Narayaniyam Dashaka 69
നാരായണീയം ദശക 69 - രാസക്രീഡാ
Narayaniyam Dashaka 69
നാരായണീയം ദശക 69 - രാസക്രീഡാ
ശ്ലോക 1
കേശപാശധൃതപിഞ്ഛികാവിതതിസഞ്ചലന്മകരകുണ്ഡലം
ഹാരജാലവനമാലികാലലിതമങ്ഗരാഗഘനസൌരഭമ് ।
പീതചേലധൃതകാഞ്ചികാഞ്ചിതമുദഞ്ചദംശുമണിനൂപുരം
രാസകേലിപരിഭൂഷിതം തവ ഹി രൂപമീശ കലയാമഹേ
ശ്ലോക 2
താവദേവ കൃതമണ്ഡനേ കലിതകഞ്ചുലീകകുചമണ്ഡലേ
ഗണ്ഡലോലമണികുണ്ഡലേ യുവതിമണ്ഡലേഽഥ പരിമണ്ഡലേ ।
അന്തരാ സകലസുന്ദരീയുഗലമിന്ദിരാരമണ സഞ്ചരന്
മഞ്ജുലാം തദനു രാസകേലിമയി കഞ്ജനാഭ സമുപാദധാഃ
॥1॥
ശ്ലോക 3
വാസുദേവ തവ ഭാസമാനമിഹ രാസകേലിരസസൌരഭം
ദൂരതോഽപി ഖലു നാരദാഗദിതമാകലയ്യ കുതുകാകുലാ ।
വേഷഭൂഷണവിലാസപേശലവിലാസിനീശതസമാവൃതാ
നാകതോ യുഗപദാഗതാ വിയതി വേഗതോഽഥ സുരമണ്ഡലീ
॥2॥
ശ്ലോക 4
വേണുനാദകൃതതാനദാനകലഗാനരാഗഗതിയോജനാ-
ലോഭനീയമൃദുപാദപാതകൃതതാലമേലനമനോഹരമ് ।
പാണിസങ്ക്വണിതകങ്കണം ച മുഹുരംസലമ്ബിതകരാമ്ബുജം
ശ്രോണിബിമ്ബചലദമ്ബരം ഭജത രാസകേലിരസഡമ്ബരമ്
॥3॥
ശ്ലോക 5
സ്പര്ധയാ വിരചിതാനുഗാനകൃതതാരതാരമധുരസ്വരേ
നര്തനേഽഥ ലലിതാങ്ഗഹാരലുലിതാങ്ഗഹാരമണിഭൂഷണേ ।
സമ്മദേന കൃതപുഷ്പവര്ഷമലമുന്മിഷദ്ദിവിഷദാം കുലം
ചിന്മയേ ത്വയി നിലീയമാനമിവ സമ്മുമോഹ സവധൂകുലമ്
॥4॥
ശ്ലോക 6
സ്വിന്നസന്നതനുവല്ലരീ തദനു കാപി നാമ പശുപാങ്ഗനാ
കാന്തമംസമവലമ്ബതേ സ്മ തവ താന്തിഭാരമുകുലേക്ഷണാ ॥
കാചിദാചലിതകുന്തലാ നവപടീരസാരഘനസൌരഭം
വഞ്ചനേന തവ സഞ്ചുചുമ്ബ ഭുജമഞ്ചിതോരുപുലകാങ്കുരാ
॥5॥
ശ്ലോക 7
കാപി ഗണ്ഡഭുവി സന്നിധായ നിജഗണ്ഡമാകുലിതകുണ്ഡലം
പുണ്യപൂരനിധിരന്വവാപ തവ പൂഗചര്വിതരസാമൃതമ് ।
ഇന്ദിരാവിഹൃതിമന്ദിരം ഭുവനസുന്ദരം ഹി നടനാന്തരേ
ത്വാമവാപ്യ ദധുരങ്ഗനാഃ കിമു ന സമ്മദോന്മദദശാന്തരമ്
॥6॥
ശ്ലോക 8
ഗാനമീശ വിരതം ക്രമേണ കില വാദ്യമേലനമുപാരതം
ബ്രഹ്മസമ്മദരസാകുലാഃ സദസി കേവലം നനൃതുരങ്ഗനാഃ ।
നാവിദന്നപി ച നീവികാം കിമപി കുന്തലീമപി ച കഞ്ചുലീം
ജ്യോതിഷാമപി കദമ്ബകം ദിവി വിലമ്ബിതം കിമപരം ബ്രുവേ
॥7॥
ശ്ലോക 9
മോദസീമ്നി ഭുവനം വിലാപ്യ വിഹൃതിം സമാപ്യ ച തതോ വിഭോ
കേലിസമ്മൃദിതനിര്മലാങ്ഗനവഘര്മലേശസുഭഗാത്മനാമ് ।
മന്മഥാസഹനചേതസാം പശുപയോഷിതാം സുകൃതചോദിത-
സ്താവദാകലിതമൂര്തിരാദധിഥ മാരവീരപരമോത്സവാന്
॥8॥
ശ്ലോക 10
കേലിഭേദപരിലോലിതാഭിരതിലാലിതാഭിരബലാലിഭിഃ
സ്വൈരമീശ നനു സൂരജാപയസി ചാരുനാമ വിഹൃതിം വ്യധാഃ ।
കാനനേഽപി ച വിസാരിശീതലകിശോരമാരുതമനോഹരേ
സൂനസൌരഭമയേ വിലേസിഥ വിലാസിനീശതവിമോഹനമ്
॥9॥
ശ്ലോക 11
കാമിനീരിതി ഹി യാമിനീഷു ഖലു കാമനീയകനിധേ ഭവാന്
പൂര്ണസമ്മദരസാര്ണവം കമപി യോഗിഗമ്യമനുഭാവയന് ।
ബ്രഹ്മശങ്കരമുഖാനപീഹ പശുപാങ്ഗനാസു ബഹുമാനയന്
ഭക്തലോകഗമനീയരൂപ കമനീയ കൃഷ്ണ പരിപാഹി മാമ്
॥10॥