ಶ್ರೀ ನರಸಿಂಹ ಕವಚಮ್

ಶ್ರೀ ನರಸಿಂಹ ಕವಚಮ್

ಶ್ಲೋಕ 1

ನೃಸಿಂಹಕವಚಂ ವಕ್ಷ್ಯೇ ಪ್ರಹ್ಲಾದೇನೋದಿತಂ ಪುರಾ ।

ಸರ್ವರಕ್ಷಾಕರಂ ಪುಣ್ಯಂ ಸರ್ವೋಪದ್ರವನಾಶನಮ್

ಶ್ಲೋಕ 2

ಸರ್ವಸಮ್ಪತ್ಕರಂ ಚೈವ ಸ್ವರ್ಗಮೋಕ್ಷಪ್ರದಾಯಕಮ್ ।

ಧ್ಯಾತ್ವಾ ನೃಸಿಂಹಂ ದೇವೇಶಂ ಹೇಮಸಿಂಹಾಸನಸ್ಥಿತಮ್

॥ 1 ॥

ಶ್ಲೋಕ 3

ವಿವೃತಾಸ್ಯಂ ತ್ರಿನಯನಂ ಶರದಿನ್ದುಸಮಪ್ರಭಮ್ ।

ಲಕ್ಷ್ಮ್ಯಾಲಿಙ್ಗಿತವಾಮಾಙ್ಗಂ ವಿಭೂತಿಭಿರುಪಾಶ್ರಿತಮ್

॥ 2 ॥

ಶ್ಲೋಕ 4

ಚತುರ್ಭುಜಂ ಕೋಮಲಾಙ್ಗಂ ಸ್ವರ್ಣಕುಣ್ಡಲಶೋಭಿತಮ್ ।

ಸರೋಜಶೋಭಿತೋರಸ್ಕಂ ರತ್ನಕೇಯೂರಮುದ್ರಿತಮ್

॥ 3 ॥

ಶ್ಲೋಕ 5

॥ 4 ॥ [ರತ್ನಕೇಯೂರಶೋಭಿತಮ್]

ತಪ್ತಕಾಞ್ಚನಸಙ್ಕಾಶಂ ಪೀತನಿರ್ಮಲವಾಸನಮ್ ।

ಇನ್ದ್ರಾದಿಸುರಮೌಲಿಸ್ಥಸ್ಫುರನ್ಮಾಣಿಕ್ಯದೀಪ್ತಿಭಿಃ

ಶ್ಲೋಕ 6

ವಿರಾಜಿತಪದದ್ವನ್ದ್ವಂ ಶಙ್ಖಚಕ್ರಾದಿಹೇತಿಭಿಃ ।

ಗರುತ್ಮತಾ ಸವಿನಯಂ ಸ್ತೂಯಮಾನಂ ಮುದಾನ್ವಿತಮ್

॥ 5 ॥

ಶ್ಲೋಕ 7

ಸ್ವಹೃತ್ಕಮಲಸಂವಾಸಂ ಕೃತ್ವಾ ತು ಕವಚಂ ಪಠೇತ್ ।

ನೃಸಿಂಹೋ ಮೇ ಶಿರಃ ಪಾತು ಲೋಕರಕ್ಷಾತ್ಮಸಮ್ಭವಃ

॥ 6 ॥

ಶ್ಲೋಕ 8

ಸರ್ವಗೋಽಪಿ ಸ್ತಮ್ಭವಾಸಃ ಫಾಲಂ ಮೇ ರಕ್ಷತು ಧ್ವನಿಮ್ ।

ನೃಸಿಂಹೋ ಮೇ ದೃಶೌ ಪಾತು ಸೋಮಸೂರ್ಯಾಗ್ನಿಲೋಚನಃ

॥ 7 ॥

ಶ್ಲೋಕ 9

ಸ್ಮೃತಿಂ ಮೇ ಪಾತು ನೃಹರಿರ್ಮುನಿವರ್ಯಸ್ತುತಿಪ್ರಿಯಃ ।

ನಾಸಾಂ ಮೇ ಸಿಂಹನಾಸಸ್ತು ಮುಖಂ ಲಕ್ಷ್ಮೀಮುಖಪ್ರಿಯಃ

॥ 8 ॥

ಶ್ಲೋಕ 10

ಸರ್ವವಿದ್ಯಾಧಿಪಃ ಪಾತು ನೃಸಿಂಹೋ ರಸನಾಂ ಮಮ ।

ವಕ್ತ್ರಂ ಪಾತ್ವಿನ್ದುವದನಃ ಸದಾ ಪ್ರಹ್ಲಾದವನ್ದಿತಃ

॥ 9 ॥

ಶ್ಲೋಕ 11

ನೃಸಿಂಹಃ ಪಾತು ಮೇ ಕಣ್ಠಂ ಸ್ಕನ್ಧೌ ಭೂಭರಣಾನ್ತಕೃತ್ ।

ದಿವ್ಯಾಸ್ತ್ರಶೋಭಿತಭುಜೋ ನೃಸಿಂಹಃ ಪಾತು ಮೇ ಭುಜೌ

॥ 10 ॥

ಶ್ಲೋಕ 12

ಕರೌ ಮೇ ದೇವವರದೋ ನೃಸಿಂಹಃ ಪಾತು ಸರ್ವತಃ ।

ಹೃದಯಂ ಯೋಗಿಸಾಧ್ಯಶ್ಚ ನಿವಾಸಂ ಪಾತು ಮೇ ಹರಿಃ

॥ 11 ॥

ಶ್ಲೋಕ 13

ಮಧ್ಯಂ ಪಾತು ಹಿರಣ್ಯಾಕ್ಷವಕ್ಷಃಕುಕ್ಷಿವಿದಾರಣಃ ।

ನಾಭಿಂ ಮೇ ಪಾತು ನೃಹರಿಃ ಸ್ವನಾಭಿ ಬ್ರಹ್ಮಸಂಸ್ತುತಃ

॥ 12 ॥

ಶ್ಲೋಕ 14

ಬ್ರಹ್ಮಾಣ್ಡಕೋಟಯಃ ಕಟ್ಯಾಂ ಯಸ್ಯಾಸೌ ಪಾತು ಮೇ ಕಟಿಮ್ ।

ಗುಹ್ಯಂ ಮೇ ಪಾತು ಗುಹ್ಯಾನಾಂ ಮನ್ತ್ರಾಣಾಂ ಗುಹ್ಯರೂಪಧೃಕ್

॥ 13 ॥

ಶ್ಲೋಕ 15

ಊರೂ ಮನೋಭವಃ ಪಾತು ಜಾನುನೀ ನರರೂಪಧೃಕ್ ।

ಜಙ್ಘೇ ಪಾತು ಧರಾಭಾರಹರ್ತಾ ಯೋಽಸೌ ನೃಕೇಸರೀ

॥ 14 ॥

ಶ್ಲೋಕ 16

ಸುರರಾಜ್ಯಪ್ರದಃ ಪಾತು ಪಾದೌ ಮೇ ನೃಹರೀಶ್ವರಃ ।

ಸಹಸ್ರಶೀರ್ಷಾ ಪುರುಷಃ ಪಾತು ಮೇ ಸರ್ವಶಸ್ತನುಮ್

॥ 15 ॥

ಶ್ಲೋಕ 17

ಮಹೋಗ್ರಃ ಪೂರ್ವತಃ ಪಾತು ಮಹಾವೀರಾಗ್ರಜೋಽಗ್ನಿತಃ ।

ಮಹಾವಿಷ್ಣುರ್ದಕ್ಷಿಣೇ ತು ಮಹಾಜ್ವಾಲಸ್ತು ನೈರೃತೌ

॥ 16 ॥

ಶ್ಲೋಕ 18

ಪಶ್ಚಿಮೇ ಪಾತು ಸರ್ವೇಶೋ ದಿಶಿ ಮೇ ಸರ್ವತೋಮುಖಃ ।

ನೃಸಿಂಹಃ ಪಾತು ವಾಯವ್ಯಾಂ ಸೌಮ್ಯಾಂ ಭೂಷಣವಿಗ್ರಹಃ

॥ 17 ॥

ಶ್ಲೋಕ 19

ಈಶಾನ್ಯಾಂ ಪಾತು ಭದ್ರೋ ಮೇ ಸರ್ವಮಙ್ಗಲದಾಯಕಃ ।

ಸಂಸಾರಭಯದಃ ಪಾತು ಮೃತ್ಯೋರ್ಮೃತ್ಯುರ್ನೃಕೇಸರೀ

॥ 18 ॥

ಶ್ಲೋಕ 20

ಇದಂ ನೃಸಿಂಹಕವಚಂ ಪ್ರಹ್ಲಾದಮುಖಮಣ್ಡಿತಮ್ ।

ಭಕ್ತಿಮಾನ್ಯಃ ಪಠೇನ್ನಿತ್ಯಂ ಸರ್ವಪಾಪೈಃ ಪ್ರಮುಚ್ಯತೇ

॥ 19 ॥

ಶ್ಲೋಕ 21

ಪುತ್ರವಾನ್ ಧನವಾನ್ ಲೋಕೇ ದೀರ್ಘಾಯುರುಪಜಾಯತೇ ।

ಯಂ ಯಂ ಕಾಮಯತೇ ಕಾಮಂ ತಂ ತಂ ಪ್ರಾಪ್ನೋತ್ಯಸಂಶಯಮ್

॥ 20 ॥

ಶ್ಲೋಕ 22

ಸರ್ವತ್ರ ಜಯಮಾಪ್ನೋತಿ ಸರ್ವತ್ರ ವಿಜಯೀ ಭವೇತ್ ।

ಭೂಮ್ಯನ್ತರಿಕ್ಷದಿವ್ಯಾನಾಂ ಗ್ರಹಾಣಾಂ ವಿನಿವಾರಣಮ್

॥ 21 ॥

ಶ್ಲೋಕ 23

ವೃಶ್ಚಿಕೋರಗಸಮ್ಭೂತವಿಷಾಪಹರಣಂ ಪರಮ್ ।

ಬ್ರಹ್ಮರಾಕ್ಷಸಯಕ್ಷಾಣಾಂ ದೂರೋತ್ಸಾರಣಕಾರಣಮ್

॥ 22 ॥

ಶ್ಲೋಕ 24

ಭೂರ್ಜೇ ವಾ ತಾಲಪತ್ರೇ ವಾ ಕವಚಂ ಲಿಖಿತಂ ಶುಭಮ್ ।

ಕರಮೂಲೇ ಧೃತಂ ಯೇನ ಸಿಧ್ಯೇಯುಃ ಕರ್ಮಸಿದ್ಧಯಃ

॥ 23 ॥

ಶ್ಲೋಕ 25

ದೇವಾಸುರಮನುಷ್ಯೇಷು ಸ್ವಂ ಸ್ವಮೇವ ಜಯಂ ಲಭೇತ್ ।

ಏಕಸನ್ಧ್ಯಂ ತ್ರಿಸನ್ಧ್ಯಂ ವಾ ಯಃ ಪಠೇನ್ನಿಯತೋ ನರಃ

॥ 24 ॥

ಶ್ಲೋಕ 26

ಸರ್ವಮಙ್ಗಲಮಾಙ್ಗಲ್ಯಂ ಭುಕ್ತಿಂ ಮುಕ್ತಿಂ ಚ ವಿನ್ದತಿ ।

ದ್ವಾತ್ರಿಂಶತಿಸಹಸ್ರಾಣಿ ಪಠೇಚ್ಛುದ್ಧಾತ್ಮನಾಂ ನೃಣಾಮ್

॥ 25 ॥

ಶ್ಲೋಕ 27

ಕವಚಸ್ಯಾಸ್ಯ ಮನ್ತ್ರಸ್ಯ ಮನ್ತ್ರಸಿದ್ಧಿಃ ಪ್ರಜಾಯತೇ ।

ಅನೇನ ಮನ್ತ್ರರಾಜೇನ ಕೃತ್ವಾ ಭಸ್ಮಾಭಿಮನ್ತ್ರಣಮ್

॥ 26 ॥

ಶ್ಲೋಕ 28

ತಿಲಕಂ ವಿನ್ಯಸೇದ್ಯಸ್ತು ತಸ್ಯ ಗ್ರಹಭಯಂ ಹರೇತ್ ।

ತ್ರಿವಾರಂ ಜಪಮಾನಸ್ತು ದತ್ತಂ ವಾರ್ಯಭಿಮನ್ತ್ರ್ಯ ಚ

॥ 27 ॥

ಶ್ಲೋಕ 29

ಪ್ರಾಶಯೇದ್ಯೋ ನರೋ ಮನ್ತ್ರಂ ನೃಸಿಂಹಧ್ಯಾನಮಾಚರೇತ್ ।

ತಸ್ಯ ರೋಗಾಃ ಪ್ರಣಶ್ಯನ್ತಿ ಯೇ ಚ ಸ್ಯುಃ ಕುಕ್ಷಿಸಮ್ಭವಾಃ

॥ 28 ॥

ಶ್ಲೋಕ 30

ಕಿಮತ್ರ ಬಹುನೋಕ್ತೇನ ನೃಸಿಂಹಸದೃಶೋ ಭವೇತ್ ।

ಮನಸಾ ಚಿನ್ತಿತಂ ಯತ್ತು ಸ ತಚ್ಚಾಪ್ನೋತ್ಯಸಂಶಯಮ್

॥ 29 ॥

ಶ್ಲೋಕ 31

ಗರ್ಜನ್ತಂ ಗರ್ಜಯನ್ತಂ ನಿಜಭುಜಪಟಲಂ ಸ್ಫೋಟಯನ್ತಂ ಹಠನ್ತಂ

ರೂಪ್ಯನ್ತಂ ತಾಪಯನ್ತಂ ದಿವಿ ಭುವಿ ದಿತಿಜಂ ಕ್ಷೇಪಯನ್ತಂ ಕ್ಷಿಪನ್ತಮ್ ।

ಕ್ರನ್ದನ್ತಂ ರೋಷಯನ್ತಂ ದಿಶಿ ದಿಶಿ ಸತತಂ ಸಂಹರನ್ತಂ ಭರನ್ತಂ

ವೀಕ್ಷನ್ತಂ ಘೂರ್ಣಯನ್ತಂ ಶರನಿಕರಶತೈರ್ದಿವ್ಯಸಿಂಹಂ ನಮಾಮಿ ॥

ಇತಿ ಶ್ರೀಬ್ರಹ್ಮಾಣ್ಡಪುರಾಣೇ ಪ್ರಹ್ಲಾದೋಕ್ತಂ ಶ್ರೀ ನೃಸಿಂಹ ಕವಚಮ್ ।