Sree Durga Sahasra Nama Stotram

shrI durgA sahasra nAma stotram

shloka 1

|| atha shrI durgA sahasranAmastotram ||

nArada uvAcha -

kumAra guNagambhIra devasenApate prabho |

sarvAbhIShTapradaM puMsAM sarvapApapraNAshanam || 1||

guhyAdguhyataraM stotraM bhaktivardhakama~njasA |

ma~NgalaM grahapIDAdishAntidaM vaktumarhasi || 2||

skanda uvAcha -

shRRiNu nArada devarShe lokAnugrahakAmyayA |

yatpRRichChasi paraM puNyaM tatte vakShyAmi kautukAt || 3||

mAtA me lokajananI himavannagasattamAt |

menAyAM brahmavAdinyAM prAdurbhUtA harapriyA || 4||

mahatA tapasA.a.arAdhya shaNkaraM lokashaNkaram |

svameva vallabhaM bheje kaleva hi kalAnidhim || 5||

nagAnAmadhirAjastu himavAn virahAturaH |

svasutAyAH parikShINe vasiShThena prabodhitaH || 6||

trilokajananI seyaM prasannA tvayi puNyataH |

prAdurbhUtA sutAtvena tadviyogaM shubhaM tyaja || 7||

bahurUpA cha durgeyaM bahunAmnI sanAtanI |

sanAtanasya jAyA sA putrImohaM tyajAdhunA || 8||

iti prabodhitaH shailaH tAM tuShTAva parAM shivAm |

tadA prasannA sA durgA pitaraM prAha nandinI || 9||

matprasAdAtparaM stotraM hRRidaye pratibhAsatAm |

tena nAmnAM sahasreNa pUjayan kAmamApnuhi || 10||

ityuktvAntarhitAyAM tu hRRidaye sphuritaM tadA |

nAmnAM sahasraM durgAyAH pRRichChate me yaduktavAn || 11||

maNgalAnAM maNgalaM tad durgAnAma sahasrakam |

sarvAbhIShTapradAM puMsAM bravImyakhilakAmadam || 12||

durgAdevI samAkhyAtA himavAnRRiShiruchyate |

ChandonuShTup japo devyAH prItaye kriyate sadA || 13||

asya shrIdurgAstotramahAmantrasya | himavAn RRiShiH | anuShTup ChandaH |

durgAbhagavatI devatA | shrIdurgAprasAdasiddhyarthe jape viniyogaH | |

shrIbhagavatyai durgAyai namaH |

devIdhyAnam

OM hrIM kAlAbhrAbhAM kaTAkShairarikulabhayadAM maulibaddhendurekhAM

sha~NkhaM chakraM kRRipANaM trishikhamapi karairudvahantIM trinetrAm |

siMhaskandhAdhirUDhAM tribhuvanamakhilaM tejasA pUrayantIM

dhyAyed durgAM jayAkhyAM tridashaparivRRitAM sevitAM siddhikAmaiH ||

shrI jayadurgAyai namaH |

OM shivAthomA ramA shaktiranantA niShkalA.amalA |

shAntA mAheshvarI nityA shAshvatA paramA kShamA || 1||

achintyA kevalAnantA shivAtmA paramAtmikA |

anAdiravyayA shuddhA sarvaj~nA sarvagA.achalA || 2||

ekAnekavibhAgasthA mAyAtItA sunirmalA |

mahAmAheshvarI satyA mahAdevI nira~njanA || 3||

kAShThA sarvAntarasthA.api chichChaktishchAtrilAlitA |

sarvA sarvAtmikA vishvA jyotIrUpAkSharAmRRitA || 4||

shAntA pratiShThA sarveshA nivRRittiramRRitapradA |

vyomamUrtirvyomasaMsthA vyomadhArA.achyutA.atulA || 5||

anAdinidhanA.amoghA kAraNAtmakalAkulA |

RRituprathamajA.anAbhiramRRitAtmasamAshrayA || 6||

prANeshvarapriyA namyA mahAmahiShaghAtinI |

prANeshvarI prANarUpA pradhAnapuruSheshvarI || 7||

sarvashaktikalA.akAmA mahiSheShTavinAshinI |

sarvakAryaniyantrI cha sarvabhUteshvareshvarI || 8||

a~NgadAdidharA chaiva tathA mukuTadhAriNI |

sanAtanI mahAnandA.a.akAshayonistathechyate || 9||

chitprakAshasvarUpA cha mahAyogeshvareshvarI |

mahAmAyA saduShpArA mUlaprakRRitirIshikA || 10||

saMsArayoniH sakalA sarvashaktisamudbhavA |

saMsArapArA durvArA durnirIkShA durAsadA || 11||

prANashaktishcha sevyA cha yoginI paramAkalA |

mahAvibhUtirdurdarshA mUlaprakRRitisambhavA || 12||

anAdyanantavibhavA parArthA puruShAraNiH |

sargasthityantakRRichchaiva sudurvAchyA duratyayA || 13||

shabdagamyA shabdamAyA shabdAkhyAnandavigrahA |

pradhAnapuruShAtItA pradhAnapuruShAtmikA || 14||

purANI chinmayA puMsAmiShTadA puShTirUpiNI |

pUtAntarasthA kUTasthA mahApuruShasanjnitA || 15||

janmamRRityujarAtItA sarvashaktisvarUpiNI |

vA~nChApradA.anavachChinnapradhAnAnupraveshinI || 16||

kShetraj~nA.achintyashaktistu prochyate.avyaktalakShaNA |

malApavarjitA.a.anAdimAyA tritayatattvikA || 17||

prItishcha prakRRitishchaiva guhAvAsA tathochyate |

mahAmAyA nagotpannA tAmasI cha dhruvA tathA || 18||

vyaktA.avyaktAtmikA kRRiShNA raktA shuklA hyakAraNA |

prochyate kAryajananI nityaprasavadharmiNI || 19||

sargapralayamuktA cha sRRiShTisthityantadharmiNI |

brahmagarbhA chaturviMshasvarUpA padmavAsinI || 20||

achyutAhlAdikA vidyudbrahmayonirmahAlayA |

mahAlakShmI samudbhAvabhAvitAtmAmaheshvarI || 21||

mahAvimAnamadhyasthA mahAnidrA sakautukA |

sarvArthadhAriNI sUkShmA hyaviddhA paramArthadA || 22||

anantarUpA.anantArthA tathA puruShamohinI |

anekAnekahastA cha kAlatrayavivarjitA || 23||

brahmajanmA haraprItA matirbrahmashivAtmikA |

brahmeshaviShNusampUjyA brahmAkhyA brahmasanjnitA || 24||

vyaktA prathamajA brAhmI mahArAtrIH prakIrtitA |

j~nAnasvarUpA vairAgyarUpA hyaishvaryarUpiNI || 25||

dharmAtmikA brahmamUrtiH pratishrutapumarthikA |

apAMyoniH svayambhUtA mAnasI tattvasambhavA || 26||

Ishvarasya priyA proktA sha~NkarArdhasharIriNI |

bhavAnI chaiva rudrANI mahAlakShmIstathA.ambikA || 27||

maheshvarasamutpannA bhuktimukti pradAyinI |

sarveshvarI sarvavandyA nityamuktA sumAnasA || 28||

mahendropendranamitA shA~NkarIshAnuvartinI |

IshvarArdhAsanagatA mAheshvarapativratA || 29||

saMsArashoShiNI chaiva pArvatI himavatsutA |

paramAnandadAtrI cha guNAgryA yogadA tathA || 30||

j~nAnamUrtishcha sAvitrI lakShmIH shrIH kamalA tathA |

anantaguNagambhIrA hyuronIlamaNiprabhA || 31||

sarojanilayA ga~NgA yogidhyeyA.asurArdinI |

sarasvatI sarvavidyA jagajjyeShThA suma~NgalA || 32||

vAgdevI varadA varyA kIrtiH sarvArthasAdhikA |

vAgIshvarI brahmavidyA mahAvidyA sushobhanA || 33||

grAhyavidyA vedavidyA dharmavidyA.a.atmabhAvitA |

svAhA vishvambharA siddhiH sAdhyA medhA dhRRitiH kRRitiH || 34||

sunItiH sa~NkRRitishchaiva kIrtitA naravAhinI |

pUjAvibhAvinI saumyA bhogyabhAg bhogadAyinI || 35||

shobhAvatI shA~NkarI cha lolA mAlAvibhUShitA |

parameShThipriyA chaiva trilokIsundarI mAtA || 36||

nandA sandhyA kAmadhAtrI mahAdevI susAttvikA |

mahAmahiShadarpaghnI padmamAlA.aghahAriNI || 37||

vichitramukuTA rAmA kAmadAtA prakIrtitA |

pitAmbaradharA divyavibhUShaNa vibhUShitA || 38||

divyAkhyA somavadanA jagatsaMsRRiShTivarjitA |

niryantrA yantravAhasthA nandinI rudrakAlikA || 39||

AdityavarNA kaumArI mayUravaravAhinI |

padmAsanagatA gaurI mahAkAlI surArchitA || 40||

aditirniyatA raudrI padmagarbhA vivAhanA |

virUpAkShA keshivAhA guhApuranivAsinI || 41||

mahAphalA.anavadyA~NgI kAmarUpA saridvarA |

bhAsvadrUpA muktidAtrI praNatakleshabha~njanA || 42||

kaushikI gominI rAtristridashArivinAshinI |

bahurUpA surUpA cha virUpA rUpavarjitA || 43||

bhaktArtishamanA bhavyA bhavabhAvavinAshinI |

sarvajnAnaparItANgI sarvAsuravimardikA || 44||

pikasvanI sAmagItA bhavA~NkanilayA priyA |

dIkShA vidyAdharI dIptA mahendrAhitapAtinI || 45||

sarvadevamayA dakShA samudrAntaravAsinI |

akala~NkA nirAdhArA nityasiddhA nirAmayA || 46||

kAmadhenubRRihadgarbhA dhImatI maunanAshinI |

niHsaNkalpA nirAtaNkA vinayA vinayapradA || 47||

jvAlAmAlA sahasrADhyA devadevI manomayA |

subhagA suvishuddhA cha vasudevasamudbhavA || 48||

mahendropendrabhaginI bhaktigamyA parAvarA |

jnAnajneyA parAtItA vedAntaviShayA matiH || 49||

dakShiNA dAhikA dahyA sarvabhUtahRRidisthitA |

yogamAyA vibhAgaj~nA mahAmohA garIyasI || 50||

sandhyA sarvasamudbhUtA brahmavRRikShAshriyAditiH |

bIjA~NkurasamudbhUtA mahAshaktirmahAmatiH || 51||

khyAtiH prajnAvatI sanj~nA mahAbhogIndrashAyinI |

hINkRRitiH shaNkarI shAntirgandharvagaNasevitA || 52||

vaishvAnarI mahAshUlA devasenA bhavapriyA |

mahArAtrI parAnandA shachI duHsvapnanAshinI || 53||

IDyA jayA jagaddhAtrI durvij~neyA surUpiNI |

guhAmbikA gaNotpannA mahApIThA marutsutA || 54||

havyavAhA bhavAnandA jagadyoniH prakIrtitA |

jaganmAtA jaganmRRityurjarAtItA cha buddhidA || 55||

siddhidAtrI ratnagarbhA ratnagarbhAshrayA parA |

daityahantrI sveShTadAtrI ma~NgalaikasuvigrahA || 56||

puruShAntargatA chaiva samAdhisthA tapasvinI |

divisthitA triNetrA cha sarvendriyamanAdhRRitiH || 57||

sarvabhUtahRRidisthA cha tathA saMsAratAriNI |

vedyA brahmavivedyA cha mahAlIlA prakIrtitA || 58||

brAhmaNibRRihatI brAhmI brahmabhUtA.aghahAriNI |

hiraNmayI mahAdAtrI saMsAraparivartikA || 59||

sumAlinI surUpA cha bhAsvinI dhAriNI tathA |

unmUlinI sarvasabhA sarvapratyayasAkShiNI || 60||

susaumyA chandravadanA tANDavAsaktamAnasA |

sattvashuddhikarI shuddhA malatrayavinAshinI || 61||

jagatttrayI jaganmUrtistrimUrtiramRRitAshrayA |

vimAnasthA vishokA cha shokanAshinyanAhatA || 62||

hemakuNDalinI kAlI padmavAsA sanAtanI |

sadAkIrtiH sarvabhUtashayA devI satAmpriyA || 63||

brahmamUrtikalA chaiva kRRittikA ka~njamAlinI |

vyomakeshA kriyAshaktirichChAshaktiH parAgatiH || 64||

kShobhikA khaNDikAbhedyA bhedAbhedavivarjitA |

abhinnA bhinnasaMsthAnA vashinI vaMshadhAriNI || 65||

guhyashaktirguhyatattvA sarvadA sarvatomukhI |

bhaginI cha nirAdhArA nirAhArA prakIrtitA || 66||

nira~NkushapadodbhUtA chakrahastA vishodhikA |

sragviNI padmasambhedakAriNI parikIrtitA || 67||

parAvaravidhAnaj~nA mahApuruShapUrvajA |

parAvaraj~nA vidyA cha vidyujjihvA jitAshrayA || 68||

vidyAmayI sahasrAkShI sahasravadanAtmajA |

sahasrarashmiHsatvasthA maheshvarapadAshrayA || 69||

jvAlinI sanmayA vyAptA chinmayA padmabhedikA |

mahAshrayA mahAmantrA mahAdevamanoramA || 70||

vyomalakShmIH siMharathA chekitAnA.amitaprabhA |

vishveshvarI bhagavatI sakalA kAlahAriNI || 71||

sarvavedyA sarvabhadrA guhyA dUDhA guhAraNI |

pralayA yogadhAtrI cha ga~NgA vishveshvarI tathA || 72||

kAmadA kanakA kAntA ka~njagarbhaprabhA tathA |

puNyadA kAlakeshA cha bhokttrI puShkariNI tathA || 73||

sureshvarI bhUtidAtrI bhUtibhUShA prakIrtitA |

pa~nchabrahmasamutpannA paramArthA.arthavigrahA || 74||

varNodayA bhAnumUrtirvAgvij~neyA manojavA |

manoharA mahoraskA tAmasI vedarUpiNI || 75||

vedashaktirvedamAtA vedavidyAprakAshinI |

yogeshvareshvarI mAyA mahAshaktirmahAmayI || 76||

vishvAntaHsthA viyanmUrtirbhArgavI surasundarI |

surabhirnandinI vidyA nandagopatanUdbhavA || 77||

bhAratI paramAnandA parAvaravibhedikA |

sarvapraharaNopetA kAmyA kAmeshvareshvarI || 78||

anantAnandavibhavA hRRillekhA kanakaprabhA |

kUShmANDA dhanaratnADhyA sugandhA gandhadAyinI || 79||

trivikramapadodbhUtA chaturAsyA shivodayA |

sudurlabhA dhanAdhyakShA dhanyA pi~NgalalochanA || 80||

shAntA prabhAsvarUpA cha pa~NkajAyatalochanA |

indrAkShI hRRidayAntaHsthA shivA mAtA cha satkriyA || 81||

girijA cha sugUDhA cha nityapuShTA nirantarA |

durgA kAtyAyanI chaNDI chandrikA kAntavigrahA || 82||

hiraNyavarNA jagatI jagadyantrapravartikA |

mandarAdrinivAsA cha shAradA svarNamAlinI || 83||

ratnamAlA ratnagarbhA vyuShTirvishvapramAthinI |

padmAnandA padmanibhA nityapuShTA kRRitodbhavA || 84||

nArAyaNI duShTashikShA sUryamAtA vRRiShapriyA |

mahendrabhaginI satyA satyabhAShA sukomalA || 85||

vAmA cha pa~nchatapasAM varadAtrI prakIrtitA |

vAchyavarNeshvarI vidyA durjayA duratikramA || 86||

kAlarAtrirmahAvegA vIrabhadrapriyA hitA |

bhadrakAlI jaganmAtA bhaktAnAM bhadradAyinI || 87||

karAlA pi~NgalAkArA kAmabhettrI mahAmanAH |

yashasvinI yashodA cha ShaDadhvaparivartikA || 88||

shaNkhinI padminI saNkhyA sA~NkhyayogapravartikA |

chaitrAdirvatsarArUDhA jagatsampUraNIndrajA || 89||

shumbhaghnI khecharArAdhyA kambugrIvA balIDitA |

khagArUDhA mahaishvaryA supadmanilayA tathA || 90||

viraktA garuDasthA cha jagatIhRRidguhAshrayA |

shumbhAdimathanA bhaktahRRidgahvaranivAsinI || 91||

jagatttrayAraNI siddhasa~NkalpA kAmadA tathA |

sarvavij~nAnadAtrI chAnalpakalmaShahAriNI || 92||

sakalopaniShadgamyA duShTaduShprekShyasattamA |

sadvRRitA lokasaMvyAptA tuShTiH puShTiH kriyAvatI || 93||

vishvAmareshvarI chaiva bhuktimuktipradAyinI |

shivAdhRRitA lohitAkShI sarpamAlAvibhUShaNA || 94||

nirAnandA trishUlAsidhanurbANAdidhAriNI |

asheShadhyeyamUrtishcha devatAnAM cha devatA || 95||

varAmbikA gireH putrI nishumbhavinipAtinI |

suvarNA svarNalasitA.anantavarNA sadAdhRRitA || 96||

shA~NkarI shAntahRRidayA ahorAtravidhAyikA |

vishvagoptrI gUDharUpA guNapUrNA cha gArgyajA || 97||

gaurI shAkambharI satyasandhA sandhyAtrayIdhRRitA |

sarvapApavinirmuktA sarvabandhavivarjitA || 98||

sA~NkhyayogasamAkhyAtA aprameyA munIDitA |

vishuddhasukulodbhUtA bindunAdasamAdRRitA || 99||

shambhuvAmA~NkagA chaiva shashitulyanibhAnanA |

vanamAlAvirAjantI anantashayanAdRRitA || 100||

naranArAyaNodbhUtA nArasiMhI prakIrtitA |

daityapramAthinI sha~NkhachakrapadmagadAdharA || 101||

sa~NkarShaNasamutpannA ambikA sajjanAshrayA |

suvRRitA sundarI chaiva dharmakAmArthadAyinI || 102||

mokShadA bhaktinilayA purANapuruShAdRRitA |

mahAvibhUtidA.a.arAdhyA sarojanilayA.asamA || 103||

aShTAdashabhujA.anAdirnIlotpaladalAkShiNI |

sarvashaktisamArUDhA dharmAdharmavivarjitA || 104||

vairAgyaj~nAnaniratA nirAlokA nirindriyA |

vichitragahanAdhArA shAshvatasthAnavAsinI || 105||

jnAneshvarI pItachelA vedavedANgapAragA |

manasvinI manyumAtA mahAmanyusamudbhavA || 106||

amanyuramRRitAsvAdA purandarapariShTutA |

ashochyA bhinnaviShayA hiraNyarajatapriyA || 107||

hiraNyajananI bhImA hemAbharaNabhUShitA |

vibhrAjamAnA durj~neyA jyotiShTomaphalapradA || 108||

mahAnidrAsamutpattiranidrA satyadevatA |

dIrghA kakudminI piNgajaTAdhArA manojnadhIH || 109||

mahAshrayA ramotpannA tamaHpAre pratiShThitA |

tritattvamAtA trividhA susUkShmA padmasaMshrayA || 110||

shAntyatItakalA.atItavikArA shvetachelikA |

chitramAyA shivaj~nAnasvarUpA daityamAthinI || 111||

kAshyapI kAlasarpAbhaveNikA shAstrayonikA |

trayImUrtiH kriyAmUrtishchaturvargA cha darshinI || 112||

nArAyaNI narotpannA kaumudI kAntidhAriNI |

kaushikI lalitA lIlA parAvaravibhAvinI || 113||

vareNyA.adbhutamahAtmyA vaDavA vAmalochanA |

subhadrA chetanArAdhyA shAntidA shAntivardhinI || 114||

jayAdishaktijananI shaktichakrapravartikA |

trishaktijananI janyA ShaTsUtraparivarNitA || 115||

sudhautakarmaNA.a.arAdhyA yugAntadahanAtmikA |

sa~NkarShiNI jagaddhAtrI kAmayoniH kirITinI || 116||

aindrI trailokyanamitA vaiShNavI parameshvarI |

pradyumnajananI bimbasamoShThI padmalochanA || 117||

madotkaTA haMsagatiH prachaNDA chaNDavikramA |

vRRiShAdhIshA parAtmA cha vindhyA parvatavAsinI || 118||

himavanmerunilayA kailAsapuravAsinI |

chANUrahantrI nItij~nA kAmarUpA trayItanuH || 119||

vratasnAtA dharmashIlA siMhAsananivAsinI |

vIrabhadrAdRRitA vIrA mahAkAlasamudbhavA || 120||

vidyAdharArchitA siddhasAdhyArAdhitapAdukA |

shraddhAtmikA pAvanI cha mohinI achalAtmikA || 121||

mahAdbhutA vArijAkShI siMhavAhanagAminI |

manIShiNI sudhAvANI vINAvAdanatatparA || 122||

shvetavAhaniShevyA cha lasanmatirarundhatI |

hiraNyAkShI tathA chaiva mahAnandapradAyinI || 123||

vasuprabhA sumAlyAptakandharA pa~NkajAnanA |

parAvarA varArohA sahasranayanArchitA || 124||

shrIrUpA shrImatI shreShThA shivanAmnI shivapriyA |

shrIpradA shritakalyANA shrIdharArdhasharIriNI || 125||

shrIkalA.anantadRRiShTishcha hyakShudrArAtisUdanI |

raktabIjanihantrI cha daityasa~NgavimardinI || 126||

siMhArUDhA siMhikAsyA daityashoNitapAyinI |

sukIrtisahitAchChinnasaMshayA rasavedinI || 127||

guNAbhirAmA nAgArivAhanA nirjarArchitA |

nityoditA svaya~njyotiH svarNakAyA prakIrtitA || 128||

vajradaNDANkitA chaiva tathAmRRitasanjIvinI |

vajrachChannA devadevI varavajrasvavigrahA || 129||

mANgalyA maNgalAtmA cha mAlinI mAlyadhAriNI |

gandharvI taruNI chAndrI khaDgAyudhadharA tathA || 130||

saudAminI prajAnandA tathA proktA bhRRigUdbhavA |

ekAna~NgA cha shAstrArthakushalA dharmachAriNI || 131||

dharmasarvasvavAhA cha dharmAdharmavinishchayA |

dharmashaktirdharmamayA dhArmikAnAM shivapradA || 132||

vidharmA vishvadharmaj~nA dharmArthAntaravigrahA |

dharmavarShmA dharmapUrvA dharmapAra~NgatAntarA || 133||

dharmopadeShTrI dharmAtmA dharmagamyA dharAdharA |

kapAlinI shAkalinI kalAkalitavigrahA || 134||

sarvashaktivimuktA cha karNikAradharA.akSharA|

kaMsaprANaharA chaiva yugadharmadharA tathA || 135||

yugapravartikA proktA trisandhyA dhyeyavigrahA |

svargApavargadAtrI cha tathA pratyakShadevatA || 136||

AdityA divyagandhA cha divAkaranibhaprabhA |

padmAsanagatA proktA khaDgabANasharAsanA || 137||

shiShTA vishiShTA shiShTeShTA shiShTashreShThaprapUjitA |

shatarUpA shatAvartA vitatA rAsamodinI || 138||

sUryendunetrA pradyumnajananI suShThumAyinI |

sUryAntarasthitA chaiva satpratiShThatavigrahA || 139||

nivRRittA prochyate j~nAnapAragA parvatAtmajA |

kAtyAyanI chaNDikA cha chaNDI haimavatI tathA || 140||

dAkShAyaNI satI chaiva bhavAnI sarvama~NgalA |

dhUmralochanahantrI cha chaNDamuNDavinAshinI || 141||

yoganidrA yogabhadrA samudratanayA tathA |

devapriya~NkarI shuddhA bhaktabhaktipravardhinI || 142||

triNetrA chandramukuTA pramathArchitapAdukA |

arjunAbhIShTadAtrI cha pANDavapriyakAriNI || 143||

kumAralAlanAsaktA harabAhUpadhAnikA |

vighneshajananI bhaktavighnastomaprahAriNI || 144||

susmitendumukhI namyA jayApriyasakhI tathA |

anAdinidhanA preShThA chitramAlyAnulepanA || 145||

koTichandrapratIkAshA kUTajAlapramAthinI |

kRRityAprahAriNI chaiva mAraNochchATanI tathA || 146||

surAsurapravandyANghrirmohaghnI jnAnadAyinI |

ShaDvairinigrahakarI vairividrAviNI tathA || 147||

bhUtasevyA bhUtadAtrI bhUtapIDAvimardikA |

nAradastutachAritrA varadeshA varapradA || 148||

vAmadevastutA chaiva kAmadA somashekharA |

dikpAlasevitA bhavyA bhAminI bhAvadAyinI || 149||

strIsaubhAgyapradAtrI cha bhogadA roganAshinI |

vyomagA bhUmigA chaiva munipUjyapadAmbujA |

vanadurgA cha durbodhA mahAdurgA prakIrtitA || 150||

phalashrutiH

itIdaM kIrtidaM bhadra durgAnAmasahasrakam |

trisandhyaM yaH paThennityaM tasya lakShmIH sthirA bhavet || 1||

grahabhUtapishAchAdipIDA nashyatyasaMshayam |

bAlagrahAdipIDAyAH shAntirbhavati kIrtanAt || 2||

mArikAdimahAroge paThatAM saukhyadaM nRRiNAm |

vyavahAre cha jayadaM shatrubAdhAnivArakam || 3||

dampatyoH kalahe prApte mithaH premAbhivardhakam |

AyurArogyadaM puMsAM sarvasampatpradAyakam || 4||

vidyAbhivardhakaM nityaM paThatAmarthasAdhakam |

shubhadaM shubhakAryeShu paThatAM shRRiNutAmapi || 5||

yaH pUjayati durgAM tAM durgAnAmasahasrakaiH |

puShpaiH kuNkumasammishraiH sa tu yatkANkShate hRRidi || 6||

tatsarvaM samavApnoti nAsti nAstyatra saMshayaH |

yanmukhe dhriyate nityaM durgAnAmasahasrakam || 7||

kiM tasyetaramantraughaiH kAryaM dhanyatamasya hi |

durgAnAmasahasrasya pustakaM yadgRRihe bhavet || 8||

na tatra grahabhUtAdibAdhA syAnma~NgalAspade |

tadgRRihaM puNyadaM kShetraM devIsAnnidhyakArakam || 9||

etasya stotramukhyasya pAThakaH shreShThamantravit |

devatAyAH prasAdena sarvapUjyaH sukhI bhavet || 10||

ityetannagarAjena kIrtitaM munisattama |

guhyAdguhyataraM stotraM tvayi snehAt prakIrtitam || 11||

bhaktAya shraddhadhAnAya kevalaM kIrtyatAmidam |

hRRidi dhAraya nityaM tvaM devyanugrahasAdhakam || 12|| ||

iti shrIskAndapurANe skandanAradasaMvAde durgAsahasranAmastotraM sampUrNam ||