Pitru Stotram (Garuda Puranam)

pitR stotraM (garuDa purANam)

zloka 1

ruciruvAca |

namasye'haM pitRRn bhaktyA ye vasantyadhidevatAH |

devairapi hi tarpyante ye zrAddheSu svadhottaraiH || 1 ||

namasye'haM pitRRn svarge ye tarpyante maharSibhiH |

zrAddhairmanomayairbhaktyA bhuktimuktimabhIpsubhiH || 2 ||

namasye'haM pitRRn svarge siddhAH santarpayanti yAn |

zrAddheSu divyaiH sakalairupahArairanuttamaiH || 3 ||

namasye'haM pitRRn bhaktyA ye'rcyante guhyakairdivi |

tanmayatvena vAJchadbhirRddhiryAtyantikIM parAm || 4 ||

namasye'haM pitRRn martyairarcyante bhuvi ye sadA |

zrAddheSu zraddhayAbhISTalokapuSTipradAyinaH || 5 ||

namasye'haM pitRRn viprairarcyante bhuvi ye sadA |

vAJchitAbhISTalAbhAya prAjApatyapradAyinaH || 6 ||

namasye'haM pitRRn ye vai tarpyante'raNyavAsibhiH |

vanyaiH zrAddhairyatAhAraistaponirdhUtakalmaSaiH || 7 ||

namasye'haM pitRRn viprairnaiSThikairdharmacAribhiH |

ye saMyatAtmabhirnityaM santarpyante samAdhibhiH || 8 ||

namasye'haM pitRRn zrAddhai rAjanyAstarpayanti yAn |

kavyairazeSairvidhivallokadvayaphalapradAn || 9 ||

namasye'haM pitRRn vaizyairarcyante bhuvi ye sadA |

svakarmAbhiratairnityaM puSpadhUpAnnavAribhiH || 10 ||

namasye'haM pitRRn zrAddhe zUdrairapi ca bhaktitaH |

santarpyante jagatkRtsnaM nAmnA khyAtAH sukAlinaH || 11 ||

namasye'haM pitRRn zrAddhe pAtAle ye mahAsuraiH |

santarpyante sudhAhArAstyaktadambhamadaiH sadA || 12 ||

namasye'haM pitRRn zrAddhairarcyante ye rasAtale |

bhogairazeSairvidhivannAgaiH kAmAnabhIpsubhiH || 13 ||

namasye'haM pitRRn zrAddhaiH sarpaiH santarpitAnsadA |

tatraiva vidhivanmantrabhogasampatsamanvitaiH || 14 ||

pitRRnnamasye nivasanti sAkSA-

-dye devaloke'tha mahItale vA |

tathA'ntarikSe ca surAripUjyA-

-ste me pratIcchantu manopanItam || 15 ||

pitRRnnamasye paramArthabhUtA

ye vai vimAne nivasantyamUrtAH |

yajanti yAnastamalairmanobhi-

-ryogIzvarAH klezavimuktihetUn || 16 ||

pitRRnnamasye divi ye ca mUrtAH

svadhAbhujaH kAmyaphalAbhisandhau |

pradAnazaktAH sakalepsitAnAM

vimuktidA ye'nabhisaMhiteSu || 17 ||

tRpyantu te'sminpitaraH samastA

icchAvatAM ye pradizanti kAmAn |

suratvamindratvamito'dhikaM vA

gajAzvaratnAni mahAgRhANi || 18 ||

somasya ye razmiSu ye'rkabimbe

zukle vimAne ca sadA vasanti |

tRpyantu te'sminpitaro'nnatoyai-

-rgandhAdinA puSTimito vrajantu || 19 ||

yeSAM hute'gnau haviSA ca tRpti-

-rye bhuJjate viprazarIrasaMsthAH |

ye piNDadAnena mudaM prayAnti

tRpyantu te'sminpitaro'nnatoyaiH || 20 ||

ye khaDgamAMsena surairabhISTaiH

kRSNaistilairdivya manoharaizca |

kAlena zAkena maharSivaryaiH

samprINitAste mudamatra yAntu || 21 ||

kavyAnyazeSANi ca yAnyabhISTA-

-nyatIva teSAM mama pUjitAnAm |

teSAJca sAnnidhyamihAstu puSpa-

-gandhAmbubhojyeSu mayA kRteSu || 22 ||

dine dine ye pratigRhNate'rcAM

mAsAntapUjyA bhuvi ye'STakAsu |

ye vatsarAnte'bhyudaye ca pUjyAH

prayAntu te me pitaro'tra tuSTim || 23 ||

pUjyA dvijAnAM kumudendubhAso

ye kSatriyANAM jvalanArkavarNAH |

tathA vizAM ye kanakAvadAtA

nIlIprabhAH zUdrajanasya ye ca || 24 ||

te'sminsamastA mama puSpagandha-

-dhUpAmbubhojyAdinivedanena |

tathA'gnihomena ca yAnti tRptiM

sadA pitRbhyaH praNato'smi tebhyaH || 25 ||

ye devapUrvANyabhitRptiheto-

-raznanti kavyAni zubhAhRtAni |

tRptAzca ye bhUtisRjo bhavanti

tRpyantu te'sminpraNato'smi tebhyaH || 26 ||

rakSAMsi bhUtAnyasurAMstathogrA-

-nnirnAzayantu tvazivaM prajAnAm |

AdyAH surANAmamarezapUjyA-

-stRpyantu te'sminpraNato'smitebhyaH || 27 ||

agnisvAttA barhiSada AjyapAH somapAstathA |

vrajantu tRptiM zrAddhe'sminpitarastarpitA mayA || 28 ||

agnisvAttAH pitRgaNAH prAcIM rakSantu me dizam |

tathA barhiSadaH pAntu yAmyAM me pitaraH sadA |

pratIcImAjyapAstadvadudIcImapi somapAH || 29 ||

rakSobhUtapizAcebhyastathaivAsuradoSataH |

sarvataH pitaro rakSAM kurvantu mama nityazaH || 30 ||

vizvo vizvabhugArAdhyo dharmo dhanyaH zubhAnanaH |

bhUtido bhUtikRdbhUtiH pitRRNAM ye gaNA nava || 31 ||

kalyANaH kalyadaH kartA kalyaH kalyatarAzrayaH |

kalyatAheturanaghaH SaDime te gaNAH smRtAH || 32 ||

varo vareNyo varadastuSTidaH puSTidastathA |

vizvapAtA tathA dhAtA saptaite ca gaNAH smRtAH || 33 ||

mahAnmahAtmA mahito mahimAvAnmahAbalaH |

gaNAH paJca tathaivaite pitRRNAM pApanAzanAH || 34 ||

sukhado dhanadazcAnyo dharmado'nyazca bhUtidaH |

pitRRNAM kathyate caiva tathA gaNacatuSTayam || 35 ||

ekatriMzatpitRgaNA yairvyAptamakhilaM jagat |

ta evAtra pitRgaNAstuSyantu ca madAhitam || 36 ||

iti zrI garuDapurANe Unanavatitamo'dhyAye rucikRta pitR stotram |