Narayaniyam Dashaka 1

dazakaM 1 - bhagavataH svarUpaM tathA mAhAtmyam

zloka 1

sAndrAnandAvabodhAtmakamanupamitaM kAladezAvadhibhyAM

nirmuktaM nityamuktaM nigamazatasahasreNa nirbhAsyamAnam |

aspaSTaM dRSTamAtre punarurupuruSArthAtmakaM brahma tatvaM

tattAvadbhAti sAkSAd gurupavanapure hanta bhAgyaM janAnAm || 1 ||

evandurlabhyavastunyapi sulabhatayA hastalabdhe yadanyat

tanvA vAcA dhiyA vA bhajati bata janaH kSudrataiva sphuTeyam |

ete tAvadvayaM tu sthirataramanasA vizvapIDApahatyai

nizzeSAtmAnamenaM gurupavanapurAdhIzamevAzrayAmaH || 2 ||

sattvaM yattat parAbhyAmaparikalanato nirmalaM tena tAvat

bhUtairbhUtendriyaiste vapuriti bahuzaH zrUyate vyAsavAkyam|

tat svacchtvAdyadAcchAditaparasukhacidgarbhanirbhAsarUpaM

tasmin dhanyA ramante zrutimatimadhure sugrahe vigrahe te || 3 ||

niSkampe nityapUrNe niravadhiparamAnandapIyUSarUpe

nirlInAnekamuktAvalisubhagatame nirmalabrahmasindhau |

kallolollAsatulyaM khalu vimalataraM sattvamAhustadAtmA

kasmAnno niSkalastvaM sakala iti vacastvatkalAsveva bhUman || 4 ||

nirvyApAro'pi niSkAraNamaja bhajase yatkriyAmIkSaNAkhyAM

tenaivodeti lInA prakRtirasatikalpA'pi kalpAdikAle|

tasyAH saMzuddhamaMzaM kamapi tamatirodhAyakaM sattvarUpaM

sa tvaM dhRtvA dadhAsi svamahimavibhavAkuNTha vaikuNTha rUpaM||5||

tatte pratyagradhArAdharalalitakalAyAvalIkelikAraM

lAvaNyasyaikasAraM sukRtijanadRzAM pUrNapuNyAvatAram|

lakSmInizzaGkalIlAnilayanamamRtasyandasandohamantaH

siJcat saJcintakAnAM vapuranukalaye mArutAgAranAtha ||6||

kaSTA te sRSTiceSTA bahutarabhavakhedAvahA jIvabhAjA-

mityevaM pUrvamAlocitamajita mayA naivamadyAbhijAne|

nocejjIvAH kathaM vA madhurataramidaM tvadvapuzcidrasArdraM

netraiH zrotraizca pItvA paramarasasudhAmbhodhipUre rameran||7||

namrANAM sannidhatte satatamapi purastairanabhyarthitAna -

pyarthAn kAmAnajasraM vitarati paramAnandasAndrAM gatiM ca|

itthaM nizzeSalabhyo niravadhikaphalaH pArijAto hare tvaM

kSudraM taM zakravATIdrumamabhilaSati vyarthamarthivrajo'yam||8||

kAruNyAtkAmamanyaM dadati khalu pare svAtmadastvaM vizeSA-

daizvaryAdIzate'nye jagati parajane svAtmano'pIzvarastvam|

tvayyuccairAramanti pratipadamadhure cetanAH sphItabhAgyA-

stvaM cAtmArAma evetyatulaguNagaNAdhAra zaure namaste||9||

aizvaryaM zaGkarAdIzvaraviniyamanaM vizvatejoharANAM

tejassaMhAri vIryaM vimalamapi yazo nispRhaizcopagItam|

aGgAsaGgA sadA zrIrakhilavidasi na kvApi te saGgavArtA

tadvAtAgAravAsin murahara bhagavacchabdamukhyAzrayo'si||10||