Nakshatra Suktam (Nakshatreshti)

ନକ୍ଷତ୍ର ସୂକ୍ତମ୍ (ନକ୍ଷତ୍ରେଷ୍ଟି)

ଶ୍ଲୋକ 1

ତୈତ୍ତିରୀଯ ବ୍ରାହ୍ମଣ - ଅଷ୍ଟକଂ 3, ପ୍ରଶ୍ନଃ 1,

ତୈତ୍ତିରୀଯ ସଂହିତା - କାଣ୍ଡ 3, ପ୍ରପାଠକଃ 5, ଅନୁଵାକଂ 1

ନକ୍ଷତ୍ରଂ - କୃତ୍ତିକା, ଦେଵତା - ଅଗ୍ନିଃ

ଓଁ ଅ॒ଗ୍ନିର୍ନଃ॑ ପାତୁ॒ କୃତ୍ତି॑କାଃ । ନକ୍ଷ॑ତ୍ର-ନ୍ଦେ॒ଵମି॑ନ୍ଦ୍ରି॒ଯମ୍ ।

ଇ॒ଦମା॑ସାଂ-ଵିଁଚକ୍ଷ॒ଣମ୍ । ହ॒ଵିରା॒ସ-ଞ୍ଜୁ॑ହୋତନ ।

ଯସ୍ଯ॒ ଭାନ୍ତି॑ ର॒ଶ୍ମଯୋ॒ ଯସ୍ଯ॑ କେ॒ତଵଃ॑ । ଯସ୍ଯେ॒ମା ଵିଶ୍ଵା॒ ଭୁଵ॑ନାନି॒ ସର୍ଵା᳚ ।

ସ କୃତ୍ତି॑କାଭି-ର॒ଭିସଂ॒​ଵଁସା॑ନଃ । ଅ॒ଗ୍ନିର୍ନୋ॑ ଦେ॒ଵସ୍ସୁ॑ଵି॒ତେ ଦ॑ଧାତୁ ॥ 1

ନକ୍ଷତ୍ରଂ - ରୋହିଣୀ, ଦେଵତା - ପ୍ରଜାପତିଃ

ପ୍ର॒ଜାପ॑ତେ ରୋହି॒ଣୀଵେ॑ତୁ॒ ପତ୍ନୀ᳚ । ଵି॒ଶ୍ଵରୂ॑ପା ବୃହ॒ତୀ ଚି॒ତ୍ରଭା॑ନୁଃ ।

ସା ନୋ॑ ଯ॒ଜ୍ଞସ୍ଯ॑ ସୁଵି॒ତେ ଦ॑ଧାତୁ । ଯଥା॒ ଜୀଵେ॑ମ ଶ॒ରଦ॒ସ୍ସଵୀ॑ରାଃ ।

ରୋ॒ହି॒ଣୀ ଦେ॒ଵ୍ଯୁଦ॑ଗାତ୍ପୁ॒ରସ୍ତା᳚ତ୍ । ଵିଶ୍ଵା॑ ରୂ॒ପାଣି॑ ପ୍ରତି॒ମୋଦ॑ମାନା ।

ପ୍ର॒ଜାପ॑ତିଗ୍ଂ ହ॒ଵିଷା॑ ଵ॒ର୍ଧଯ॑ନ୍ତୀ । ପ୍ରି॒ଯା ଦେ॒ଵାନା॒-ମୁପ॑ଯାତୁ ଯ॒ଜ୍ଞମ୍ ॥ 2

ନକ୍ଷତ୍ରଂ - ମୃଗଶୀର୍​ଷଃ, ଦେଵତା - ସୋମଃ

ସୋମୋ॒ ରାଜା॑ ମୃଗଶୀ॒ର୍॒ଷେଣ॒ ଆଗନ୍ନ୍॑ । ଶି॒ଵ-ନ୍ନକ୍ଷ॑ତ୍ର-ମ୍ପ୍ରି॒ଯମ॑ସ୍ଯ॒ ଧାମ॑ ।

ଆ॒ପ୍ଯାଯ॑ମାନୋ ବହୁ॒ଧା ଜନେ॑ଷୁ । ରେତଃ॑ ପ୍ର॒ଜାଂ-ଯଁଜ॑ମାନେ ଦଧାତୁ ।

ଯତ୍ତେ॒ ନକ୍ଷ॑ତ୍ର-ମ୍ମୃଗଶୀ॒ର୍॒ଷମସ୍ତି॑ । ପ୍ରି॒ଯଗ୍ଂ ରା॑ଜ-ନ୍ପ୍ରି॒ଯତ॑ମ-ମ୍ପ୍ରି॒ଯାଣା᳚ମ୍ ।

ତସ୍ମୈ॑ ତେ ସୋମ ହ॒ଵିଷା॑ ଵିଧେମ । ଶନ୍ନ॑ ଏଧି ଦ୍ଵି॒ପଦେ॒ ଶଞ୍ଚତୁ॑ଷ୍ପଦେ ॥ 3

ନକ୍ଷତ୍ରଂ - ଆର୍ଦ୍ରା, ଦେଵତା - ରୁଦ୍ରଃ

ଆ॒ର୍ଦ୍ରଯା॑ ରୁ॒ଦ୍ରଃ ପ୍ରଥ॑ମା ନ ଏତି । ଶ୍ରେଷ୍ଠୋ॑ ଦେ॒ଵାନା॒-ମ୍ପତି॑ରଘ୍ନି॒ଯାନା᳚ମ୍ ।

ନକ୍ଷ॑ତ୍ରମସ୍ଯ ହ॒ଵିଷା॑ ଵିଧେମ । ମା ନଃ॑ ପ୍ର॒ଜାଗ୍ଂ ରୀ॑ରିଷ॒ନ୍ମୋତ ଵୀ॒ରାନ୍ ।

ହେ॒ତୀ ରୁ॒ଦ୍ରସ୍ଯ॒ ପରି॑ଣୋ ଵୃଣକ୍ତୁ । ଆ॒ର୍ଦ୍ରା ନକ୍ଷ॑ତ୍ର-ଞ୍ଜୁଷତାଗ୍ଂ ହ॒ଵିର୍ନଃ॑ ।

ପ୍ର॒ମୁ॒ଞ୍ଚମା॑ନୌ ଦୁରି॒ତାନି॒ ଵିଶ୍ଵା᳚ । ଅପା॒ଘଶଗ୍ଂ॑ ସନ୍ନୁ-ଦତା॒ମରା॑ତିମ୍ ॥ 4

ନକ୍ଷତ୍ରଂ - ପୁନର୍ଵସୁ, ଦେଵତା - ଅଦିତିଃ

ପୁନ॑ର୍ନୋ ଦେ॒ଵ୍ଯଦି॑ତି-ସ୍ପୃଣୋତୁ । ପୁନ॑ର୍ଵସୂ ନଃ॒ ପୁନ॒ରେତାଂ᳚-ଯଁ॒ଜ୍ଞମ୍ ।

ପୁନ॑ର୍ନୋ ଦେ॒ଵା ଅ॒ଭିଯ॑ନ୍ତୁ॒ ସର୍ଵେ᳚ । ପୁନଃ॑ ପୁନର୍ଵୋ ହ॒ଵିଷା॑ ଯଜାମଃ ।

ଏ॒ଵା ନ ଦେ॒ଵ୍ଯ-ଦି॑ତିରନ॒ର୍ଵା । ଵିଶ୍ଵ॑ସ୍ଯ ଭ॒ର୍ତ୍ରୀ ଜଗ॑ତଃ ପ୍ରତି॒ଷ୍ଠା ।

ପୁନ॑ର୍ଵସୂ ହ॒ଵିଷା॑ ଵ॒ର୍ଧଯ॑ନ୍ତୀ । ପ୍ରି॒ଯ-ନ୍ଦେ॒ଵାନା॒-ମପ୍ଯେ॑ତୁ॒ ପାଥଃ॑ ॥ 5

ନକ୍ଷତ୍ରଂ - ପୁଷ୍ଯଃ, ଦେଵତା - ବୃହସ୍ପତିଃ

ବୃହ॒ସ୍ପତିଃ॑ ପ୍ରଥ॒ମଞ୍ଜାଯ॑ମାନଃ । ତି॒ଷ୍ଯ॑-ନ୍ନକ୍ଷ॑ତ୍ରମ॒ଭି ସମ୍ବ॑ଭୂଵ ।

ଶ୍ରେଷ୍ଠୋ॑ ଦେ॒ଵାନା॒-ମ୍ପୃତ॑ନାସୁ ଜି॒ଷ୍ଣୁଃ । ଦି॒ଶୋ-ଽନୁ॒ ସର୍ଵା॒ ଅଭ॑ଯନ୍ନୋ ଅସ୍ତୁ ।

ତି॒ଷ୍ଯଃ॑ ପୁ॒ରସ୍ତା॑ଦୁ॒ତ ମ॑ଧ୍ଯ॒ତୋ ନଃ॑ । ବୃହ॒ସ୍ପତି॑ର୍ନଃ॒ ପରି॑ପାତୁ ପ॒ଶ୍ଚାତ୍ ।

ବାଧେ॑ ତା॒ନ୍ଦ୍ଵେଷୋ॒ ଅଭ॑ଯ-ଙ୍କୃଣୁତାମ୍ । ସୁ॒ଵୀର୍ଯ॑ସ୍ଯ॒ ପତ॑ଯସ୍ଯାମ ॥ 6

ନକ୍ଷତ୍ରଂ -ଆଶ୍ରେଷମ୍, ଦେଵତା - ସର୍ପାଃ

ଇ॒ଦଗ୍ଂ ସ॒ର୍ପେଭ୍ଯୋ॑ ହ॒ଵିର॑ସ୍ତୁ॒ ଜୁଷ୍ଟ᳚ମ୍ । ଆ॒ଶ୍ରେ॒ଷା ଯେଷା॑ମନୁ॒ଯନ୍ତି॒ ଚେତଃ॑ ।

ଯେ ଅ॒ନ୍ତରି॑କ୍ଷ-ମ୍ପୃଥି॒ଵୀଂ-କ୍ଷି॒ଯନ୍ତି॑ । ତେନ॑ ସ୍ସ॒ର୍ପାସୋ॒ ହଵ॒ମାଗ॑ମିଷ୍ଠାଃ ।

ଯେ ରୋ॑ଚ॒ନେ ସୂର୍ଯ॒ସ୍ଯାପି॑ ସ॒ର୍ପାଃ । ଯେ ଦିଵ॑-ନ୍ଦେ॒ଵୀ-ମନୁ॑ସ॒ଞ୍ଚର॑ନ୍ତି ।

ଯେଷା॑ମାଶ୍ରେ॒ଷା ଅ॑ନୁ॒ଯନ୍ତି॒ କାମ᳚ମ୍ । ତେଭ୍ଯ॑-ସ୍ସ॒ର୍ପେଭ୍ଯୋ॒ ମଧୁ॑-ମଜ୍ଜୁହୋମି ॥ 7

ନକ୍ଷତ୍ରଂ - ମଘା, ଦେଵତା - ପିତରଃ

ଉପ॑ହୂତାଃ ପି॒ତରୋ॒ ଯେ ମ॒ଘାସୁ॑ । ମନୋ॑ଜଵସ-ସ୍ସୁ॒କୃତ॑-ସ୍ସୁକୃ॒ତ୍ଯାଃ ।

ତେ ନୋ॒ ନକ୍ଷ॑ତ୍ରେ॒ ହଵ॒ମାଗ॑ମିଷ୍ଠାଃ । ସ୍ଵ॒ଧାଭି॑ର୍ଯ॒ଜ୍ଞ-ମ୍ପ୍ରଯ॑ତ-ଞ୍ଜୁଷନ୍ତାମ୍ ।

ଯେ ଅ॑ଗ୍ନିଦ॒ଗ୍ଧା ଯେ-ଽନ॑ଗ୍ନି-ଦଗ୍ଧାଃ । ଯେ॑-ଽମୁଲ୍ଲୋ॒କ-ମ୍ପି॒ତରଃ॑, କ୍ଷି॒ଯନ୍ତି॑ ।

ଯାଗ୍​ଶ୍ଚ॑ ଵି॒ଦ୍ମଯାଗ୍ଂ ଉ॑ ଚ॒ ନ ପ୍ର॑ଵି॒ଦ୍ମ । ମ॒ଘାସୁ॑ ଯ॒ଜ୍ଞଗ୍ଂ ସୁକୃ॑ତ-ଞ୍ଜୁଷନ୍ତାମ୍ ॥ 8

ନକ୍ଷତ୍ରଂ - ପୂର୍ଵଫଲ୍ଗୁନୀ, ଦେଵତା - ଅର୍ଯମା

ଗଵା॒-ମ୍ପତିଃ॒ ଫଲ୍ଗୁ॑ନୀ-ନାମସି॒ ତ୍ଵମ୍ । ତଦ॑ର୍ଯମନ୍ଵରୁଣ ମିତ୍ର॒ ଚାରୁ॑ ।

ତ-ନ୍ତ୍ଵା॑ ଵ॒ଯଗ୍ଂ ସ॑ନି॒ତାରଗ୍ଂ॑ ସନୀ॒ନାମ୍ । ଜୀ॒ଵା ଜୀଵ॑ନ୍ତ॒ମୁପ॒ ସଂ​ଵିଁ॑ଶେମ ।

ଯେନେ॒ମା ଵିଶ୍ଵା॒ ଭୁଵ॑ନାନି॒ ସଞ୍ଜି॑ତା । ଯସ୍ଯ॑ ଦେ॒ଵା ଅ॑ନୁସଂ॒​ଯଁନ୍ତି॒ ଚେତଃ॑ ।

ଅ॒ର୍ଯ॒ମା ରାଜା॒-ଽଜର॒ସ୍ତୁ ଵି॑ଷ୍ମାନ୍ । ଫଲ୍ଗୁ॑ନୀନା-ମୃଷ॒ଭୋ ରୋ॑ରଵୀତି ॥ 9

ନକ୍ଷତ୍ରଂ - ଉତ୍ତର ଫଲ୍ଗୁନୀ, ଦେଵତା - ଭଗଃ

ଶ୍ରେଷ୍ଠୋ॑ ଦେ॒ଵାନା᳚-ମ୍ଭଗଵୋ ଭଗାସି । ତତ୍ତ୍ଵା॑ ଵିଦୁଃ॒ ଫଲ୍ଗୁ॑ନୀ॒-ସ୍ତସ୍ଯ॑ ଵିତ୍ତାତ୍ ।

ଅ॒ସ୍ମଭ୍ଯଂ॑-କ୍ଷ॒ତ୍ରମ॒ଜରଗ୍ଂ॑ ସୁ॒ଵୀର୍ଯ᳚ମ୍ । ଗୋମ॒ଦଶ୍ଵ॑-ଵ॒ଦୁପ॒ସନ୍ନୁ॑-ଦେ॒ହ ।

ଭଗୋ॑ହ ଦା॒ତା ଭଗ॒ ଇତ୍ପ୍ର॑ଦା॒ତା । ଭଗୋ॑ ଦେ॒ଵୀଃ ଫଲ୍ଗୁ॑ନୀ॒-ରାଵି॑ଵେଶ ।

ଭଗ॒ସ୍ଯେତ୍ତ-ମ୍ପ୍ର॑ସ॒ଵ-ଙ୍ଗ॑ମେମ । ଯତ୍ର॑ ଦେ॒ଵୈ-ସ୍ସ॑ଧ॒ମାଦ॑-ମ୍ମଦେମ ॥ 10

ନକ୍ଷତ୍ରଂ - ହସ୍ତଃ, ଦେଵତା - ସଵିତା

ଆଯା॑ତୁ ଦେ॒ଵ-ସ୍ସ॑ଵି॒ତୋ ପ॑ଯାତୁ । ହି॒ର॒ଣ୍ଯଯେ॑ନ ସୁ॒ଵୃତା॒ ରଥେ॑ନ ।

ଵହ॒ନ॒, ହସ୍ତଗ୍ଂ॑ ସୁ॒ଭଗଂ॑-ଵିଁଦ୍ମ॒ନାପ॑ସମ୍ । ପ୍ର॒ଯଚ୍ଛ॑ନ୍ତ॒-ମ୍ପପୁ॑ରି॒-ମ୍ପୁଣ୍ଯ॒ମଚ୍ଛ॑ ।

ହସ୍ତଃ॒ ପ୍ରଯ॑ଚ୍ଛ ତ୍ଵ॒ମୃତଂ॒-ଵଁସୀ॑ଯଃ । ଦକ୍ଷି॑ଣେନ॒ ପ୍ରତି॑ଗୃଭ୍ଣୀମ ଏନତ୍ ।

ଦା॒ତାର॑-ମ॒ଦ୍ଯ ସ॑ଵି॒ତା ଵି॑ଦେଯ । ଯୋ ନୋ॒ ହସ୍ତା॑ଯ ପ୍ରସୁ॒ଵାତି॑ ଯ॒ଜ୍ଞମ୍ ॥ 11

ନକ୍ଷତ୍ରଂ - ଚିତ୍ରା, ଦେଵତା - ତ୍ଵଷ୍ଟା

ତ୍ଵଷ୍ଟା॒ ନକ୍ଷ॑ତ୍ର-ମ॒ଭ୍ଯେ॑ତି ଚି॒ତ୍ରାମ୍ । ସୁ॒ଭଗ୍ଂ ସ॑ସଂ​ଯୁଁଵ॒ତିଗ୍ଂ ରୋଚ॑ମାନାମ୍ ।

ନି॒ଵେ॒ଶଯ॑-ନ୍ନ॒ମୃତା॒-ନ୍ମର୍ତ୍ଯାଗ୍॑ଶ୍ଚ । ରୂ॒ପାଣି॑ ପି॒ଗ୍ଂ॒ଶ-ନ୍ଭୁଵ॑ନାନି॒ ଵିଶ୍ଵା᳚ ।

ତନ୍ନ॒ସ୍ତ୍ଵଷ୍ଟା॒ ତଦୁ॑ ଚି॒ତ୍ରା ଵିଚ॑ଷ୍ଟାମ୍ । ତନ୍ନକ୍ଷ॑ତ୍ର-ମ୍ଭୂରି॒ଦା ଅ॑ସ୍ତୁ॒ ମହ୍ଯ᳚ମ୍ ।

ତନ୍ନଃ॑ ପ୍ର॒ଜାଂ-ଵୀଁ॒ରଵ॑ତୀଗ୍ଂ ସନୋତୁ । ଗୋଭି॑ର୍ନୋ॒ ଅଶ୍ଵୈ॒-ସ୍ସମ॑ନକ୍ତୁ ଯ॒ଜ୍ଞମ୍ ॥ 12

ନକ୍ଷତ୍ରଂ - ସ୍ଵାତୀ, ଦେଵତା - ଵାଯୁଃ

ଵା॒ଯୁ-ର୍ନକ୍ଷ॑ତ୍ର-ମ॒ଭ୍ଯେ॑ତି॒ ନିଷ୍ଟ୍ଯା᳚ମ୍ । ତି॒ଗ୍ମଶୃ॑ଙ୍ଗୋ ଵୃଷ॒ଭୋ ରୋରୁ॑ଵାଣଃ ।

ସ॒ମୀ॒ରଯ॒-ନ୍ଭୁଵ॑ନା ମାତ॒ରିଶ୍ଵା᳚ । ଅପ॒ ଦ୍ଵେଷାଗ୍ଂ॑ସି ନୁଦତା॒ମରା॑ତୀଃ ।

ତନ୍ନୋ॑ ଵା॒ଯସ୍ତଦୁ॒ ନିଷ୍ଟ୍ଯା॑ ଶୃଣୋତୁ । ତନ୍ନକ୍ଷ॑ତ୍ର-ମ୍ଭୂରି॒ଦା ଅ॑ସ୍ତୁ॒ ମହ୍ଯ᳚ମ୍ ।

ତନ୍ନୋ॑ ଦେ॒ଵାସୋ॒ ଅନୁ॑ ଜାନନ୍ତୁ॒ କାମ᳚ମ୍ । ଯଥା॒ ତରେ॑ମ ଦୁରି॒ତାନି॒ ଵିଶ୍ଵା᳚ ॥ 13

ନକ୍ଷତ୍ରଂ - ଵିଶାଖା, ଦେଵତା - ଇନ୍ଦ୍ରାଗ୍ନୀ

ଦୂ॒ରମ॒ସ୍ମଚ୍ଛତ୍ର॑ଵୋ ଯନ୍ତୁ ଭୀ॒ତାଃ । ତଦି॑ନ୍ଦ୍ରା॒ଗ୍ନୀ କୃ॑ଣୁତା॒-ନ୍ତଦ୍ଵିଶା॑ଖେ ।

ତନ୍ନୋ॑ ଦେ॒ଵା ଅନୁ॑ମଦନ୍ତୁ ଯ॒ଜ୍ଞମ୍ । ପ॒ଶ୍ଚା-ତ୍ପୁ॒ରସ୍ତା॒-ଦଭ॑ଯନ୍ନୋ ଅସ୍ତୁ ।

ନକ୍ଷ॑ତ୍ରାଣା॒-ମଧି॑ପତ୍ନୀ॒ ଵିଶା॑ଖେ । ଶ୍ରେଷ୍ଠା॑-ଵିନ୍ଦ୍ରା॒ଗ୍ନୀ ଭୁଵ॑ନସ୍ଯ ଗୋ॒ପୌ ।

ଵିଷୂ॑ଚ॒-ଶ୍ଶତ୍ରୂ॑ନପ॒ବାଧ॑ମାନୌ । ଅପ॒କ୍ଷୁଧ॑-ନ୍ନୁଦତା॒ମରା॑ତିମ୍ ॥ 14

ପୌର୍ଣମାସି

ପୂ॒ର୍ଣା ପ॒ଶ୍ଚାଦୁ॒ତ ପୂ॒ର୍ଣା ପୁ॒ରସ୍ତା᳚ତ୍ । ଉନ୍ମ॑ଧ୍ଯ॒ତଃ ପୌ᳚ର୍ଣମା॒ସୀ ଜି॑ଗାଯ ।

ତସ୍ଯା᳚-ନ୍ଦେ॒ଵା ଅଧି॑ ସଂ॒-ଵଁସ॑ନ୍ତଃ । ଉ॒ତ୍ତ॒ମେ ନାକ॑ ଇ॒ହ ମା॑ଦଯନ୍ତାମ୍ ।

ପୃ॒ଥ୍ଵୀ ସୁ॒ଵର୍ଚା॑ ଯୁଵ॒ତି-ସ୍ସ॒ଜୋଷାଃ᳚ । ପୌ॒ର୍ଣ॒ମା॒ସ୍ଯୁଦ॑ଗା॒-ଚ୍ଛୋଭ॑ମାନା ।

ଆ॒ପ୍ଯା॒ଯଯ॑ନ୍ତୀ ଦୁରି॒ତାନି॒ ଵିଶ୍ଵା᳚ । ଉ॒ରୁ-ନ୍ଦୁହାଂ॒-ଯଁଜ॑ମାନାଯ ଯ॒ଜ୍ଞମ୍ ॥ 15

ନକ୍ଷତ୍ରଂ - ଅନୂରାଧା, ଦେଵତା - ମିତ୍ରଃ

ଋ॒ଦ୍ଧ୍ଯାସ୍ମ॑ ହ॒ଵ୍ଯୈ-ର୍ନମ॑ସୋପ॒-ସଦ୍ଯ॑ । ମି॒ତ୍ର-ନ୍ଦେ॒ଵ-ମ୍ମି॑ତ୍ର॒ଧେଯ॑ନ୍ନୋ ଅସ୍ତୁ ।

ଅ॒ନୂ॒ରା॒ଧାନ୍, ହ॒ଵିଷା॑ ଵ॒ର୍ଧଯ॑ନ୍ତଃ । ଶ॒ତ-ଞ୍ଜୀ॑ଵେମ ଶ॒ରଦ॒-ସ୍ସଵୀ॑ରାଃ ।

ଚି॒ତ୍ରଂ-ନକ୍ଷ॑ତ୍ର॒-ମୁଦ॑ଗା-ତ୍ପୁ॒ରସ୍ତା᳚ତ୍ । ଅ॒ନୂ॒ରା॒ଧା ସ॒ ଇତି॒ ଯଦ୍ଵଦ॑ନ୍ତି ।

ତନ୍ମି॒ତ୍ର ଏ॑ତି ପ॒ଥିଭି॑-ର୍ଦେଵ॒ଯାନୈଃ᳚ । ହି॒ର॒ଣ୍ଯଯୈ॒-ର୍ଵିତ॑ତୈ-ର॒ନ୍ତରି॑କ୍ଷେ ॥ 16

ନକ୍ଷତ୍ରଂ - ଜ୍ଯେଷ୍ଠା, ଦେଵତା - ଇନ୍ଦ୍ରଃ

ଇନ୍ଦ୍ରୋ᳚ ଜ୍ଯେ॒ଷ୍ଠା ମନୁ॒ ନକ୍ଷ॑ତ୍ରମେତି । ଯସ୍ମି॑ନ୍ ଵୃ॒ତ୍ରଂ-ଵୃଁ॑ତ୍ର॒ ତୂର୍ଯେ॑ ତ॒ତାର॑ ।

ତସ୍ମି॑ନ୍ଵ॒ଯ-ମ॒ମୃତ॒-ନ୍ଦୁହା॑ନାଃ । କ୍ଷୁଧ॑ନ୍ତରେମ॒ ଦୁରି॑ତି॒-ନ୍ଦୁରି॑ଷ୍ଟିମ୍ ।

ପୁ॒ର॒ନ୍ଦ॒ରାଯ॑ ଵୃଷ॒ଭାଯ॑ ଧୃ॒ଷ୍ଣଵେ᳚ । ଅଷା॑ଢାଯ॒ ସହ॑ମାନାଯ ମୀ॒ଢୁଷେ᳚ ।

ଇନ୍ଦ୍ରା॑ଯ ଜ୍ଯେ॒ଷ୍ଠା ମଧୁ॑ମ॒ଦ୍ଦୁହା॑ନା । ଉ॒ରୁ-ଙ୍କୃ॑ଣୋତୁ॒ ଯଜ॑ମାନାଯ ଲୋ॒କମ୍ ॥ 17

ନକ୍ଷତ୍ରଂ - ମୂଲମ୍, ଦେଵତା - ପ୍ରଜାପତିଃ

ମୂଲ॑-ମ୍ପ୍ର॒ଜାଂ-ଵୀଁ॒ରଵ॑ତୀଂ-ଵିଁଦେଯ । ପରା᳚ଚ୍ଯେତୁ॒ ନିର୍-ଋ॑ତିଃ ପରା॒ଚା ।

ଗୋଭି॒-ର୍ନକ୍ଷ॑ତ୍ର-ମ୍ପ॒ଶୁଭି॒-ସ୍ସମ॑କ୍ତମ୍ । ଅହ॑-ର୍ଭୂଯା॒-ଦ୍ଯଜ॑ମାନାଯ॒ ମହ୍ଯ᳚ମ୍ ।

ଅହ॑ର୍ନୋ ଅ॒ଦ୍ଯ ସୁ॑ଵି॒ତେ ଦ॑ଧାତୁ । ମୂଲ॒-ନ୍ନକ୍ଷ॑ତ୍ର॒ମିତି॒ ଯଦ୍ଵଦ॑ନ୍ତି ।

ପରା॑ଚୀଂ-ଵାଁ॒ଚା ନିର୍-ଋ॑ତି-ନ୍ନୁଦାମି । ଶି॒ଵ-ମ୍ପ୍ର॒ଜାଯୈ॑ ଶି॒ଵମ॑ସ୍ତୁ॒ ମହ୍ଯ᳚ମ୍ ॥ 18

ନକ୍ଷତ୍ରଂ - ପୂର୍ଵାଷାଢା, ଦେଵତା - ଆପଃ

ଯା ଦି॒ଵ୍ଯା ଆପଃ॒ ପଯ॑ସା ସମ୍ବଭୂ॒ଵୁଃ । ଯା ଅ॒ନ୍ତରି॑କ୍ଷ ଉ॒ତ ପାର୍ଥି॑ଵୀ॒ର୍ଯାଃ ।

ଯାସା॑ମଷା॒ଢା ଅ॑ନୁ॒ଯନ୍ତି॒ କାମ᳚ମ୍ । ତା ନ॒ ଆପ॒-ଶ୍ଶଗ୍ଗ୍​ ସ୍ଯୋ॒ନା ଭ॑ଵନ୍ତୁ ।

ଯାଶ୍ଚ॒ କୂପ୍ଯା॒ ଯାଶ୍ଚ॑ ନା॒ଦ୍ଯା᳚-ସ୍ସମୁ॒ଦ୍ରିଯାଃ᳚ । ଯାଶ୍ଚ॑ ଵୈଶ॒ନ୍ତୀରୁ॒ତ ପ୍ରା॑ସ॒ଚୀର୍ଯାଃ ।

ଯାସା॑ମଷା॒ଢା ମଧୁ॑ ଭ॒କ୍ଷଯ॑ନ୍ତି । ତା ନ॒ ଆପ॒-ଶ୍ଶଗ୍ଗ୍​ ସ୍ଯୋ॒ନା ଭ॑ଵନ୍ତୁ ॥ 19

ନକ୍ଷତ୍ରଂ - ଉତ୍ତରାଷାଢା, ଦେଵତା - ଵିଶ୍ଵେଦେଵଃ

ତନ୍ନୋ॒ ଵିଶ୍ଵେ॒ ଉପ॑ ଶୃଣ୍ଵନ୍ତୁ ଦେ॒ଵାଃ । ତଦ॑ଷା॒ଢା ଅ॒ଭିସଂ​ଯଁ॑ନ୍ତୁ ଯ॒ଜ୍ଞମ୍ ।

ତନ୍ନକ୍ଷ॑ତ୍ର-ମ୍ପ୍ରଥତା-ମ୍ପ॒ଶୁଭ୍ଯଃ॑ । କୃ॒ଷି-ର୍ଵୃ॒ଷ୍ଟି-ର୍ଯଜ॑ମାନାଯ କଲ୍ପତାମ୍ ।

ଶୁ॒ଭ୍ରାଃ କ॒ନ୍ଯା॑ ଯୁଵ॒ତଯ॑-ସ୍ସୁ॒ପେଶ॑ସଃ । କ॒ର୍ମ॒କୃତ॑-ସ୍ସୁ॒କୃତୋ॑ ଵୀ॒ର୍ଯା॑ଵତୀଃ ।

ଵିଶ୍ଵା᳚-ନ୍ଦେ॒ଵାନ୍, ହ॒ଵିଷା॑ ଵ॒ର୍ଧଯ॑ନ୍ତୀଃ ।

ଅ॒ଷା॒ଢାଃ କାମ॒ ମୁପ॑ଯାନ୍ତୁ ଯ॒ଜ୍ଞମ୍ ॥ 20

ନକ୍ଷତ୍ରଂ - ଅଭିଜିତ୍, ଦେଵତା - ବ୍ରହ୍ମା

ଯସ୍ମି॒-ନ୍ବ୍ରହ୍ମା॒ଭ୍ଯଜ॑ଯ॒-ଥ୍ସର୍ଵ॑ମେ॒ତତ୍ । ଅ॒ମୁଞ୍ଚ॑ ଲୋ॒କ ମି॒ଦମୂ॑ଚ॒ ସର୍ଵ᳚ମ୍ ।

ତନ୍ନୋ॒ ନକ୍ଷ॑ତ୍ର-ମଭି॒ଜି-ଦ୍ଵି॒ଜିତ୍ଯ॑ । ଶ୍ରିଯ॑-ନ୍ଦଧା॒ତ୍ଵ-ହୃ॑ଣୀଯମାନମ୍ ।

ଉ॒ଭୌ ଲୋ॒କୌ ବ୍ରହ୍ମ॑ଣା॒ ସଞ୍ଜି॑ତେ॒ମୌ । ତନ୍ନୋ॒ ନକ୍ଷ॑ତ୍ର-ମଭି॒ଜି-ଦ୍ଵିଚ॑ଷ୍ଟାମ୍ ।

ତସ୍ମି॑ନ୍ ଵ॒ଯ-ମ୍ପୃତ॑ନା॒ ସ୍ସଞ୍ଜ॑ଯେମ । ତନ୍ନୋ॑ ଦେ॒ଵାସୋ॒ ଅନୁ॑ଜାନନ୍ତୁ॒ କାମ᳚ମ୍ ॥ 21

ନକ୍ଷତ୍ରଂ - ଶ୍ରଵଣମ୍, ଦେଵତା - ଵିଷ୍ଣୁଃ

ଶୃ॒ଣ୍ଵନ୍ତି॑ ଶ୍ରୋ॒ଣା-ମ॒ମୃତ॑ସ୍ଯ ଗୋ॒ପାମ୍ । ପୁଣ୍ଯା॑ମସ୍ଯା॒ ଉପ॑ଶୃଣୋମି॒ ଵାଚ᳚ମ୍ ।

ମ॒ହୀ-ନ୍ଦେ॒ଵୀଂ-ଵିଁଷ୍ଣୁ॑ପତ୍ନୀ ମଜୂ॒ର୍ଯାମ୍ । ପ୍ର॒ତୀଚୀ॑ ମେନାଗ୍ଂ ହ॒ଵିଷା॑ ଯଜାମଃ ।

ତ୍ରେ॒ଧା ଵିଷ୍ଣୁ॑-ରୁରୁଗା॒ଯୋ ଵିଚ॑କ୍ରମେ । ମ॒ହୀ-ନ୍ଦିଵ॑-ମ୍ପୃଥି॒ଵୀ-ମ॒ନ୍ତରି॑କ୍ଷମ୍ ।

ତଚ୍ଛ୍ରୋ॒ଣୈତି॒ ଶ୍ରଵ॑-ଇ॒ଚ୍ଛମା॑ନା । ପୁଣ୍ଯ॒ଗ୍ଗ୍॒ ଶ୍ଲୋକଂ॒-ଯଁଜ॑ମାନାଯ କୃଣ୍ଵ॒ତୀ ॥ 22

ନକ୍ଷତ୍ରଂ - ଶ୍ରଵିଷ୍ଟା, ଦେଵତା - ଵସଵଃ

ଅ॒ଷ୍ଟୌ ଦେ॒ଵା ଵସ॑ଵସ୍ସୋ॒ମ୍ଯାସଃ॑ । ଚତ॑ସ୍ରୋ ଦେ॒ଵୀ ର॒ଜରା॒-ଶ୍ଶ୍ରଵି॑ଷ୍ଠାଃ ।

ତେ ଯ॒ଜ୍ଞ-ମ୍ପା᳚ନ୍ତୁ॒ ରଜ॑ସଃ ପ॒ରସ୍ତା᳚ତ୍ । ସଂ॒​ଵଁ॒ଥ୍ସ॒ରୀଣ॑-ମ॒ମୃତଗ୍ଗ୍॑ ସ୍ଵ॒ସ୍ତି ।

ଯ॒ଜ୍ଞ-ନ୍ନଃ॑ ପାନ୍ତୁ॒ ଵସ॑ଵଃ ପୁ॒ରସ୍ତା᳚ତ୍ । ଦ॒କ୍ଷି॒ଣ॒ତୋ॑-ଽଭିଯ॑ନ୍ତୁ॒ ଶ୍ରଵି॑ଷ୍ଠାଃ ।

ପୁଣ୍ଯ॒ନ୍ନକ୍ଷ॑ତ୍ରମ॒ଭି ସଂ​ଵିଁ॑ଶାମ । ମା ନୋ॒ ଅରା॑ତି-ର॒ଘଶ॒ଗ୍ଂ॒ ସାଗନ୍ନ୍॑ ॥ 23

ନକ୍ଷତ୍ରଂ - ଶତଭିଷକ୍, ଦେଵତା - ଵରୁଣଃ

କ୍ଷ॒ତ୍ରସ୍ଯ॒ ରାଜା॒ ଵରୁ॑ଣୋ-ଽଧିରା॒ଜଃ । ନକ୍ଷ॑ତ୍ରାଣାଗ୍ଂ ଶ॒ତଭି॑ଷ॒ଗ୍ ଵସି॑ଷ୍ଠଃ ।

ତୌ ଦେ॒ଵେଭ୍ଯଃ॑ କୃଣୁତୋ ଦୀ॒ର୍ଘମାଯଃ॑ । ଶ॒ତଗ୍ଂ ସ॒ହସ୍ରା॑ ଭେଷ॒ଜାନି॑ ଧତ୍ତଃ ।

ଯ॒ଜ୍ଞନ୍ନୋ॒ ରାଜା॒ ଵରୁ॑ଣ॒ ଉପ॑ଯାତୁ । ତନ୍ନୋ॒ ଵିଶ୍ଵେ॑ ଅ॒ଭିସଂ​ଯଁ॑ନ୍ତୁ ଦେ॒ଵାଃ ।

ତନ୍ନୋ॒ ନକ୍ଷ॑ତ୍ରଗ୍ଂ ଶ॒ତଭି॑ଷଗ୍ ଜୁଷା॒ଣମ୍ । ଦୀ॒ର୍ଘମାଯୁଃ॒ ପ୍ରତି॑ର-ଦ୍ଭେଷ॒ଜାନି॑ ॥ 24

ନକ୍ଷତ୍ରଂ - ପୂର୍ଵପ୍ରୋଷ୍ଠପଦା, ଦେଵତା - ଅଜଯେକପାଦଃ

ଅ॒ଜ ଏକ॑ପା॒- ଦୁଦ॑ଗା-ତ୍ପୁ॒ରସ୍ତା᳚ତ୍ । ଵିଶ୍ଵା॑ ଭୂ॒ତାନି॑ ପ୍ରତି॒ ମୋଦ॑ମାନଃ ।

ତସ୍ଯ॑ ଦେ॒ଵାଃ ପ୍ର॑ସ॒ଵଂ-ଯଁ॑ନ୍ତି॒ ସର୍ଵେ᳚ । ପ୍ରୋ॒ଷ୍ଠ॒ପ॒ଦାସୋ॑ ଅ॒ମୃତ॑ସ୍ଯ ଗୋ॒ପାଃ ।

ଵି॒ଭ୍ରାଜ॑ମାନ-ସ୍ସମିଧା॒ନ ଉ॒ଗ୍ରଃ । ଆ-ଽନ୍ତରି॑କ୍ଷ-ମରୁହ॒ଦ-ଦ୍ଗ॒ନ୍ଦ୍ଯାମ୍ ।

ତଗ୍ଂ ସୂର୍ଯ॑-ନ୍ଦେ॒ଵ-ମ॒ଜମେକ॑ପାଦମ୍ । ପ୍ରୋ॒ଷ୍ଠ॒ପ॒ଦାସୋ॒ ଅନୁ॑ଯନ୍ତି॒ ସର୍ଵେ᳚ ॥ 25

ନକ୍ଷତ୍ରଂ - ଉତ୍ତରପ୍ରୋଷ୍ଠପଦା, ଦେଵତା - ଅହିର୍ବୁଦ୍ଧ୍ନିଯଃ

ଅହି॑-ର୍ବୁ॒ଦ୍ଧ୍ନିଯଃ॒ ପ୍ରଥ॑ମାନ ଏତି । ଶ୍ରେଷ୍ଠୋ॑ ଦେ॒ଵାନା॑ମୁ॒ତ ମାନୁ॑ଷାଣାମ୍ ।

ତ-ମ୍ବ୍ରା᳚ହ୍ମ॒ଣା-ସ୍ସୋ॑ମ॒ପା-ସ୍ସୋ॒ମ୍ଯାସଃ॑ । ପ୍ରୋ॒ଷ୍ଠ॒ପ॒ଦାସୋ॑ ଅ॒ଭିର॑କ୍ଷନ୍ତି॒ ସର୍ଵେ᳚ ।

ଚ॒ତ୍ଵାର॒ ଏକ॑ମ॒ଭି କର୍ମ॑ ଦେ॒ଵାଃ । ପ୍ରୋ॒ଷ୍ଠ॒ପ॒ଦାସ॒ ଇତି॒ ଯାନ୍, ଵଦ॑ନ୍ତି ।

ତେ ବୁ॒ଦ୍ଧନିଯ॑-ମ୍ପରି॒ଷଦ୍ଯଗ୍ଗ୍॑ ସ୍ତୁ॒ଵନ୍ତଃ॑ । ଅହିଗ୍ଂ॑ ରକ୍ଷନ୍ତି॒ ନମ॑ସୋପ॒ ସଦ୍ଯ॑ ॥ 26

ନକ୍ଷତ୍ରଂ - ରେଵତୀ, ଦେଵତା - ପୂଷା

ପୂ॒ଷା ରେ॒ଵତ୍ଯନ୍ଵେ॑ତି॒ ପନ୍ଥା᳚ମ୍ । ପୁ॒ଷ୍ଟି॒ପତୀ॑ ପଶୁ॒ପା ଵାଜ॑ବସ୍ତ୍ଯୌ ।

ଇ॒ମାନି॑ ହ॒ଵ୍ଯା ପ୍ରଯ॑ତା ଜୁଷା॒ଣା । ସୁ॒ଗୈର୍ନୋ॒ ଯାନୈ॒ରୁପ॑ଯାତାଂ-ଯଁ॒ଜ୍ଞମ୍ ।

କ୍ଷୁ॒ଦ୍ରା-ନ୍ପ॒ଶୂ-ନ୍ର॑କ୍ଷତୁ ରେ॒ଵତୀ॑ ନଃ । ଗାଵୋ॑ ନୋ॒ ଅଶ୍ଵା॒ଗ୍ଂ॒ ଅନ୍ଵେ॑ତୁ ପୂ॒ଷା ।

ଅନ୍ନ॒ଗ୍ଂ॒ ରକ୍ଷ॑ନ୍ତୌ ବହୁ॒ଧା ଵିରୂ॑ପମ୍ । ଵାଜଗ୍ଂ॑ ସନୁତାଂ॒-ଯଁଜ॑ମାନାଯ ଯ॒ଜ୍ଞମ୍ ॥ 27

ନକ୍ଷତ୍ରଂ - ଅଶ୍ଵିନୀ, ଦେଵତା - ଅଶ୍ଵିନୀ ଦେଵ

ତଦ॒ଶ୍ଵିନା॑-ଵଶ୍ଵ॒ଯୁଜୋ-ପ॑ଯାତାମ୍ । ଶୁଭ॒ଙ୍ଗମି॑ଷ୍ଠୌ ସୁ॒ଯମେ॑ଭି॒ରଶ୍ଵୈଃ᳚ ।

ସ୍ଵନ୍ନକ୍ଷ॑ତ୍ରଗ୍ଂ ହ॒ଵିଷା॒ ଯଜ॑ନ୍ତୌ । ମଦ୍ଧ୍ଵା॒-ସମ୍ପୃ॑କ୍ତୌ॒ ଯଜୁ॑ଷା॒ ସମ॑କ୍ତୌ ।

ଯୌ ଦେ॒ଵାନା᳚-ମ୍ଭି॒ଷଜୌ॑ ହଵ୍ଯଵା॒ହୌ । ଵିଶ୍ଵ॑ସ୍ଯ ଦୂ॒ତା-ଵ॒ମୃତ॑ସ୍ଯ ଗୋ॒ପୌ ।

ତୌ ନକ୍ଷ॑ତ୍ରଂ-ଜୁଜୁଷା॒ଣୋ-ପ॑ଯାତାମ୍ । ନମୋ॒-ଽଶ୍ଵିଭ୍ଯା᳚-ଙ୍କୃଣୁମୋ-ଽଶ୍ଵ॒ଗ୍ଯୁଭ୍ଯା᳚ମ୍ ॥ 28

ନକ୍ଷତ୍ରଂ - ଅପଭରଣୀ, ଦେଵତା - ଯମଃ

ଅପ॑ ପା॒ପ୍ମାନ॒-ମ୍ଭର॑ଣୀ-ର୍ଭରନ୍ତୁ । ତଦ୍ଯ॒ମୋ ରାଜା॒ ଭଗ॑ଵା॒ନ୍॒, ଵିଚ॑ଷ୍ଟାମ୍ ।

ଲୋ॒କସ୍ଯ॒ ରାଜା॑ ମହ॒ତୋ ମ॒ହାନ୍, ହି । ସୁ॒ଗନ୍ନଃ॒ ପନ୍ଥା॒ମଭ॑ଯ-ଙ୍କୃଣୋତୁ ।

ଯସ୍ମି॒-ନ୍ନକ୍ଷ॑ତ୍ରେ ଯ॒ମ ଏତି॒ ରାଜା᳚ । ଯସ୍ମି॑ନ୍ନେନ-ମ॒ଭ୍ଯଷି॑ଞ୍ଚନ୍ତ ଦେ॒ଵାଃ ।

ତଦ॑ସ୍ଯ ଚି॒ତ୍ରଗ୍ଂ ହ॒ଵିଷା॑ ଯଜାମ । ଅପ॑ ପା॒ପ୍ମାନ॒-ମ୍ଭର॑ଣୀ-ର୍ଭରନ୍ତୁ ॥ 29

ଅମାଵାସି

ନି॒ଵେଶ॑ନୀ ସ॒ଙ୍ଗମ॑ନୀ॒ ଵସୂ॑ନାଂ॒-ଵିଁଶ୍ଵା॑ ରୂ॒ପାଣି॒ ଵସୂ᳚ନ୍ଯା-ଵେ॒ଶଯ॑ନ୍ତୀ ।

ସ॒ହ॒ସ୍ର॒-ପୋ॒ଷଗ୍ଂ ସୁ॒ଭଗା॒ ରରା॑ଣା॒ ସା ନ॒ ଆଗ॒ନ୍ ଵର୍ଚ॑ସା ସଂ​ଵିଁଦା॒ନା ।

ଯତ୍ତେ॑ ଦେ॒ଵା ଅଦ॑ଧୁ-ର୍ଭାଗ॒ଧେଯ॒-ମମା॑ଵାସ୍ଯେ ସଂ॒​ଵଁସ॑ନ୍ତୋ ମହି॒ତ୍ଵା ।

ସା ନୋ॑ ଯ॒ଜ୍ଞ-ମ୍ପି॑ପୃହି ଵିଶ୍ଵଵାରେ ର॒ଯିନ୍ନୋ॑ ଧେହି ସୁଭଗେ ସୁ॒ଵୀର᳚ମ୍ ॥ 30

ଓଁ ଶାନ୍ତି॒-ଶ୍ଶାନ୍ତି॒-ଶ୍ଶାନ୍ତିଃ॑ ॥

31-40: Optional for Additional Chanting

ଚନ୍ଦ୍ରମା

ନଵୋ॑ ନଵୋ ଭଵତି॒ ଜାଯ॑ମା॒ନୋ-ଽହ୍ନା᳚-ଙ୍କେ॒ତୁ-ରୁ॒ଷସା॑ ମେ॒ତ୍ଯଗ୍ରେ᳚ ।

ଭା॒ଗ-ନ୍ଦେ॒ଵେଭ୍ଯୋ॒ ଵିଦ॑ଧାତ୍ଯା॒ଯ-ନ୍ପ୍ରଚ॒ନ୍ଦ୍ରମା᳚ସ୍ତିରିତି ଦୀ॒ର୍ଘମାଯୁଃ॑ ॥

ଯମା॑ଦି॒ତ୍ଯା ଅ॒ଗ୍ଂ॒ଶୁମା᳚ପ୍ଯା॒ଯଯ॑ନ୍ତି॒ ଯମକ୍ଷି॑ତ॒-ମକ୍ଷି॑ତଯଃ॒ ପିବ॑ନ୍ତି ।

ତେନ॑ ନୋ॒ ରାଜା॒ ଵରୁ॑ଣୋ॒ ବୃହ॒ସ୍ପତି॒ ରାପ୍ଯା॑ଯଯନ୍ତୁ॒ ଭୁଵ॑ନସ୍ଯ ଗୋ॒ପାଃ ॥ 31

ଅହୋ ରାତ୍ର

ଯେ ଵିରୂ॑ପେ॒ ସମ॑ନସା ସଂ​ଵ୍ଯଁଯ॑ନ୍ତୀ । ସ॒ମା॒ନ-ନ୍ତନ୍ତୁ॑-ମ୍ପରିତା-ତ॒ନାତେ᳚ ।

ଵି॒ଭୂ ପ୍ର॒ଭୂ ଅ॑ନୁ॒ଭୂ ଵି॒ଶ୍ଵତୋ॑ ହୁଵେ । ତେ ନୋ॒ ନକ୍ଷ॑ତ୍ରେ॒ ହଵ॒ମାଗ॑-ମେତମ୍ ।

ଵ॒ଯ-ନ୍ଦେ॒ଵୀ ବ୍ରହ୍ମ॑ଣା ସଂ​ଵିଁଦା॒ନାଃ । ସୁ॒ରତ୍ନା॑ସୋ ଦେ॒ଵଵୀ॑ତି॒-ନ୍ଦଧା॑ନାଃ ।

ଅ॒ହୋ॒ରା॒ତ୍ରେ ହ॒ଵିଷା॑ ଵ॒ର୍ଧଯ॑ନ୍ତଃ । ଅତି॑ ପା॒ପ୍ମାନ॒-ମତି॑ମୁକ୍ତ୍ଯା ଗମେମ ॥ 32

ଉଷା

ପ୍ରତ୍ଯୁ॑ଵ ଦୃଶ୍ଯାଯ॒ତୀ । ଵ୍ଯୁ॒ଚ୍ଛନ୍ତୀ॑ ଦୁହି॒ତା ଦି॒ଵଃ ।

ଅ॒ପୋ ମ॒ହୀ ଵୃ॑ଣୁତେ॒ ଚକ୍ଷୁ॑ଷା । ତମୋ॒ ଜ୍ଯୋତି॑ଷ୍​କୃଣୋତି ସୂ॒ନରୀ᳚ ।

ଉଦୁ॒ ସ୍ତ୍ରିଯା᳚ସ୍ସଚତେ॒ ସୂର୍ଯଃ॑ । ସ ଚା॑ ଉ॒ଦ୍ଯନ୍ନକ୍ଷ॑ତ୍ର ମର୍ଚି॒ମତ୍ ।

ତ ଵେଦୁ॑ଷୋ॒ ଵ୍ଯୁଷି॒ ସୂର୍ଯ॑ସ୍ଯ ଚ । ସମ୍ଭ॒କ୍ତେନ॑ ଗମେମହି ॥ 33

ନକ୍ଷତ୍ରଃ

ତନ୍ନୋ॒ ନକ୍ଷ॑ତ୍ର ମର୍ଚି॒ମତ୍ । ଭା॒ନୁ॒ମତ୍ତେଜ॑ ଉ॒ଚ୍ଛର॑ତ୍ ।

ଉପ॑ଯ॒ଜ୍ଞ-ମି॒ହାଗ॑ମତ୍ । ପ୍ରନକ୍ଷ॑ତ୍ରାଯ ଦେ॒ଵାଯ॑ । ଇନ୍ଦ୍ରା॒ଯେନ୍ଦୁଗ୍ଂ॑ ହଵାମହେ ।

ସ ନ॑ ସ୍ସଵି॒ତା ସୁ॑ଵଥ୍ସ॒ନିମ୍ । ପୁ॒ଷ୍ଟି॒ଦାଂ-ଵୀଁ॒ରଵ॑ତ୍ତମମ୍ ॥ 34

ସୂର୍ଯଃ

ଉଦୁ॒ତ୍ଯ-ଞ୍ଜା॒ତଵେ॑ଦସ-ନ୍ଦେ॒ଵଂ-ଵଁ॑ହନ୍ତି କେ॒ତଵଃ॑ । ଦୃ॒ଶେ ଵିଶ୍ଵା॑ଯ॒ ସୂର୍ଯ᳚ମ୍ ।

ଚି॒ତ୍ର-ନ୍ଦେ॒ଵାନା॒ ମୁଦ॑ଗା॒ଦନୀ॑କ॒-ଞ୍ଚକ୍ଷୁ॑-ର୍ମି॒ତ୍ରସ୍ଯ॒ ଵରୁ॑ଣସ୍ଯା॒ଗ୍ନେଃ ।

ଆ-ଽପ୍ରା॒ ଦ୍ଯାଵା॑ପୃଥି॒ଵୀ ଅ॒ନ୍ତରି॑କ୍ଷ॒ଗ୍ଂ॒ ସୂର୍ଯ॑ ଆ॒ତ୍ମା ଜଗ॑ତସ୍ତ॒ସ୍ଥୁଷ॑ଶ୍ଚ ॥ 35

ଅଦିତିଃ

ଅଦି॑ତିର୍ନ ଉରୁଷ୍ଯ॒-ତ୍ଵଦି॑ତି॒-ଶ୍ଶର୍ମ॑ ଯଚ୍ଛତୁ । ଅଦି॑ତିଃ ପା॒ତ୍ଵଗ୍ଂ ହ॑ସଃ।

ମ॒ହୀମୂ॒ଷୁ ମା॒ତରଗ୍ଂ॑ ସୁଵ୍ର॒ତାନା॑-ମୃ॒ତସ୍ଯ॒ ପତ୍ନୀ॒ ମଵ॑ସେ ହୁଵେମ ।

ତୁ॒ଵି॒କ୍ଷ॒ତ୍ରା-ମ॒ଜର॑ନ୍ତୀ ମୁରୂ॒ଚୀଗ୍ଂ ସୁ॒ଶର୍ମା॑ଣ॒-ମଦି॑ତିଗ୍ଂ ସୁ॒ପ୍ରଣୀ॑ତିମ୍ ॥ 36

ଵିଷ୍ଣୁଃ

ଇ॒ଦଂ-ଵିଁଷ୍ଣୁ॒-ର୍ଵିଚ॑କ୍ରମେ ତ୍ରେ॒ଧା ନିଦ॑ଧେ ପ॒ଦମ୍ । ସମୂ॑ଢମସ୍ଯ ପାଗ୍ଂ ସୁ॒ରେ ।

ପ୍ରତଦ୍ଵିଷ୍ଣୁ॑ ସ୍ତଵତେ ଵୀ॒ର୍ଯା॑ଯ । ମୃ॒ଗୋ ନ ଭୀ॒ମଃ କୁ॑ଚ॒ରୋ ଗି॑ରି॒ଷ୍ଠାଃ ।

ଯସ୍ଯୋ॒ରୁଷୁ॑ ତ୍ରି॒ଷୁ ଵି॒କ୍ରମ॑ଣେଷୁ । ଅଧି॑କ୍ଷି॒ଯନ୍ତି॒ ଭୁଵ॑ନାନି॒ ଵିଶ୍ଵା᳚ ॥ 37

ଅଗ୍ନିଃ

ଅ॒ଗ୍ନି-ର୍ମୂ॒ଦ୍​ର୍ଧା ଦି॒ଵଃ କ॒କୁତ୍ପତିଃ॑ ପୃଥି॒ଵ୍ଯା ଅ॒ଯମ୍ ।

ଅ॒ପାଗ୍ଂ ରେତାଗ୍ଂ॑ସି ଜିନ୍ଵତି ।

ଭୁଵୋ॑ ଯ॒ଜ୍ଞସ୍ଯ॒ ରଜ॑ସଶ୍ଚ ନେ॒ତା ଯତ୍ରା॑ ନି॒ଯୁଦ୍ଭି॒-ସ୍ସଚ॑ସେ ଶି॒ଵାଭିଃ॑ ।

ଦି॒ଵି ମୂ॒ଦ୍​ର୍ଧାନ॑-ନ୍ଦଧିଷେ ସୁଵ॒ର୍॒ଷା-ଞ୍ଜି॒ହ୍ଵାମ॑ଗ୍ନେ ଚକୃଷେ ହଵ୍ଯ॒ଵାହଂ᳚ ॥ 38

ଅନୁମତୀ

ଅନୁ॑ନୋ॒-ଽଦ୍ଯାନୁ॑ମତି-ର୍ଯ॒ଜ୍ଞ-ନ୍ଦେ॒ଵେଷୁ॑ ମନ୍ଯତାମ୍ ।

ଅ॒ଗ୍ନିଶ୍ଚ॑ ହଵ୍ଯ॒ଵାହ॑ନୋ॒ ଭଵ॑ତା-ନ୍ଦା॒ଶୁଷେ॒ ମଯଃ॑ ।

ଅନ୍ଵିଦ॑ନୁମତେ॒ ତ୍ଵ-ମ୍ମନ୍ଯା॑ସୈ॒ ଶଞ୍ଚ॑ ନଃ କୃଧି ।

କ୍ରତ୍ଵେ॒ ଦକ୍ଷା॑ଯ ନୋ ହିନୁ॒ ପ୍ରଣ॒ ଆଯୂଗ୍ଂ॑ଷି ତାରିଷଃ ॥ 39

ହଵ୍ଯଵାହଃ (ଅଗ୍ନିଃ)

ହ॒ଵ୍ଯ॒ଵାହ॑ମଭି-ମାତି॒ଷାହ᳚ମ୍ । ର॒କ୍ଷୋ॒ହଣ॒-ମ୍ପୃତ॑ନାସୁ ଜି॒ଷ୍ଣୁମ୍ ।

ଜ୍ଯୋତି॑ଷ୍ମନ୍ତ॒-ନ୍ଦୀଦ୍ଯ॑ତ॒-ମ୍ପୁର॑ନ୍ଧିମ୍ । ଅ॒ଗ୍ନିଗ୍ଗ୍​ ସ୍ଵି॑ଷ୍ଟ॒ କୃତ॒ମାହୁ॑ଵେମ ।

ସ୍ଵି॑ଷ୍ଟ ମଗ୍ନେ ଅ॒ଭିତ-ତ୍ପୃ॑ଣାହି । ଵିଶ୍ଵା॑ ଦେଵ॒ ପୃତ॑ନା ଅ॒ଭିଷ୍ଯ ।

ଉ॒ରୁନ୍ନଃ॒ ପନ୍ଥା᳚-ମ୍ପ୍ରଦି॒ଶନ୍ ଵିଭା॑ହି । ଜ୍ଯୋତି॑ଷ୍ମଦ୍ଧେହ୍ଯ॒ ଜର॑ନ୍ନ॒ ଆଯୁଃ॑ ॥ 40

ଓଁ ଶାନ୍ତି॒-ଶ୍ଶାନ୍ତି॒-ଶ୍ଶାନ୍ତିଃ॑ ॥