Purusha Suktam
Purusha Suktam
puruSa sUktam
zloka 1
o-ntacchaM॒-yorAvR॑NImahe | gA॒tuM-ya॒jJAya॑ | gA॒tuM-ya~॒jJapa॑taye | daivI᳚ sva॒stira॑stu naH | sva॒stirmAnu॑SebhyaH | U॒rdhva-Jji॑gAtu bheSa॒jam | za-nno॑ astu dvi॒pade᳚ | za-Jcatu॑Spade |
OM zAnti॒-zzAnti॒-zzAntiH॑ ||
sa॒hasra॑zIrSA॒ puru॑SaH | sa॒ha॒srA॒kSa-ssa॒hasra॑pAt |
sa bhUmiM॑-vi~॒zvato॑ vR॒tvA | atya॑tiSThaddazAGgu॒lam ||
puru॑Sa e॒vedagM sarvam᳚ | yadbhU॒taM-ya~cca॒ bhavyam᳚ |
u॒tAmR॑ta॒tva syezA॑naH | yadanne॑nAti॒roha॑ti ||
e॒tAvA॑nasya mahi॒mA | ato॒ jyAyAg॑zca॒ pUru॑SaH |
pAdo᳚-'sya॒ vizvA॑ bhU॒tAni॑ | tri॒pAda॑syA॒mRta॑-ndi॒vi ||
tri॒pAdU॒rdhva udai॒tpuru॑SaH | pAdo᳚-'sye॒hA-''bha॑vA॒tpunaH॑ |
tato॒ viSva॒Gvya॑krAmat | sA॒za॒nA॒na॒za॒ne a॒bhi ||
tasmA᳚dvi॒rADa॑jAyata | vi॒rAjo॒ adhi॒ pUru॑SaH |
sa jA॒to atya॑ricyata | pa॒zcAdbhUmi॒matho॑ pu॒raH ||
yatpuru॑SeNa ha॒viSA᳚ | de॒vA ya॒jJamata॑nvata |
va॒sa॒nto a॑syAsI॒dAjyam᳚ | grI॒Sma i॒dhmazza॒radhdha॒viH ||
sa॒ptAsyA॑sanpari॒dhayaH॑ | tri-ssa॒pta sa॒midhaH॑ kR॒tAH |
de॒vA yadya॒jJa-nta॑nvA॒nAH | aba॑dhna॒n-puru॑Sa-mpa॒zum ||
taM-ya~॒jJa-mba॒r॒hiSi॒ praukSan॑ | puru॑Sa-JjA॒tama॑gra॒taH |
tena॑ de॒vA aya॑janta | sA॒dhyA RSa॑yazca॒ ye ||
tasmA᳚dya॒jJAthsa॑rva॒hutaH॑ | sambhR॑ta-mpRSadA॒jyam |
pa॒zUg-stAg-zca॑kre vAya॒vyAn॑ | A॒ra॒NyAn-grA॒myAzca॒ ye ||
tasmA᳚dya॒jJAthsa॑rva॒hutaH॑ | Rca॒-ssAmA॑ni jajJire |
chandAgM॑si jajJire॒ tasmA᳚t | yaju॒stasmA॑dajAyata ||
tasmA॒dazvA॑ ajAyanta | ye ke co॑bha॒yAda॑taH |
gAvo॑ ha jajJire॒ tasmA᳚t | tasmA᳚jjA॒tA a॑jA॒vayaH॑ ||
yatpuru॑SaM॒-vya~॑dadhuH | ka॒ti॒thA vya॑kalpayann |
mukha॒-Gkima॑sya॒ kau bA॒hU | kAvU॒rU pAdA॑vucyete ||
brA॒hma॒No᳚-'sya॒ mukha॑mAsIt | bA॒hU rA॑ja॒nyaH॑ kR॒taH |
U॒rU tada॑sya॒ yadvaizyaH॑ | pa॒dbhyAgM zU॒dro a॑jAyata ||
ca॒ndramA॒ mana॑so jA॒taH | cakSo॒-ssUryo॑ ajAyata |
mukhA॒dindra॑zcA॒gnizca॑ | prA॒NAdvA॒yura॑jAyata ||
nAbhyA॑ AsIda॒ntari॑kSam | zI॒rSNo dyau-ssama॑vartata |
pa॒dbhyA-mbhUmi॒rdiza॒-zzrotrA᳚t | tathA॑ lo॒kAgM a॑kalpayann ||
vedA॒hame॒ta-mpuru॑Sa-mma॒hAntam᳚ | A॒di॒tyava॑rNa॒-ntama॑sa॒stu pA॒re |
sarvA॑Ni rU॒pANi॑ vi॒citya॒ dhIraH॑ | nAmA॑ni kR॒tvA-'bhi॒vada॒n॒, yadA-''ste᳚ ||
dhA॒tA pu॒rastA॒dyamu॑dAja॒hAra॑ | za॒kraH pravi॒dvA-npra॒diza॒zcata॑sraH |
tame॒vaM-vi~॒dvAna॒mRta॑ i॒ha bha॑vati | nAnyaH panthA॒ aya॑nAya vidyate ||
ya॒jJena॑ ya॒jJama॑yajanta de॒vAH | tAni॒ dharmA॑Ni pratha॒mAnyA॑sann |
te ha॒ nAka॑-mmahi॒mAnaH॑ sacante | yatra॒ pUrve॑ sA॒dhyA-ssanti॑ de॒vAH ||
a॒dbhya-ssambhU॑taH pRthi॒vyai rasA᳚cca | vi॒zvaka॑rmaNa॒-ssama॑varta॒tAdhi॑ |
tasya॒ tvaSTA॑ vi॒dadha॑drU॒pame॑ti | tatpuru॑Sasya॒ vizva॒mAjA॑na॒magre᳚ ||
vedA॒hame॒ta-mpuru॑Sa-mma॒hAntam᳚ | A॒di॒tyava॑rNa॒-ntama॑saH॒ para॑stAt |
tame॒vaM-vi~॒dvAna॒mRta॑ i॒ha bha॑vati | nAnyaH panthA॑ vidya॒te-'ya॑nAya ||
pra॒jApa॑tizcarati॒ garbhe॑ a॒ntaH | a॒jAya॑mAno bahu॒dhA vijA॑yate |
tasya॒ dhIrAH॒ pari॑jAnanti॒ yonim᳚ | marI॑cInA-mpa॒dami॑cchanti ve॒dhasaH॑ ||
yo de॒vebhya॒ Ata॑pati | yo de॒vAnA᳚-mpu॒rohi॑taH |
pUrvo॒ yo de॒vebhyo॑ jA॒taH | namo॑ ru॒cAya॒ brAhma॑ye ||
ruca॑-mbrA॒hma-Jja॒naya॑ntaH | de॒vA agre॒ tada॑bruvann |
yastvai॒va-mbrA᳚hma॒No vi॒dyAt | tasya॑ de॒vA asa॒n vaze᳚ ||
hrIzca॑ te la॒kSmIzca॒ patnyau᳚ | a॒ho॒rA॒tre pA॒rzve |
nakSa॑trANi rU॒pam | a॒zvinau॒ vyAttam᳚ |
i॒STa-mma॑niSANa | a॒mu-mma॑niSANa | sarva॑-mmaniSANa ||
tacchaM॒-yorAvR॑NImahe | gA॒tuM-ya॒jJAya॑ | gA॒tuM-ya~॒jJapa॑taye | daivI᳚ sva॒stira॑stu naH | sva॒stirmAnu॑SebhyaH | U॒rdhva-Jji॑gAtu bheSa॒jam | za-nno॑ astu dvi॒pade᳚ | za-Jcatu॑Spade |
OM zAnti॒-zzAnti॒-zzAntiH॑ ||