Sankshepa Ramayanam

sa~NkShepa rAmAyaNam

shloka 1

shrImadvAlmIkIya rAmAyaNe bAlakANDam |

atha prathamassargaH |

tapassvAdhyAyanirataM tapasvI vAgvidAM varam |

nAradaM paripaprachCha vAlmIkirmunipu~Ngavam || 1 ||

ko.anvasminsAmprataM loke guNavAn kashcha vIryavAn |

dharmajnashcha kRRitajnashcha satyavAkyo dRRiDhavrataH || 2 ||

chAritreNa cha ko yuktaH sarvabhUteShu ko hitaH |

vidvAn kaH kaH samarthashcha kashchaikapriyadarshanaH || 3 ||

AtmavAn ko jitakrodho dyutimAn ko.anasUyakaH |

kasya bibhyati devAshcha jAtaroShasya saMyuge || 4 ||

etadichChAmyahaM shrotuM paraM kautUhalaM hi me |

maharShe tvaM samartho.asi j~nAtumevaMvidhaM naram || 5 ||

shrutvA chaitattrilokaj~no vAlmIkernArado vachaH |

shrUyatAmiti chAmantrya prahRRiShTo vAkyamabravIt || 6 ||

bahavo durlabhAshchaiva ye tvayA kIrtitA guNAH |

mune vakShyAmyahaM buddhvA tairyuktaH shrUyatAM naraH || 7 ||

ikShvAkuvaMshaprabhavo rAmo nAma janaiH shrutaH |

niyatAtmA mahAvIryo dyutimAn dhRRitimAn vashI || 8 ||

buddhimAn nItimAn vAgmI shrImAn shatrunibarhaNaH |

vipulAMso mahAbAhuH kambugrIvo mahAhanuH || 9 ||

mahorasko maheShvAso gUDhajatrurarindamaH |

AjAnubAhuH sushirAH sulalATaH suvikramaH || 10 ||

samaH samavibhaktA~NgaH snigdhavarNaH pratApavAn |

pInavakShA vishAlAkSho lakShmIvAn shubhalakShaNaH || 11 ||

dharmaj~naH satyasandhashcha prajAnAM cha hite rataH |

yashasvI j~nAnasampannaH shuchirvashyaH samAdhimAn || 12 ||

prajApatisamaH shrImAn dhAtA ripuniShUdanaH |

rakShitA jIvalokasya dharmasya parirakShitA || 13 ||

rakShitA svasya dharmasya svajanasya cha rakShitA |

vedavedANgatattvajno dhanurvede cha niShThitaH || 14 ||

sarvashAstrArthatattvaj~no smRRitimAnpratibhAnavAn |

sarvalokapriyaH sAdhuradInAtmA vichakShaNaH || 15 ||

sarvadAbhigataH sadbhiH samudra iva sindhubhiH |

AryaH sarvasamashchaiva sadaikapriyadarshanaH || 16 ||

sa cha sarvaguNopetaH kausalyAnandavardhanaH |

samudra iva gAmbhIrye dhairyeNa himavAniva || 17 ||

viShNunA sadRRisho vIrye somavatpriyadarshanaH |

kAlAgnisadRRishaH krodhe kShamayA pRRithivIsamaH || 18 ||

dhanadena samastyAge satye dharma ivAparaH |

tamevaM guNasampannaM rAmaM satyaparAkramam || 19 ||

jyeShThaM shreShThaguNairyuktaM priyaM dasharathaH sutam |

prakRRitInAM hitairyuktaM prakRRiti priya kAmyayA || 20 ||

yauvarAjyena saMyoktumaichChatprItyA mahIpatiH |

tasyAbhiShekasambhArAn dRRiShTvA bhAryA.atha kaikayI || 21 ||

pUrvaM dattavarA devI varamenamayAchata |

vivAsanaM cha rAmasya bharatasyAbhiShechanam || 22 ||

sa satyavachanAdrAjA dharmapAshena saMyataH |

vivAsayAmAsa sutaM rAmaM dasharathaH priyam || 23 ||

sa jagAma vanaM vIraH pratij~nAmanupAlayan |

piturvachananirdeshAtkaikeyyAH priyakAraNAt || 24 ||

taM vrajantaM priyo bhrAtA lakShmaNo.anujagAma ha |

snehAdvinayasampannaH sumitrAnandavardhanaH || 25 ||

bhrAtaraM dayito bhrAtuH saubhrAtramanudarshayan |

rAmasya dayitA bhAryA nityaM prANasamAhitA || 26 ||

janakasya kule jAtA devamAyeva nirmitA |

sarvalakShaNasampannA nArINAmuttamA vadhUH || 27 ||

sItA.apyanugatA rAmaM shashinaM rohiNI yathA |

paurairanugato dUraM pitrA dasharathena cha || 28 ||

shRRiNgiberapure sUtaM gaNgAkUle vyasarjayat |

guhamAsAdya dharmAtmA niShAdAdhipatiM priyam || 29 ||

guhena sahito rAmaH lakShmaNena cha sItayA |

te vanena vanaM gatvA nadIstIrtvA bahUdakAH || 30 ||

chitrakUTamanuprApya bharadvAjasya shAsanAt |

ramyamAvasathaM kRRitvA ramamANA vane trayaH || 31 ||

devagandharvasa~NkAshAstatra te nyavasansukham |

chitrakUTaM gate rAme putrashokAturastathA || 32 ||

rAjA dasharathaH svargaM jagAma vilapansutam |

mRRite tu tasminbharato vasiShThapramukhairdvijaiH || 33 ||

niyujyamAno rAjyAya naichChadrAjyaM mahAbalaH |

sa jagAma vanaM vIro rAmapAdaprasAdakaH || 34 ||

gatvA tu sa mahAtmAnaM rAmaM satyaparAkramam |

ayAchadbhrAtaraM rAmaM AryabhAvapuraskRRitaH || 35 ||

tvameva rAjA dharmaj~na iti rAmaM vacho.abravIt |

rAmo.api paramodAraH sumukhassumahAyashAH || 36 ||

na chaichChatpiturAdeshAdrAjyaM rAmo mahAbalaH |

pAduke chAsya rAjyAya nyAsaM dattvA punaH punaH || 37 ||

nivartayAmAsa tato bharataM bharatAgrajaH |

sa kAmamanavApyaiva rAmapAdAvupaspRRishan || 38 ||

nandigrAme.akarodrAjyaM rAmAgamanakA~NkShayA |

gate tu bharate shrImAn satyasandho jitendriyaH || 39 ||

rAmastu punarAlakShya nAgarasya janasya cha |

tatrAgamanamekAgro daNDakAnpravivesha ha || 40 ||

pravishya tu mahAraNyaM rAmo rAjIvalochanaH |

virAdhaM rAkShasaM hatvA sharabha~NgaM dadarsha ha || 41 ||

sutIkShNaM chApyagastyaM cha agastyabhrAtaraM tathA |

agastyavachanAchchaiva jagrAhaindraM sharAsanam || 42 ||

khaDgaM cha paramaprItastUNI chAkShayasAyakau |

vasatastasya rAmasya vane vanacharaiH saha || 43 ||

RRiShayo.abhyAgamansarve vadhAyAsurarakShasAm |

sa teShAM pratishushrAva rAkShasAnAM tathA vane || 44 ||

pratij~nAtashcha rAmeNa vadhaH saMyati rakShasAm |

RRiShINAmagnikalpAnAM daNDakAraNyavAsinAm || 45 ||

tena tatraiva vasatA janasthAnanivAsinI |

virUpitA shUrpaNakhA rAkShasI kAmarUpiNI || 46 ||

tataH shUrpaNakhAvAkyAdudyuktAnsarvarAkShasAn |

kharaM trishirasaM chaiva dUShaNaM chaiva rAkShasam || 47 ||

nijaghAna raNe rAmasteShAM chaiva padAnugAn |

vane tasminnivasatA janasthAnanivAsinAm || 48 ||

rakShasAM nihatAnyAsansahasrANi chaturdasha |

tato j~nAtivadhaM shrutvA rAvaNaH krodhamUrChitaH || 49 ||

sahAyaM varayAmAsa mArIchaM nAma rAkShasam |

vAryamANaH subahusho mArIchena sa rAvaNaH || 50 ||

na virodho balavatA kShamo rAvaNa tena te |

anAdRRitya tu tadvAkyaM rAvaNaH kAlachoditaH || 51 ||

jagAma sahamArIchaH tasyAshramapadaM tadA |

tena mAyAvinA dUramapavAhya nRRipAtmajau || 52 ||

jahAra bhAryAM rAmasya gRRidhraM hatvA jaTAyuSham |

gRRidhraM cha nihataM dRRiShTvA hRRitAM shrutvA cha maithilIm || 53 ||

rAghavaH shokasantapto vilalApAkulendriyaH |

tatastenaiva shokena gRRidhraM dagdhvA jaTAyuSham || 54 ||

mArgamANo vane sItAM rAkShasaM sandadarsha ha |

kabandhaM nAma rUpeNa vikRRitaM ghoradarshanam || 55 ||

taM nihatya mahAbAhuH dadAha svargatashcha saH |

sa chAsya kathayAmAsa shabarIM dharmachAriNIm || 56 ||

shramaNIM dharmanipuNAmabhigachCheti rAghavam |

so.abhyagachChanmahAtejAH shabarIM shatrusUdanaH || 57 ||

shabaryA pUjitaH samyagrAmo dasharathAtmajaH |

pampAtIre hanumatA sa~Ngato vAnareNa ha || 58 ||

hanumadvachanAchchaiva sugrIveNa samAgataH |

sugrIvAya cha tatsarvaM shaMsadrAmo mahAbalaH || 59 ||

AditastadyathAvRRittaM sItayAshcha visheShataH |

sugrIvashchApi tatsarvaM shrutvA rAmasya vAnaraH || 60 ||

chakAra sakhyaM rAmeNa prItashchaivAgnisAkShikam |

tato vAnararAjena vairAnukathanaM prati || 61 ||

rAmAyAveditaM sarvaM praNayAdduHkhitena cha |

pratij~nAtaM cha rAmeNa tadA vAlivadhaM prati || 62 ||

vAlinashcha balaM tatra kathayAmAsa vAnaraH |

sugrIvaH sha~NkitashchAsInnityaM vIryeNa rAghave || 63 ||

rAghavaH pratyayArthaM tu dundubheH kAyamuttamam |

darshayAmAsa sugrIvo mahAparvata sannibham || 64 ||

utsmayitvA mahAbAhuH prekShya chAsthi mahAbalaH |

pAdA~NguShThena chikShepa sampUrNaM dashayojanam || 65 ||

bibheda cha punaH sAlAnsaptaikena maheShuNA |

giriM rasAtalaM chaiva janayan pratyayaM tadA || 66 ||

tataH prItamanAstena vishvastaH sa mahAkapiH |

kiShkindhAM rAmasahito jagAma cha guhAM tadA || 67 ||

tato.agarjaddharivaraH sugrIvo hemapi~NgalaH |

tena nAdena mahatA nirjagAma harIshvaraH || 68 ||

anumAnya tadA tArAM sugrIveNa samAgataH |

nijaghAna cha tatrainaM shareNaikena rAghavaH || 69 ||

tataH sugrIvavachanAddhatvA vAlinamAhave |

sugrIvameva tadrAjye rAghavaH pratyapAdayat || 70 ||

sa cha sarvAnsamAnIya vAnarAnvAnararShabhaH |

dishaH prasthApayAmAsa didRRikShurjanakAtmajAm || 71 ||

tato gRRidhrasya vachanAtsampAterhanumAnbalI |

shatayojanavistIrNaM pupluve lavaNArNavam || 72 ||

tatra la~NkAM samAsAdya purIM rAvaNapAlitAm |

dadarsha sItAM dhyAyantIM ashokavanikAM gatAm || 73 ||

nivedayitvA.abhij~nAnaM pravRRittiM cha nivedya cha |

samAshvAsya cha vaidehIM mardayAmAsa toraNam || 74 ||

pa~ncha senAgragAnhatvA sapta mantrisutAnapi |

shUramakShaM cha niShpiShya grahaNaM samupAgamat || 75 ||

astreNonmuktamAtmAnaM j~nAtvA paitAmahAdvarAt |

marShayanrAkShasAnvIro yantriNastAnyadRRichChayA || 76 ||

tato dagdhvA purIM la~NkAM RRite sItAM cha maithilIm |

rAmAya priyamAkhyAtuM punarAyAnmahAkapiH || 77 ||

so.abhigamya mahAtmAnaM kRRitvA rAmaM pradakShiNam |

nyavedayadameyAtmA dRRiShTA sIteti tattvataH || 78 ||

tataH sugrIvasahito gatvA tIraM mahodadheH |

samudraM kShobhayAmAsa sharairAdityasannibhaiH || 79 ||

darshayAmAsa chAtmAnaM samudraH saritAM patiH |

samudravachanAchchaiva nalaM setumakArayat || 80 ||

tena gatvA purIM la~NkAM hatvA rAvaNamAhave |

rAmaH sItAmanuprApya parAM vrIDAmupAgamat || 81 ||

tAmuvAcha tato rAmaH paruShaM janasaMsadi |

amRRiShyamANA sA sItA vivesha jvalanaM satI || 82 ||

tato.agnivachanAtsItAM j~nAtvA vigatakalmaShAm |

babhau rAmaH samprahRRiShTaH pUjitaH sarvadaivataiH || 83 ||

karmaNA tena mahatA trailokyaM sacharAcharam |

sadevarShigaNaM tuShTaM rAghavasya mahAtmanaH || 84 ||

abhiShichya cha la~NkAyAM rAkShasendraM vibhIShaNam |

kRRitakRRityastadA rAmo vijvaraH pramumoda ha || 85 ||

devatAbhyo varaM prApya samutthApya cha vAnarAn |

ayodhyAM prasthito rAmaH puShpakeNa suhRRidvRRitaH || 86 ||

bharadvAjAshramaM gatvA rAmaH satyaparAkramaH |

bharatasyAntikaM rAmo hanUmantaM vyasarjayat || 87 ||

punarAkhyAyikAM jalpansugrIvasahitashcha saH |

puShpakaM tatsamAruhya nandigrAmaM yayau tadA || 88 ||

nandigrAme jaTAM hitvA bhrAtRRibhiH sahito.anaghaH |

rAmaH sItAmanuprApya rAjyaM punaravAptavAn || 89 ||

prahRRiShTamudito lokastuShTaH puShTaH sudhArmikaH |

nirAmayo hyarogashcha durbhikSha bhayavarjitaH || 90 ||

na putramaraNaM ki~nchiddrakShyanti puruShAH kvachit |

nAryashchAvidhavA nityaM bhaviShyanti pativratAH || 91 ||

na chAgnijaM bhayaM ki~nchinnApsu majjanti jantavaH |

na vAtajaM bhayaM ki~nchinnApi jvarakRRitaM tathA || 92 ||

na chApi kShudbhayaM tatra na taskarabhayaM tathA |

nagarANi cha rAShTrANi dhanadhAnyayutAni cha || 93 ||

nityaM pramuditAH sarve yathA kRRitayuge tathA |

ashvamedhashatairiShTvA tathA bahusuvarNakaiH || 94 ||

gavAM koTyayutaM datvA brahmalokaM prayAsyati |

asa~NkhyeyaM dhanaM datvA brAhmaNebhyo mahAyashAH || 95 ||

rAjavaMshAn shataguNAn sthApayiShyati rAghavaH |

chAturvarNyaM cha loke.asmin sve sve dharme niyokShyati || 96 ||

dashavarShasahasrANi dashavarShashatAni cha |

rAmo rAjyamupAsitvA brahmalokaM gamiShyati || 97 ||

idaM pavitraM pApaghnaM puNyaM vedaishcha sammitam |

yaH paThedrAmacharitaM sarvapApaiH pramuchyate || 98 ||

etadAkhyAnamAyuShyaM paThanrAmAyaNaM naraH |

saputrapautraH sagaNaH pretya svarge mahIyate || 99 ||

paThan dvijo vAgRRiShabhatvamIyAt

syAt kShatriyo bhUmipatitvamIyAt |

vaNigjanaH paNyaphalatvamIyAt

janashcha shUdro.api mahattvamIyAt || 100 ||

ityArShe shrImadrAmAyaNe vAlmIkIye AdikAvye bAlakANDe nAradavAkyaM nAma prathamaH sargaH ||