Mukunda Mala Stotram

mukundamAlA stotram

zloka 1

ghuSyate yasya nagare raGgayAtrA dine dine |

tamahaM zirasA vande rAjAnaM kulazekharam ||

zrIvallabheti varadeti dayApareti

bhaktapriyeti bhavaluNThanakovideti |

nAtheti nAgazayaneti jagannivAse-

-tyAlApanaM pratipadaM kuru me mukunda || 1 ||

jayatu jayatu devo devakInandano'yaM

jayatu jayatu kRSNo vRSNivaMzapradIpaH |

jayatu jayatu meghazyAmalaH komalAGgo

jayatu jayatu pRthvIbhAranAzo mukundaH || 2 ||

mukunda mUrdhnA praNipatya yAce

bhavantamekAntamiyantamartham |

avismRtistvaccaraNAravinde

bhave bhave me'stu bhavatprasAdAt || 3 ||

nAhaM vande tava caraNayordvandvamadvandvahetoH

kumbhIpAkaM gurumapi hare nArakaM nApanetum |

ramyArAmAmRdutanulatA nandane nApi rantuM

bhAve bhAve hRdayabhavane bhAvayeyaM bhavantam || 4 ||

nAsthA dharme na vasunicaye naiva kAmopabhoge

yadyadbhavyaM bhavatu bhagavan pUrvakarmAnurUpam |

etatprArthyaM mama bahumataM janmajanmAntare'pi

tvatpAdAmbhoruhayugagatA nizcalA bhaktirastu || 5 ||

divi vA bhuvi vA mamAstu vAso

narake vA narakAntaka prakAmam |

avadhIrita zAradAravindau

caraNau te maraNe'pi cintayAmi || 6 ||

kRSNa tvadIya padapaGkajapaJjarAnta-

-madyaiva me vizatu mAnasarAjahaMsaH |

prANaprayANasamaye kaphavAtapittaiH

kaNThAvarodhanavidhau smaraNaM kutaste || 7 ||

cintayAmi harimeva santataM

mandamanda hasitAnanAmbujaM

nandagopatanayaM parAtparaM

nAradAdimunibRndavanditam || 8 ||

karacaraNasaroje kAntimannetramIne

zramamuSi bhujavIcivyAkule'gAdhamArge |

harisarasi vigAhyApIya tejojalaughaM

bhavamaruparikhinnaH khedamadya tyajAmi || 9 ||

sarasijanayane sazaGkhacakre

murabhidi mA virama svacitta rantum |

sukhataramaparaM na jAtu jAne

haricaraNasmaraNAmRtena tulyam || 10 ||

mA bhIrmandamano vicintya bahudhA yAmIzciraM yAtanAH

nAmI naH prabhavanti pAparipavaH svAmI nanu zrIdharaH |

AlasyaM vyapanIya bhaktisulabhaM dhyAyasva nArAyaNaM

lokasya vyasanApanodanakaro dAsasya kiM na kSamaH || 11 ||

bhavajaladhigatAnAM dvandvavAtAhatAnAM

sutaduhitRkalatratrANabhArArditAnAm |

viSamaviSayatoye majjatAmaplavAnAM

bhavatu zaraNameko viSNupoto narANAm || 12 ||

bhavajaladhimagAdhaM dustaraM nistareyaM

kathamahamiti ceto mA sma gAH kAtaratvam |

sarasijadRzi deve tAvakI bhaktirekA

narakabhidi niSaNNA tArayiSyatyavazyam || 13 ||

tRSNAtoye madanapavanoddhUta mohormimAle

dArAvarte tanayasahajagrAhasaGghAkule ca |

saMsArAkhye mahati jaladhau majjatAM nastridhAman

pAdAmbhoje varada bhavato bhaktinAvaM prayaccha || 14 ||

mAdrAkSaM kSINapuNyAn kSaNamapi bhavato bhaktihInAnpadAbje

mAzrauSaM zrAvyabandhaM tava caritamapAsyAnyadAkhyAnajAtam |

mAsmArSaM mAdhava tvAmapi bhuvanapate cetasApahnuvAnA-

-nmAbhUvaM tvatsaparyAvyatikararahito janmajanmAntare'pi || 15 ||

jihve kIrtaya kezavaM muraripuM ceto bhaja zrIdharaM

pANidvandva samarcayAcyutakathAH zrotradvaya tvaM zRNu |

kRSNaM lokaya locanadvaya harergacchAGghriyugmAlayaM

jighra ghrANa mukundapAdatulasIM mUrdhannamAdhokSajam || 16 ||

he lokAH zRNuta prasUtimaraNavyAdhezcikitsAmimAM

yogajJAH samudAharanti munayo yAM yAjJavalkyAdayaH |

antarjyotirameyamekamamRtaM kRSNAkhyamApIyatAM

tatpItaM paramauSadhaM vitanute nirvANamAtyantikam || 17 |

he martyAH paramaM hitaM zRNuta vo vakSyAmi saGkSepataH

saMsArArNavamApadUrmibahulaM samyakpravizya sthitAH |

nAnAjJAnamapAsya cetasi namo nArAyaNAyetyamuM

mantraM sapraNavaM praNAmasahitaM prAvartayadhvaM muhuH || 18 ||

pRthvIreNuraNuH payAMsi kaNikAH phalguH sphuliGgo'laghu-

-stejo niHzvasanaM maruttanutaraM randhraM susUkSmaM nabhaH |

kSudrA rudrapitAmahaprabhRtayaH kITAH samastAH surAH

dRSTe yatra sa tAvako vijayate bhUmAvadhUtAvadhiH || 19 ||

baddhenAJjalinA natena zirasA gAtraiH saromodgamaiH

kaNThena svaragadgadena nayanenodgIrNabASpAmbunA |

nityaM tvaccaraNAravindayugala dhyAnAmRtAsvAdinA-

-masmAkaM sarasIruhAkSa satataM sampadyatAM jIvitam || 20 ||

he gopAlaka he kRpAjalanidhe he sindhukanyApate

he kaMsAntaka he gajendrakaruNApArINa he mAdhava |

he rAmAnuja he jagattrayaguro he puNDarIkAkSa mAM

he gopIjananAtha pAlaya paraM jAnAmi na tvAM vinA || 21 ||

bhaktApAyabhujaGgagAruDamaNistrailokyarakSAmaNiH

gopIlocanacAtakAmbudamaNiH saundaryamudrAmaNiH |

yaH kAntAmaNi rukmiNI ghanakucadvandvaikabhUSAmaNiH

zreyo devazikhAmaNirdizatu no gopAlacUDAmaNiH || 22 ||

zatrucchedaikamantraM sakalamupaniSadvAkyasampUjyamantraM

saMsArottAramantraM samupacitatamaH saGghaniryANamantram |

sarvaizvaryaikamantraM vyasanabhujagasandaSTasantrANamantraM

jihve zrIkRSNamantraM japa japa satataM janmasAphalyamantram || 23 ||

vyAmoha prazamauSadhaM munimanovRtti pravRttyauSadhaM

daityendrArtikarauSadhaM tribhuvanI saJjIvanaikauSadham |

bhaktAtyantahitauSadhaM bhavabhayapradhvaMsanaikauSadhaM

zreyaHprAptikarauSadhaM piba manaH zrIkRSNadivyauSadham || 24 ||

AmnAyAbhyasanAnyaraNyaruditaM vedavratAnyanvahaM

medazchedaphalAni pUrtavidhayaH sarve hutaM bhasmani |

tIrthAnAmavagAhanAni ca gajasnAnaM vinA yatpada-

-dvandvAmbhoruhasaMsmRtirvijayate devaH sa nArAyaNaH || 25 ||

zrImannAma procya nArAyaNAkhyaM

ke na prApurvAJchitaM pApino'pi |

hA naH pUrvaM vAkpravRttA na tasmin

tena prAptaM garbhavAsAdiduHkham || 26 ||

majjanmanaH phalamidaM madhukaiTabhAre

matprArthanIya madanugraha eSa eva |

tvadbhRtyabhRtya paricAraka bhRtyabhRtya

bhRtyasya bhRtya iti mAM smara lokanAtha || 27 ||

nAthe naH puruSottame trijagatAmekAdhipe cetasA

sevye svasya padasya dAtari sure nArAyaNe tiSThati |

yaM kaJcitpuruSAdhamaM katipayagrAmezamalpArthadaM

sevAyai mRgayAmahe naramaho mUkA varAkA vayam || 28 ||

madana parihara sthitiM madIye

manasi mukundapadAravindadhAmni |

haranayanakRzAnunA kRzo'si

smarasi na cakraparAkramaM murAreH || 29 ||

tattvaM bruvANAni paraM parasmA-

-nmadhu kSarantIva satAM phalAni |

prAvartaya prAJjalirasmi jihve

nAmAni nArAyaNa gocarANi || 30 ||

idaM zarIraM pariNAmapezalaM

patatyavazyaM zlathasandhijarjaram |

kimauSadhaiH klizyasi mUDha durmate

nirAmayaM kRSNarasAyanaM piba || 31 ||

dArA vArAkaravarasutA te tanUjo viriJciH

stotA vedastava suragaNo bhRtyavargaH prasAdaH |

muktirmAyA jagadavikalaM tAvakI devakI te

mAtA mitraM balaripusutastvayyato'nyanna jAne || 32 ||

kRSNo rakSatu no jagattrayaguruH kRSNaM namasyAmyahaM

kRSNenAmarazatravo vinihatAH kRSNAya tasmai namaH |

kRSNAdeva samutthitaM jagadidaM kRSNasya dAso'smyahaM

kRSNe tiSThati sarvametadakhilaM he kRSNa rakSasva mAm || 33 ||

tattvaM prasIda bhagavan kuru mayyanAthe

viSNo kRpAM paramakAruNikaH kila tvam |

saMsArasAgaranimagnamanantadIna-

-muddhartumarhasi hare puruSottamo'si || 34 ||

namAmi nArAyaNapAdapaGkajaM

karomi nArAyaNapUjanaM sadA |

vadAmi nArAyaNanAma nirmalaM

smarAmi nArAyaNatattvamavyayam || 35 ||

zrInAtha nArAyaNa vAsudeva

zrIkRSNa bhaktapriya cakrapANe |

zrIpadmanAbhAcyuta kaiTabhAre

zrIrAma padmAkSa hare murAre || 36 ||

ananta vaikuNTha mukunda kRSNa

govinda dAmodara mAdhaveti |

vaktuM samartho'pi na vakti kazci-

-daho janAnAM vyasanAbhimukhyam || 37 ||

dhyAyanti ye viSNumanantamavyayaM

hRtpadmamadhye satataM vyavasthitam |

samAhitAnAM satatAbhayapradaM

te yAnti siddhiM paramAM ca vaiSNavIm || 38 ||

kSIrasAgarataraGgazIkarA-

-''sAratArakitacArumUrtaye |

bhogibhogazayanIyazAyine

mAdhavAya madhuvidviSe namaH || 39 ||

yasya priyau zrutidharau kavilokavIrau

mitre dvijanmavarapadmazarAvabhUtAm |

tenAmbujAkSacaraNAmbujaSaTpadena

rAjJA kRtA kRtiriyaM kulazekhareNa || 40 ||

iti kulazekhara praNItaM mukundamAlA |