAma stotra mahAmantrasya, vazinyAdi vAgdevatA RSayaH, anuSTup chandaH, zrI lalitA parAbhaTTArikA mahA tripura sundarI devatA, aiM bIjaM, klIM zaktiH, sauH kIlakaM, mama dharmArtha kAma mokSa caturvidha phalapuruSArtha siddhyarthe lalitA tripurasundarI parAbhaTTArikA sahasra nAma jape viniyogaH
karanyAsaH
aiM aGguSTAbhyAM namaH, klIM tarjanIbhyAM namaH, sauH madhyamAbhyAM namaH, sauH anAmikAbhyAM namaH, klIM kaniSThikAbhyAM namaH, aiM karatala karapRSThAbhyAM namaH
aGganyAsaH
aiM hRdayAya namaH, klIM zirase svAhA, sauH zikhAyai vaSaT, sauH kavacAya huM, klIM netratrayAya vauSaT, aiM astrAyaphaT, bhUrbhuvassuvaromiti digbandhaH
dhyAnaM
aruNAM karuNA taraGgitAkSIM dhRtapAzAGkuza puSpabANacApAm |
aNimAdibhi rAvRtAM mayUkhaiH ahamityeva vibhAvaye bhavAnIm || 1 ||
dhyAyet padmAsanasthAM vikasitavadanAM padma patrAyatAkSIM
hemAbhAM pItavastrAM karakalita lasamaddhemapadmAM varAGgIm |
sarvAlaGkArayuktAM sakalamabhayadAM bhaktanamrAM bhavAnIM
zrI vidyAM zAntamUrtiM sakala surasutAM sarvasampat-pradAtrIm || 2 ||
sakuGkuma vilepanA malikacumbi kastUrikAM
samanda hasitekSaNAM sazaracApa pAzAGkuzAm |
azeSa janamohinI maruNamAlya bhUSojjvalAM
japAkusuma bhAsurAM japavidhau smare dambikAm || 3 ||
sindhUrAruNa vigrahAM triNayanAM mANikya maulisphura-
ttArAnAyaka zekharAM smitamukhI mApIna vakSoruhAm |
pANibhyA malipUrNa ratna caSakaM raktotpalaM bibhratIM
saumyAM ratnaghaTastha rakta caraNAM dhyAyetparAmambikAm || 4 ||
lamityAdi paJcapUjAM vibhAvayet
laM pRthivI tattvAtmikAyai zrI lalitAdevyai gandhaM parikalpayAmi
haM AkAza tattvAtmikAyai zrI lalitAdevyai puSpaM parikalpayAmi
yaM vAyu tattvAtmikAyai zrI lalitAdevyai dhUpaM parikalpayAmi
raM vahni tattvAtmikAyai zrI lalitAdevyai dIpaM parikalpayAmi
vaM amRta tattvAtmikAyai zrI lalitAdevyai amRta naivedyaM parikalpayAmi
saM sarva tattvAtmikAyai zrI lalitAdevyai tAmbUlAdi sarvopacArAn parikalpayAmi
gururbrahma gururviSNuH gururdevo mahezvaraH |
gurussAkSAt parabrahma tasmai zrI gurave namaH ||
hariH OM
zrI mAtA, zrI mahArAjJI, zrImat-siMhAsanezvarI |
cidagni kuNDasambhUtA, devakAryasamudyatA || 1 ||
udyadbhAnu sahasrAbhA, caturbAhu samanvitA |
rAgasvarUpa pAzADhyA, krodhAkArAGkuzojjvalA || 2 ||
manorUpekSukodaNDA, paJcatanmAtra sAyakA |
nijAruNa prabhApUra majjad-brahmANDamaNDalA || 3 ||
campakAzoka punnAga saugandhika lasatkacA
kuruvinda maNizreNI kanatkoTIra maNDitA || 4 ||
aSTamI candra vibhrAja dalikasthala zobhitA |
mukhacandra kalaGkAbha mRganAbhi vizeSakA || 5 ||
vadanasmara mAGgalya gRhatoraNa cillikA |
vaktralakSmI parIvAha calanmInAbha locanA || 6 ||
navacampaka puSpAbha nAsAdaNDa virAjitA |
tArAkAnti tiraskAri nAsAbharaNa bhAsurA || 7 ||
kadamba maJjarIklRpta karNapUra manoharA |
tATaGka yugalIbhUta tapanoDupa maNDalA || 8 ||
padmarAga zilAdarza paribhAvi kapolabhUH |
navavidruma bimbazrIH nyakkAri radanacchadA || 9 ||
zuddha vidyAGkurAkAra dvijapaGkti dvayojjvalA |
karpUravITi kAmoda samAkarSaddigantarA || 10 ||
nijasallApa mAdhurya vinirbhatsita kacchapI |
mandasmita prabhApUra majjat-kAmeza mAnasA || 11 ||
anAkalita sAdRzya cubuka zrI virAjitA |
kAmezabaddha mAGgalya sUtrazobhita kantharA || 12 ||
kanakAGgada keyUra kamanIya bhujAnvitA |
ratnagraiveya cintAka lolamuktA phalAnvitA || 13 ||
kAmezvara premaratna maNi pratipaNastanI|
nAbhyAlavAla romAli latAphala kucadvayI || 14 ||
lakSyaromalatA dhAratA samunneya madhyamA |
stanabhAra dalan-madhya paTTabandha valitrayA || 15 ||
aruNAruNa kausumbha vastra bhAsvat-kaTItaTI |
ratnakiGkiNi kAramya razanAdAma bhUSitA || 16 ||
kAmeza jJAta saubhAgya mArdavoru dvayAnvitA |
mANikya makuTAkAra jAnudvaya virAjitA || 17 ||
indragopa parikSipta smara tUNAbha jaGghikA |
gUDhagulbhA kUrmapRSTha jayiSNu prapadAnvitA || 18 ||
nakhadIdhiti saJchanna namajjana tamoguNA |
padadvaya prabhAjAla parAkRta saroruhA || 19 ||
ziJjAna maNimaJjIra maNDita zrI padAmbujA |
marAlI mandagamanA, mahAlAvaNya zevadhiH || 20 ||
sarvAruNA'navadyAGgI sarvAbharaNa bhUSitA |
zivakAmezvarAGkasthA, zivA, svAdhIna vallabhA || 21 ||
sumeru madhyazRGgasthA, zrImannagara nAyikA |
cintAmaNi gRhAntasthA, paJcabrahmAsanasthitA || 22 ||
mahApadmATavI saMsthA, kadamba vanavAsinI |
sudhAsAgara madhyasthA, kAmAkSI kAmadAyinI || 23 ||
devarSi gaNasaGghAta stUyamAnAtma vaibhavA |
bhaNDAsura vadhodyukta zaktisenA samanvitA || 24 ||
sampatkarI samArUDha sindhura vrajasevitA |
azvArUDhAdhiSThitAzva koTikoTi bhirAvRtA || 25 ||
cakrarAja rathArUDha sarvAyudha pariSkRtA |
geyacakra rathArUDha mantriNI parisevitA || 26 ||
kiricakra rathArUDha daNDanAthA puraskRtA |
jvAlAmAlini kAkSipta vahniprAkAra madhyagA || 27 ||
bhaNDasainya vadhodyukta zakti vikramaharSitA |
nityA parAkramATopa nirIkSaNa samutsukA || 28 ||
bhaNDaputra vadhodyukta bAlAvikrama nanditA |
mantriNyambA viracita viSaGga vadhatoSitA || 29 ||
vizukra prANaharaNa vArAhI vIryananditA |
kAmezvara mukhAloka kalpita zrI gaNezvarA || 30 ||
mahAgaNeza nirbhinna vighnayantra praharSitA |
bhaNDAsurendra nirmukta zastra pratyastra varSiNI || 31 ||
karAGguli nakhotpanna nArAyaNa dazAkRtiH |
mahApAzupatAstrAgni nirdagdhAsura sainikA || 32 ||
kAmezvarAstra nirdagdha sabhaNDAsura zUnyakA |
brahmopendra mahendrAdi devasaMstuta vaibhavA || 33 ||
haranetrAgni sandagdha kAma saJjIvanauSadhiH |
zrImadvAgbhava kUTaika svarUpa mukhapaGkajA || 34 ||
kaNThAdhaH kaTiparyanta madhyakUTa svarUpiNI |
zaktikUTaika tApanna kaTyathobhAga dhAriNI || 35 ||
mUlamantrAtmikA, mUlakUTa traya kalebarA |
kulAmRtaika rasikA, kulasaGketa pAlinI || 36 ||
kulAGganA, kulAntaHsthA, kaulinI, kulayoginI |
akulA, samayAntaHsthA, samayAcAra tatparA || 37 ||
mUlAdhAraika nilayA, brahmagranthi vibhedinI |
maNipUrAnta ruditA, viSNugranthi vibhedinI || 38 ||
AjJA cakrAntarAlasthA, rudragranthi vibhedinI |
sahasrArAmbujA rUDhA, sudhAsArAbhi varSiNI || 39 ||
taTillatA samaruciH, SaT-cakropari saMsthitA |
mahAzaktiH, kuNDalinI, bisatantu tanIyasI || 40 ||
bhavAnI, bhAvanAgamyA, bhavAraNya kuThArikA |
bhadrapriyA, bhadramUrti, rbhaktasaubhAgya dAyinI || 41 ||
bhaktipriyA, bhaktigamyA, bhaktivazyA, bhayApahA |
zAmbhavI, zAradArAdhyA, zarvANI, zarmadAyinI || 42 ||
zAGkarI, zrIkarI, sAdhvI, zaraccandranibhAnanA |
zAtodarI, zAntimatI, nirAdhArA, niraJjanA || 43 ||
nirlepA, nirmalA, nityA, nirAkArA, nirAkulA |
nirguNA, niSkalA, zAntA, niSkAmA, nirupaplavA || 44 ||
nityamuktA, nirvikArA, niSprapaJcA, nirAzrayA |
nityazuddhA, nityabuddhA, niravadyA, nirantarA || 45 ||
niSkAraNA, niSkalaGkA, nirupAdhi, rnirIzvarA |
nIrAgA, rAgamathanI, nirmadA, madanAzinI || 46 ||
nizcintA, nirahaGkArA, nirmohA, mohanAzinI |
nirmamA, mamatAhantrI, niSpApA, pApanAzinI || 47 ||
niSkrodhA, krodhazamanI, nirlobhA, lobhanAzinI |
niHsaMzayA, saMzayaghnI, nirbhavA, bhavanAzinI || 48 ||
nirvikalpA, nirAbAdhA, nirbhedA, bhedanAzinI |
nirnAzA, mRtyumathanI, niSkriyA, niSparigrahA || 49 ||
nistulA, nIlacikurA, nirapAyA, niratyayA |
durlabhA, durgamA, durgA, duHkhahantrI, sukhapradA || 50 ||
duSTadUrA, durAcAra zamanI, doSavarjitA |
sarvajJA, sAndrakaruNA, samAnAdhikavarjitA || 51 ||
sarvazaktimayI, sarvamaGgalA, sadgatipradA |
sarvezvarI, sarvamayI, sarvamantra svarUpiNI || 52 ||
sarvayantrAtmikA, sarvatantrarUpA, manonmanI |
mAhezvarI, mahAdevI, mahAlakSmI, rmRDapriyA || 53 ||
mahArUpA, mahApUjyA, mahApAtaka nAzinI |
mahAmAyA, mahAsattvA, mahAzakti rmahAratiH || 54 ||
mahAbhogA, mahaizvaryA, mahAvIryA, mahAbalA |
mahAbuddhi, rmahAsiddhi, rmahAyogezvarezvarI || 55 ||
mahAtantrA, mahAmantrA, mahAyantrA, mahAsanA |
mahAyAga kramArAdhyA, mahAbhairava pUjitA || 56 ||
mahezvara mahAkalpa mahAtANDava sAkSiNI |
mahAkAmeza mahiSI, mahAtripura sundarI || 57 ||
catuHSaSTyupacArADhyA, catuSSaSTi kalAmayI |
mahA catuSSaSTi koTi yoginI gaNasevitA || 58 ||
manuvidyA, candravidyA, candramaNDalamadhyagA |
cArurUpA, cAruhAsA, cArucandra kalAdharA || 59 ||
carAcara jagannAthA, cakrarAja niketanA |
pArvatI, padmanayanA, padmarAga samaprabhA || 60 ||
paJcapretAsanAsInA, paJcabrahma svarUpiNI |
cinmayI, paramAnandA, vijJAna ghanarUpiNI || 61 ||
dhyAnadhyAtR dhyeyarUpA, dharmAdharma vivarjitA |
vizvarUpA, jAgariNI, svapantI, taijasAtmikA || 62 ||
suptA, prAjJAtmikA, turyA, sarvAvasthA vivarjitA |
sRSTikartrI, brahmarUpA, goptrI, govindarUpiNI || 63 ||
saMhAriNI, rudrarUpA, tirodhAnakarIzvarI |
sadAzivAnugrahadA, paJcakRtya parAyaNA || 64 ||
bhAnumaNDala madhyasthA, bhairavI, bhagamAlinI |
padmAsanA, bhagavatI, padmanAbha sahodarI || 65 ||
unmeSa nimiSotpanna vipanna bhuvanAvaliH |
sahasrazIrSavadanA, sahasrAkSI, sahasrapAt || 66 ||
Abrahma kITajananI, varNAzrama vidhAyinI |
nijAjJArUpanigamA, puNyApuNya phalapradA || 67 ||
zruti sImanta sindhUrIkRta pAdAbjadhUlikA |
sakalAgama sandoha zuktisampuTa mauktikA || 68 ||
puruSArthapradA, pUrNA, bhoginI, bhuvanezvarI |
ambikA,'nAdi nidhanA, haribrahmendra sevitA || 69 ||
nArAyaNI, nAdarUpA, nAmarUpa vivarjitA |
hrIGkArI, hrImatI, hRdyA, heyopAdeya varjitA || 70 ||
rAjarAjArcitA, rAjJI, ramyA, rAjIvalocanA |
raJjanI, ramaNI, rasyA, raNatkiGkiNi mekhalA || 71 ||
ramA, rAkenduvadanA, ratirUpA, ratipriyA |
rakSAkarI, rAkSasaghnI, rAmA, ramaNalampaTA || 72 ||
kAmyA, kAmakalArUpA, kadamba kusumapriyA |
kalyANI, jagatIkandA, karuNArasa sAgarA || 73 ||
kalAvatI, kalAlApA, kAntA, kAdambarIpriyA |
varadA, vAmanayanA, vAruNImadavihvalA || 74 ||
vizvAdhikA, vedavedyA, vindhyAcala nivAsinI |
vidhAtrI, vedajananI, viSNumAyA, vilAsinI || 75 ||
kSetrasvarUpA, kSetrezI, kSetra kSetrajJa pAlinI |
kSayavRddhi vinirmuktA, kSetrapAla samarcitA || 76 ||
vijayA, vimalA, vandyA, vandAru janavatsalA |
vAgvAdinI, vAmakezI, vahnimaNDala vAsinI || 77 ||
bhaktimat-kalpalatikA, pazupAza vimocanI |
saMhRtAzeSa pASaNDA, sadAcAra pravartikA || 78 ||
tApatrayAgni santapta samAhlAdana candrikA |
taruNI, tApasArAdhyA, tanumadhyA, tamo'pahA || 79 ||
citi, statpadalakSyArthA, cideka rasarUpiNI |
svAtmAnandalavIbhUta brahmAdyAnanda santatiH || 80 ||
parA, pratyakcitI rUpA, pazyantI, paradevatA |
madhyamA, vaikharIrUpA, bhaktamAnasa haMsikA || 81 ||
kAmezvara prANanADI, kRtajJA, kAmapUjitA |
zRGgAra rasasampUrNA, jayA, jAlandharasthitA || 82 ||
oDyANa pIThanilayA, bindumaNDala vAsinI |
rahoyAga kramArAdhyA, rahastarpaNa tarpitA || 83 ||
sadyaH prasAdinI, vizvasAkSiNI, sAkSivarjitA |
SaDaGgadevatA yuktA, SADguNya paripUritA || 84 ||
nityaklinnA, nirupamA, nirvANa sukhadAyinI |
nityA, SoDazikArUpA, zrIkaNThArdha zarIriNI || 85 ||
prabhAvatI, prabhArUpA, prasiddhA, paramezvarI |
mUlaprakRti ravyaktA, vyaktA'vyakta svarUpiNI || 86 ||
vyApinI, vividhAkArA, vidyA'vidyA svarUpiNI |
mahAkAmeza nayanA kumudAhlAda kaumudI || 87 ||
bhaktahArda tamobheda bhAnumad-bhAnusantatiH |
zivadUtI, zivArAdhyA, zivamUrti, zzivaGkarI || 88 ||
zivapriyA, zivaparA, ziSTeSTA, ziSTapUjitA |
aprameyA, svaprakAzA, manovAcAma gocarA || 89 ||
cicchakti, zcetanArUpA, jaDazakti, rjaDAtmikA |
gAyatrI, vyAhRti, ssandhyA, dvijabRnda niSevitA || 90 ||
tattvAsanA, tattvamayI, paJcakozAntarasthitA |
nissImamahimA, nityayauvanA, madazAlinI || 91 ||
madaghUrNita raktAkSI, madapATala gaNDabhUH |
candana dravadigdhAGgI, cAmpeya kusuma priyA || 92 ||
kuzalA, komalAkArA, kurukullA, kulezvarI |
kulakuNDAlayA, kaula mArgatatpara sevitA || 93 ||
kumAra gaNanAthAmbA, tuSTiH, puSTi, rmati, rdhRtiH |
zAntiH, svastimatI, kAnti, rnandinI, vighnanAzinI || 94 ||
tejovatI, trinayanA, lolAkSI kAmarUpiNI |
mAlinI, haMsinI, mAtA, malayAcala vAsinI || 95 ||
sumukhI, nalinI, subhrUH, zobhanA, suranAyikA |
kAlakaNThI, kAntimatI, kSobhiNI, sUkSmarUpiNI || 96 ||
vajrezvarI, vAmadevI, vayo'vasthA vivarjitA |
siddhezvarI, siddhavidyA, siddhamAtA, yazasvinI || 97 ||
vizuddhi cakranilayA,''raktavarNA, trilocanA |
khaTvAGgAdi praharaNA, vadanaika samanvitA || 98 ||
pAyasAnnapriyA, tvaksthA, pazuloka bhayaGkarI |
amRtAdi mahAzakti saMvRtA, DAkinIzvarI || 99 ||
anAhatAbja nilayA, zyAmAbhA, vadanadvayA |
daMSTrojjvalA,'kSamAlAdhidharA, rudhira saMsthitA || 100 ||
kAlarAtryAdi zaktyoghavRtA, snigdhaudanapriyA |
mahAvIrendra varadA, rAkiNyambA svarUpiNI || 101 ||
maNipUrAbja nilayA, vadanatraya saMyutA |
vajrAdhikAyudhopetA, DAmaryAdibhi rAvRtA || 102 ||
raktavarNA, mAMsaniSThA, guDAnna prItamAnasA |
samasta bhaktasukhadA, lAkinyambA svarUpiNI || 103 ||
svAdhiSThAnAmbu jagatA, caturvaktra manoharA |
zUlAdyAyudha sampannA, pItavarNA,'tigarvitA || 104 ||
medoniSThA, madhuprItA, bandinyAdi samanvitA |
dadhyannAsakta hRdayA, kAkinI rUpadhAriNI || 105 ||
mUlA dhArAmbujArUDhA, paJcavaktrA,'sthisaMsthitA |
aGkuzAdi praharaNA, varadAdi niSevitA || 106 ||
mudgaudanAsakta cittA, sAkinyambAsvarUpiNI |
AjJA cakrAbjanilayA, zuklavarNA, SaDAnanA || 107 ||
majjAsaMsthA, haMsavatI mukhyazakti samanvitA |
haridrAnnaika rasikA, hAkinI rUpadhAriNI || 108 ||
sahasradala padmasthA, sarvavarNopa zobhitA |
sarvAyudhadharA, zukla saMsthitA, sarvatomukhI || 109 ||
sarvaudana prItacittA, yAkinyambA svarUpiNI |
svAhA, svadhA,'mati, rmedhA, zrutiH, smRti, ranuttamA || 110 ||
puNyakIrtiH, puNyalabhyA, puNyazravaNa kIrtanA |
pulomajArcitA, bandhamocanI, bandhurAlakA || 111 ||
vimarzarUpiNI, vidyA, viyadAdi jagatprasUH |
sarvavyAdhi prazamanI, sarvamRtyu nivAriNI || 112 ||
agragaNyA,'cintyarUpA, kalikalmaSa nAzinI |
kAtyAyinI, kAlahantrI, kamalAkSa niSevitA || 113 ||
tAmbUla pUrita mukhI, dADimI kusumaprabhA |
mRgAkSI, mohinI, mukhyA, mRDAnI, mitrarUpiNI || 114 ||
nityatRptA, bhaktanidhi, rniyantrI, nikhilezvarI |
maitryAdi vAsanAlabhyA, mahApralaya sAkSiNI || 115 ||
parAzaktiH, parAniSThA, prajJAna ghanarUpiNI |
mAdhvIpAnAlasA, mattA, mAtRkA varNa rUpiNI || 116 ||
mahAkailAsa nilayA, mRNAla mRdudorlatA |
mahanIyA, dayAmUrtI, rmahAsAmrAjyazAlinI || 117 ||
AtmavidyA, mahAvidyA, zrIvidyA, kAmasevitA |
zrISoDazAkSarI vidyA, trikUTA, kAmakoTikA || 118 ||
kaTAkSakiGkarI bhUta kamalA koTisevitA |
ziraHsthitA, candranibhA, phAlasthendra dhanuHprabhA || 119 ||
hRdayasthA, raviprakhyA, trikoNAntara dIpikA |
dAkSAyaNI, daityahantrI, dakSayajJa vinAzinI || 120 ||
darAndolita dIrghAkSI, darahAsojjvalanmukhI |
gurumUrti, rguNanidhi, rgomAtA, guhajanmabhUH || 121 ||
devezI, daNDanItisthA, daharAkAza rUpiNI |
pratipanmukhya rAkAnta tithimaNDala pUjitA || 122 ||
kalAtmikA, kalAnAthA, kAvyAlApa vinodinI |
sacAmara ramAvANI savyadakSiNa sevitA || 123 ||
Adizakti, rameyA,''tmA, paramA, pAvanAkRtiH |
anekakoTi brahmANDa jananI, divyavigrahA || 124 ||
klIGkArI, kevalA, guhyA, kaivalya padadAyinI |
tripurA, trijagadvandyA, trimUrti, stridazezvarI || 125 ||
tryakSarI, divyagandhADhyA, sindhUra tilakAJcitA |
umA, zailendratanayA, gaurI, gandharva sevitA || 126 ||
vizvagarbhA, svarNagarbhA,'varadA vAgadhIzvarI |
dhyAnagamyA,'paricchedyA, jJAnadA, jJAnavigrahA || 127 ||
sarvavedAnta saMvedyA, satyAnanda svarUpiNI |
lopAmudrArcitA, lIlAklRpta brahmANDamaNDalA || 128 ||
adRzyA, dRzyarahitA, vijJAtrI, vedyavarjitA |
yoginI, yogadA, yogyA, yogAnandA, yugandharA || 129 ||
icchAzakti jJAnazakti kriyAzakti svarUpiNI |
sarvAdhArA, supratiSThA, sadasad-rUpadhAriNI || 130 ||
aSTamUrti, rajAjaitrI, lokayAtrA vidhAyinI |
ekAkinI, bhUmarUpA, nirdvaitA, dvaitavarjitA || 131 ||
annadA, vasudA, vRddhA, brahmAtmaikya svarUpiNI |
bRhatI, brAhmaNI, brAhmI, brahmAnandA, balipriyA || 132 ||
bhASArUpA, bRhatsenA, bhAvAbhAva vivarjitA |
sukhArAdhyA, zubhakarI, zobhanA sulabhAgatiH || 133 ||
rAjarAjezvarI, rAjyadAyinI, rAjyavallabhA |
rAjat-kRpA, rAjapITha nivezita nijAzritAH || 134 ||
rAjyalakSmIH, kozanAthA, caturaGga balezvarI |
sAmrAjyadAyinI, satyasandhA, sAgaramekhalA || 135 ||
dIkSitA, daityazamanI, sarvaloka vazaGkarI |
sarvArthadAtrI, sAvitrI, saccidAnanda rUpiNI || 136 ||
dezakAlA'paricchinnA, sarvagA, sarvamohinI |
sarasvatI, zAstramayI, guhAmbA, guhyarUpiNI || 137 ||
sarvopAdhi vinirmuktA, sadAziva pativratA |
sampradAyezvarI, sAdhvI, gurumaNDala rUpiNI || 138 ||
kulottIrNA, bhagArAdhyA, mAyA, madhumatI, mahI |
gaNAmbA, guhyakArAdhyA, komalAGgI, gurupriyA || 139 ||
svatantrA, sarvatantrezI, dakSiNAmUrti rUpiNI |
sanakAdi samArAdhyA, zivajJAna pradAyinI || 140 ||
citkalA,'nandakalikA, premarUpA, priyaGkarI |
nAmapArAyaNa prItA, nandividyA, naTezvarI || 141 ||
mithyA jagadadhiSThAnA muktidA, muktirUpiNI |
lAsyapriyA, layakarI, lajjA, rambhAdi vanditA || 142 ||
bhavadAva sudhAvRSTiH, pApAraNya davAnalA |
daurbhAgyatUla vAtUlA, jarAdhvAnta raviprabhA || 143 ||
bhAgyAbdhicandrikA, bhaktacittakeki ghanAghanA |
rogaparvata dambholi, rmRtyudAru kuThArikA || 144 ||
mahezvarI, mahAkAlI, mahAgrAsA, mahA'zanA |
aparNA, caNDikA, caNDamuNDA'sura niSUdinI || 145 ||
kSarAkSarAtmikA, sarvalokezI, vizvadhAriNI |
trivargadAtrI, subhagA, tryambakA, triguNAtmikA || 146 ||
svargApavargadA, zuddhA, japApuSpa nibhAkRtiH |
ojovatI, dyutidharA, yajJarUpA, priyavratA || 147 ||
durArAdhyA, durAdarSA, pATalI kusumapriyA |
mahatI, merunilayA, mandAra kusumapriyA || 148 ||
vIrArAdhyA, virADrUpA, virajA, vizvatomukhI |
pratyagrUpA, parAkAzA, prANadA, prANarUpiNI || 149 ||
mArtANDa bhairavArAdhyA, mantriNI nyastarAjyadhUH |
tripurezI, jayatsenA, nistraiguNyA, parAparA || 150 ||
satyajJAnA'nandarUpA, sAmarasya parAyaNA |
kapardinI, kalAmAlA, kAmadhuk,kAmarUpiNI || 151 ||
kalAnidhiH, kAvyakalA, rasajJA, rasazevadhiH |
puSTA, purAtanA, pUjyA, puSkarA, puSkarekSaNA || 152 ||
paraJjyotiH, parandhAma, paramANuH, parAtparA |
pAzahastA, pAzahantrI, paramantra vibhedinI || 153 ||
mUrtA,'mUrtA,'nityatRptA, muni mAnasa haMsikA |
satyavratA, satyarUpA, sarvAntaryAminI, satI || 154 ||
brahmANI, brahmajananI, bahurUpA, budhArcitA |
prasavitrI, pracaNDA'jJA, pratiSThA, prakaTAkRtiH || 155 ||
prANezvarI, prANadAtrI, paJcAzat-pITharUpiNI |
vizRGkhalA, viviktasthA, vIramAtA, viyatprasUH || 156 ||
mukundA, mukti nilayA, mUlavigraha rUpiNI |
bhAvajJA, bhavarogaghnI bhavacakra pravartinI || 157 ||
chandassArA, zAstrasArA, mantrasArA, talodarI |
udArakIrti, ruddAmavaibhavA, varNarUpiNI || 158 ||
janmamRtyu jarAtapta jana vizrAnti dAyinI |
sarvopaniSa dudghuSTA, zAntyatIta kalAtmikA || 159 ||
gambhIrA, gaganAntaHsthA, garvitA, gAnalolupA |
kalpanArahitA, kASThA, kAntA, kAntArdha vigrahA || 160 ||
kAryakAraNa nirmuktA, kAmakeli taraGgitA |
kanat-kanakatATaGkA, lIlAvigraha dhAriNI || 161 ||
ajAkSaya vinirmuktA, mugdhA kSipraprasAdinI |
antarmukha samArAdhyA, bahirmukha sudurlabhA || 162 ||
trayI, trivarga nilayA, tristhA, tripuramAlinI |
nirAmayA, nirAlambA, svAtmArAmA, sudhAsRtiH || 163 ||
saMsArapaGka nirmagna samuddharaNa paNDitA |
yajJapriyA, yajJakartrI, yajamAna svarUpiNI || 164 ||
dharmAdhArA, dhanAdhyakSA, dhanadhAnya vivardhinI |
viprapriyA, viprarUpA, vizvabhramaNa kAriNI || 165 ||
vizvagrAsA, vidrumAbhA, vaiSNavI, viSNurUpiNI |
ayoni, ryoninilayA, kUTasthA, kularUpiNI || 166 ||
vIragoSThIpriyA, vIrA, naiSkarmyA, nAdarUpiNI |
vijJAna kalanA, kalyA vidagdhA, baindavAsanA || 167 ||
tattvAdhikA, tattvamayI, tattvamartha svarUpiNI |
sAmagAnapriyA, saumyA, sadAziva kuTumbinI || 168 ||
savyApasavya mArgasthA, sarvApadvi nivAriNI |
svasthA, svabhAvamadhurA, dhIrA, dhIra samarcitA || 169 ||
caitanyArghya samArAdhyA, caitanya kusumapriyA |
sadoditA, sadAtuSTA, taruNAditya pATalA || 170 ||
dakSiNA, dakSiNArAdhyA, darasmera mukhAmbujA |
kaulinI kevalA,'narghyA kaivalya padadAyinI || 171 ||
stotrapriyA, stutimatI, zrutisaMstuta vaibhavA |
manasvinI, mAnavatI, mahezI, maGgalAkRtiH || 172 ||
vizvamAtA, jagaddhAtrI, vizAlAkSI, virAgiNI|
pragalbhA, paramodArA, parAmodA, manomayI || 173 ||
vyomakezI, vimAnasthA, vajriNI, vAmakezvarI |
paJcayajJapriyA, paJcapreta maJcAdhizAyinI || 174 ||
paJcamI, paJcabhUtezI, paJca saGkhyopacAriNI |
zAzvatI, zAzvataizvaryA, zarmadA, zambhumohinI || 175 ||
dharA, dharasutA, dhanyA, dharmiNI, dharmavardhinI |
lokAtItA, guNAtItA, sarvAtItA, zamAtmikA || 176 ||
bandhUka kusuma prakhyA, bAlA, lIlAvinodinI |
sumaGgalI, sukhakarI, suveSADyA, suvAsinI || 177 ||
suvAsinyarcanaprItA, zobhanA, zuddha mAnasA |
bindu tarpaNa santuSTA, pUrvajA, tripurAmbikA || 178 ||
dazamudrA samArAdhyA, tripurA zrIvazaGkarI |
jJAnamudrA, jJAnagamyA, jJAnajJeya svarUpiNI || 179 ||
yonimudrA, trikhaNDezI, triguNAmbA, trikoNagA |
anaghAdbhuta cAritrA, vAJchitArtha pradAyinI || 180 ||
abhyAsAti zayajJAtA, SaDadhvAtIta rUpiNI |
avyAja karuNAmUrti, rajJAnadhvAnta dIpikA || 181 ||
AbAlagopa viditA, sarvAnullaGghya zAsanA |
zrI cakrarAjanilayA, zrImattripura sundarI || 182 ||
zrI zivA, zivazaktyaikya rUpiNI, lalitAmbikA |
evaM zrIlalitAdevyA nAmnAM sAhasrakaM jaguH || 183 ||
|| iti zrI brahmANDapurANe, uttarakhaNDe, zrI hayagrIvAgastya saMvAde, zrIlalitArahasyanAma zrI lalitA rahasyanAma sAhasrastotra kathanaM nAma dvitIyo'dhyAyaH ||
sindhUrAruNa vigrahAM triNayanAM mANikya maulisphura-
ttArAnAyaka zekharAM smitamukhI mApIna vakSoruhAm |
pANibhyA malipUrNa ratna caSakaM raktotpalaM bibhratIM
saumyAM ratnaghaTastha rakta caraNAM dhyAyetparAmambikAm ||