Pitru Stotram (Garuda Puranam)

පිතෘ ස්තෝත්රං (ගරුඩ පුරාණම්)

ශ්ලොක 1

රුචිරුවාච .

නමස්යේ(අ)හං පිතෲන් භක්ත්යා යේ වසන්ත්යධිදේවතාඃ .

දේවෛරපි හි තර්ප්යන්තේ යේ ශ්රාද්ධේෂු ස්වධෝත්තරෛඃ .. 1 ..

නමස්යේ(අ)හං පිතෲන් ස්වර්ගේ යේ තර්ප්යන්තේ මහර්ෂිභිඃ .

ශ්රාද්ධෛර්මනෝමයෛර්භක්ත්යා භුක්තිමුක්තිමභීප්සුභිඃ .. 2 ..

නමස්යේ(අ)හං පිතෲන් ස්වර්ගේ සිද්ධාඃ සන්තර්පයන්ති යාන් .

ශ්රාද්ධේෂු දිව්යෛඃ සකලෛරුපහාරෛරනුත්තමෛඃ .. 3 ..

නමස්යේ(අ)හං පිතෲන් භක්ත්යා යේ(අ)ර්ච්යන්තේ ගුහ්යකෛර්දිවි .

තන්මයත්වේන වාඤ්ඡද්භිරෘද්ධිර්යාත්යන්තිකීං පරාම් .. 4 ..

නමස්යේ(අ)හං පිතෲන් මර්ත්යෛරර්ච්යන්තේ භුවි යේ සදා .

ශ්රාද්ධේෂු ශ්රද්ධයාභීෂ්ටලෝකපුෂ්ටිප්රදායිනඃ .. 5 ..

නමස්යේ(අ)හං පිතෲන් විප්රෛරර්ච්යන්තේ භුවි යේ සදා .

වාඤ්ඡිතාභීෂ්ටලාභාය ප්රාජාපත්යප්රදායිනඃ .. 6 ..

නමස්යේ(අ)හං පිතෲන් යේ වෛ තර්ප්යන්තේ(අ)රණ්යවාසිභිඃ .

වන්යෛඃ ශ්රාද්ධෛර්යතාහාරෛස්තපෝනිර්ධූතකල්මෂෛඃ .. 7 ..

නමස්යේ(අ)හං පිතෲන් විප්රෛර්නෛෂ්ඨිකෛර්ධර්මචාරිභිඃ .

යේ සංයතාත්මභිර්නිත්යං සන්තර්ප්යන්තේ සමාධිභිඃ .. 8 ..

නමස්යේ(අ)හං පිතෲන් ශ්රාද්ධෛ රාජන්යාස්තර්පයන්ති යාන් .

කව්යෛරශේෂෛර්විධිවල්ලෝකද්වයඵලප්රදාන් .. 9 ..

නමස්යේ(අ)හං පිතෲන් වෛශ්යෛරර්ච්යන්තේ භුවි යේ සදා .

ස්වකර්මාභිරතෛර්නිත්යං පුෂ්පධූපාන්නවාරිභිඃ .. 10 ..

නමස්යේ(අ)හං පිතෲන් ශ්රාද්ධේ ශූද්රෛරපි ච භක්තිතඃ .

සන්තර්ප්යන්තේ ජගත්කෘත්ස්නං නාම්නා ඛ්යාතාඃ සුකාලිනඃ .. 11 ..

නමස්යේ(අ)හං පිතෲන් ශ්රාද්ධේ පාතාලේ යේ මහාසුරෛඃ .

සන්තර්ප්යන්තේ සුධාහාරාස්ත්යක්තදම්භමදෛඃ සදා .. 12 ..

නමස්යේ(අ)හං පිතෲන් ශ්රාද්ධෛරර්ච්යන්තේ යේ රසාතලේ .

භෝගෛරශේෂෛර්විධිවන්නාගෛඃ කාමානභීප්සුභිඃ .. 13 ..

නමස්යේ(අ)හං පිතෲන් ශ්රාද්ධෛඃ සර්පෛඃ සන්තර්පිතාන්සදා .

තත්රෛව විධිවන්මන්ත්රභෝගසම්පත්සමන්විතෛඃ .. 14 ..

පිතෲන්නමස්යේ නිවසන්ති සාක්ෂා-

-ද්යේ දේවලෝකේ(අ)ථ මහීතලේ වා .

තථා(අ)න්තරික්ෂේ ච සුරාරිපූජ්යා-

-ස්තේ මේ ප්රතීච්ඡන්තු මනෝපනීතම් .. 15 ..

පිතෲන්නමස්යේ පරමාර්ථභූතා

යේ වෛ විමානේ නිවසන්ත්යමූර්තාඃ .

යජන්ති යානස්තමලෛර්මනෝභි-

-ර්යෝගීශ්වරාඃ ක්ලේශවිමුක්තිහේතූන් .. 16 ..

පිතෲන්නමස්යේ දිවි යේ ච මූර්තාඃ

ස්වධාභුජඃ කාම්යඵලාභිසන්ධෞ .

ප්රදානශක්තාඃ සකලේප්සිතානාං

විමුක්තිදා යේ(අ)නභිසංහිතේෂු .. 17 ..

තෘප්යන්තු තේ(අ)ස්මින්පිතරඃ සමස්තා

ඉච්ඡාවතාං යේ ප්රදිශන්ති කාමාන් .

සුරත්වමින්ද්රත්වමිතෝ(අ)ධිකං වා

ගජාශ්වරත්නානි මහාගෘහාණි .. 18 ..

සෝමස්ය යේ රශ්මිෂු යේ(අ)ර්කබිම්බේ

ශුක්ලේ විමානේ ච සදා වසන්ති .

තෘප්යන්තු තේ(අ)ස්මින්පිතරෝ(අ)න්නතෝයෛ-

-ර්ගන්ධාදිනා පුෂ්ටිමිතෝ ව්රජන්තු .. 19 ..

යේෂාං හුතේ(අ)ග්නෞ හවිෂා ච තෘප්ති-

-ර්යේ භුඤ්ජතේ විප්රශරීරසංස්ථාඃ .

යේ පිණ්ඩදානේන මුදං ප්රයාන්ති

තෘප්යන්තු තේ(අ)ස්මින්පිතරෝ(අ)න්නතෝයෛඃ .. 20 ..

යේ ඛඩ්ගමාංසේන සුරෛරභීෂ්ටෛඃ

කෘෂ්ණෛස්තිලෛර්දිව්ය මනෝහරෛශ්ච .

කාලේන ශාකේන මහර්ෂිවර්යෛඃ

සම්ප්රීණිතාස්තේ මුදමත්ර යාන්තු .. 21 ..

කව්යාන්යශේෂාණි ච යාන්යභීෂ්ටා-

-න්යතීව තේෂාං මම පූජිතානාම් .

තේෂාඤ්ච සාන්නිධ්යමිහාස්තු පුෂ්ප-

-ගන්ධාම්බුභෝජ්යේෂු මයා කෘතේෂු .. 22 ..

දිනේ දිනේ යේ ප්රතිගෘහ්ණතේ(අ)ර්චාං

මාසාන්තපූජ්යා භුවි යේ(අ)ෂ්ටකාසු .

යේ වත්සරාන්තේ(අ)භ්යුදයේ ච පූජ්යාඃ

ප්රයාන්තු තේ මේ පිතරෝ(අ)ත්ර තුෂ්ටිම් .. 23 ..

පූජ්යා ද්විජානාං කුමුදේන්දුභාසෝ

යේ ක්ෂත්රියාණාං ජ්වලනාර්කවර්ණාඃ .

තථා විශාං යේ කනකාවදාතා

නීලීප්රභාඃ ශූද්රජනස්ය යේ ච .. 24 ..

තේ(අ)ස්මින්සමස්තා මම පුෂ්පගන්ධ-

-ධූපාම්බුභෝජ්යාදිනිවේදනේන .

තථා(අ)ග්නිහෝමේන ච යාන්ති තෘප්තිං

සදා පිතෘභ්යඃ ප්රණතෝ(අ)ස්මි තේභ්යඃ .. 25 ..

යේ දේවපූර්වාණ්යභිතෘප්තිහේතෝ-

-රශ්නන්ති කව්යානි ශුභාහෘතානි .

තෘප්තාශ්ච යේ භූතිසෘජෝ භවන්ති

තෘප්යන්තු තේ(අ)ස්මින්ප්රණතෝ(අ)ස්මි තේභ්යඃ .. 26 ..

රක්ෂාංසි භූතාන්යසුරාංස්තථෝග්රා-

-න්නිර්නාශයන්තු ත්වශිවං ප්රජානාම් .

ආද්යාඃ සුරාණාමමරේශපූජ්යා-

-ස්තෘප්යන්තු තේ(අ)ස්මින්ප්රණතෝ(අ)ස්මිතේභ්යඃ .. 27 ..

අග්නිස්වාත්තා බර්හිෂද ආජ්යපාඃ සෝමපාස්තථා .

ව්රජන්තු තෘප්තිං ශ්රාද්ධේ(අ)ස්මින්පිතරස්තර්පිතා මයා .. 28 ..

අග්නිස්වාත්තාඃ පිතෘගණාඃ ප්රාචීං රක්ෂන්තු මේ දිශම් .

තථා බර්හිෂදඃ පාන්තු යාම්යාං මේ පිතරඃ සදා .

ප්රතීචීමාජ්යපාස්තද්වදුදීචීමපි සෝමපාඃ .. 29 ..

රක්ෂෝභූතපිශාචේභ්යස්තථෛවාසුරදෝෂතඃ .

සර්වතඃ පිතරෝ රක්ෂාං කුර්වන්තු මම නිත්යශඃ .. 30 ..

විශ්වෝ විශ්වභුගාරාධ්යෝ ධර්මෝ ධන්යඃ ශුභානනඃ .

භූතිදෝ භූතිකෘද්භූතිඃ පිතෲණාං යේ ගණා නව .. 31 ..

කල්යාණඃ කල්යදඃ කර්තා කල්යඃ කල්යතරාශ්රයඃ .

කල්යතාහේතුරනඝඃ ෂඩිමේ තේ ගණාඃ ස්මෘතාඃ .. 32 ..

වරෝ වරේණ්යෝ වරදස්තුෂ්ටිදඃ පුෂ්ටිදස්තථා .

විශ්වපාතා තථා ධාතා සප්තෛතේ ච ගණාඃ ස්මෘතාඃ .. 33 ..

මහාන්මහාත්මා මහිතෝ මහිමාවාන්මහාබලඃ .

ගණාඃ පඤ්ච තථෛවෛතේ පිතෲණාං පාපනාශනාඃ .. 34 ..

සුඛදෝ ධනදශ්චාන්යෝ ධර්මදෝ(අ)න්යශ්ච භූතිදඃ .

පිතෲණාං කථ්යතේ චෛව තථා ගණචතුෂ්ටයම් .. 35 ..

ඒකත්රිංශත්පිතෘගණා යෛර්ව්යාප්තමඛිලං ජගත් .

ත ඒවාත්ර පිතෘගණාස්තුෂ්යන්තු ච මදාහිතම් .. 36 ..

ඉති ශ්රී ගරුඩපුරාණේ ඌනනවතිතමෝ(අ)ධ්යායේ රුචිකෘත පිතෘ ස්තෝත්රම් .