Narayaniyam Dashaka 69
নারাযণীযং দশক 69 - রাসক্রীডা
Narayaniyam Dashaka 69
নারাযণীযং দশক 69 - রাসক্রীডা
শ্লোক 1
কেশপাশধৃতপিঞ্ছিকাবিততিসঞ্চলন্মকরকুণ্ডলং
হারজালবনমালিকাললিতমঙ্গরাগঘনসৌরভম্ ।
পীতচেলধৃতকাঞ্চিকাঞ্চিতমুদঞ্চদংশুমণিনূপুরং
রাসকেলিপরিভূষিতং তব হি রূপমীশ কলযামহে
শ্লোক 2
তাবদেব কৃতমণ্ডনে কলিতকঞ্চুলীককুচমণ্ডলে
গণ্ডলোলমণিকুণ্ডলে যুবতিমণ্ডলেঽথ পরিমণ্ডলে ।
অন্তরা সকলসুন্দরীযুগলমিন্দিরারমণ সঞ্চরন্
মঞ্জুলাং তদনু রাসকেলিমযি কঞ্জনাভ সমুপাদধাঃ
॥1॥
শ্লোক 3
বাসুদেব তব ভাসমানমিহ রাসকেলিরসসৌরভং
দূরতোঽপি খলু নারদাগদিতমাকলয্য কুতুকাকুলা ।
বেষভূষণবিলাসপেশলবিলাসিনীশতসমাবৃতা
নাকতো যুগপদাগতা বিযতি বেগতোঽথ সুরমণ্ডলী
॥2॥
শ্লোক 4
বেণুনাদকৃততানদানকলগানরাগগতিযোজনা-
লোভনীযমৃদুপাদপাতকৃততালমেলনমনোহরম্ ।
পাণিসঙ্ক্বণিতকঙ্কণং চ মুহুরংসলম্বিতকরাম্বুজং
শ্রোণিবিম্বচলদম্বরং ভজত রাসকেলিরসডম্বরম্
॥3॥
শ্লোক 5
স্পর্ধযা বিরচিতানুগানকৃততারতারমধুরস্বরে
নর্তনেঽথ ললিতাঙ্গহারলুলিতাঙ্গহারমণিভূষণে ।
সম্মদেন কৃতপুষ্পবর্ষমলমুন্মিষদ্দিবিষদাং কুলং
চিন্মযে ত্বযি নিলীযমানমিব সম্মুমোহ সবধূকুলম্
॥4॥
শ্লোক 6
স্বিন্নসন্নতনুবল্লরী তদনু কাপি নাম পশুপাঙ্গনা
কান্তমংসমবলম্বতে স্ম তব তান্তিভারমুকুলেক্ষণা ॥
কাচিদাচলিতকুন্তলা নবপটীরসারঘনসৌরভং
বঞ্চনেন তব সঞ্চুচুম্ব ভুজমঞ্চিতোরুপুলকাঙ্কুরা
॥5॥
শ্লোক 7
কাপি গণ্ডভুবি সন্নিধায নিজগণ্ডমাকুলিতকুণ্ডলং
পুণ্যপূরনিধিরন্ববাপ তব পূগচর্বিতরসামৃতম্ ।
ইন্দিরাবিহৃতিমন্দিরং ভুবনসুন্দরং হি নটনান্তরে
ত্বামবাপ্য দধুরঙ্গনাঃ কিমু ন সম্মদোন্মদদশান্তরম্
॥6॥
শ্লোক 8
গানমীশ বিরতং ক্রমেণ কিল বাদ্যমেলনমুপারতং
ব্রহ্মসম্মদরসাকুলাঃ সদসি কেবলং ননৃতুরঙ্গনাঃ ।
নাবিদন্নপি চ নীবিকাং কিমপি কুন্তলীমপি চ কঞ্চুলীং
জ্যোতিষামপি কদম্বকং দিবি বিলম্বিতং কিমপরং ব্রুবে
॥7॥
শ্লোক 9
মোদসীম্নি ভুবনং বিলাপ্য বিহৃতিং সমাপ্য চ ততো বিভো
কেলিসম্মৃদিতনির্মলাঙ্গনবঘর্মলেশসুভগাত্মনাম্ ।
মন্মথাসহনচেতসাং পশুপযোষিতাং সুকৃতচোদিত-
স্তাবদাকলিতমূর্তিরাদধিথ মারবীরপরমোত্সবান্
॥8॥
শ্লোক 10
কেলিভেদপরিলোলিতাভিরতিলালিতাভিরবলালিভিঃ
স্বৈরমীশ ননু সূরজাপযসি চারুনাম বিহৃতিং ব্যধাঃ ।
কাননেঽপি চ বিসারিশীতলকিশোরমারুতমনোহরে
সূনসৌরভমযে বিলেসিথ বিলাসিনীশতবিমোহনম্
॥9॥
শ্লোক 11
কামিনীরিতি হি যামিনীষু খলু কামনীযকনিধে ভবান্
পূর্ণসম্মদরসার্ণবং কমপি যোগিগম্যমনুভাবযন্ ।
ব্রহ্মশঙ্করমুখানপীহ পশুপাঙ্গনাসু বহুমানযন্
ভক্তলোকগমনীযরূপ কমনীয কৃষ্ণ পরিপাহি মাম্
॥10॥