Ranganatha Ashtakam

raGganAtha aSTakaM

zloka 1

AnandarUpe nijabodharUpe

brahmasvarUpe zrutimUrtirUpe |

zazAGkarUpe ramaNIyarUpe

zrIraGgarUpe ramatAM mano me || 1 ||

kAveritIre karuNAvilole

mandAramUle dhRtacArukele |

daityAntakAle'khilalokalIle

zrIraGgalIle ramatAM mano me || 2 ||

lakSmInivAse jagatAM nivAse

hRtpadmavAse ravibimbavAse |

kRpAnivAse guNabRndavAse

zrIraGgavAse ramatAM mano me || 3 ||

brahmAdivandye jagadekavandye

mukundavandye suranAthavandye |

vyAsAdivandye sanakAdivandye

zrIraGgavandye ramatAM mano me || 4 ||

brahmAdhirAje garuDAdhirAje

vaikuNTharAje surarAjarAje |

trailokyarAje'khilalokarAje

zrIraGgarAje ramatAM mano me || 5 ||

amoghamudre paripUrNanidre

zrIyoganidre sasamudranidre |

zritaikabhadre jagadekanidre

zrIraGgabhadre ramatAM mano me || 6 ||

sacitrazAyI bhujagendrazAyI

nandAGkazAyI kamalAGkazAyI |

kSIrAbdhizAyI vaTapatrazAyI

zrIraGgazAyI ramatAM mano me || 7 ||

idaM hi raGgaM tyajatAmihAGgaM

punarna cAGgaM yadi cAGgameti |

pANau rathAGgaM caraNe'mbu gAGgaM

yAne vihaGgaM zayane bhujaGgam || 8 ||

raGganAthASTakaM puNyaM prAtarutthAya yaH paThet |

sarvAnkAmAnavApnoti raGgisAyujyamApnuyAt || 9 ||

iti zrI raGganAthASTakam |