Narayaniyam Dashaka 69
ನಾರಾಯಣೀಯಂ ದಶಕ 69 - ರಾಸಕ್ರೀಡಾ
Narayaniyam Dashaka 69
ನಾರಾಯಣೀಯಂ ದಶಕ 69 - ರಾಸಕ್ರೀಡಾ
ಶ್ಲೋಕ 1
ಕೇಶಪಾಶಧೃತಪಿಞ್ಛಿಕಾವಿತತಿಸಞ್ಚಲನ್ಮಕರಕುಣ್ಡಲಂ
ಹಾರಜಾಲವನಮಾಲಿಕಾಲಲಿತಮಙ್ಗರಾಗಘನಸೌರಭಮ್ ।
ಪೀತಚೇಲಧೃತಕಾಞ್ಚಿಕಾಞ್ಚಿತಮುದಞ್ಚದಂಶುಮಣಿನೂಪುರಂ
ರಾಸಕೇಲಿಪರಿಭೂಷಿತಂ ತವ ಹಿ ರೂಪಮೀಶ ಕಲಯಾಮಹೇ
ಶ್ಲೋಕ 2
ತಾವದೇವ ಕೃತಮಣ್ಡನೇ ಕಲಿತಕಞ್ಚುಲೀಕಕುಚಮಣ್ಡಲೇ
ಗಣ್ಡಲೋಲಮಣಿಕುಣ್ಡಲೇ ಯುವತಿಮಣ್ಡಲೇಽಥ ಪರಿಮಣ್ಡಲೇ ।
ಅನ್ತರಾ ಸಕಲಸುನ್ದರೀಯುಗಲಮಿನ್ದಿರಾರಮಣ ಸಞ್ಚರನ್
ಮಞ್ಜುಲಾಂ ತದನು ರಾಸಕೇಲಿಮಯಿ ಕಞ್ಜನಾಭ ಸಮುಪಾದಧಾಃ
॥1॥
ಶ್ಲೋಕ 3
ವಾಸುದೇವ ತವ ಭಾಸಮಾನಮಿಹ ರಾಸಕೇಲಿರಸಸೌರಭಂ
ದೂರತೋಽಪಿ ಖಲು ನಾರದಾಗದಿತಮಾಕಲಯ್ಯ ಕುತುಕಾಕುಲಾ ।
ವೇಷಭೂಷಣವಿಲಾಸಪೇಶಲವಿಲಾಸಿನೀಶತಸಮಾವೃತಾ
ನಾಕತೋ ಯುಗಪದಾಗತಾ ವಿಯತಿ ವೇಗತೋಽಥ ಸುರಮಣ್ಡಲೀ
॥2॥
ಶ್ಲೋಕ 4
ವೇಣುನಾದಕೃತತಾನದಾನಕಲಗಾನರಾಗಗತಿಯೋಜನಾ-
ಲೋಭನೀಯಮೃದುಪಾದಪಾತಕೃತತಾಲಮೇಲನಮನೋಹರಮ್ ।
ಪಾಣಿಸಙ್ಕ್ವಣಿತಕಙ್ಕಣಂ ಚ ಮುಹುರಂಸಲಮ್ಬಿತಕರಾಮ್ಬುಜಂ
ಶ್ರೋಣಿಬಿಮ್ಬಚಲದಮ್ಬರಂ ಭಜತ ರಾಸಕೇಲಿರಸಡಮ್ಬರಮ್
॥3॥
ಶ್ಲೋಕ 5
ಸ್ಪರ್ಧಯಾ ವಿರಚಿತಾನುಗಾನಕೃತತಾರತಾರಮಧುರಸ್ವರೇ
ನರ್ತನೇಽಥ ಲಲಿತಾಙ್ಗಹಾರಲುಲಿತಾಙ್ಗಹಾರಮಣಿಭೂಷಣೇ ।
ಸಮ್ಮದೇನ ಕೃತಪುಷ್ಪವರ್ಷಮಲಮುನ್ಮಿಷದ್ದಿವಿಷದಾಂ ಕುಲಂ
ಚಿನ್ಮಯೇ ತ್ವಯಿ ನಿಲೀಯಮಾನಮಿವ ಸಮ್ಮುಮೋಹ ಸವಧೂಕುಲಮ್
॥4॥
ಶ್ಲೋಕ 6
ಸ್ವಿನ್ನಸನ್ನತನುವಲ್ಲರೀ ತದನು ಕಾಪಿ ನಾಮ ಪಶುಪಾಙ್ಗನಾ
ಕಾನ್ತಮಂಸಮವಲಮ್ಬತೇ ಸ್ಮ ತವ ತಾನ್ತಿಭಾರಮುಕುಲೇಕ್ಷಣಾ ॥
ಕಾಚಿದಾಚಲಿತಕುನ್ತಲಾ ನವಪಟೀರಸಾರಘನಸೌರಭಂ
ವಞ್ಚನೇನ ತವ ಸಞ್ಚುಚುಮ್ಬ ಭುಜಮಞ್ಚಿತೋರುಪುಲಕಾಙ್ಕುರಾ
॥5॥
ಶ್ಲೋಕ 7
ಕಾಪಿ ಗಣ್ಡಭುವಿ ಸನ್ನಿಧಾಯ ನಿಜಗಣ್ಡಮಾಕುಲಿತಕುಣ್ಡಲಂ
ಪುಣ್ಯಪೂರನಿಧಿರನ್ವವಾಪ ತವ ಪೂಗಚರ್ವಿತರಸಾಮೃತಮ್ ।
ಇನ್ದಿರಾವಿಹೃತಿಮನ್ದಿರಂ ಭುವನಸುನ್ದರಂ ಹಿ ನಟನಾನ್ತರೇ
ತ್ವಾಮವಾಪ್ಯ ದಧುರಙ್ಗನಾಃ ಕಿಮು ನ ಸಮ್ಮದೋನ್ಮದದಶಾನ್ತರಮ್
॥6॥
ಶ್ಲೋಕ 8
ಗಾನಮೀಶ ವಿರತಂ ಕ್ರಮೇಣ ಕಿಲ ವಾದ್ಯಮೇಲನಮುಪಾರತಂ
ಬ್ರಹ್ಮಸಮ್ಮದರಸಾಕುಲಾಃ ಸದಸಿ ಕೇವಲಂ ನನೃತುರಙ್ಗನಾಃ ।
ನಾವಿದನ್ನಪಿ ಚ ನೀವಿಕಾಂ ಕಿಮಪಿ ಕುನ್ತಲೀಮಪಿ ಚ ಕಞ್ಚುಲೀಂ
ಜ್ಯೋತಿಷಾಮಪಿ ಕದಮ್ಬಕಂ ದಿವಿ ವಿಲಮ್ಬಿತಂ ಕಿಮಪರಂ ಬ್ರುವೇ
॥7॥
ಶ್ಲೋಕ 9
ಮೋದಸೀಮ್ನಿ ಭುವನಂ ವಿಲಾಪ್ಯ ವಿಹೃತಿಂ ಸಮಾಪ್ಯ ಚ ತತೋ ವಿಭೋ
ಕೇಲಿಸಮ್ಮೃದಿತನಿರ್ಮಲಾಙ್ಗನವಘರ್ಮಲೇಶಸುಭಗಾತ್ಮನಾಮ್ ।
ಮನ್ಮಥಾಸಹನಚೇತಸಾಂ ಪಶುಪಯೋಷಿತಾಂ ಸುಕೃತಚೋದಿತ-
ಸ್ತಾವದಾಕಲಿತಮೂರ್ತಿರಾದಧಿಥ ಮಾರವೀರಪರಮೋತ್ಸವಾನ್
॥8॥
ಶ್ಲೋಕ 10
ಕೇಲಿಭೇದಪರಿಲೋಲಿತಾಭಿರತಿಲಾಲಿತಾಭಿರಬಲಾಲಿಭಿಃ
ಸ್ವೈರಮೀಶ ನನು ಸೂರಜಾಪಯಸಿ ಚಾರುನಾಮ ವಿಹೃತಿಂ ವ್ಯಧಾಃ ।
ಕಾನನೇಽಪಿ ಚ ವಿಸಾರಿಶೀತಲಕಿಶೋರಮಾರುತಮನೋಹರೇ
ಸೂನಸೌರಭಮಯೇ ವಿಲೇಸಿಥ ವಿಲಾಸಿನೀಶತವಿಮೋಹನಮ್
॥9॥
ಶ್ಲೋಕ 11
ಕಾಮಿನೀರಿತಿ ಹಿ ಯಾಮಿನೀಷು ಖಲು ಕಾಮನೀಯಕನಿಧೇ ಭವಾನ್
ಪೂರ್ಣಸಮ್ಮದರಸಾರ್ಣವಂ ಕಮಪಿ ಯೋಗಿಗಮ್ಯಮನುಭಾವಯನ್ ।
ಬ್ರಹ್ಮಶಙ್ಕರಮುಖಾನಪೀಹ ಪಶುಪಾಙ್ಗನಾಸು ಬಹುಮಾನಯನ್
ಭಕ್ತಲೋಕಗಮನೀಯರೂಪ ಕಮನೀಯ ಕೃಷ್ಣ ಪರಿಪಾಹಿ ಮಾಮ್
॥10॥