Sree Bhu Varaha Stotram

zrI bhU varAha stotram

zloka 1

RSaya Ucu |

jitaM jitaM te'jita yajJabhAvanA

trayIM tanUM svAM paridhunvate namaH |

yadromagarteSu nililyuradhvarAH

tasmai namaH kAraNasUkarAya te || 1 ||

rUpaM tavaitannanu duSkRtAtmanAM

durdarzanaM deva yadadhvarAtmakam |

chandAMsi yasya tvaci barhiroma-

ssvAjyaM dRzi tvaGghriSu cAturhotram || 2 ||

sruktuNDa AsItsruva Iza nAsayo-

riDodare camasAH karNarandhre |

prAzitramAsye grasane grahAstu te

yaccarvaNante bhagavannagnihotram || 3 ||

dIkSAnujanmopasadaH zirodharaM

tvaM prAyaNIyo dayanIya daMSTraH |

jihvA pravargyastava zIrSakaM kratoH

sabhyAvasathyaM citayo'savo hi te || 4 ||

somastu retaH savanAnyavasthitiH

saMsthAvibhedAstava deva dhAtavaH |

satrANi sarvANi zarIrasandhi-

stvaM sarvayajJakraturiSTibandhanaH || 5 ||

namo namaste'khilayantradevatA

dravyAya sarvakratave kriyAtmane |

vairAgya bhaktyAtmajayA'nubhAvita

jJAnAya vidyAgurave namò namaH || 6 ||

daMSTrAgrakoTyA bhagavaMstvayA dhRtA

virAjate bhUdhara bhUssabhUdharA |

yathA vanAnnissarato datA dhRtA

mataGgajendrasya sa patrapadminI || 7 ||

trayImayaM rUpamidaM ca saukaraM

bhUmaNDale nAtha tadA dhRtena te |

cakAsti zRGgoDhaghanena bhUyasA

kulAcalendrasya yathaiva vibhramaH || 8 ||

saMsthApayainAM jagatAM satasthuSAM

lokAya patnImasi mAtaraM pitA |

vidhema cAsyai namasA saha tvayA

yasyAM svatejo'gnimivAraNAvadhAH || 9 ||

kaH zraddhadhItAnyatamastava prabho

rasAM gatAyA bhuva udvibarhaNam |

na vismayo'sau tvayi vizvavismaye

yo mAyayedaM sasRje'ti vismayam || 10 ||

vidhunvatA vedamayaM nijaM vapu-

rjanastapaH satyanivAsino vayam |

saTAzikhoddhUta zivAmbubindubhi-

rvimRjyamAnA bhRzamIza pAvitAH || 11 ||

sa vai bata bhraSTamatistavaiSa te

yaH karmaNAM pAramapArakarmaNaH |

yadyogamAyA guNa yoga mohitaM

vizvaM samastaM bhagavan vidhehi zam || 12 ||

iti zrImadbhAgavate mahApurANe tRtIyaskandhe zrI varAha prAdurbhAvonAma trayodazodhyAyaH |