Mooka Pancha Sathi 3

mUka paJca zati 3 - stuti zatakam

pANDityaM paramezvari stutividhau naivAzrayante girAM

vairiJcAnyapi gumphanAni vigaladgarvANi zarvANi te |

stotuM tvAM pariphullanIlanalinazyAmAkSi kAmAkSi mAM

vAcAlIkurute tathApi nitarAM tvatpAdasevAdaraH ||1||

tApiJchastabakatviSe tanubhRtAM dAridryamudrAdviSe

saMsArAkhyatamomuSe purariporvAmAGkasImAjuSe |

kampAtIramupeyuSe kavayatAM jihvAkuTIM jagmuSe

vizvatrANapuSe namo'stu satataM tasmai paraJjyotiSe ||2||

ye sandhyAruNayanti zaGkarajaTAkAntAracanrArbhakaM

sindUranti ca ye purandaravadhUsImantasImAntare |

puNya.M ye paripakkayanti bhajatAM kAJcIpure mAmamI

pAyAsuH paramezvarapraNayinIpAdodbhavAH pAMsavaH ||3||

kAmADambarapUrayA zazirucA kamrasmitAnAM tviSA

kAmAreranurAgasindhumadhikaM kallolitaM tanvatI |

kAmAkSIti samastasajjananutA kalyANadAtrI nRNAM

kAruNyAkulamAnasA bhagavatI kampAtaTe jRmbhate ||4||

kAmAkSINaparAkramaprakaTanaM sambhAvayantI dRzA

zyAmA kSIrasahodarasmitaruciprakSAlitAzAntarA |

kAmAkSIjanamaulibhUSaNamaNirvAcAM parA devatA

kAmAkSIti vibhAti kApi karuNA kampAtaTinyAstaTe ||5||

zyAmA kAcana candrikA tribhuvane puNyAtmanAmAnane

sImAzUnyakavitvavarSajananI yA kApi kAdambinI |

mArArAtimanovimohanavidhau kAcitattamaHkandalI

kAmAkSyAH karuNAkaTAkSalaharI kAmAya me kalpatAm ||6||

prauDhadhvAntakadambake kumudinIpuNyAGkuraM darzayan

jyotsnAsaGgamane'pi kokamithunaM mizraM samudbhAvayan |

kAlindIlaharIdazAM prakaTayankamrAM nabhasyadbhutAM

kazcinnetramahotsavo vijayate kAJcIpure zUlinaH ||7||

tandrAhInatamAlanIlasuSamaistAruNyalIlAgRhaiH

tArAnAthakizoralAJchitakacaistAmrAravindekSaNaiH |

mAtaH saMzrayatAM mano manasijaprAgalbhyanADindhamaiH

kampAtIracarairghanastanabharaiH puNyAGkaraiH zAGkaraiH ||8||

nityaM nizcalatAmupetya marutAM rakSAvidhiM puSNatI

tejassaJcayapATavena kiraNAnuSNadyutermuSNatI |

kAJcImadhyagatApi dIptijananI vizvAntare jRmbhate

kAciccitramaho smRtApi tamasAM nirvApikA dIpikA ||9||

kAntaiH kezarucAM cayairbhramaritaM mandasmitaiH puSpitaM

kAntyA pallavitaM padAmburuhayornetratviSA patritam |

kampAtIravanAntaraM vidadhatI kalyANajanmasthalI

kAJcImadhyamahAmaNirvijayate kAcitkRpAkandalI ||10||

rAkAcandrasamAnakAntivadanA nAkAdhirAjastutA

mUkAnAmapi kurvatI suradhanInIkAzavAgvaibhavam |

zrIkAJcInagarIvihArarasikA zokApahantrI satAm

ekA puNyaparamparA pazupaterAkAriNI rAjate ||11||

jAtA zItalazailataH sukRtinAM dRzyA paraM dehinAM

lokAnAM kSaNamAtrasaMsmaraNataH santApavicchedinI |

AzcaryaM bahu khelanaM vitanute naizcalyamAbibhratI

kampAyAstaTasImni kApi taTinI kAruNyapAthomayI ||12||

aikyaM yena viracyate haratanau dambhAvapumbhAvuke

rekhA yatkacasImni zekharadazAM naizAkarI gAhate |

aunnatyaM muhureti yena sa mahAnmenAsakhaH sAnumAn

kampAtIravihAriNA sazaraNAstenaiva dhAmnA vayam ||13||

akSNozca stanayoH zriyA zravaNayorbAhvozca mUlaM spRzan

uttaMsena mukhena ca pratidinaM druhyanpayojanmane |

mAdhuryeNa girAM gatena mRdunA haMsAGganAM hrepayan

kAJcIsImni cakAsti ko'pi kavitAsantAnabIjAGkuraH ||14||

khaNDaM cAndramasaM vataMsamanizaM kAJcIpure khelanaM

kAlAyazchavitaskarIM tanuruciM karNajape locane |

tAruNyoSmanakhampacaM stanabharaM jaGghAspRzaM kuntalaM

bhAgyaM dezikasaJcitaM mama kadA sampAdayedambike ||15||

tanvAnaM nijakelisaudhasaraNiM naisargikINAM girAM

kedAraM kavimallasUktilaharIsasyazriyAM zAzvatam |

aMhovaJcanacuJcu kiJcana bhaje kAJcIpurImaNDanaM

paryAyacchavi pAkazAsanamaNeH pauSpeSavaM pauruSam ||16||

Aloke mukhapaGkaje ca dadhatI saudhAkarIM cAturIM

cUDAlaGkriyamANapaGkajavanIvairAgamaprakriyA |

mugdhasmeramukhI ghansatanataTImUrcchAlamadhyAJcitA

kAJcIsImani kAminI vijayate kAcijjaganmohinI ||17||

yasminnamba bhavatkaTAkSarajanI mande'pi mandasmita-

jyotsnAsaMsnapitA bhavatyabhimukhI taM pratyaho dehinam |

drakSAmAkSikamAdhurImadabharavrIDAkarI vaikharI

kAmAkSi svayamAtanotyabhisRtiM vAmekSaNeva kSaNam ||18||

kAlindIjalakAntayaH smitarucisvarvAhinIpAthasi

prauDhadhvAntarucaH sphuTAdharamaholauhityasandhyodaye |

maNikyopalakuNDalAMzuzikhini vyAmizradhUmazriyaH

kalyANaikabhuvaH kaTAkSasuSamAH kAmAkSi rAjanti te ||19||

kalakalaraNatkAJcI kAJcIvibhUSaNamAlikA

kacabharalasaccandrA candrAvataMsasadharmiNI |

kavikulagiraH zrAvaMzrAvaM milatpulakAGkurA

viracitaziraHkampA kampAtaTe parizobhate ||20||

sarasavacasAM vIcI nIcIbhavanmadhumAdhurI

bharitabhuvanA kIrtirmUrtirmanobhavajitvarI |

janani manaso yogyaM bhogyaM nRNAM tava jAyate

kathamiva vinA kAJcIbhUSe kaTAkSataraGgitam ||21||

bhramaritasaritkUlo nIlotpalaprabhayA''bhayA

natajanatamaHkhaNDI tuNDIrasImni vijRmbhate |

acalatapasAmekaH pAkaH prasUnazarAsana-

pratibhaTamanohArI nArIkulaikazikhAmaNiH ||22||

madhuravacaso mandasmerA mataGgajagAminaH

taruNimajuSastApicchAbhAstamaHparipanthinaH |

kucabharanatAH kuryurbhadraM kuraGgavilocanAH

kalitakaruNAH kAJcIbhAjaH kapAlimahotsavAH ||23||

kamalasuSamAkSyArohe vicakSaNavIkSaNAH

kumudasukRtakrIDAcUDAlakuntalabandhurAH |

rucirarucibhistApicchazrIprapaJcanacuJcavaH

puravijayinaH kampAtIre sphuranti manorathAH ||24||

kalitaratayaH kAJcIlIlAvidhau kavimaNDalI-

vacanalaharIvAsantInAM vasantavibhUtayaH |

kuzalavidhaye bhUyAsurme kuraGgavilocanAH

kusumavizikhArAterakSNAM kutUhalavibhramAH ||25||

kabalitatamaskANDAstuNDIramaNDalamaNDanAH

sarasijavanIsantAnAnAmaruntudazekharAH |

nayanasaraNernedIyaMsaH kadA nu bhavanti me

taruNajaladazyAmAH zambhostapaHphalavibhramAH ||26||

acaramamiSuM dInaM mInadhvajasya mukhazriyA

sarasijabhuvo yAnaM mlAnaM gatena ca maJjunA |

tridazasadasAmannaM khinnaM girA ca vitanvatI

tilakayati sA kampAtIraM trilocanasundarI ||27||

janani bhuvane caGkramye'haM kiyantamanehasaM

kupuruSakarabhraSTairduSTairdhanairudarambhariH |

taruNakaruNe tandrAzUnye taraGgaya locane

namati mayi te kiJcitkAJcIpurImaNidIpike ||28||

munijanamanaHpeTIratnaM sphuratkaruNAnaTI-

viharaNakalAgehaM kAJcIpurImaNibhUSaNam |

jagati mahato mohavyAdhernRNAM paramauSadhaM

puraharadRzAM sAphalyaM me puraH parijRmbhatAm ||29||

munijanamodhAmne dhAmne vacomayajAhnavI-

himagiritaTaprAgbhArAyAkSarAya parAtmane |

viharaNajuSe kAJcIdeze mahezvaralocana-

tritayasarasakrIDAsaudhAGgaNAya namo namaH ||30||

marakatarucAM pratyAdezaM mahezvaracakSuSAm

amRtalaharIpUraM pAraM bhavAkhyapayonidheH |

sucaritaphalaM kAJcIbhAjo janasya pacelimaM

himazikhariNo vaMzasyaikaM vataMsamupAsmahe ||31||

praNamanadinArambhe kampAnadIsakhi tAvake

sarasakavitonmeSaH pUSA satAM samudaJcitaH |

pratibhaTamahAprauDhaprodyatkavitvakumudvatIM

nayati tarasA nidrAmudrAM nagezvarakanyake ||32||

zamitajaDimArambhA kampAtaTInikaTecarI

nihataduritastomA somArdhamudritakuntalA |

phalitasumanovAJchA pAJcAyudhI paradevatA

saphalayatu me netre gotrezvarapriyanandinI ||33||

mama tu dhiSaNA pIDyA jADyAtireka kathaM tvayA

kumudasuSamAmaitrIpAtrIvataMsitakuntalAm |

jagati zamitastambhAM kampAnadInilayAmasau

zriyati hi galattandrA candrAvataMsasadharmiNIm ||34||

parimalaparIpAkodrekaM payomuci kAJcane

zikhariNi punardbaidhIbhAvaM zazinyaruNAtapam |

api ca janayankamborlakSmImanambuni ko'pyasau

kusumadhanuSaH kAJcIdeze cakAsti parAkramaH ||35||

puradamayiturvAmotsaGgasthalena rasajJayA

sarasakavitAbhAjA kAJcIpurodarasImayA |

taTaparisarairnIhArAdrervacobhirakRtrimaiH

kimiva na tulAmasmacceto mahezvari gAhate ||36||

nayanayugalImAsmAkInAM kadA nu phalegrahIM

vidadhati gatau vyAkurvANA gajendracamatkriyAm |

maratakaruco mAhezAnA ghanastananamritAH

sukRtavibhavAH prAJcaH kAJcIvataMsadhurandharAH ||37||

manasijayazaHpAramparyaM marandajharIsuvAM

kavikulagirAM kandaM kampAnadItaTamaNDanam |

madhuralalitaM matkaM cakSurmanISimanoharaM

puravijayinaH sarvasvaM tatpuraskurute kadA ||38||

zithilitatamolIlAM nIlAravindavilocanAM

dahanavilasatphAlAM zrIkAmakoTimupAsmahe |

karadhRtasacchUlAM kAlAricittaharAM parAM

manasijakRpAlIlAM lolAlakAmalikekSaNAm ||39||

kalAlIlAzAlA kavikulavacaHkairavavanI-

zarajjyotsnAdhArA zazadharazizuzlAghyamukuTI |

punIte naH kampApulinataTasauhArdataralA

kadA cakSurmArgaM kanakagiridhAnuSkamahiSI ||40||

namaH stAnnamrebhyaH stanagarimagarveNa guruNA

dadhAnebhyazcUDAbharaNamamRtasyandi ziziram |

sadA vAstavebhyaH suvidhabhuvi kampAkhyasarite

yazovyApArebhyaH sukRtavibhavebhyo ratipateH ||41||

asUyantI kAcinmarakataruco nAkimukuTI-

kadambaM cumbantI caraNanakhacandrAMzupaTalaiH |

tamomudrAM vidrAvayatu mama kAJcIrnilayanA

harotsaGgazrImanmaNigRhamahAdIpakalikA ||42||

anAdyantA kAcitsujananayanAnandajananI

nirundhAnA kAntiM nijarucivilAsairjalamucAm |

smarArestAralyaM manasi janayantI svayamaho

galatkampA zampA parilasati kampAparisare ||43||

sudhADiNDIrazrIH smitaruciSu tuNDIraviSayaM

pariSkurvANAsau parihasitanIlotpalaruciH |

stanAbhyAmAnamrA stabakayatu me kAGkSitataruM

dRzAmaizAnInAM sukRtaphalapANDityagarimA ||44||

kRpAdhArAdroNI kRpaNadhiSaNAnAM praNamatAM

nihantrI santApaM nigamamukuTottaMsakalikA |

parA kAJcIlIlAparicayavatI parvatasutA

girAM nIvI devI girizaparatantrA vijayate ||45||

kavitvazrIkandaH sukRtaparipATI himagireH

vidhAtrI vizveSAM viSamazaravIradhvajapaTI |

sakhI kampAnadyAH padahasitapAthojayugalI

purANo pAyAnnaH puramathanasAmrAjyapadavI ||46||

daridrANA madhye daradalitatApicchasuSamAH

stanAbhogakkAntAstaruNahariNAGkAGkitakacAH |

harAdhInA nAnAvibudhamukuTIcumbitapadAH

kadA kampAtIre kathaya viharAmo girisute ||47||

varIvartu sthemA tvayi mama girAM devi manaso

narInartu prauDhA vadanakamale vAkyalaharI |

carIcartu prajJAjanani jaDimAnaH parajane

sarIsartu svairaM janani mayi kAmAkSi karuNA ||48||

kSaNAtte kAmAkSi bhramarasuSamAzikSaNaguruH

kaTAkSavyAkSepo mama bhavatu mokSAya vipadAm |

narInartu svairaM vacanalaharI nirjarapurI-

saridvIcInIcIkaraNapaTurAsye mama sadA ||49||

purastAnme bhUyaHprazamanaparaH stAnmama rujAM

pracAraste kampAtaTavihRtisampAdini dRzoH |

imAM yAcJAmUrIkuru sapadi dUrIkuru tamaH-

parIpAkaM matkaM sapadi budhalokaM ca naya mAm ||50||

udaJcantI kAJcInagaranilaye tvatkaruNayA

samRddhA vAgdhATI parihasitamAdhvI kavayatAm |

upAdatte mArapratibhaTajaTAjUTamukuTI-

kuTIrollAsinyAH zatamakhataTinyA jayapaTIm ||51||

zriyaM vidyAM dadyAjjanani namatAM kIrtimamitAM

suputrAn prAdatte tava jhaTiti kAmAkSi karuNA |

trilokyAmAdhikyaM tripuraparipanthipraNayini

praNAmastvatpAde zamitadurite kiM na kurute ||52||

manaHstambhaM stambhaM gamayadupakampaM praNamatAM

sadA lolaM nIlaM cikurajitalolambanikaram |

girAM dUraM smeraM dhRtazazikizoraM pazupateH

dRzAM yogyaM bhogyaM tuhinagiribhAgyaM vijayate ||53||

ghanazyAmAnkAmAntakamahiSi kAmAkSi madhurAn

dRzAM pAtAnetAnamRtajalazItAnanupamAn |

bhavotpAte bhIte mayi vitara nAthe dRDhabhava-

nmanazzoke mUke himagiripatAke karuNayA ||54||

natAnAM mandAnAM bhavanigalabandhAkuladhiyAM

mahAndhyAM rundhAnAmabhilaSitasantAnalatikAm |

carantIM kampAyAstaTabhuvi savitrIM trijagatAM

smarAmastAM nityaM smaramathanajIvAtukalikAm ||55||

parA vidyA hRdyAzritamadanavidyA marakata-

prabhAnIlA lIlAparavazitazUlAyudhamanAH |

tamaHpUraM dUraM caraNanatapaurandarapurI-

mRgAkSI kAmAkSI kamalataralAkSI nayatu me ||56||

ahantAkhyA matkaM kabalayati hA hanta hariNI

haThAtsaMvidrUpaM haramahiSi sasyAGkuramasau |

kaTAkSavyAkSepaprakaTaharipASANapaTalaiH

imAmuccairuccATaya jhaTiti kAmAkSi kRpayA ||57||

budhe vA mUke vA tava patati yasminkSaNamasau

kaTAkSaH kAmAkSi prakaTajaDimakSodapaTimA |

kathaGkAraM nAsmai karamukulacUDAlamukuTA

namovAkaM brUyurnamuciparipanthiprabhRtayaH ||58||

pratIcIM pazyAmaH prakaTarucinIvArakamaNi-

prabhAsadhrIcInAM pradalitaSaDAdhArakamalAm |

carantIM sauSumne pathi parapadendupravigala-

tsudhArdrAM kAmAkSIM pariNataparaJjyotirudayAm ||59||

jambhArAtiprabhRtimukuTIH pAdayoH pIThayantI

gumphAnvAcAM kavijanakRtAnsvairamArAmayantI |

zampAlakSmIM maNigaNarucApATalaiH prApayantI

kampAtIre kavipariSadAM jRmbhate bhAgyasImA ||60||

candrApIDAM caturavadanAM caJcalApAGgalIlAM

kundasmerAM kucabharanatAM kuntaloddhUtabhRGgAm |

mArArAtermadanazikhinaM mAMsalaM dIpayantIM

kAmAkSIM tAM kavikulagirAM kalpavallImupAse ||61||

kAlAmbhodaprakarasuSamAM kAntibhistirjayantI

kalyANAnAmudayasaraNiH kalpavallI kavInAm |

kandarpAreH priyasahacarI kalmaSANAM nihantrI

kAJcIdezaM tilakayati sA kApi kAruNyasImA ||62||

UrIkurvannurasijataTe cAturIM bhUdharANAM

pAthojAnAM nayanayugale paripanthyaM vitanvan |

kampAtIre viharati rucA moghayanmeghazailIM

kokadveSaM zirasi kalayanko'pi vidyAvizeSaH ||63||

kAJcIlIlAparicayavatI kApi tApicchalakSmIH

jADyAraNye hutavahazikhA janmabhUmiH kRpAyAH |

mAkandazrIrmadhurakavitAcAturI kokilAnAM

mArge bhUyAnmama nayanayormAnmathI kApi vidyA ||64||

seturmAtarmaratakamayo bhaktibhAjAM bhavAbdhau

lIlAlolA kuvalayamayI mAnmathI vaijayantI |

kAJcIbhUSA pazupatidRzAM kApi kAlAJjanAlI

matkaM duHkhaM zithilayatu te maJjulApAGgamAlA ||65||

vyAvRNvAnAH kuvalayadalaprakriyAvairamudrAM

vyAkurvANA manasijamahArAjasAmrAjyalakSmIm |

kAJcIlIlAvihRtirasike kAGkSitaM naH kriyAsuH

bandhacchede tava niyaminAM baddhadIkSAH kaTAkSAH ||66||

kAlAmbhode zaziruci dalaM kaitakaM darzayantI

madhyesaudAmini madhulihAM mAlikAM rAjayantI |

haMsArAvaM vikacakamale maJjumullAsayantI

kampAtIre vilasati navA kApi kAruNyalakSmIH ||67||

citraM citraM nijamRdutayA bhartsayanpallavAlIM

puMsAM kAmAnbhuvi ca niyataM pUrayanpuNyabhAjAm |

jAtaH zailAnna tu jalanidheH svairasaJcArazIlaH

kAJcIbhUSA kalayatu zivaM ko'pi cintAmaNirme ||68||

tAmrAmbhojaM jaladanikaTe tatra bandhUkapuSpaM

tasminmallIkusumasuSamAM tatra vINAninAdam |

vyAvRnvAnA sukRtalaharI kApi kAJcinagaryAm

aizAnI sA kalayatitarAmaindrajAlaM vilAsam ||69||

AhArAMzaM tridazasadasAmAzraye cAtakAnAm

AkAzoparyapi ca kalayannAlayaM tuGgameSAm |

kampAtIre viharatitarAM kAmadhenuH kavInAM

mandasmero madananigamaprakriyAsampradAyaH ||70||

ArdrIbhUtairaviralakRpairAttalIlAvilAsaiH

AsthApUrNairadhikacapalairaJcitAmbhojazilpaiH |

kAntairlakSmIlalitabhavanaiH kAntikaivalyasAraiH

kAzmalyaM naH kabalayatu sA kAmakoTI kaTAkSaiH ||71||

AdhUnvantyai taralanayanairAGgajIM vaijayantIm

Anandinyai nijapadajuSAmAttakAJcIpurAyai |

AsmAkInaM hRdayamakhilairAgamAnAM prapaJcaiH

ArAdhyAyai spRhayatitarAmadimAyai jananyai ||72||

dUraM vAcAM tridazasadasAM duHkhasindhostaritraM

mohakSvelakSitiruhavane krUradhAraM kuThAram |

kampAtIrapraNayi kavibhirvarNitodyaccaritraM

zAntyai seve sakalavipadAM zAGkaraM tatkalatram ||73||

khaNDIkRtya prakRtikuTilaM kalmaSaM prAtibhazrI-

zuNDIratvaM nijapadajuSAM zUnyatandraM dizantI |

tuNDIrAkhyai mahati viSaye svarNavRSTipradAtrI

caNDI devI kalayati ratiM candracUDAlacUDe ||74||

yena khyAto bhavati sa gRhI pUruSo merudhanvA

yaddRkkoNe madananigamaprAbhavaM bobhavIti |

yatprItyaiva trijagadadhipo jRmbhate kimpacAnaH

kampAtIre sa jayati mahAnkazcidojovizeSaH ||75||

dhanyA dhanyA gatiriha girAM devi kAmAkSi yanme

nindyAM bhindyAtsapadi jaDatAM kalmaSAdunmiSantIm |

sAdhvI mAdhvIrasamadhuratAbhaJjinI maJjurItiH

vANIveNI jhaTiti vRNutAtsvardhunIspardhinI mAm ||76||

yasyA vATI hRdayakamalaM kausumI yogabhAjAM

yasyAH pIThI satatazizirA zIkarairmAkarandaiH |

yasyAH peTI zrutiparicalanmauliratnasya kAJcI

sA me somAbharaNamahiSI sAdhayetkAGkSitAni ||77||

ekA mAtA sakalajagatAmIyuSI dhyAnamudrAm

ekAmrAdhIzvaracaraNayorekatAnAM samindhe |

tATaGkodyanmaNigaNarucA tAmrakarNapradezA

tAruNyazrIstabakitatanustApasI kApi bAlA ||78||

dantAdantiprakaTanakarI dantibhirmandayAnaiH

mandArANAM madapariNatiM mathnatI mandahAsaiH |

aGkUrAbhyAM manasijataroraGkitorAH kucAbhyA-

mantaHkAJci sphurati jagatAmAdimA kApi mAtA ||79||

triyambakakuTumbinIM tripurasundarImindirAM

pulindapatisundarIM tripurabhairavIM bhAratIm |

mataGgakulanAyikAM mahiSamardanIM mAtRkAM

bhaNanti vibudhottamA vihRtimeva kAmAkSi te ||80||

mahAmunimanonaTI mahitaramyakampAtaTI-

kuTIrakavihAriNI kuTilabodhasaMhAriNI |

sadA bhavatu kAminI sakaladehinAM svAminI

kRpAtizayakiGkarI mama vibhUtaye zAGkarI ||81||

jaDAH prakRtinirdhanA janavilocanAruntudA

narA janani vIkSaNaM kSaNamavApya kAmAkSi te |

vacassu madhumAdhurIM prakaTayanti paurandarI-

vibhUtiSu viDambanAM vapuSi mAnmathIM prakriyAm ||82||

ghansatanataTasphuTasphuritakaJculIcaJcalI-

kRtatripurazAsanA sujanazIlitopAsanA |

dRzoH saraNimaznute mama kadA nu kAJcIpure

parA paramayoginAM manasi citkulA puSkalA ||83||

kavIndrahRdayecarI parigRhItakAJcIpurI

nirUDhakaruNAjharI nikhilalokarakSAkarI |

manaHpathadavIyasI madanazAsanapreyasI

mahAguNagarIyasI mama dRzo'stu nedIyasI ||84||

dhanena na ramAmahe khalajanAnna sevAmahe

na cApalamayAmahe bhavabhayAnna dUyAmahe |

sthirAM tanumahetarAM manasi kiM ca kAJcIrata-

smarAntakakuTumbinIcaraNapallavopAsanAm ||85||

surAH parijanA vapurmanasijAya vairAyate

triviSTapanitambinIkucataTI ca kelIgiriH |

giraH surabhayo vayastaruNimA daridrasya vA

kaTAkSasaraNau kSaNaM nipatitasya kAmAkSi te ||86||

pavitraya jagattrayIvibudhabodhajIvAtubhiH

puratrayavimardinaH pulakakaJculIdAyibhiH |

bhavakSayavicakSaNairvyasanamokSaNairvIkSaNaiH

nirakSaraziromaNiM karuNayaiva kAmAkSi mAm ||87||

kadA kalitakhelanAH karuNayaiva kAJcIpure

kalAyamukulatviSaH zubhakadambapUrNAGkurAH |

payodharabharAlasAH kavijaneSu te bandhurAH

pacelimakRpArasA paripatanti mArge dRzoH ||88||

azodhyamacalodbhavaM hRdayanandanaM dehinAm

anarghamadhikAJci tatkimapi ratnamuddyotate |

anena samalaGkRtA jayati zaGkarAGkasthalI

kadAsya mama mAnasaM vrajati peTikAvibhramam ||89||

parAmRtajharIplutA jayati nityamantazcarI

bhuvAmapi bahizcarI paramasaMvidekAtmikA |

mahadbhiraparokSitA satatameva kAJcIpure

mamAnvahamahammatirmanasi bhAtu mAhezvarI ||90||

tamovipinadhAvinaM satatameva kAJcIpure

vihArarasikA parA paramasaMvidurvIruhe |

kaTAkSanigalairdRDhaM hRdayaduSTadantAvalaM

ciraM nayatu mAmakaM tripuravairisImantinI ||91||

tvameva sati caNDikA tvamasi devi cAmuNDikA

tvameva paramAtRkA tvamapi yoginIrUpiNI |

tvameva kila zAmbhavI tvamasi kAmakoTI jayA

tvameva vijayA tvayi trijagadamba kiM brUmahe ||92||

pare janani pArvati praNatapAlini prAtibha-

pradAtri paramezvari trijagadAzrite zAzvate |

triyambakakuTumbini tripadasaGgini trIkSaNe

trizaktimayi vIkSaNaM mayi nidhehi kAmAkSi te ||93||

manomadhukarotsavaM vidadhatI manISAjuSAM

svayamprabhavavaikharIvipinavIthikAlambinI |

aho ziziritA kRpAmadhurasena kampAtaTe

carAcaravidhAyinI calati kApi cinmaJjarI ||94||

kalAvati kalAbhRto mukuTasImni lIlAvati

spRhAvati mahezvare bhuvanamohane bhAsvati |

prabhAvati rame sadA mahitarUpazobhAvati

tvarAvati pare satAM gurukRpAmbudhArAvati ||95||

tvayaiva jagadambayA bhuvanamaNDalaM sUyate

tvayaiva karuNArdrayA tadapi rakSaNaM nIyate |

tvayaiva kharakopayA nayanapAvake hUyate

tvayaiva kila nityayA jagati santataM sthIyate ||96||

carAcarajaganmayIM sakalahRnmayIM cinmayIM

guNatrayamayIM jagattrayamayIM tridhAmAmayIm |

parAparamayIM sadA dazadizAM nizAharmayIM

parAM satatasanmayIM manasi cinmayIM zIlaye ||97||

jaya jagadambike harakuTumbini vaktrarucA

jitazaradambuje ghanaviDambini kezarucA |

paramavalambanaM kuru sadA pararUpadhare

mama gatasaMvido jaDimaDambaratANDavinaH ||98||

bhuvanajanani bhUSAbhUtacandre namaste

kaluSazamani kampAtIragehe namaste |

nikhilanigamavedye nityarUpe namaste

parazivamayi pAzacchedahaste namaste ||99||

kvaNatkAJcI kAJcIpuramaNivipaJcIlayajharI-

ziraHkampA kampAvasatiranukampAjalanidhiH |

ghanazyAmA zyAmA kaThinakucasImA manasi me

mRgAkSI kAmAkSI haranaTanasAkSI viharatAt ||100||

samaravijayakoTI sAdhakAnandadhATI

mRduguNaparipeTI mukhyakAdambavATI |

muninutaparipATI mohitAjANDakoTI

paramazivavadhUTI pAtu mAM kAmakoTI ||101||

imaM paravarapradaM prakRtipezalaM pAvanaM

parAparacidAkRtiprakaTanapradIpAyitam |

stavaM paThati nityadA manasi bhAvayannambikAM

japairalamalaM makhairadhikadehasaMzoSaNaiH ||102||

|| iti stutizatakaM sampUrNam ||