Mukunda Mala Stotram

মুকুন্দমালা স্তোত্রম্

শ্লোক 1

ঘুষ্যতে যস্য নগরে রঙ্গযাত্রা দিনে দিনে ।

তমহং শিরসা বন্দে রাজানং কুলশেখরম্ ॥

শ্রীবল্লভেতি বরদেতি দযাপরেতি

ভক্তপ্রিযেতি ভবলুণ্ঠনকোবিদেতি ।

নাথেতি নাগশযনেতি জগন্নিবাসে-

-ত্যালাপনং প্রতিপদং কুরু মে মুকুন্দ

শ্লোক 2

জযতু জযতু দেবো দেবকীনন্দনোঽযং

জযতু জযতু কৃষ্ণো বৃষ্ণিবংশপ্রদীপঃ ।

জযতু জযতু মেঘশ্যামলঃ কোমলাঙ্গো

জযতু জযতু পৃথ্বীভারনাশো মুকুন্দঃ

॥ 1 ॥

শ্লোক 3

মুকুন্দ মূর্ধ্না প্রণিপত্য যাচে

ভবন্তমেকান্তমিযন্তমর্থম্ ।

অবিস্মৃতিস্ত্বচ্চরণারবিন্দে

ভবে ভবে মেঽস্তু ভবত্প্রসাদাত্

॥ 2 ॥

শ্লোক 4

নাহং বন্দে তব চরণযোর্দ্বন্দ্বমদ্বন্দ্বহেতোঃ

কুম্ভীপাকং গুরুমপি হরে নারকং নাপনেতুম্ ।

রম্যারামামৃদুতনুলতা নন্দনে নাপি রন্তুং

ভাবে ভাবে হৃদযভবনে ভাবযেযং ভবন্তম্

॥ 3 ॥

শ্লোক 5

নাস্থা ধর্মে ন বসুনিচযে নৈব কামোপভোগে

যদ্যদ্ভব্যং ভবতু ভগবন্ পূর্বকর্মানুরূপম্ ।

এতত্প্রার্থ্যং মম বহুমতং জন্মজন্মান্তরেঽপি

ত্বত্পাদাম্ভোরুহযুগগতা নিশ্চলা ভক্তিরস্তু

॥ 4 ॥

শ্লোক 6

দিবি বা ভুবি বা মমাস্তু বাসো

নরকে বা নরকান্তক প্রকামম্ ।

অবধীরিত শারদারবিন্দৌ

চরণৌ তে মরণেঽপি চিন্তযামি

॥ 5 ॥

শ্লোক 7

কৃষ্ণ ত্বদীয পদপঙ্কজপঞ্জরান্ত-

-মদ্যৈব মে বিশতু মানসরাজহংসঃ ।

প্রাণপ্রযাণসমযে কফবাতপিত্তৈঃ

কণ্ঠাবরোধনবিধৌ স্মরণং কুতস্তে

॥ 6 ॥

শ্লোক 8

চিন্তযামি হরিমেব সন্ততং

মন্দমন্দ হসিতাননাম্বুজং

নন্দগোপতনযং পরাত্পরং

নারদাদিমুনিবৃন্দবন্দিতম্

॥ 7 ॥

শ্লোক 9

করচরণসরোজে কান্তিমন্নেত্রমীনে

শ্রমমুষি ভুজবীচিব্যাকুলেঽগাধমার্গে ।

হরিসরসি বিগাহ্যাপীয তেজোজলৌঘং

ভবমরুপরিখিন্নঃ খেদমদ্য ত্যজামি

॥ 8 ॥

শ্লোক 10

সরসিজনযনে সশঙ্খচক্রে

মুরভিদি মা বিরম স্বচিত্ত রন্তুম্ ।

সুখতরমপরং ন জাতু জানে

হরিচরণস্মরণামৃতেন তুল্যম্

॥ 9 ॥

শ্লোক 11

মা ভীর্মন্দমনো বিচিন্ত্য বহুধা যামীশ্চিরং যাতনাঃ

নামী নঃ প্রভবন্তি পাপরিপবঃ স্বামী ননু শ্রীধরঃ ।

আলস্যং ব্যপনীয ভক্তিসুলভং ধ্যাযস্ব নারাযণং

লোকস্য ব্যসনাপনোদনকরো দাসস্য কিং ন ক্ষমঃ

॥ 10 ॥

শ্লোক 12

ভবজলধিগতানাং দ্বন্দ্ববাতাহতানাং

সুতদুহিতৃকলত্রত্রাণভারার্দিতানাম্ ।

বিষমবিষযতোযে মজ্জতামপ্লবানাং

ভবতু শরণমেকো বিষ্ণুপোতো নরাণাম্

॥ 11 ॥

শ্লোক 13

ভবজলধিমগাধং দুস্তরং নিস্তরেযং

কথমহমিতি চেতো মা স্ম গাঃ কাতরত্বম্ ।

সরসিজদৃশি দেবে তাবকী ভক্তিরেকা

নরকভিদি নিষণ্ণা তারযিষ্যত্যবশ্যম্

॥ 12 ॥

শ্লোক 14

তৃষ্ণাতোযে মদনপবনোদ্ধূত মোহোর্মিমালে

দারাবর্তে তনযসহজগ্রাহসঙ্ঘাকুলে চ ।

সংসারাখ্যে মহতি জলধৌ মজ্জতাং নস্ত্রিধামন্

পাদাম্ভোজে বরদ ভবতো ভক্তিনাবং প্রযচ্ছ

॥ 13 ॥

শ্লোক 15

মাদ্রাক্ষং ক্ষীণপুণ্যান্ ক্ষণমপি ভবতো ভক্তিহীনান্পদাব্জে

মাশ্রৌষং শ্রাব্যবন্ধং তব চরিতমপাস্যান্যদাখ্যানজাতম্ ।

মাস্মার্ষং মাধব ত্বামপি ভুবনপতে চেতসাপহ্নুবানা-

-ন্মাভূবং ত্বত্সপর্যাব্যতিকররহিতো জন্মজন্মান্তরেঽপি

॥ 14 ॥

শ্লোক 16

জিহ্বে কীর্তয কেশবং মুররিপুং চেতো ভজ শ্রীধরং

পাণিদ্বন্দ্ব সমর্চযাচ্যুতকথাঃ শ্রোত্রদ্বয ত্বং শৃণু ।

কৃষ্ণং লোকয লোচনদ্বয হরের্গচ্ছাঙ্ঘ্রিযুগ্মালযং

জিঘ্র ঘ্রাণ মুকুন্দপাদতুলসীং মূর্ধন্নমাধোক্ষজম্

॥ 15 ॥

শ্লোক 17

হে লোকাঃ শৃণুত প্রসূতিমরণব্যাধেশ্চিকিত্সামিমাং

যোগজ্ঞাঃ সমুদাহরন্তি মুনযো যাং যাজ্ঞবল্ক্যাদযঃ ।

অন্তর্জ্যোতিরমেযমেকমমৃতং কৃষ্ণাখ্যমাপীযতাং

তত্পীতং পরমৌষধং বিতনুতে নির্বাণমাত্যন্তিকম্ ॥ 17 ।

হে মর্ত্যাঃ পরমং হিতং শৃণুত বো বক্ষ্যামি সঙ্ক্ষেপতঃ

সংসারার্ণবমাপদূর্মিবহুলং সম্যক্প্রবিশ্য স্থিতাঃ ।

নানাজ্ঞানমপাস্য চেতসি নমো নারাযণাযেত্যমুং

মন্ত্রং সপ্রণবং প্রণামসহিতং প্রাবর্তযধ্বং মুহুঃ

॥ 16 ॥

শ্লোক 18

পৃথ্বীরেণুরণুঃ পযাংসি কণিকাঃ ফল্গুঃ স্ফুলিঙ্গোঽলঘু-

-স্তেজো নিঃশ্বসনং মরুত্তনুতরং রন্ধ্রং সুসূক্ষ্মং নভঃ ।

ক্ষুদ্রা রুদ্রপিতামহপ্রভৃতযঃ কীটাঃ সমস্তাঃ সুরাঃ

দৃষ্টে যত্র স তাবকো বিজযতে ভূমাবধূতাবধিঃ

॥ 18 ॥

শ্লোক 19

বদ্ধেনাঞ্জলিনা নতেন শিরসা গাত্রৈঃ সরোমোদ্গমৈঃ

কণ্ঠেন স্বরগদ্গদেন নযনেনোদ্গীর্ণবাষ্পাম্বুনা ।

নিত্যং ত্বচ্চরণারবিন্দযুগল ধ্যানামৃতাস্বাদিনা-

-মস্মাকং সরসীরুহাক্ষ সততং সম্পদ্যতাং জীবিতম্

॥ 19 ॥

শ্লোক 20

হে গোপালক হে কৃপাজলনিধে হে সিন্ধুকন্যাপতে

হে কংসান্তক হে গজেন্দ্রকরুণাপারীণ হে মাধব ।

হে রামানুজ হে জগত্ত্রযগুরো হে পুণ্ডরীকাক্ষ মাং

হে গোপীজননাথ পালয পরং জানামি ন ত্বাং বিনা

॥ 20 ॥

শ্লোক 21

ভক্তাপাযভুজঙ্গগারুডমণিস্ত্রৈলোক্যরক্ষামণিঃ

গোপীলোচনচাতকাম্বুদমণিঃ সৌন্দর্যমুদ্রামণিঃ ।

যঃ কান্তামণি রুক্মিণী ঘনকুচদ্বন্দ্বৈকভূষামণিঃ

শ্রেযো দেবশিখামণির্দিশতু নো গোপালচূডামণিঃ

॥ 21 ॥

শ্লোক 22

শত্রুচ্ছেদৈকমন্ত্রং সকলমুপনিষদ্বাক্যসম্পূজ্যমন্ত্রং

সংসারোত্তারমন্ত্রং সমুপচিততমঃ সঙ্ঘনির্যাণমন্ত্রম্ ।

সর্বৈশ্বর্যৈকমন্ত্রং ব্যসনভুজগসন্দষ্টসন্ত্রাণমন্ত্রং

জিহ্বে শ্রীকৃষ্ণমন্ত্রং জপ জপ সততং জন্মসাফল্যমন্ত্রম্

॥ 22 ॥

শ্লোক 23

ব্যামোহ প্রশমৌষধং মুনিমনোবৃত্তি প্রবৃত্ত্যৌষধং

দৈত্যেন্দ্রার্তিকরৌষধং ত্রিভুবনী সঞ্জীবনৈকৌষধম্ ।

ভক্তাত্যন্তহিতৌষধং ভবভযপ্রধ্বংসনৈকৌষধং

শ্রেযঃপ্রাপ্তিকরৌষধং পিব মনঃ শ্রীকৃষ্ণদিব্যৌষধম্

॥ 23 ॥

শ্লোক 24

আম্নাযাভ্যসনান্যরণ্যরুদিতং বেদব্রতান্যন্বহং

মেদশ্ছেদফলানি পূর্তবিধযঃ সর্বে হুতং ভস্মনি ।

তীর্থানামবগাহনানি চ গজস্নানং বিনা যত্পদ-

-দ্বন্দ্বাম্ভোরুহসংস্মৃতির্বিজযতে দেবঃ স নারাযণঃ

॥ 24 ॥

শ্লোক 25

শ্রীমন্নাম প্রোচ্য নারাযণাখ্যং

কে ন প্রাপুর্বাঞ্ছিতং পাপিনোঽপি ।

হা নঃ পূর্বং বাক্প্রবৃত্তা ন তস্মিন্

তেন প্রাপ্তং গর্ভবাসাদিদুঃখম্

॥ 25 ॥

শ্লোক 26

মজ্জন্মনঃ ফলমিদং মধুকৈটভারে

মত্প্রার্থনীয মদনুগ্রহ এষ এব ।

ত্বদ্ভৃত্যভৃত্য পরিচারক ভৃত্যভৃত্য

ভৃত্যস্য ভৃত্য ইতি মাং স্মর লোকনাথ

॥ 26 ॥

শ্লোক 27

নাথে নঃ পুরুষোত্তমে ত্রিজগতামেকাধিপে চেতসা

সেব্যে স্বস্য পদস্য দাতরি সুরে নারাযণে তিষ্ঠতি ।

যং কঞ্চিত্পুরুষাধমং কতিপযগ্রামেশমল্পার্থদং

সেবাযৈ মৃগযামহে নরমহো মূকা বরাকা বযম্

॥ 27 ॥

শ্লোক 28

মদন পরিহর স্থিতিং মদীযে

মনসি মুকুন্দপদারবিন্দধাম্নি ।

হরনযনকৃশানুনা কৃশোঽসি

স্মরসি ন চক্রপরাক্রমং মুরারেঃ

॥ 28 ॥

শ্লোক 29

তত্ত্বং ব্রুবাণানি পরং পরস্মা-

-ন্মধু ক্ষরন্তীব সতাং ফলানি ।

প্রাবর্তয প্রাঞ্জলিরস্মি জিহ্বে

নামানি নারাযণ গোচরাণি

॥ 29 ॥

শ্লোক 30

ইদং শরীরং পরিণামপেশলং

পতত্যবশ্যং শ্লথসন্ধিজর্জরম্ ।

কিমৌষধৈঃ ক্লিশ্যসি মূঢ দুর্মতে

নিরামযং কৃষ্ণরসাযনং পিব

॥ 30 ॥

শ্লোক 31

দারা বারাকরবরসুতা তে তনূজো বিরিঞ্চিঃ

স্তোতা বেদস্তব সুরগণো ভৃত্যবর্গঃ প্রসাদঃ ।

মুক্তির্মাযা জগদবিকলং তাবকী দেবকী তে

মাতা মিত্রং বলরিপুসুতস্ত্বয্যতোঽন্যন্ন জানে

॥ 31 ॥

শ্লোক 32

কৃষ্ণো রক্ষতু নো জগত্ত্রযগুরুঃ কৃষ্ণং নমস্যাম্যহং

কৃষ্ণেনামরশত্রবো বিনিহতাঃ কৃষ্ণায তস্মৈ নমঃ ।

কৃষ্ণাদেব সমুত্থিতং জগদিদং কৃষ্ণস্য দাসোঽস্ম্যহং

কৃষ্ণে তিষ্ঠতি সর্বমেতদখিলং হে কৃষ্ণ রক্ষস্ব মাম্

॥ 32 ॥

শ্লোক 33

তত্ত্বং প্রসীদ ভগবন্ কুরু ময্যনাথে

বিষ্ণো কৃপাং পরমকারুণিকঃ কিল ত্বম্ ।

সংসারসাগরনিমগ্নমনন্তদীন-

-মুদ্ধর্তুমর্হসি হরে পুরুষোত্তমোঽসি

॥ 33 ॥

শ্লোক 34

নমামি নারাযণপাদপঙ্কজং

করোমি নারাযণপূজনং সদা ।

বদামি নারাযণনাম নির্মলং

স্মরামি নারাযণতত্ত্বমব্যযম্

॥ 34 ॥

শ্লোক 35

শ্রীনাথ নারাযণ বাসুদেব

শ্রীকৃষ্ণ ভক্তপ্রিয চক্রপাণে ।

শ্রীপদ্মনাভাচ্যুত কৈটভারে

শ্রীরাম পদ্মাক্ষ হরে মুরারে

॥ 35 ॥

শ্লোক 36

অনন্ত বৈকুণ্ঠ মুকুন্দ কৃষ্ণ

গোবিন্দ দামোদর মাধবেতি ।

বক্তুং সমর্থোঽপি ন বক্তি কশ্চি-

-দহো জনানাং ব্যসনাভিমুখ্যম্

॥ 36 ॥

শ্লোক 37

ধ্যাযন্তি যে বিষ্ণুমনন্তমব্যযং

হৃত্পদ্মমধ্যে সততং ব্যবস্থিতম্ ।

সমাহিতানাং সততাভযপ্রদং

তে যান্তি সিদ্ধিং পরমাং চ বৈষ্ণবীম্

॥ 37 ॥

শ্লোক 38

ক্ষীরসাগরতরঙ্গশীকরা-

-ঽঽসারতারকিতচারুমূর্তযে ।

ভোগিভোগশযনীযশাযিনে

মাধবায মধুবিদ্বিষে নমঃ

॥ 38 ॥

শ্লোক 39

যস্য প্রিযৌ শ্রুতিধরৌ কবিলোকবীরৌ

মিত্রে দ্বিজন্মবরপদ্মশরাবভূতাম্ ।

তেনাম্বুজাক্ষচরণাম্বুজষট্পদেন

রাজ্ঞা কৃতা কৃতিরিযং কুলশেখরেণ

॥ 39 ॥

শ্লোক 40

ইতি কুলশেখর প্রণীতং মুকুন্দমালা ।