শ্রী লক্ষ্মী অষ্টোত্তর শতনাম স্তোত্রম্

দেব্যুবাচ

দেবদেব! মহাদেব! ত্রিকালজ্ঞ! মহেশ্বর!

করুণাকর দেবেশ! ভক্তানুগ্রহকারক! ॥

অষ্টোত্তর শতং লক্ষ্ম্যাঃ শ্রোতুমিচ্ছামি তত্ত্বতঃ ॥

ঈশ্বর উবাচ

দেবি! সাধু মহাভাগে মহাভাগ্য প্রদাযকম্ ।

সর্বৈশ্বর্যকরং পুণ্যং সর্বপাপ প্রণাশনম্ ॥

সর্বদারিদ্র্য শমনং শ্রবণাদ্ভুক্তি মুক্তিদম্ ।

রাজবশ্যকরং দিব্যং গুহ্যাদ্-গুহ্যতরং পরম্ ॥

দুর্লভং সর্বদেবানাং চতুষ্ষষ্টি কলাস্পদম্ ।

পদ্মাদীনাং বরান্তানাং নিধীনাং নিত্যদাযকম্ ॥

সমস্ত দেব সংসেব্যং অণিমাদ্যষ্ট সিদ্ধিদম্ ।

কিমত্র বহুনোক্তেন দেবী প্রত্যক্ষদাযকম্ ॥

তব প্রীত্যাদ্য বক্ষ্যামি সমাহিতমনাশ্শৃণু ।

অষ্টোত্তর শতস্যাস্য মহালক্ষ্মিস্তু দেবতা ॥

ক্লীং বীজ পদমিত্যুক্তং শক্তিস্তু ভুবনেশ্বরী ।

অঙ্গন্যাসঃ করন্যাসঃ স ইত্যাদি প্রকীর্তিতঃ ॥

ধ্যানং

বন্দে পদ্মকরাং প্রসন্নবদনাং সৌভাগ্যদাং ভাগ্যদাং

হস্তাভ্যামভযপ্রদাং মণিগণৈঃ নানাবিধৈঃ ভূষিতাম্ ।

ভক্তাভীষ্ট ফলপ্রদাং হরিহর ব্রহ্মাধিভিস্সেবিতাং

পার্শ্বে পঙ্কজ শঙ্খপদ্ম নিধিভিঃ যুক্তাং সদা শক্তিভিঃ ॥

সরসিজ নযনে সরোজহস্তে ধবল তরাংশুক গন্ধমাল্য শোভে ।

ভগবতি হরিবল্লভে মনোজ্ঞে ত্রিভুবন ভূতিকরি প্রসীদমহ্যম্ ॥

ওঁ

প্রকৃতিং বিকৃতিং বিদ্যাং সর্বভূত-হিতপ্রদাম্ ।

শ্রদ্ধাং বিভূতিং সুরভিং নমামি পরমাত্মিকাম্ ॥ 1 ॥

বাচং পদ্মালযাং পদ্মাং শুচিং স্বাহাং স্বধাং সুধাম্ ।

ধন্যাং হিরণ্যযীং লক্ষ্মীং নিত্যপুষ্টাং বিভাবরীম্ ॥ 2 ॥

অদিতিং চ দিতিং দীপ্তাং বসুধাং বসুধারিণীম্ ।

নমামি কমলাং কান্তাং কামাক্ষীং ক্রোধসম্ভবাম্ [কাম্যাং ক্ষীরোদসম্ভবাম্] ॥ 3 ॥

অনুগ্রহপ্রদাং বুদ্ধি-মনঘাং হরিবল্লভাম্ ।

অশোকা-মমৃতাং দীপ্তাং লোকশোকবিনাশিনীম্ ॥ 4 ॥

নমামি ধর্মনিলযাং করুণাং লোকমাতরম্ ।

পদ্মপ্রিযাং পদ্মহস্তাং পদ্মাক্ষীং পদ্মসুন্দরীম্ ॥ 5 ॥

পদ্মোদ্ভবাং পদ্মমুখীং পদ্মনাভপ্রিযাং রমাম্ ।

পদ্মমালাধরাং দেবীং পদ্মিনীং পদ্মগন্ধিনীম্ ॥ 6 ॥

পুণ্যগন্ধাং সুপ্রসন্নাং প্রসাদাভিমুখীং প্রভাম্ ।

নমামি চন্দ্রবদনাং চন্দ্রাং চন্দ্রসহোদরীম্ ॥ 7 ॥

চতুর্ভুজাং চন্দ্ররূপা-মিন্দিরা-মিন্দুশীতলাম্ ।

আহ্লাদ জননীং পুষ্টিং শিবাং শিবকরীং সতীম্ ॥ 8 ॥

বিমলাং বিশ্বজননীং তুষ্টিং দারিদ্র্যনাশিনীম্ ।

প্রীতিপুষ্করিণীং শান্তাং শুক্লমাল্যাম্বরাং শ্রিযম্ ॥ 9 ॥

ভাস্করীং বিল্বনিলযাং বরারোহাং যশস্বিনীম্ ।

বসুন্ধরা মুদারাঙ্গাং হরিণীং হেমমালিনীম্ ॥ 10 ॥

ধনধান্যকরীং সিদ্ধিং স্ত্রৈণসৌম্যাং [সদাসৌম্যাং] শুভপ্রদাম্ ।

নৃপবেশ্মগতাং নন্দাং বরলক্ষ্মীং বসুপ্রদাম্ ॥ 11 ॥

শুভাং হিরণ্যপ্রাকারাং সমুদ্রতনযাং জযাম্ ।

নমামি মঙ্গলাং দেবীং বিষ্ণুবক্ষঃস্থলস্থিতাম্ ॥ 12 ॥

বিষ্ণুপত্নীং, প্রসন্নাক্ষীং নারাযণসমাশ্রিতাম্ ।

দারিদ্র্যধ্বংসিনীং দেবীং সর্বোপদ্রববারিণীম্ ॥ 13 ॥

নবদুর্গাং মহাকালীং ব্রহ্মবিষ্ণুশিবাত্মিকাম্ ।

ত্রিকালজ্ঞানসম্পন্নাং নমামি ভুবনেশ্বরীম্ ॥ 14 ॥

লক্ষ্মীং ক্ষীরসমুদ্ররাজ তনযাং শ্রীরঙ্গধামেশ্বরীম্ ।

দাসীভূত সমস্তদেব বনিতাং লোকৈক দীপাঙ্কুরাম্ ॥

শ্রীমন্মন্দ কটাক্ষ লব্ধ বিভবদ্-ব্রহ্মেন্দ্র গঙ্গাধরাম্ ।

ত্বাং ত্রৈলোক্য কুটুম্বিনীং সরসিজাং বন্দে মুকুন্দপ্রিযাম্ ॥ 15 ॥

মাতর্নমামি! কমলে! কমলাযতাক্ষি!

শ্রী বিষ্ণু হৃত্-কমলবাসিনি! বিশ্বমাতঃ!

ক্ষীরোদজে কমল কোমল গর্ভগৌরি!

লক্ষ্মী! প্রসীদ সততং সমতাং শরণ্যে ॥ 16 ॥

ত্রিকালং যো জপেত্ বিদ্বান্ ষণ্মাসং বিজিতেন্দ্রিযঃ ।

দারিদ্র্য ধ্বংসনং কৃত্বা সর্বমাপ্নোত্-যযত্নতঃ ।

দেবীনাম সহস্রেষু পুণ্যমষ্টোত্তরং শতম্ ।

যেন শ্রিয মবাপ্নোতি কোটিজন্ম দরিদ্রতঃ ॥ 17 ॥

ভৃগুবারে শতং ধীমান্ পঠেত্ বত্সরমাত্রকম্ ।

অষ্টৈশ্বর্য মবাপ্নোতি কুবের ইব ভূতলে ॥

দারিদ্র্য মোচনং নাম স্তোত্রমম্বাপরং শতম্ ।

যেন শ্রিয মবাপ্নোতি কোটিজন্ম দরিদ্রতঃ ॥ 18 ॥

ভুক্ত্বাতু বিপুলান্ ভোগান্ অন্তে সাযুজ্যমাপ্নুযাত্ ।

প্রাতঃকালে পঠেন্নিত্যং সর্ব দুঃখোপ শান্তযে ।

পঠন্তু চিন্তযেদ্দেবীং সর্বাভরণ ভূষিতাম্ ॥ 19 ॥

ইতি শ্রী লক্ষ্ম্যষ্টোত্তরশতনামস্তোত্রং সম্পূর্ণং