Sree Annapurna Stotram

zrI annapUrNA stotram

zloka 1

nityAnandakarI varAbhayakarI saundarya ratnAkarI

nirdhUtAkhila ghora pAvanakarI pratyakSa mAhezvarI |

prAleyAcala vaMza pAvanakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 1 ||

nAnA ratna vicitra bhUSaNakari hemAmbarADambarI

muktAhAra vilambamAna vilasat-vakSoja kumbhAntarI |

kAzmIrAgaru vAsitA rucikarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 2 ||

yogAnandakarI ripukSayakarI dharmaikya niSThAkarI

candrArkAnala bhAsamAna laharI trailokya rakSAkarI |

sarvaizvaryakarI tapaH phalakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 3 ||

kailAsAcala kandarAlayakarI gaurI-hyumAzAGkarI

kaumArI nigamArtha-gocarakarI-hyoGkAra-bIjAkSarI |

mokSadvAra-kavATapATanakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 4 ||

dRzyAdRzya-vibhUti-vAhanakarI brahmANDa-bhANDodarI

lIlA-nATaka-sUtra-khelanakarI vijJAna-dIpAGkurI |

zrIvizvezamanaH-prasAdanakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 5 ||

urvIsarvajayezvarI bhagavatI [jayakarI] mAtA kRpAsAgarI

veNI-nIlasamAna-kuntaladharI nityAnna-dAnezvarI |

sAkSAnmokSakarI sadA zubhakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 6 ||

AdikSAnta-samastavarNanakarI zambhostribhAvAkarI

kAzmIrA tripurezvarI trinayani vizvezvarI zarvarI |

svargadvAra-kapATa-pATanakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 7 ||

devI sarvavicitra-ratnarucitA dAkSAyiNI sundarI

vAmA-svAdupayodharA priyakarI saubhAgyamAhezvarI |

bhaktAbhISTakarI sadA zubhakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 8 ||

candrArkAnala-koTikoTi-sadRzI candrAMzu-bimbAdharI

candrArkAgni-samAna-kuNDala-dharI candrArka-varNezvarI

mAlA-pustaka-pAzasAGkuzadharI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 9 ||

kSatratrANakarI mahAbhayakarI mAtA kRpAsAgarI

sarvAnandakarI sadA zivakarI vizvezvarI zrIdharI |

dakSAkrandakarI nirAmayakarI kAzIpurAdhIzvarI

bhikSAM dehi kRpAvalambanakarI mAtAnnapUrNezvarI || 10 ||

annapUrNe sadApUrNe zaGkara-prANavallabhe |

jJAna-vairAgya-siddhyarthaM bhikSAM dehi ca pArvatI || 11 ||

mAtA ca pArvatIdevI pitAdevo mahezvaraH |

bAndhavA: zivabhaktAzca svadezo bhuvanatrayam || 12 ||

sarva-maGgala-mAGgalye zive sarvArtha-sAdhike |

zaraNye tryambake gauri nArAyaNi namo'stu te || 13 ||

iti zrImatparamahaMsaparivrAjakAcAryasya zrIgovindabhagavatpUjyapAdaziSyasya zrImacchaGkarabhagavataH kRtau annapUrNA stotram |