શ્રી લલિતા સહસ્ર નામ સ્તોત્રમ્

ઓમ્ ॥

અસ્ય શ્રી લલિતા દિવ્ય સહસ્રનામ સ્તોત્ર મહામન્ત્રસ્ય, વશિન્યાદિ વાગ્દેવતા ઋષયઃ, અનુષ્ટુપ્ છન્દઃ, શ્રી લલિતા પરાભટ્ટારિકા મહા ત્રિપુર સુન્દરી દેવતા, ઐં બીજં, ક્લીં શક્તિઃ, સૌઃ કીલકં, મમ ધર્માર્થ કામ મોક્ષ ચતુર્વિધ ફલપુરુષાર્થ સિદ્ધ્યર્થે લલિતા ત્રિપુરસુન્દરી પરાભટ્ટારિકા સહસ્ર નામ જપે વિનિયોગઃ

કરન્યાસઃ

ઐં અઙ્ગુષ્ટાભ્યાં નમઃ, ક્લીં તર્જનીભ્યાં નમઃ, સૌઃ મધ્યમાભ્યાં નમઃ, સૌઃ અનામિકાભ્યાં નમઃ, ક્લીં કનિષ્ઠિકાભ્યાં નમઃ, ઐં કરતલ કરપૃષ્ઠાભ્યાં નમઃ

અઙ્ગન્યાસઃ

ઐં હૃદયાય નમઃ, ક્લીં શિરસે સ્વાહા, સૌઃ શિખાયૈ વષટ્, સૌઃ કવચાય હું, ક્લીં નેત્રત્રયાય વૌષટ્, ઐં અસ્ત્રાયફટ્, ભૂર્ભુવસ્સુવરોમિતિ દિગ્બન્ધઃ

ધ્યાનં

અરુણાં કરુણા તરઙ્ગિતાક્ષીં ધૃતપાશાઙ્કુશ પુષ્પબાણચાપામ્ ।

અણિમાદિભિ રાવૃતાં મયૂખૈઃ અહમિત્યેવ વિભાવયે ભવાનીમ્ ॥ 1 ॥

ધ્યાયેત્ પદ્માસનસ્થાં વિકસિતવદનાં પદ્મ પત્રાયતાક્ષીં

હેમાભાં પીતવસ્ત્રાં કરકલિત લસમદ્ધેમપદ્માં વરાઙ્ગીમ્ ।

સર્વાલઙ્કારયુક્તાં સકલમભયદાં ભક્તનમ્રાં ભવાનીં

શ્રી વિદ્યાં શાન્તમૂર્તિં સકલ સુરસુતાં સર્વસમ્પત્-પ્રદાત્રીમ્ ॥ 2 ॥

સકુઙ્કુમ વિલેપના મલિકચુમ્બિ કસ્તૂરિકાં

સમન્દ હસિતેક્ષણાં સશરચાપ પાશાઙ્કુશામ્ ।

અશેષ જનમોહિની મરુણમાલ્ય ભૂષોજ્જ્વલાં

જપાકુસુમ ભાસુરાં જપવિધૌ સ્મરે દમ્બિકામ્ ॥ 3 ॥

સિન્ધૂરારુણ વિગ્રહાં ત્રિણયનાં માણિક્ય મૌલિસ્ફુર-

ત્તારાનાયક શેખરાં સ્મિતમુખી માપીન વક્ષોરુહામ્ ।

પાણિભ્યા મલિપૂર્ણ રત્ન ચષકં રક્તોત્પલં બિભ્રતીં

સૌમ્યાં રત્નઘટસ્થ રક્ત ચરણાં ધ્યાયેત્પરામમ્બિકામ્ ॥ 4 ॥

લમિત્યાદિ પઞ્ચપૂજાં વિભાવયેત્

લં પૃથિવી તત્ત્વાત્મિકાયૈ શ્રી લલિતાદેવ્યૈ ગન્ધં પરિકલ્પયામિ

હં આકાશ તત્ત્વાત્મિકાયૈ શ્રી લલિતાદેવ્યૈ પુષ્પં પરિકલ્પયામિ

યં વાયુ તત્ત્વાત્મિકાયૈ શ્રી લલિતાદેવ્યૈ ધૂપં પરિકલ્પયામિ

રં વહ્નિ તત્ત્વાત્મિકાયૈ શ્રી લલિતાદેવ્યૈ દીપં પરિકલ્પયામિ

વં અમૃત તત્ત્વાત્મિકાયૈ શ્રી લલિતાદેવ્યૈ અમૃત નૈવેદ્યં પરિકલ્પયામિ

સં સર્વ તત્ત્વાત્મિકાયૈ શ્રી લલિતાદેવ્યૈ તામ્બૂલાદિ સર્વોપચારાન્ પરિકલ્પયામિ

ગુરુર્બ્રહ્મ ગુરુર્વિષ્ણુઃ ગુરુર્દેવો મહેશ્વરઃ ।

ગુરુસ્સાક્ષાત્ પરબ્રહ્મ તસ્મૈ શ્રી ગુરવે નમઃ ॥

હરિઃ ૐ

શ્રી માતા, શ્રી મહારાજ્ઞી, શ્રીમત્-સિંહાસનેશ્વરી ।

ચિદગ્નિ કુણ્ડસમ્ભૂતા, દેવકાર્યસમુદ્યતા ॥ 1 ॥

ઉદ્યદ્ભાનુ સહસ્રાભા, ચતુર્બાહુ સમન્વિતા ।

રાગસ્વરૂપ પાશાઢ્યા, ક્રોધાકારાઙ્કુશોજ્જ્વલા ॥ 2 ॥

મનોરૂપેક્ષુકોદણ્ડા, પઞ્ચતન્માત્ર સાયકા ।

નિજારુણ પ્રભાપૂર મજ્જદ્-બ્રહ્માણ્ડમણ્ડલા ॥ 3 ॥

ચમ્પકાશોક પુન્નાગ સૌગન્ધિક લસત્કચા

કુરુવિન્દ મણિશ્રેણી કનત્કોટીર મણ્ડિતા ॥ 4 ॥

અષ્ટમી ચન્દ્ર વિભ્રાજ દલિકસ્થલ શોભિતા ।

મુખચન્દ્ર કલઙ્કાભ મૃગનાભિ વિશેષકા ॥ 5 ॥

વદનસ્મર માઙ્ગલ્ય ગૃહતોરણ ચિલ્લિકા ।

વક્ત્રલક્ષ્મી પરીવાહ ચલન્મીનાભ લોચના ॥ 6 ॥

નવચમ્પક પુષ્પાભ નાસાદણ્ડ વિરાજિતા ।

તારાકાન્તિ તિરસ્કારિ નાસાભરણ ભાસુરા ॥ 7 ॥

કદમ્બ મઞ્જરીકૢપ્ત કર્ણપૂર મનોહરા ।

તાટઙ્ક યુગલીભૂત તપનોડુપ મણ્ડલા ॥ 8 ॥

પદ્મરાગ શિલાદર્શ પરિભાવિ કપોલભૂઃ ।

નવવિદ્રુમ બિમ્બશ્રીઃ ન્યક્કારિ રદનચ્છદા ॥ 9 ॥

શુદ્ધ વિદ્યાઙ્કુરાકાર દ્વિજપઙ્ક્તિ દ્વયોજ્જ્વલા ।

કર્પૂરવીટિ કામોદ સમાકર્ષદ્દિગન્તરા ॥ 10 ॥

નિજસલ્લાપ માધુર્ય વિનિર્ભત્સિત કચ્છપી ।

મન્દસ્મિત પ્રભાપૂર મજ્જત્-કામેશ માનસા ॥ 11 ॥

અનાકલિત સાદૃશ્ય ચુબુક શ્રી વિરાજિતા ।

કામેશબદ્ધ માઙ્ગલ્ય સૂત્રશોભિત કન્થરા ॥ 12 ॥

કનકાઙ્ગદ કેયૂર કમનીય ભુજાન્વિતા ।

રત્નગ્રૈવેય ચિન્તાક લોલમુક્તા ફલાન્વિતા ॥ 13 ॥

કામેશ્વર પ્રેમરત્ન મણિ પ્રતિપણસ્તની।

નાભ્યાલવાલ રોમાલિ લતાફલ કુચદ્વયી ॥ 14 ॥

લક્ષ્યરોમલતા ધારતા સમુન્નેય મધ્યમા ।

સ્તનભાર દલન્-મધ્ય પટ્ટબન્ધ વલિત્રયા ॥ 15 ॥

અરુણારુણ કૌસુમ્ભ વસ્ત્ર ભાસ્વત્-કટીતટી ।

રત્નકિઙ્કિણિ કારમ્ય રશનાદામ ભૂષિતા ॥ 16 ॥

કામેશ જ્ઞાત સૌભાગ્ય માર્દવોરુ દ્વયાન્વિતા ।

માણિક્ય મકુટાકાર જાનુદ્વય વિરાજિતા ॥ 17 ॥

ઇન્દ્રગોપ પરિક્ષિપ્ત સ્મર તૂણાભ જઙ્ઘિકા ।

ગૂઢગુલ્ભા કૂર્મપૃષ્ઠ જયિષ્ણુ પ્રપદાન્વિતા ॥ 18 ॥

નખદીધિતિ સઞ્છન્ન નમજ્જન તમોગુણા ।

પદદ્વય પ્રભાજાલ પરાકૃત સરોરુહા ॥ 19 ॥

શિઞ્જાન મણિમઞ્જીર મણ્ડિત શ્રી પદામ્બુજા ।

મરાલી મન્દગમના, મહાલાવણ્ય શેવધિઃ ॥ 20 ॥

સર્વારુણાઽનવદ્યાઙ્ગી સર્વાભરણ ભૂષિતા ।

શિવકામેશ્વરાઙ્કસ્થા, શિવા, સ્વાધીન વલ્લભા ॥ 21 ॥

સુમેરુ મધ્યશૃઙ્ગસ્થા, શ્રીમન્નગર નાયિકા ।

ચિન્તામણિ ગૃહાન્તસ્થા, પઞ્ચબ્રહ્માસનસ્થિતા ॥ 22 ॥

મહાપદ્માટવી સંસ્થા, કદમ્બ વનવાસિની ।

સુધાસાગર મધ્યસ્થા, કામાક્ષી કામદાયિની ॥ 23 ॥

દેવર્ષિ ગણસઙ્ઘાત સ્તૂયમાનાત્મ વૈભવા ।

ભણ્ડાસુર વધોદ્યુક્ત શક્તિસેના સમન્વિતા ॥ 24 ॥

સમ્પત્કરી સમારૂઢ સિન્ધુર વ્રજસેવિતા ।

અશ્વારૂઢાધિષ્ઠિતાશ્વ કોટિકોટિ ભિરાવૃતા ॥ 25 ॥

ચક્રરાજ રથારૂઢ સર્વાયુધ પરિષ્કૃતા ।

ગેયચક્ર રથારૂઢ મન્ત્રિણી પરિસેવિતા ॥ 26 ॥

કિરિચક્ર રથારૂઢ દણ્ડનાથા પુરસ્કૃતા ।

જ્વાલામાલિનિ કાક્ષિપ્ત વહ્નિપ્રાકાર મધ્યગા ॥ 27 ॥

ભણ્ડસૈન્ય વધોદ્યુક્ત શક્તિ વિક્રમહર્ષિતા ।

નિત્યા પરાક્રમાટોપ નિરીક્ષણ સમુત્સુકા ॥ 28 ॥

ભણ્ડપુત્ર વધોદ્યુક્ત બાલાવિક્રમ નન્દિતા ।

મન્ત્રિણ્યમ્બા વિરચિત વિષઙ્ગ વધતોષિતા ॥ 29 ॥

વિશુક્ર પ્રાણહરણ વારાહી વીર્યનન્દિતા ।

કામેશ્વર મુખાલોક કલ્પિત શ્રી ગણેશ્વરા ॥ 30 ॥

મહાગણેશ નિર્ભિન્ન વિઘ્નયન્ત્ર પ્રહર્ષિતા ।

ભણ્ડાસુરેન્દ્ર નિર્મુક્ત શસ્ત્ર પ્રત્યસ્ત્ર વર્ષિણી ॥ 31 ॥

કરાઙ્ગુલિ નખોત્પન્ન નારાયણ દશાકૃતિઃ ।

મહાપાશુપતાસ્ત્રાગ્નિ નિર્દગ્ધાસુર સૈનિકા ॥ 32 ॥

કામેશ્વરાસ્ત્ર નિર્દગ્ધ સભણ્ડાસુર શૂન્યકા ।

બ્રહ્મોપેન્દ્ર મહેન્દ્રાદિ દેવસંસ્તુત વૈભવા ॥ 33 ॥

હરનેત્રાગ્નિ સન્દગ્ધ કામ સઞ્જીવનૌષધિઃ ।

શ્રીમદ્વાગ્ભવ કૂટૈક સ્વરૂપ મુખપઙ્કજા ॥ 34 ॥

કણ્ઠાધઃ કટિપર્યન્ત મધ્યકૂટ સ્વરૂપિણી ।

શક્તિકૂટૈક તાપન્ન કટ્યથોભાગ ધારિણી ॥ 35 ॥

મૂલમન્ત્રાત્મિકા, મૂલકૂટ ત્રય કલેબરા ।

કુલામૃતૈક રસિકા, કુલસઙ્કેત પાલિની ॥ 36 ॥

કુલાઙ્ગના, કુલાન્તઃસ્થા, કૌલિની, કુલયોગિની ।

અકુલા, સમયાન્તઃસ્થા, સમયાચાર તત્પરા ॥ 37 ॥

મૂલાધારૈક નિલયા, બ્રહ્મગ્રન્થિ વિભેદિની ।

મણિપૂરાન્ત રુદિતા, વિષ્ણુગ્રન્થિ વિભેદિની ॥ 38 ॥

આજ્ઞા ચક્રાન્તરાલસ્થા, રુદ્રગ્રન્થિ વિભેદિની ।

સહસ્રારામ્બુજા રૂઢા, સુધાસારાભિ વર્ષિણી ॥ 39 ॥

તટિલ્લતા સમરુચિઃ, ષટ્-ચક્રોપરિ સંસ્થિતા ।

મહાશક્તિઃ, કુણ્ડલિની, બિસતન્તુ તનીયસી ॥ 40 ॥

ભવાની, ભાવનાગમ્યા, ભવારણ્ય કુઠારિકા ।

ભદ્રપ્રિયા, ભદ્રમૂર્તિ, ર્ભક્તસૌભાગ્ય દાયિની ॥ 41 ॥

ભક્તિપ્રિયા, ભક્તિગમ્યા, ભક્તિવશ્યા, ભયાપહા ।

શામ્ભવી, શારદારાધ્યા, શર્વાણી, શર્મદાયિની ॥ 42 ॥

શાઙ્કરી, શ્રીકરી, સાધ્વી, શરચ્ચન્દ્રનિભાનના ।

શાતોદરી, શાન્તિમતી, નિરાધારા, નિરઞ્જના ॥ 43 ॥

નિર્લેપા, નિર્મલા, નિત્યા, નિરાકારા, નિરાકુલા ।

નિર્ગુણા, નિષ્કલા, શાન્તા, નિષ્કામા, નિરુપપ્લવા ॥ 44 ॥

નિત્યમુક્તા, નિર્વિકારા, નિષ્પ્રપઞ્ચા, નિરાશ્રયા ।

નિત્યશુદ્ધા, નિત્યબુદ્ધા, નિરવદ્યા, નિરન્તરા ॥ 45 ॥

નિષ્કારણા, નિષ્કલઙ્કા, નિરુપાધિ, ર્નિરીશ્વરા ।

નીરાગા, રાગમથની, નિર્મદા, મદનાશિની ॥ 46 ॥

નિશ્ચિન્તા, નિરહઙ્કારા, નિર્મોહા, મોહનાશિની ।

નિર્મમા, મમતાહન્ત્રી, નિષ્પાપા, પાપનાશિની ॥ 47 ॥

નિષ્ક્રોધા, ક્રોધશમની, નિર્લોભા, લોભનાશિની ।

નિઃસંશયા, સંશયઘ્ની, નિર્ભવા, ભવનાશિની ॥ 48 ॥

નિર્વિકલ્પા, નિરાબાધા, નિર્ભેદા, ભેદનાશિની ।

નિર્નાશા, મૃત્યુમથની, નિષ્ક્રિયા, નિષ્પરિગ્રહા ॥ 49 ॥

નિસ્તુલા, નીલચિકુરા, નિરપાયા, નિરત્યયા ।

દુર્લભા, દુર્ગમા, દુર્ગા, દુઃખહન્ત્રી, સુખપ્રદા ॥ 50 ॥

દુષ્ટદૂરા, દુરાચાર શમની, દોષવર્જિતા ।

સર્વજ્ઞા, સાન્દ્રકરુણા, સમાનાધિકવર્જિતા ॥ 51 ॥

સર્વશક્તિમયી, સર્વમઙ્ગલા, સદ્ગતિપ્રદા ।

સર્વેશ્વરી, સર્વમયી, સર્વમન્ત્ર સ્વરૂપિણી ॥ 52 ॥

સર્વયન્ત્રાત્મિકા, સર્વતન્ત્રરૂપા, મનોન્મની ।

માહેશ્વરી, મહાદેવી, મહાલક્ષ્મી, ર્મૃડપ્રિયા ॥ 53 ॥

મહારૂપા, મહાપૂજ્યા, મહાપાતક નાશિની ।

મહામાયા, મહાસત્ત્વા, મહાશક્તિ ર્મહારતિઃ ॥ 54 ॥

મહાભોગા, મહૈશ્વર્યા, મહાવીર્યા, મહાબલા ।

મહાબુદ્ધિ, ર્મહાસિદ્ધિ, ર્મહાયોગેશ્વરેશ્વરી ॥ 55 ॥

મહાતન્ત્રા, મહામન્ત્રા, મહાયન્ત્રા, મહાસના ।

મહાયાગ ક્રમારાધ્યા, મહાભૈરવ પૂજિતા ॥ 56 ॥

મહેશ્વર મહાકલ્પ મહાતાણ્ડવ સાક્ષિણી ।

મહાકામેશ મહિષી, મહાત્રિપુર સુન્દરી ॥ 57 ॥

ચતુઃષષ્ટ્યુપચારાઢ્યા, ચતુષ્ષષ્ટિ કલામયી ।

મહા ચતુષ્ષષ્ટિ કોટિ યોગિની ગણસેવિતા ॥ 58 ॥

મનુવિદ્યા, ચન્દ્રવિદ્યા, ચન્દ્રમણ્ડલમધ્યગા ।

ચારુરૂપા, ચારુહાસા, ચારુચન્દ્ર કલાધરા ॥ 59 ॥

ચરાચર જગન્નાથા, ચક્રરાજ નિકેતના ।

પાર્વતી, પદ્મનયના, પદ્મરાગ સમપ્રભા ॥ 60 ॥

પઞ્ચપ્રેતાસનાસીના, પઞ્ચબ્રહ્મ સ્વરૂપિણી ।

ચિન્મયી, પરમાનન્દા, વિજ્ઞાન ઘનરૂપિણી ॥ 61 ॥

ધ્યાનધ્યાતૃ ધ્યેયરૂપા, ધર્માધર્મ વિવર્જિતા ।

વિશ્વરૂપા, જાગરિણી, સ્વપન્તી, તૈજસાત્મિકા ॥ 62 ॥

સુપ્તા, પ્રાજ્ઞાત્મિકા, તુર્યા, સર્વાવસ્થા વિવર્જિતા ।

સૃષ્ટિકર્ત્રી, બ્રહ્મરૂપા, ગોપ્ત્રી, ગોવિન્દરૂપિણી ॥ 63 ॥

સંહારિણી, રુદ્રરૂપા, તિરોધાનકરીશ્વરી ।

સદાશિવાનુગ્રહદા, પઞ્ચકૃત્ય પરાયણા ॥ 64 ॥

ભાનુમણ્ડલ મધ્યસ્થા, ભૈરવી, ભગમાલિની ।

પદ્માસના, ભગવતી, પદ્મનાભ સહોદરી ॥ 65 ॥

ઉન્મેષ નિમિષોત્પન્ન વિપન્ન ભુવનાવલિઃ ।

સહસ્રશીર્ષવદના, સહસ્રાક્ષી, સહસ્રપાત્ ॥ 66 ॥

આબ્રહ્મ કીટજનની, વર્ણાશ્રમ વિધાયિની ।

નિજાજ્ઞારૂપનિગમા, પુણ્યાપુણ્ય ફલપ્રદા ॥ 67 ॥

શ્રુતિ સીમન્ત સિન્ધૂરીકૃત પાદાબ્જધૂલિકા ।

સકલાગમ સન્દોહ શુક્તિસમ્પુટ મૌક્તિકા ॥ 68 ॥

પુરુષાર્થપ્રદા, પૂર્ણા, ભોગિની, ભુવનેશ્વરી ।

અમ્બિકા,ઽનાદિ નિધના, હરિબ્રહ્મેન્દ્ર સેવિતા ॥ 69 ॥

નારાયણી, નાદરૂપા, નામરૂપ વિવર્જિતા ।

હ્રીઙ્કારી, હ્રીમતી, હૃદ્યા, હેયોપાદેય વર્જિતા ॥ 70 ॥

રાજરાજાર્ચિતા, રાજ્ઞી, રમ્યા, રાજીવલોચના ।

રઞ્જની, રમણી, રસ્યા, રણત્કિઙ્કિણિ મેખલા ॥ 71 ॥

રમા, રાકેન્દુવદના, રતિરૂપા, રતિપ્રિયા ।

રક્ષાકરી, રાક્ષસઘ્ની, રામા, રમણલમ્પટા ॥ 72 ॥

કામ્યા, કામકલારૂપા, કદમ્બ કુસુમપ્રિયા ।

કલ્યાણી, જગતીકન્દા, કરુણારસ સાગરા ॥ 73 ॥

કલાવતી, કલાલાપા, કાન્તા, કાદમ્બરીપ્રિયા ।

વરદા, વામનયના, વારુણીમદવિહ્વલા ॥ 74 ॥

વિશ્વાધિકા, વેદવેદ્યા, વિન્ધ્યાચલ નિવાસિની ।

વિધાત્રી, વેદજનની, વિષ્ણુમાયા, વિલાસિની ॥ 75 ॥

ક્ષેત્રસ્વરૂપા, ક્ષેત્રેશી, ક્ષેત્ર ક્ષેત્રજ્ઞ પાલિની ।

ક્ષયવૃદ્ધિ વિનિર્મુક્તા, ક્ષેત્રપાલ સમર્ચિતા ॥ 76 ॥

વિજયા, વિમલા, વન્દ્યા, વન્દારુ જનવત્સલા ।

વાગ્વાદિની, વામકેશી, વહ્નિમણ્ડલ વાસિની ॥ 77 ॥

ભક્તિમત્-કલ્પલતિકા, પશુપાશ વિમોચની ।

સંહૃતાશેષ પાષણ્ડા, સદાચાર પ્રવર્તિકા ॥ 78 ॥

તાપત્રયાગ્નિ સન્તપ્ત સમાહ્લાદન ચન્દ્રિકા ।

તરુણી, તાપસારાધ્યા, તનુમધ્યા, તમોઽપહા ॥ 79 ॥

ચિતિ, સ્તત્પદલક્ષ્યાર્થા, ચિદેક રસરૂપિણી ।

સ્વાત્માનન્દલવીભૂત બ્રહ્માદ્યાનન્દ સન્તતિઃ ॥ 80 ॥

પરા, પ્રત્યક્ચિતી રૂપા, પશ્યન્તી, પરદેવતા ।

મધ્યમા, વૈખરીરૂપા, ભક્તમાનસ હંસિકા ॥ 81 ॥

કામેશ્વર પ્રાણનાડી, કૃતજ્ઞા, કામપૂજિતા ।

શૃઙ્ગાર રસસમ્પૂર્ણા, જયા, જાલન્ધરસ્થિતા ॥ 82 ॥

ઓડ્યાણ પીઠનિલયા, બિન્દુમણ્ડલ વાસિની ।

રહોયાગ ક્રમારાધ્યા, રહસ્તર્પણ તર્પિતા ॥ 83 ॥

સદ્યઃ પ્રસાદિની, વિશ્વસાક્ષિણી, સાક્ષિવર્જિતા ।

ષડઙ્ગદેવતા યુક્તા, ષાડ્ગુણ્ય પરિપૂરિતા ॥ 84 ॥

નિત્યક્લિન્ના, નિરુપમા, નિર્વાણ સુખદાયિની ।

નિત્યા, ષોડશિકારૂપા, શ્રીકણ્ઠાર્ધ શરીરિણી ॥ 85 ॥

પ્રભાવતી, પ્રભારૂપા, પ્રસિદ્ધા, પરમેશ્વરી ।

મૂલપ્રકૃતિ રવ્યક્તા, વ્યક્તાઽવ્યક્ત સ્વરૂપિણી ॥ 86 ॥

વ્યાપિની, વિવિધાકારા, વિદ્યાઽવિદ્યા સ્વરૂપિણી ।

મહાકામેશ નયના કુમુદાહ્લાદ કૌમુદી ॥ 87 ॥

ભક્તહાર્દ તમોભેદ ભાનુમદ્-ભાનુસન્તતિઃ ।

શિવદૂતી, શિવારાધ્યા, શિવમૂર્તિ, શ્શિવઙ્કરી ॥ 88 ॥

શિવપ્રિયા, શિવપરા, શિષ્ટેષ્ટા, શિષ્ટપૂજિતા ।

અપ્રમેયા, સ્વપ્રકાશા, મનોવાચામ ગોચરા ॥ 89 ॥

ચિચ્છક્તિ, શ્ચેતનારૂપા, જડશક્તિ, ર્જડાત્મિકા ।

ગાયત્રી, વ્યાહૃતિ, સ્સન્ધ્યા, દ્વિજબૃન્દ નિષેવિતા ॥ 90 ॥

તત્ત્વાસના, તત્ત્વમયી, પઞ્ચકોશાન્તરસ્થિતા ।

નિસ્સીમમહિમા, નિત્યયૌવના, મદશાલિની ॥ 91 ॥

મદઘૂર્ણિત રક્તાક્ષી, મદપાટલ ગણ્ડભૂઃ ।

ચન્દન દ્રવદિગ્ધાઙ્ગી, ચામ્પેય કુસુમ પ્રિયા ॥ 92 ॥

કુશલા, કોમલાકારા, કુરુકુલ્લા, કુલેશ્વરી ।

કુલકુણ્ડાલયા, કૌલ માર્ગતત્પર સેવિતા ॥ 93 ॥

કુમાર ગણનાથામ્બા, તુષ્ટિઃ, પુષ્ટિ, ર્મતિ, ર્ધૃતિઃ ।

શાન્તિઃ, સ્વસ્તિમતી, કાન્તિ, ર્નન્દિની, વિઘ્નનાશિની ॥ 94 ॥

તેજોવતી, ત્રિનયના, લોલાક્ષી કામરૂપિણી ।

માલિની, હંસિની, માતા, મલયાચલ વાસિની ॥ 95 ॥

સુમુખી, નલિની, સુભ્રૂઃ, શોભના, સુરનાયિકા ।

કાલકણ્ઠી, કાન્તિમતી, ક્ષોભિણી, સૂક્ષ્મરૂપિણી ॥ 96 ॥

વજ્રેશ્વરી, વામદેવી, વયોઽવસ્થા વિવર્જિતા ।

સિદ્ધેશ્વરી, સિદ્ધવિદ્યા, સિદ્ધમાતા, યશસ્વિની ॥ 97 ॥

વિશુદ્ધિ ચક્રનિલયા,ઽઽરક્તવર્ણા, ત્રિલોચના ।

ખટ્વાઙ્ગાદિ પ્રહરણા, વદનૈક સમન્વિતા ॥ 98 ॥

પાયસાન્નપ્રિયા, ત્વક્​સ્થા, પશુલોક ભયઙ્કરી ।

અમૃતાદિ મહાશક્તિ સંવૃતા, ડાકિનીશ્વરી ॥ 99 ॥

અનાહતાબ્જ નિલયા, શ્યામાભા, વદનદ્વયા ।

દંષ્ટ્રોજ્જ્વલા,ઽક્ષમાલાધિધરા, રુધિર સંસ્થિતા ॥ 100 ॥

કાલરાત્ર્યાદિ શક્ત્યોઘવૃતા, સ્નિગ્ધૌદનપ્રિયા ।

મહાવીરેન્દ્ર વરદા, રાકિણ્યમ્બા સ્વરૂપિણી ॥ 101 ॥

મણિપૂરાબ્જ નિલયા, વદનત્રય સંયુતા ।

વજ્રાધિકાયુધોપેતા, ડામર્યાદિભિ રાવૃતા ॥ 102 ॥

રક્તવર્ણા, માંસનિષ્ઠા, ગુડાન્ન પ્રીતમાનસા ।

સમસ્ત ભક્તસુખદા, લાકિન્યમ્બા સ્વરૂપિણી ॥ 103 ॥

સ્વાધિષ્ઠાનામ્બુ જગતા, ચતુર્વક્ત્ર મનોહરા ।

શૂલાદ્યાયુધ સમ્પન્ના, પીતવર્ણા,ઽતિગર્વિતા ॥ 104 ॥

મેદોનિષ્ઠા, મધુપ્રીતા, બન્દિન્યાદિ સમન્વિતા ।

દધ્યન્નાસક્ત હૃદયા, કાકિની રૂપધારિણી ॥ 105 ॥

મૂલા ધારામ્બુજારૂઢા, પઞ્ચવક્ત્રા,ઽસ્થિસંસ્થિતા ।

અઙ્કુશાદિ પ્રહરણા, વરદાદિ નિષેવિતા ॥ 106 ॥

મુદ્ગૌદનાસક્ત ચિત્તા, સાકિન્યમ્બાસ્વરૂપિણી ।

આજ્ઞા ચક્રાબ્જનિલયા, શુક્લવર્ણા, ષડાનના ॥ 107 ॥

મજ્જાસંસ્થા, હંસવતી મુખ્યશક્તિ સમન્વિતા ।

હરિદ્રાન્નૈક રસિકા, હાકિની રૂપધારિણી ॥ 108 ॥

સહસ્રદલ પદ્મસ્થા, સર્વવર્ણોપ શોભિતા ।

સર્વાયુધધરા, શુક્લ સંસ્થિતા, સર્વતોમુખી ॥ 109 ॥

સર્વૌદન પ્રીતચિત્તા, યાકિન્યમ્બા સ્વરૂપિણી ।

સ્વાહા, સ્વધા,ઽમતિ, ર્મેધા, શ્રુતિઃ, સ્મૃતિ, રનુત્તમા ॥ 110 ॥

પુણ્યકીર્તિઃ, પુણ્યલભ્યા, પુણ્યશ્રવણ કીર્તના ।

પુલોમજાર્ચિતા, બન્ધમોચની, બન્ધુરાલકા ॥ 111 ॥

વિમર્શરૂપિણી, વિદ્યા, વિયદાદિ જગત્પ્રસૂઃ ।

સર્વવ્યાધિ પ્રશમની, સર્વમૃત્યુ નિવારિણી ॥ 112 ॥

અગ્રગણ્યા,ઽચિન્ત્યરૂપા, કલિકલ્મષ નાશિની ।

કાત્યાયિની, કાલહન્ત્રી, કમલાક્ષ નિષેવિતા ॥ 113 ॥

તામ્બૂલ પૂરિત મુખી, દાડિમી કુસુમપ્રભા ।

મૃગાક્ષી, મોહિની, મુખ્યા, મૃડાની, મિત્રરૂપિણી ॥ 114 ॥

નિત્યતૃપ્તા, ભક્તનિધિ, ર્નિયન્ત્રી, નિખિલેશ્વરી ।

મૈત્ર્યાદિ વાસનાલભ્યા, મહાપ્રલય સાક્ષિણી ॥ 115 ॥

પરાશક્તિઃ, પરાનિષ્ઠા, પ્રજ્ઞાન ઘનરૂપિણી ।

માધ્વીપાનાલસા, મત્તા, માતૃકા વર્ણ રૂપિણી ॥ 116 ॥

મહાકૈલાસ નિલયા, મૃણાલ મૃદુદોર્લતા ।

મહનીયા, દયામૂર્તી, ર્મહાસામ્રાજ્યશાલિની ॥ 117 ॥

આત્મવિદ્યા, મહાવિદ્યા, શ્રીવિદ્યા, કામસેવિતા ।

શ્રીષોડશાક્ષરી વિદ્યા, ત્રિકૂટા, કામકોટિકા ॥ 118 ॥

કટાક્ષકિઙ્કરી ભૂત કમલા કોટિસેવિતા ।

શિરઃસ્થિતા, ચન્દ્રનિભા, ફાલસ્થેન્દ્ર ધનુઃપ્રભા ॥ 119 ॥

હૃદયસ્થા, રવિપ્રખ્યા, ત્રિકોણાન્તર દીપિકા ।

દાક્ષાયણી, દૈત્યહન્ત્રી, દક્ષયજ્ઞ વિનાશિની ॥ 120 ॥

દરાન્દોલિત દીર્ઘાક્ષી, દરહાસોજ્જ્વલન્મુખી ।

ગુરુમૂર્તિ, ર્ગુણનિધિ, ર્ગોમાતા, ગુહજન્મભૂઃ ॥ 121 ॥

દેવેશી, દણ્ડનીતિસ્થા, દહરાકાશ રૂપિણી ।

પ્રતિપન્મુખ્ય રાકાન્ત તિથિમણ્ડલ પૂજિતા ॥ 122 ॥

કલાત્મિકા, કલાનાથા, કાવ્યાલાપ વિનોદિની ।

સચામર રમાવાણી સવ્યદક્ષિણ સેવિતા ॥ 123 ॥

આદિશક્તિ, રમેયા,ઽઽત્મા, પરમા, પાવનાકૃતિઃ ।

અનેકકોટિ બ્રહ્માણ્ડ જનની, દિવ્યવિગ્રહા ॥ 124 ॥

ક્લીઙ્કારી, કેવલા, ગુહ્યા, કૈવલ્ય પદદાયિની ।

ત્રિપુરા, ત્રિજગદ્વન્દ્યા, ત્રિમૂર્તિ, સ્ત્રિદશેશ્વરી ॥ 125 ॥

ત્ર્યક્ષરી, દિવ્યગન્ધાઢ્યા, સિન્ધૂર તિલકાઞ્ચિતા ।

ઉમા, શૈલેન્દ્રતનયા, ગૌરી, ગન્ધર્વ સેવિતા ॥ 126 ॥

વિશ્વગર્ભા, સ્વર્ણગર્ભા,ઽવરદા વાગધીશ્વરી ।

ધ્યાનગમ્યા,ઽપરિચ્છેદ્યા, જ્ઞાનદા, જ્ઞાનવિગ્રહા ॥ 127 ॥

સર્વવેદાન્ત સંવેદ્યા, સત્યાનન્દ સ્વરૂપિણી ।

લોપામુદ્રાર્ચિતા, લીલાકૢપ્ત બ્રહ્માણ્ડમણ્ડલા ॥ 128 ॥

અદૃશ્યા, દૃશ્યરહિતા, વિજ્ઞાત્રી, વેદ્યવર્જિતા ।

યોગિની, યોગદા, યોગ્યા, યોગાનન્દા, યુગન્ધરા ॥ 129 ॥

ઇચ્છાશક્તિ જ્ઞાનશક્તિ ક્રિયાશક્તિ સ્વરૂપિણી ।

સર્વાધારા, સુપ્રતિષ્ઠા, સદસદ્-રૂપધારિણી ॥ 130 ॥

અષ્ટમૂર્તિ, રજાજૈત્રી, લોકયાત્રા વિધાયિની ।

એકાકિની, ભૂમરૂપા, નિર્દ્વૈતા, દ્વૈતવર્જિતા ॥ 131 ॥

અન્નદા, વસુદા, વૃદ્ધા, બ્રહ્માત્મૈક્ય સ્વરૂપિણી ।

બૃહતી, બ્રાહ્મણી, બ્રાહ્મી, બ્રહ્માનન્દા, બલિપ્રિયા ॥ 132 ॥

ભાષારૂપા, બૃહત્સેના, ભાવાભાવ વિવર્જિતા ।

સુખારાધ્યા, શુભકરી, શોભના સુલભાગતિઃ ॥ 133 ॥

રાજરાજેશ્વરી, રાજ્યદાયિની, રાજ્યવલ્લભા ।

રાજત્-કૃપા, રાજપીઠ નિવેશિત નિજાશ્રિતાઃ ॥ 134 ॥

રાજ્યલક્ષ્મીઃ, કોશનાથા, ચતુરઙ્ગ બલેશ્વરી ।

સામ્રાજ્યદાયિની, સત્યસન્ધા, સાગરમેખલા ॥ 135 ॥

દીક્ષિતા, દૈત્યશમની, સર્વલોક વશઙ્કરી ।

સર્વાર્થદાત્રી, સાવિત્રી, સચ્ચિદાનન્દ રૂપિણી ॥ 136 ॥

દેશકાલાઽપરિચ્છિન્ના, સર્વગા, સર્વમોહિની ।

સરસ્વતી, શાસ્ત્રમયી, ગુહામ્બા, ગુહ્યરૂપિણી ॥ 137 ॥

સર્વોપાધિ વિનિર્મુક્તા, સદાશિવ પતિવ્રતા ।

સમ્પ્રદાયેશ્વરી, સાધ્વી, ગુરુમણ્ડલ રૂપિણી ॥ 138 ॥

કુલોત્તીર્ણા, ભગારાધ્યા, માયા, મધુમતી, મહી ।

ગણામ્બા, ગુહ્યકારાધ્યા, કોમલાઙ્ગી, ગુરુપ્રિયા ॥ 139 ॥

સ્વતન્ત્રા, સર્વતન્ત્રેશી, દક્ષિણામૂર્તિ રૂપિણી ।

સનકાદિ સમારાધ્યા, શિવજ્ઞાન પ્રદાયિની ॥ 140 ॥

ચિત્કલા,ઽનન્દકલિકા, પ્રેમરૂપા, પ્રિયઙ્કરી ।

નામપારાયણ પ્રીતા, નન્દિવિદ્યા, નટેશ્વરી ॥ 141 ॥

મિથ્યા જગદધિષ્ઠાના મુક્તિદા, મુક્તિરૂપિણી ।

લાસ્યપ્રિયા, લયકરી, લજ્જા, રમ્ભાદિ વન્દિતા ॥ 142 ॥

ભવદાવ સુધાવૃષ્ટિઃ, પાપારણ્ય દવાનલા ।

દૌર્ભાગ્યતૂલ વાતૂલા, જરાધ્વાન્ત રવિપ્રભા ॥ 143 ॥

ભાગ્યાબ્ધિચન્દ્રિકા, ભક્તચિત્તકેકિ ઘનાઘના ।

રોગપર્વત દમ્ભોલિ, ર્મૃત્યુદારુ કુઠારિકા ॥ 144 ॥

મહેશ્વરી, મહાકાલી, મહાગ્રાસા, મહાઽશના ।

અપર્ણા, ચણ્ડિકા, ચણ્ડમુણ્ડાઽસુર નિષૂદિની ॥ 145 ॥

ક્ષરાક્ષરાત્મિકા, સર્વલોકેશી, વિશ્વધારિણી ।

ત્રિવર્ગદાત્રી, સુભગા, ત્ર્યમ્બકા, ત્રિગુણાત્મિકા ॥ 146 ॥

સ્વર્ગાપવર્ગદા, શુદ્ધા, જપાપુષ્પ નિભાકૃતિઃ ।

ઓજોવતી, દ્યુતિધરા, યજ્ઞરૂપા, પ્રિયવ્રતા ॥ 147 ॥

દુરારાધ્યા, દુરાદર્ષા, પાટલી કુસુમપ્રિયા ।

મહતી, મેરુનિલયા, મન્દાર કુસુમપ્રિયા ॥ 148 ॥

વીરારાધ્યા, વિરાડ્રૂપા, વિરજા, વિશ્વતોમુખી ।

પ્રત્યગ્રૂપા, પરાકાશા, પ્રાણદા, પ્રાણરૂપિણી ॥ 149 ॥

માર્તાણ્ડ ભૈરવારાધ્યા, મન્ત્રિણી ન્યસ્તરાજ્યધૂઃ ।

ત્રિપુરેશી, જયત્સેના, નિસ્ત્રૈગુણ્યા, પરાપરા ॥ 150 ॥

સત્યજ્ઞાનાઽનન્દરૂપા, સામરસ્ય પરાયણા ।

કપર્દિની, કલામાલા, કામધુક્,કામરૂપિણી ॥ 151 ॥

કલાનિધિઃ, કાવ્યકલા, રસજ્ઞા, રસશેવધિઃ ।

પુષ્ટા, પુરાતના, પૂજ્યા, પુષ્કરા, પુષ્કરેક્ષણા ॥ 152 ॥

પરઞ્જ્યોતિઃ, પરન્ધામ, પરમાણુઃ, પરાત્પરા ।

પાશહસ્તા, પાશહન્ત્રી, પરમન્ત્ર વિભેદિની ॥ 153 ॥

મૂર્તા,ઽમૂર્તા,ઽનિત્યતૃપ્તા, મુનિ માનસ હંસિકા ।

સત્યવ્રતા, સત્યરૂપા, સર્વાન્તર્યામિની, સતી ॥ 154 ॥

બ્રહ્માણી, બ્રહ્મજનની, બહુરૂપા, બુધાર્ચિતા ।

પ્રસવિત્રી, પ્રચણ્ડાઽજ્ઞા, પ્રતિષ્ઠા, પ્રકટાકૃતિઃ ॥ 155 ॥

પ્રાણેશ્વરી, પ્રાણદાત્રી, પઞ્ચાશત્-પીઠરૂપિણી ।

વિશૃઙ્ખલા, વિવિક્તસ્થા, વીરમાતા, વિયત્પ્રસૂઃ ॥ 156 ॥

મુકુન્દા, મુક્તિ નિલયા, મૂલવિગ્રહ રૂપિણી ।

ભાવજ્ઞા, ભવરોગઘ્ની ભવચક્ર પ્રવર્તિની ॥ 157 ॥

છન્દસ્સારા, શાસ્ત્રસારા, મન્ત્રસારા, તલોદરી ।

ઉદારકીર્તિ, રુદ્દામવૈભવા, વર્ણરૂપિણી ॥ 158 ॥

જન્મમૃત્યુ જરાતપ્ત જન વિશ્રાન્તિ દાયિની ।

સર્વોપનિષ દુદ્ઘુષ્ટા, શાન્ત્યતીત કલાત્મિકા ॥ 159 ॥

ગમ્ભીરા, ગગનાન્તઃસ્થા, ગર્વિતા, ગાનલોલુપા ।

કલ્પનારહિતા, કાષ્ઠા, કાન્તા, કાન્તાર્ધ વિગ્રહા ॥ 160 ॥

કાર્યકારણ નિર્મુક્તા, કામકેલિ તરઙ્ગિતા ।

કનત્-કનકતાટઙ્કા, લીલાવિગ્રહ ધારિણી ॥ 161 ॥

અજાક્ષય વિનિર્મુક્તા, મુગ્ધા ક્ષિપ્રપ્રસાદિની ।

અન્તર્મુખ સમારાધ્યા, બહિર્મુખ સુદુર્લભા ॥ 162 ॥

ત્રયી, ત્રિવર્ગ નિલયા, ત્રિસ્થા, ત્રિપુરમાલિની ।

નિરામયા, નિરાલમ્બા, સ્વાત્મારામા, સુધાસૃતિઃ ॥ 163 ॥

સંસારપઙ્ક નિર્મગ્ન સમુદ્ધરણ પણ્ડિતા ।

યજ્ઞપ્રિયા, યજ્ઞકર્ત્રી, યજમાન સ્વરૂપિણી ॥ 164 ॥

ધર્માધારા, ધનાધ્યક્ષા, ધનધાન્ય વિવર્ધિની ।

વિપ્રપ્રિયા, વિપ્રરૂપા, વિશ્વભ્રમણ કારિણી ॥ 165 ॥

વિશ્વગ્રાસા, વિદ્રુમાભા, વૈષ્ણવી, વિષ્ણુરૂપિણી ।

અયોનિ, ર્યોનિનિલયા, કૂટસ્થા, કુલરૂપિણી ॥ 166 ॥

વીરગોષ્ઠીપ્રિયા, વીરા, નૈષ્કર્મ્યા, નાદરૂપિણી ।

વિજ્ઞાન કલના, કલ્યા વિદગ્ધા, બૈન્દવાસના ॥ 167 ॥

તત્ત્વાધિકા, તત્ત્વમયી, તત્ત્વમર્થ સ્વરૂપિણી ।

સામગાનપ્રિયા, સૌમ્યા, સદાશિવ કુટુમ્બિની ॥ 168 ॥

સવ્યાપસવ્ય માર્ગસ્થા, સર્વાપદ્વિ નિવારિણી ।

સ્વસ્થા, સ્વભાવમધુરા, ધીરા, ધીર સમર્ચિતા ॥ 169 ॥

ચૈતન્યાર્ઘ્ય સમારાધ્યા, ચૈતન્ય કુસુમપ્રિયા ।

સદોદિતા, સદાતુષ્ટા, તરુણાદિત્ય પાટલા ॥ 170 ॥

દક્ષિણા, દક્ષિણારાધ્યા, દરસ્મેર મુખામ્બુજા ।

કૌલિની કેવલા,ઽનર્ઘ્યા કૈવલ્ય પદદાયિની ॥ 171 ॥

સ્તોત્રપ્રિયા, સ્તુતિમતી, શ્રુતિસંસ્તુત વૈભવા ।

મનસ્વિની, માનવતી, મહેશી, મઙ્ગલાકૃતિઃ ॥ 172 ॥

વિશ્વમાતા, જગદ્ધાત્રી, વિશાલાક્ષી, વિરાગિણી।

પ્રગલ્ભા, પરમોદારા, પરામોદા, મનોમયી ॥ 173 ॥

વ્યોમકેશી, વિમાનસ્થા, વજ્રિણી, વામકેશ્વરી ।

પઞ્ચયજ્ઞપ્રિયા, પઞ્ચપ્રેત મઞ્ચાધિશાયિની ॥ 174 ॥

પઞ્ચમી, પઞ્ચભૂતેશી, પઞ્ચ સઙ્ખ્યોપચારિણી ।

શાશ્વતી, શાશ્વતૈશ્વર્યા, શર્મદા, શમ્ભુમોહિની ॥ 175 ॥

ધરા, ધરસુતા, ધન્યા, ધર્મિણી, ધર્મવર્ધિની ।

લોકાતીતા, ગુણાતીતા, સર્વાતીતા, શમાત્મિકા ॥ 176 ॥

બન્ધૂક કુસુમ પ્રખ્યા, બાલા, લીલાવિનોદિની ।

સુમઙ્ગલી, સુખકરી, સુવેષાડ્યા, સુવાસિની ॥ 177 ॥

સુવાસિન્યર્ચનપ્રીતા, શોભના, શુદ્ધ માનસા ।

બિન્દુ તર્પણ સન્તુષ્ટા, પૂર્વજા, ત્રિપુરામ્બિકા ॥ 178 ॥

દશમુદ્રા સમારાધ્યા, ત્રિપુરા શ્રીવશઙ્કરી ।

જ્ઞાનમુદ્રા, જ્ઞાનગમ્યા, જ્ઞાનજ્ઞેય સ્વરૂપિણી ॥ 179 ॥

યોનિમુદ્રા, ત્રિખણ્ડેશી, ત્રિગુણામ્બા, ત્રિકોણગા ।

અનઘાદ્ભુત ચારિત્રા, વાઞ્છિતાર્થ પ્રદાયિની ॥ 180 ॥

અભ્યાસાતિ શયજ્ઞાતા, ષડધ્વાતીત રૂપિણી ।

અવ્યાજ કરુણામૂર્તિ, રજ્ઞાનધ્વાન્ત દીપિકા ॥ 181 ॥

આબાલગોપ વિદિતા, સર્વાનુલ્લઙ્ઘ્ય શાસના ।

શ્રી ચક્રરાજનિલયા, શ્રીમત્ત્રિપુર સુન્દરી ॥ 182 ॥

શ્રી શિવા, શિવશક્ત્યૈક્ય રૂપિણી, લલિતામ્બિકા ।

એવં શ્રીલલિતાદેવ્યા નામ્નાં સાહસ્રકં જગુઃ ॥ 183 ॥

॥ ઇતિ શ્રી બ્રહ્માણ્ડપુરાણે, ઉત્તરખણ્ડે, શ્રી હયગ્રીવાગસ્ત્ય સંવાદે, શ્રીલલિતારહસ્યનામ શ્રી લલિતા રહસ્યનામ સાહસ્રસ્તોત્ર કથનં નામ દ્વિતીયોઽધ્યાયઃ ॥

સિન્ધૂરારુણ વિગ્રહાં ત્રિણયનાં માણિક્ય મૌલિસ્ફુર-

ત્તારાનાયક શેખરાં સ્મિતમુખી માપીન વક્ષોરુહામ્ ।

પાણિભ્યા મલિપૂર્ણ રત્ન ચષકં રક્તોત્પલં બિભ્રતીં

સૌમ્યાં રત્નઘટસ્થ રક્ત ચરણાં ધ્યાયેત્પરામમ્બિકામ્ ॥