Rama Raksha Stotram

zrI rAma rakSA stotram

zloka 1

OM asya zrI rAmarakSA stotramantrasya

budhakauzika RSiH

zrI sItArAma candrodevatA

anuSTup chandaH

sItA zaktiH

zrImad hanumAn kIlakam

zrIrAmacandra prItyarthe rAmarakSA stotrajape viniyogaH ||

dhyAnam

dhyAyedAjAnubAhuM dhRtazara dhanuSaM baddha padmAsanasthaM

pItaM vAsovasAnaM navakamala dalasparthi netraM prasannam |

vAmAGkArUDha sItAmukha kamalamilallocanaM nIradAbhaM

nAnAlaGkAra dIptaM dadhatamuru jaTAmaNDalaM rAmacandram ||

stotram

caritaM raghunAthasya zatakoTi pravistaram |

ekaikamakSaraM puMsAM mahApAtaka nAzanam || 1 ||

dhyAtvA nIlotpala zyAmaM rAmaM rAjIvalocanam |

jAnakI lakSmaNopetaM jaTAmukuTa maNDitam || 2 ||

sAsitUNa dhanurbANa pANiM naktaM carAntakam |

svalIlayA jagattrAtu mAvirbhUtamajaM vibhum || 3 ||

rAmarakSAM paThetprAjJaH pApaghnIM sarvakAmadAm |

ziro me rAghavaH pAtu phAlaM (bhAlaM) dazarathAtmajaH || 4 ||

kausalyeyo dRzaupAtu vizvAmitrapriyaH zRtI |

ghrANaM pAtu makhatrAtA mukhaM saumitrivatsalaH || 5 ||

jihvAM vidyAnidhiH pAtu kaNThaM bharatavanditaH |

skandhau divyAyudhaH pAtu bhujau bhagnezakArmukaH || 6 ||

karau sItApatiH pAtu hRdayaM jAmadagnyajit |

madhyaM pAtu kharadhvaMsI nAbhiM jAmbavadAzrayaH || 7 ||

sugrIvezaH kaTiM pAtu sakthinI hanumat-prabhuH |

UrU raghUttamaH pAtu rakSaHkula vinAzakRt || 8 ||

jAnunI setukRt-pAtu jaGghe dazamukhAntakaH |

pAdau vibhISaNazrIdaH pAtu rAmo'khilaM vapuH || 9 ||

etAM rAmabalopetAM rakSAM yaH sukRtI paThet |

sa cirAyuH sukhI putrI vijayI vinayI bhavet || 10 ||

pAtAla-bhUtala-vyoma-cAriNa-zcadma-cAriNaH |

na draSTumapi zaktAste rakSitaM rAmanAmabhiH || 11 ||

rAmeti rAmabhadreti rAmacandreti vA smaran |

naro na lipyate pApairbhuktiM muktiM ca vindati || 12 ||

jagajjaitraika mantreNa rAmanAmnAbhi rakSitam |

yaH kaNThe dhArayettasya karasthAH sarvasiddhayaH || 13 ||

vajrapaJjara nAmedaM yo rAmakavacaM smaret |

avyAhatAjJaH sarvatra labhate jayamaGgalam || 14 ||

AdiSTavAn-yathA svapne rAmarakSAmimAM haraH |

tathA likhitavAn-prAtaH prabuddhau budhakauzikaH || 15 ||

ArAmaH kalpavRkSANAM virAmaH sakalApadAm |

abhirAma-strilokAnAM rAmaH zrImAn sa naH prabhuH || 16 ||

taruNau rUpasampannau sukumArau mahAbalau |

puNDarIka vizAlAkSau cIrakRSNAjinAmbarau || 17 ||

phalamUlAzinau dAntau tApasau brahmacAriNau |

putrau dazarathasyaitau bhrAtarau rAmalakSmaNau || 18 ||

zaraNyau sarvasattvAnAM zreSThau sarvadhanuSmatAm |

rakSaHkula nihantArau trAyetAM no raghUttamau || 19 ||

Atta sajya dhanuSA viSuspRzA vakSayAzuga niSaGga saGginau |

rakSaNAya mama rAmalakSaNAvagrataH pathi sadaiva gacchatAm || 20 ||

sannaddhaH kavacI khaDgI cApabANadharo yuvA |

gacchan manorathAnnazca (manoratho'smAkaM) rAmaH pAtu sa lakSmaNaH || 21 ||

rAmo dAzarathi zzUro lakSmaNAnucaro balI |

kAkutsaH puruSaH pUrNaH kausalyeyo raghUttamaH || 22 ||

vedAntavedyo yajJezaH purANa puruSottamaH |

jAnakIvallabhaH zrImAnaprameya parAkramaH || 23 ||

ityetAni japennityaM madbhaktaH zraddhayAnvitaH |

azvamedhAdhikaM puNyaM samprApnoti na saMzayaH || 24 ||

rAmaM dUrvAdala zyAmaM padmAkSaM pItavAsasam |

stuvanti nAmabhi-rdivyairna te saMsAriNo narAH || 25 ||

rAmaM lakSmaNa pUrvajaM raghuvaraM sItApatiM sundaram

kAkutsthaM karuNArNavaM guNanidhiM viprapriyaM dhArmikam |

rAjendraM satyasandhaM dazarathatanayaM zyAmalaM zAntamUrtim

vande lokAbhirAmaM raghukula tilakaM rAghavaM rAvaNArim || 26 ||

rAmAya rAmabhadrAya rAmacandrAya vedhase |

raghunAthAya nAthAya sItAyAH pataye namaH || 27 ||

zrIrAma rAma raghunandana rAma rAma

zrIrAma rAma bharatAgraja rAma rAma |

zrIrAma rAma raNakarkaza rAma rAma

zrIrAma rAma zaraNaM bhava rAma rAma || 28 ||

zrIrAma candra caraNau manasA smarAmi

zrIrAma candra caraNau vacasA gRhNAmi |

zrIrAma candra caraNau zirasA namAmi

zrIrAma candra caraNau zaraNaM prapadye || 29 ||

mAtA rAmo mat-pitA rAmacandraH

svAmI rAmo mat-sakhA rAmacandraH |

sarvasvaM me rAmacandro dayAluH

nAnyaM jAne naiva jAne na jAne || 30 ||

dakSiNe lakSmaNo yasya vAme ca (tu) janakAtmajA |

purato mArutiryasya taM vande raghunandanam || 31 ||

lokAbhirAmaM raNaraGgadhIraM

rAjIvanetraM raghuvaMzanAtham |

kAruNyarUpaM karuNAkaraM taM

zrIrAmacandraM zaraNyaM prapadye || 32 ||

manojavaM mAruta tulya vegaM

jitendriyaM buddhimatAM variSTam |

vAtAtmajaM vAnarayUtha mukhyaM

zrIrAmadUtaM zaraNaM prapadye || 33 ||

kUjantaM rAmarAmeti madhuraM madhurAkSaram |

AruhyakavitA zAkhAM vande vAlmIki kokilam || 34 ||

ApadAmapahartAraM dAtAraM sarvasampadAm |

lokAbhirAmaM zrIrAmaM bhUyobhUyo namAmyaham || 35 ||

bharjanaM bhavabIjAnAmarjanaM sukhasampadAm |

tarjanaM yamadUtAnAM rAma rAmeti garjanam || 36 ||

rAmo rAjamaNiH sadA vijayate rAmaM ramezaM bhaje

rAmeNAbhihatA nizAcaracamU rAmAya tasmai namaH |

rAmAnnAsti parAyaNaM parataraM rAmasya dAsosmyahaM

rAme cittalayaH sadA bhavatu me bho rAma mAmuddhara || 37 ||

zrIrAma rAma rAmeti rame rAme manorame |

sahasranAma tattulyaM rAma nAma varAnane || 38 ||

iti zrIbudhakauzikamuni viracitaM zrIrAma rakSAstotraM sampUrNam |

zrIrAma jayarAma jayajayarAma |