Mooka Pancha Sathi 2

ମୂକ ପଞ୍ଚ ଶତି 2 - ପାଦାରଵିନ୍ଦ ଶତକମ୍

ଶ୍ଲୋକ 1

ମହିମ୍ନଃ ପନ୍ଥାନଂ ମଦନପରିପନ୍ଥିପ୍ରଣଯିନି

ପ୍ରଭୁର୍ନିର୍ଣେତୁଂ ତେ ଭଵତି ଯତମାନୋଽପି କତମଃ ।

ତଥାପି ଶ୍ରୀକାଞ୍ଚୀଵିହୃତିରସିକେ କୋଽପି ମନସୋ

ଵିପାକସ୍ତ୍ଵତ୍ପାଦସ୍ତୁତିଵିଧିଷୁ ଜଲ୍ପାକଯତି ମାମ୍

ଶ୍ଲୋକ 2

ଗଲଗ୍ରାହୀ ପୌରନ୍ଦରପୁରଵନୀପଲ୍ଲଵରୁଚାଂ

ଧୃତପାଥମ୍ଯାନାମରୁଣମହସାମାଦିମଗୁରୁଃ ।

ସମିନ୍ଧେ ବନ୍ଧୂକସ୍ତବକସହଯୁଧ୍ଵା ଦିଶି ଦିଶି

ପ୍ରସର୍ପନ୍କାମାକ୍ଷ୍ଯାଶ୍ଚରଣକିରଣାନାମରୁଣିମା

॥1॥

ଶ୍ଲୋକ 3

ମରାଲୀନାଂ ଯାନାଭ୍ଯସନକଲନାମୂଲଗୁରଵେ

ଦରିଦ୍ରାଣାଂ ତ୍ରାଣଵ୍ଯତିକରସୁରୋଦ୍ଯାନତରଵେ ।

ତମସ୍କାଣ୍ଡପ୍ରୌଢିପ୍ରକଟନତିରସ୍କାରପଟଵେ

ଜନୋଽଯଂ କାମାକ୍ଷ୍ଯାଶ୍ଚରଣନଲିନାଯ ସ୍ପୃହଯତେ

॥2॥

ଶ୍ଲୋକ 4

ଵହନ୍ତୀ ସୈନ୍ଦୂରୀଂ ସରଣିମଵନମ୍ରାମରପୁର଼ୀ-

ପୁରନ୍ଧ୍ରୀସୀମନ୍ତେ କଵିକମଲବାଲାର୍କସୁଷମା ।

ତ୍ରଯୀସୀମନ୍ତିନ୍ଯାଃ ସ୍ତନତଟନିଚୋଲାରୁଣପଟୀ

ଵିଭାନ୍ତୀ କାମାକ୍ଷ୍ଯାଃ ପଦନଲିନକାନ୍ତିର୍ଵିଜଯତେ

॥3॥

ଶ୍ଲୋକ 5

ପ୍ରଣମ୍ରୀଭୂତସ୍ଯ ପ୍ରଣଯକଲହତ୍ରସ୍ତମନସଃ

ସ୍ମରାରାତେଶ୍ଚୂଡାଵିଯତି ଗୃହମେଧୀ ହିମକରଃ ।

ଯଯୋଃ ସାନ୍ଧ୍ଯାଂ କାନ୍ତିଂ ଵହତି ସୁଷମାଭିଶ୍ଚରଣଯୋଃ

ତଯୋର୍ମେ କାମାକ୍ଷ୍ଯା ହୃଦଯମପତନ୍ଦ୍ରଂ ଵିହରତାମ୍

॥4॥

ଶ୍ଲୋକ 6

ଯଯୋଃ ପୀଠାଯନ୍ତେ ଵିବୁଧମୁକୁଟୀନାଂ ପଟଲିକା

ଯଯୋଃ ସୌଧାଯନ୍ତେ ସ୍ଵଯମୁଦଯଭାଜୋ ଭଣିତଯଃ ।

ଯଯୋଃ ଦାସାଯନ୍ତେ ସରସିଜଭଵାଦ୍ଯାଶ୍ଚରଣଯୋଃ

ତଯୋର୍ମେ କାମାକ୍ଷ୍ଯା ଦିନମନୁ ଵରୀଵର୍ତୁ ହୃଦଯମ୍

॥5॥

ଶ୍ଲୋକ 7

ନଯନ୍ତୀ ସଙ୍କୋଚଂ ସରସିଜରୁଚଂ ଦିକ୍ପରିସରେ

ସୃଜନ୍ତୀ ଲୌହିତ୍ଯଂ ନଖକିରଣଚନ୍ଦ୍ରାର୍ଧଖଚିତା ।

କଵୀନ୍ଦ୍ରାଣାଂ ହୃତ୍କୈରଵଵିକସନୋଦ୍ଯୋଗଜନନୀ

ସ୍ଫୁରନ୍ତୀ କାମାକ୍ଷ୍ଯାଃ ଚରଣରୁଚିସନ୍ଧ୍ଯା ଵିଜଯତେ

॥6॥

ଶ୍ଲୋକ 8

ଵିରାଵୈର୍ମାଞ୍ଜୀରୈଃ କିମପି କଥଯନ୍ତୀଵ ମଧୁରଂ

ପୁରସ୍ତାଦାନମ୍ରେ ପୁରଵିଜଯିନି ସ୍ମେରଵଦନେ ।

ଵଯସ୍ଯେଵ ପ୍ରୌଢା ଶିଥିଲଯତି ଯା ପ୍ରେମକଲହ-

ପ୍ରରୋହଂ କାମାକ୍ଷ୍ଯାଃ ଚରଣଯୁଗଲୀ ସା ଵିଜଯତେ

॥7॥

ଶ୍ଲୋକ 9

ସୁପର୍ଵସ୍ତ୍ରୀଲୋଲାଲକପରିଚିତଂ ଷଟ୍ପଦକୁଲୈଃ

ସ୍ଫୁରଲ୍ଲାକ୍ଷାରାଗଂ ତରୁଣତରଣିଜ୍ଯୋତିରରୁଣୈଃ ।

ଭୃତଂ କାନ୍ତ୍ଯମ୍ଭୋଭିଃ ଵିସୃମରମରନ୍ଦୈଃ ସରସିଜୈଃ

ଵିଧତ୍ତେ କାମାକ୍ଷ୍ଯାଃ ଚରଣଯୁଗଲଂ ବନ୍ଧୁପଦଵୀମ୍

॥8॥

ଶ୍ଲୋକ 10

ରଜଃସଂସର୍ଗେଽପି ସ୍ଥିତମରଜସାମେଵ ହୃଦଯେ

ପରଂ ରକ୍ତତ୍ଵେନ ସ୍ଥିତମପି ଵିରକ୍ତୈକଶରଣମ୍ ।

ଅଲଭ୍ଯଂ ମନ୍ଦାନାଂ ଦଧଦପି ସଦା ମନ୍ଦଗତିତାଂ

ଵିଧତ୍ତେ କାମାକ୍ଷ୍ଯାଃ ଚରଣଯୁଗମାଶ୍ଚର୍ଯଲହରୀମ୍

॥9॥

ଶ୍ଲୋକ 11

ଜଟାଲା ମଞ୍ଜୀରସ୍ଫୁରଦରୁଣରତ୍ନାଂଶୁନିକରୈଃ

ନିଷିଦନ୍ତୀ ମଧ୍ଯେ ନଖରୁଚିଝରୀଗାଙ୍ଗପଯସାମ୍ ।

ଜଗତ୍ତ୍ରାଣଂ କର୍ତୁଂ ଜନନି ମମ କାମାକ୍ଷି ନିଯତଂ

ତପଶ୍ଚର୍ଯାଂ ଧତ୍ତେ ତଵ ଚରଣପାଥୋଜଯୁଗଲୀ

॥10॥

ଶ୍ଲୋକ 12

ତୁଲାକୋଟିଦ୍ଵନ୍ଦ୍ଵକ୍କଣିତଭଣିତାଭୀତିଵଚସୋଃ

ଵିନମ୍ରଂ କାମାକ୍ଷୀ ଵିସୃମରମହଃପାଟଲିତଯୋଃ ।

କ୍ଷଣଂ ଵିନ୍ଯାସେନ କ୍ଷପିତତମସୋର୍ମେ ଲଲିତଯୋଃ

ପୁନୀଯାନ୍ମୂର୍ଧାନଂ ପୁରହରପୁରନ୍ଧ୍ରୀ ଚରଣଯୋଃ

॥11॥

ଶ୍ଲୋକ 13

ଭଵାନି ଦ୍ରୁହ୍ଯେତାଂ ଭଵନିବିଡିତେଭ୍ଯୋ ମମ ମୁହୁ-

ସ୍ତମୋଵ୍ଯାମୋହେଭ୍ଯସ୍ତଵ ଜନନି କାମାକ୍ଷି ଚରଣୌ ।

ଯଯୋର୍ଲାକ୍ଷାବିନ୍ଦୁସ୍ଫୁରଣଧରଣାଦ୍ଧ୍ଵର୍ଜଟିଜଟା-

କୁଟୀରା ଶୋଣାଙ୍କଂ ଵହତି ଵପୁରେଣାଙ୍କକଲିକା

॥12॥

ଶ୍ଲୋକ 14

ପଵିତ୍ରୀକୁର୍ଯୁର୍ନୁଃ ପଦତଲଭୁଵଃ ପାଟଲରୁଚଃ

ପରାଗାସ୍ତେ ପାପପ୍ରଶମନଧୁରୀଣାଃ ପରଶିଵେ ।

କଣଂ ଲବ୍ଧୁଂ ଯେଷାଂ ନିଜଶିରସି କାମାକ୍ଷି ଵିଵଶା

ଵଲନ୍ତୋ ଵ୍ଯାତନ୍ଵନ୍ତ୍ଯହମହମିକାଂ ମାଧଵମୁଖାଃ

॥13॥

ଶ୍ଲୋକ 15

ବଲାକାମାଲାଭିର୍ନଖରୁଚିମଯୀଭିଃ ପରିଵୃତେ

ଵିନମ୍ରସ୍ଵର୍ନାରୀଵିକଚକଚକାଲାମ୍ବୁଦକୁଲେ ।

ସ୍ଫୁରନ୍ତଃ କାମାକ୍ଷି ସ୍ଫୁଟଦଲିତବନ୍ଧୂକସୁହୃଦ-

ସ୍ତଟିଲ୍ଲେଖାଯନ୍ତେ ତଵ ଚରଣପାଥୋଜକିରଣାଃ

॥14॥

ଶ୍ଲୋକ 16

ସରାଗଃ ସଦ୍ଵେଷଃ ପ୍ରସୃମରସରୋଜେ ପ୍ରତିଦିନଂ

ନିସର୍ଗାଦାକ୍ରାମନ୍ଵିବୁଧଜନମୂର୍ଧାନମଧିକମ୍ ।

କଥଙ୍କାରଂ ମାତଃ କଥଯ ପଦପଦ୍ମସ୍ତଵ ସତାଂ

ନତାନାଂ କାମାକ୍ଷି ପ୍ରକଟଯତି କୈଵଲ୍ଯସରଣିମ୍

॥15॥

ଶ୍ଲୋକ 17

ଜପାଲକ୍ଷ୍ମୀଶୋଣୋ ଜନିତପରମଜ୍ଞାନନଲିନୀ-

ଵିକାସଵ୍ଯାସଙ୍ଗୋ ଵିଫଲିତଜଗଜ୍ଜାଡ୍ଯଗରିମା ।

ମନଃପୂର୍ଵାଦ୍ରିଂ ମେ ତିଲକଯତୁ କାମାକ୍ଷି ତରସା

ତମସ୍କାଣ୍ଡଦ୍ରୋହୀ ତଵ ଚରଣପାଥୋଜରମଣଃ

॥16॥

ଶ୍ଲୋକ 18

ନମସ୍କୁର୍ମଃ ପ୍ରେଙ୍ଖନ୍ମଣିକଟକନୀଲୋତ୍ପଲମହଃ-

ପଯୋଧୌ ରିଙ୍ଖଦ୍ଭିର୍ନଖକିରଣଫେନୈର୍ଧଵଲିତେ ।

ସ୍ଫୁଟଂ କୁର୍ଵାଣାଯ ପ୍ରବଲଚଲଦୌର୍ଵାନଲଶିଖା-

ଵିତର୍କଂ କାମାକ୍ଷ୍ଯାଃ ସତତମରୁଣିମ୍ନେ ଚରଣଯୋଃ

॥17॥

ଶ୍ଲୋକ 19

ଶିଵେ ପାଶାଯେତାମଲଘୁନି ତମଃକୂପକୁହରେ

ଦିନାଧୀଶାଯେତାଂ ମମ ହୃଦଯପାଥୋଜଵିପିନେ ।

ନଭୋମାସାଯେତାଂ ସରସକଵିତାରୀତିସରିତି

ତ୍ଵଦୀଯୌ କାମାକ୍ଷି ପ୍ରସୃତକିରଣୌ ଦେଵି ଚରଣୌ

॥18॥

ଶ୍ଲୋକ 20

ନିଷକ୍ତଂ ଶ୍ରୁତ୍ଯନ୍ତେ ନଯନମିଵ ସଦ୍ଵୃତ୍ତରୁଚିରୈଃ

ସମୈର୍ଜୁଷ୍ଟଂ ଶୁଦ୍ଧୈରଧରମିଵ ରମ୍ଯୈର୍ଦ୍ଵିଜଗଣୈଃ ।

ଶିଵେ ଵକ୍ଷୋଜନ୍ମଦ୍ଵିତଯମିଵ ମୁକ୍ତାଶ୍ରିତମୁମେ

ତ୍ଵଦୀଯଂ କାମାକ୍ଷି ପ୍ରଣତଶରଣଂ ନୌମି ଚରଣମ୍

॥19॥

ଶ୍ଲୋକ 21

ନମସ୍ଯାସଂସଜ୍ଜନ୍ନମୁଚିପରିପନ୍ଥିପ୍ରଣଯିନୀ-

ନିସର୍ଗପ୍ରେଙ୍ଖୋଲତ୍କୁରଲକୁଲକାଲାହିଶବଲେ ।

ନଖଚ୍ଛାଯାଦୁଗ୍ଧୋଦଧିପଯସି ତେ ଵୈଦ୍ରୁମରୁଚାଂ

ପ୍ରଚାରଂ କାମାକ୍ଷି ପ୍ରଚୁରଯତି ପାଦାବ୍ଜସୁଷମା

॥20॥

ଶ୍ଲୋକ 22

କଦା ଦୂରୀକର୍ତୁଂ କଟୁଦୁରିତକାକୋଲଜନିତଂ

ମହାନ୍ତଂ ସନ୍ତାପଂ ମଦନପରିପନ୍ଥିପ୍ରିଯତମେ ।

କ୍ଷଣାତ୍ତେ କାମାକ୍ଷି ତ୍ରିଭୁଵନପରୀତାପହରଣେ

ପଟୀଯାଂସଂ ଲପ୍ସ୍ଯେ ପଦକମଲସେଵାମୃତରସମ୍

॥21॥

ଶ୍ଲୋକ 23

ଯଯୋଃ ସାନ୍ଧ୍ଯଂ ରୋଚିଃ ସତତମରୁଣିମ୍ନେ ସ୍ପୃହଯତେ

ଯଯୋଶ୍ଚାନ୍ଦ୍ରୀ କାନ୍ତିଃ ପରିପତତି ଦୃଷ୍ଟ୍ଵା ନଖରୁଚିମ୍ ।

ଯଯୋଃ ପାକୋଦ୍ରେକଂ ପିପଠିଷତି ଭକ୍ତ୍ଯା କିସଲଯଂ

ମ୍ରଦିମ୍ନଃ କାମାକ୍ଷ୍ଯା ମନସି ଚରଣୌ ତୌ ତନୁମହେ

॥22॥

ଶ୍ଲୋକ 24

ଜଗନ୍ନେଦଂ ନେଦଂ ପରମିତି ପରିତ୍ଯଜ୍ଯ ଯତିଭିଃ

କୁଶାଗ୍ରୀଯସ୍ଵାନ୍ତୈଃ କୁଶଲଧିଷଣୈଃ ଶାସ୍ତ୍ରସରଣୌ ।

ଗଵେଷ୍ଯଂ କାମାକ୍ଷି ଧ୍ରୁଵମକୃତକାନାଂ ଗିରିସୁତେ

ଗିରାମୈଦମ୍ପର୍ଯଂ ତଵ ଚରଣପଦ୍ମଂ ଵିଜଯତେ

॥23॥

ଶ୍ଲୋକ 25

କୃତସ୍ନାନଂ ଶାସ୍ତ୍ରାମୃତସରସି କାମାକ୍ଷି ନିତରାଂ

ଦଧାନଂ ଵୈଶଦ୍ଯଂ କଲିତରସମାନନ୍ଦସୁଧଯା ।

ଅଲଙ୍କାରଂ ଭୂମେର୍ମୁନିଜନମନଶ୍ଚିନ୍ମଯମହା-

ପଯୋଧେରନ୍ତସ୍ସ୍ଥଂ ତଵ ଚରଣରତ୍ନଂ ମୃଗଯତେ

॥24॥

ଶ୍ଲୋକ 26

ମନୋଗେହେ ମୋହୋଦ୍ଭଵତିମିରପୂର୍ଣେ ମମ ମୁହୁଃ

ଦରିଦ୍ରାଣୀକୁର୍ଵନ୍ଦିନକରସହସ୍ରାଣି କିରଣୈଃ ।

ଵିଧତ୍ତାଂ କାମାକ୍ଷି ପ୍ରସୃମରତମୋଵଞ୍ଚନଚଣଃ

କ୍ଷଣାର୍ଧଂ ସାନ୍ନିଧ୍ଯଂ ଚରଣମଣିଦୀପୋ ଜନନି ତେ

॥25॥

ଶ୍ଲୋକ 27

କଵୀନାଂ ଚେତୋଵନ୍ନଖରରୁଚିସମ୍ପର୍କି ଵିବୁଧ-

ସ୍ରଵନ୍ତୀସ୍ରୋତୋଵତ୍ପଟୁମୁଖରିତଂ ହଂସକରଵୈଃ ।

ଦିନାରମ୍ଭଶ୍ରୀଵନ୍ନିଯତମରୁଣଚ୍ଛାଯସୁଭଗଂ

ମଦନ୍ତଃ କାମାକ୍ଷ୍ଯାଃ ସ୍ଫୁରତୁ ପଦପଙ୍କେରୁହଯୁଗମ୍

॥26॥

ଶ୍ଲୋକ 28

ସଦା କିଂ ସମ୍ପର୍କାତ୍ପ୍ରକୃତିକଠିନୈର୍ନାକିମୁକୁଟୈଃ

ତଟୈର୍ନୀହାରାଦ୍ରେରଧିକମଣୁନା ଯୋଗିମନସା ।

ଵିଭିନ୍ତେ ସମ୍ମୋହଂ ଶିଶିରଯତି ଭକ୍ତାନପି ଦୃଶାମ୍

ଅଦୃଶ୍ଯଂ କାମାକ୍ଷି ପ୍ରକଟଯତି ତେ ପାଦଯୁଗଲମ୍

॥27॥

ଶ୍ଲୋକ 29

ପଵିତ୍ରାଭ୍ଯାମମ୍ବ ପ୍ରକୃତିମୃଦୁଲାଭ୍ଯାଂ ତଵ ଶିଵେ

ପଦାଭ୍ଯାଂ କାମାକ୍ଷି ପ୍ରସଭମଭିଭୂତୈଃ ସଚକିତୈଃ ।

ପ୍ରଵାଲୈରମ୍ଭୋଜୈରପି ଚ ଵନଵାସଵ୍ରତଦଶାଃ

ସଦୈଵାରଭ୍ଯନ୍ତେ ପରିଚରିତନାନାଦ୍ଵିଜଗଣୈଃ

॥28॥

ଶ୍ଲୋକ 30

ଚିରାଦ୍ଦୃଶ୍ଯା ହଂସୈଃ କଥମପି ସଦା ହଂସସୁଲଭଂ

ନିରସ୍ଯନ୍ତୀ ଜାଡ୍ଯଂ ନିଯତଜଡମଧ୍ଯୈକଶରଣମ୍ ।

ଅଦୋଷଵ୍ଯାସଙ୍ଗା ସତତମପି ଦୋଷାପ୍ତିମଲିନଂ

ପଯୋଜଂ କାମାକ୍ଷ୍ଯାଃ ପରିହସତି ପାଦାବ୍ଜଯୁଗଲୀ

॥29॥

ଶ୍ଲୋକ 31

ସୁରାଣାମାନନ୍ଦପ୍ରବଲନତଯା ମଣ୍ଡନତଯା

ନଖେନ୍ଦୁଜ୍ଯୋତ୍ସ୍ନାଭିର୍ଵିସୃମରତମଃଖଣ୍ଡନତଯା ।

ପଯୋଜଶ୍ରୀଦ୍ଵେଷଵ୍ରତରତତଯା ତ୍ଵଚ୍ଚରଣଯୋଃ

ଵିଲାସଃ କାମାକ୍ଷି ପ୍ରକଟଯତି ନୈଶାକରଦଶାମ୍

॥30॥

ଶ୍ଲୋକ 32

ସିତିମ୍ନା କାନ୍ତୀନାଂ ନଖରଜନୁଷାଂ ପାଦନଲିନ-

ଚ୍ଛଵୀନାଂ ଶୋଣିମ୍ନା ତଵ ଜନନି କାମାକ୍ଷି ନମନେ ।

ଲଭନ୍ତେ ମନ୍ଦାରଗ୍ରଥିତନଵବନ୍ଧୂକକୁସୁମ-

ସ୍ରଜାଂ ସାମୀଚୀନ୍ଯଂ ସୁରପୁରପୁରନ୍ଧ୍ରୀକଚଭରାଃ

॥31॥

ଶ୍ଲୋକ 33

ସ୍ଫୁରନ୍ମଧ୍ଯେ ଶୁଦ୍ଧେ ନଖକିରଣଦୁଗ୍ଧାବ୍ଧିପଯସାଂ

ଵହନ୍ନବ୍ଜଂ ଚକ୍ରଂ ଦରମପି ଚ ଲେଖାତ୍ମକତଯା ।

ଶ୍ରିତୋ ମାତ୍ସ୍ଯଂ ରୂପଂ ଶ୍ରିଯମପି ଦଧାନୋ ନିରୁପମାଂ

ତ୍ରିଧାମା କାମାକ୍ଷ୍ଯାଃ ପଦନଲିନନାମା ଵିଜଯତେ

॥32॥

ଶ୍ଲୋକ 34

ନଖଶ୍ରୀସନ୍ନଦ୍ଧସ୍ତବକନିଚିତଃ ସ୍ଵୈଶ୍ଚ କିରଣୈଃ

ପିଶଙ୍ଗୈଃ କାମାକ୍ଷି ପ୍ରକଟିତଲସତ୍ପଲ୍ଲଵରୁଚିଃ ।

ସତାଂ ଗମ୍ଯଃ ଶଙ୍କେ ସକଲଫଲଦାତା ସୁରତରୁଃ

ତ୍ଵଦୀଯଃ ପାଦୋଽଯଂ ତୁହିନଗିରିରାଜନ୍ଯତନଯେ

॥33॥

ଶ୍ଲୋକ 35

ଵଷଟ୍କୁର୍ଵନ୍ମାଞ୍ଜୀରକଲକଲୈଃ କର୍ମଲହରୀ-

ହଵୀଂଷି ପ୍ରୌଦ୍ଦଣ୍ଡଂ ଜ୍ଵଲତି ପରମଜ୍ଞାନଦହନେ ।

ମହୀଯାନ୍କାମାକ୍ଷି ସ୍ଫୁଟମହସି ଜୋହୋତି ସୁଧିଯାଂ

ମନୋଵେଦ୍ଯାଂ ମାତସ୍ତଵ ଚରଣଯଜ୍ଵା ଗିରିସୁତେ

॥34॥

ଶ୍ଲୋକ 36

ମହାମନ୍ତ୍ରଂ କିଞ୍ଚିନ୍ମଣିକଟକନାଦୈର୍ମୃଦୁ ଜପନ୍

କ୍ଷିପନ୍ଦିକ୍ଷୁ ସ୍ଵଚ୍ଛଂ ନଖରୁଚିମଯଂ ଭାସ୍ମନରଜଃ ।

ନତାନାଂ କାମାକ୍ଷି ପ୍ରକୃତିପଟୁରଚ୍ଚାଟ୍ଯ ମମତା-

ପିଶାଚୀଂ ପାଦୋଽଯଂ ପ୍ରକଟଯତି ତେ ମାନ୍ତ୍ରିକଦଶାମ୍

॥35॥

ଶ୍ଲୋକ 37

ଉଦୀତେ ବୋଧେନ୍ଦୌ ତମସି ନିତରାଂ ଜଗ୍ମୁଷି ଦଶାଂ

ଦରିଦ୍ରାଂ କାମାକ୍ଷି ପ୍ରକଟମନୁରାଗଂ ଵିଦଧତୀ ।

ସିତେନାଚ୍ଛାଦ୍ଯାଙ୍ଗଂ ନଖରୁଚିପଟେନାଙ୍ଘ୍ରିଯୁଗଲୀ-

ପୁରନ୍ଧ୍ରୀ ତେ ମାତଃ ସ୍ଵଯମଭିସରତ୍ଯେଵ ହୃଦଯମ୍

॥36॥

ଶ୍ଲୋକ 38

ଦିନାରମ୍ଭଃ ସମ୍ପନ୍ନଲିନଵିପିନାନାମଭିନଵୋ

ଵିକାସୋ ଵାସନ୍ତଃ ସୁକଵିପିକଲୋକସ୍ଯ ନିଯତଃ ।

ପ୍ରଦୋଷଃ କାମାକ୍ଷି ପ୍ରକଟପରମଜ୍ଞାନଶଶିନ-

ଶ୍ଚକାସ୍ତି ତ୍ଵତ୍ପାଦସ୍ମରଣମହିମା ଶୈଲତନଯେ

॥37॥

ଶ୍ଲୋକ 39

ଧୃତଚ୍ଛାଯଂ ନିତ୍ଯଂ ସରସିରୁହମୈତ୍ରୀପରିଚିତଂ

ନିଧାନଂ ଦୀପ୍ତୀନାଂ ନିଖିଲଜଗତାଂ ବୋଧଜନକମ୍ ।

ମୁମୁକ୍ଷୂଣାଂ ମାର୍ଗପ୍ରଥନପଟୁ କାମାକ୍ଷି ପଦଵୀଂ

ପଦଂ ତେ ପାତଙ୍ଗୀଂ ପରିକଲଯତେ ପର୍ଵତସୁତେ

॥38॥

ଶ୍ଲୋକ 40

ଶନୈସ୍ତୀର୍ତ୍ଵା ମୋହାମ୍ବୁଧିମଥ ସମାରୋଢୁମନସଃ

କ୍ରମାତ୍କୈଵଲ୍ଯାଖ୍ଯାଂ ସୁକୃତିସୁଲଭାଂ ସୌଧଵଲଭୀମ୍ ।

ଲଭନ୍ତେ ନିଃଶ୍ରେଣୀମିଵ ଝଟିତି କାମାକ୍ଷି ଚରଣଂ

ପୁରଶ୍ଚର୍ଯାଭିସ୍ତେ ପୁରମଥନସୀମନ୍ତିନି ଜନାଃ

॥39॥

ଶ୍ଲୋକ 41

ପ୍ରଚଣ୍ଡାର୍ତିକ୍ଷୋଭପ୍ରମଥନକୃତେ ପ୍ରାତିଭସରି-

ତ୍ପ୍ରଵାହପ୍ରୋଦ୍ଦଣ୍ଡୀକରଣଜଲଦାଯ ପ୍ରଣମତାମ୍ ।

ପ୍ରଦୀପାଯ ପ୍ରୌଢେ ଭଵତମସି କାମାକ୍ଷି ଚରଣ-

ପ୍ରସାଦୌନ୍ମୁଖ୍ଯାଯ ସ୍ପୃହଯତି ଜନୋଽଯଂ ଜନନି ତେ

॥40॥

ଶ୍ଲୋକ 42

ମରୁଦ୍ଭିଃ ସଂସେଵ୍ଯା ସତତମପି ଚାଞ୍ଚଲ୍ଯରହିତା

ସଦାରୁଣ୍ଯଂ ଯାନ୍ତୀ ପରିଣତିଦରିଦ୍ରାଣସୁଷମା ।

ଗୁଣୋତ୍କର୍ଷାନ୍ମାଞ୍ଜୀରକକଲକଲୈସ୍ତର୍ଜନପଟୁଃ

ପ୍ରଵାଲଂ କାମାକ୍ଷ୍ଯାଃ ପରିହସତି ପାଦାବ୍ଜଯୁଗଲୀ

॥41॥

ଶ୍ଲୋକ 43

ଜଗଦ୍ରକ୍ଷାଦକ୍ଷା ଜଲଜରୁଚିଶିକ୍ଷାପଟୁତରା

ସମୈର୍ନମ୍ଯା ରମ୍ଯା ସତତମଭିଗମ୍ଯା ବୁଧଜନୈଃ ।

ଦ୍ଵଯୀ ଲୀଲାଲୋଲା ଶ୍ରୁତିଷୁ ସୁରପାଲାଦିମୁକୁଟୀ-

ତଟୀସୀମାଧାମା ତଵ ଜନନି କାମାକ୍ଷି ପଦଯୋଃ

॥42॥

ଶ୍ଲୋକ 44

ଗିରାଂ ଦୂରୌ ଚୋରୌ ଜଡିମତିମିରାଣାଂ କୃତଜଗ-

ତ୍ପରିତ୍ରାଣୌ ଶୋଣୌ ମୁନିହୃଦଯଲୀଲୈକନିପୁଣୌ ।

ନଖୈଃ ସ୍ମେରୌ ସାରୌ ନିଗମଵଚସାଂ ଖଣ୍ଡିତଭଵ-

ଗ୍ରହୋନ୍ମାଦୌ ପାଦୌ ତଵ ଜନନି କାମାକ୍ଷି କଲଯେ

॥43॥

ଶ୍ଲୋକ 45

ଅଵିଶ୍ରାନ୍ତଂ ପଙ୍କଂ ଯଦପି କଲଯନ୍ଯାଵକମଯଂ

ନିରସ୍ଯନ୍କାମାକ୍ଷି ପ୍ରଣମନଜୁଷାଂ ପଙ୍କମଖିଲମ୍ ।

ତୁଲାକୋଟିଦ୍ଵନ୍ଦଂ ଦଧଦପି ଚ ଗଚ୍ଛନ୍ନତୁଲତାଂ

ଗିରାଂ ମାର୍ଗଂ ପାଦୋ ଗିରିଵରସୁତେ ଲଙ୍ଘଯତି ତେ

॥44॥

ଶ୍ଲୋକ 46

ପ୍ରଵାଲଂ ସଵ୍ରୀଲଂ ଵିପିନଵିଵରେ ଵେପଯତି ଯା

ସ୍ଫୁରଲ୍ଲୀଲଂ ବାଲାତପମଧିକବାଲଂ ଵଦତି ଯା ।

ରୁଚିଂ ସାନ୍ଧ୍ଯାଂ ଵନ୍ଧ୍ଯାଂ ଵିରଚଯତି ଯା ଵର୍ଧଯତୁ ସା

ଶିଵଂ ମେ କାମାକ୍ଷ୍ଯାଃ ପଦନଲିନପାଟଲ୍ଯଲହରୀ

॥45॥

ଶ୍ଲୋକ 47

କିରଞ୍ଜ୍ଯୋତ୍ସ୍ନାରୀତିଂ ନଖମୁଖରୁଚା ହଂସମନସାଂ

ଵିତନ୍ଵାନଃ ପ୍ରୀତିଂ ଵିକଚତରୁଣାମ୍ଭୋରୁହରୁଚିଃ ।

ପ୍ରକାଶଃ ଶ୍ରୀପାଦସ୍ତଵ ଜନନି କାମାକ୍ଷି ତନୁତେ

ଶରତ୍କାଲପ୍ରୌଢିଂ ଶଶିଶକଲଚୂଡପ୍ରିଯତମେ

॥46॥

ଶ୍ଲୋକ 48

ନଖାଙ୍କୂରସ୍ମେରଦ୍ଯୁତିଵିମଲଗଙ୍ଗାମ୍ଭସି ସୁଖଂ

କୃତସ୍ନାନଂ ଜ୍ଞାନାମୃତମମଲମାସ୍ଵାଦ୍ଯ ନିଯତମ୍ ।

ଉଦଞ୍ଚନ୍ମଞ୍ଜୀରସ୍ଫୁରଣମଣିଦୀପେ ମମ ମନୋ

ମନୋଜ୍ଞେ କାମାକ୍ଷ୍ଯାଶ୍ଚରଣମଣିହର୍ମ୍ଯେ ଵିହରତାମ୍

॥47॥

ଶ୍ଲୋକ 49

ଭଵାମ୍ଭୋଧୌ ନୌକାଂ ଜଡିମଵିପିନେ ପାଵକଶିଖା-

ମମର୍ତ୍ଯେନ୍ଦ୍ରାଦୀନାମଧିମୁକୁଟମୁତ୍ତଂସକଲିକାମ୍ ।

ଜଗତ୍ତାପେ ଜ୍ଯୋତ୍ସ୍ନାମକୃତକଵଚଃପଞ୍ଜରପୁଟେ

ଶୁକସ୍ତ୍ରୀଂ କାମାକ୍ଷ୍ଯା ମନସି କଲଯେ ପାଦଯୁଗଲୀମ୍

॥48॥

ଶ୍ଲୋକ 50

ପରତ୍ମପ୍ରାକାଶ୍ଯପ୍ରତିଫଲନଚୁଞ୍ଚୁଃ ପ୍ରଣମତାଂ

ମନୋଜ୍ଞସ୍ତ୍ଵତ୍ପାଦୋ ମଣିମୁକୁରମୁଦ୍ରାଂ କଲଯତେ ।

ଯଦୀଯାଂ କାମାକ୍ଷି ପ୍ରକୃତିମସୃଣାଃ ଶୋଧକଦଶାଂ

ଵିଧାତୁଂ ଚେଷ୍ଠନ୍ତେ ବଲରିପୁଵଧୂଟୀକଚଭରାଃ

॥49॥

ଶ୍ଲୋକ 51

ଅଵିଶ୍ରାନ୍ତଂ ତିଷ୍ଠନ୍ନକୃତକଵଚଃକନ୍ଦରପୁଟୀ-

କୁଟୀରାନ୍ତଃ ପ୍ରୌଢଂ ନଖରୁଚିସଟାଲୀଂ ପ୍ରକଟଯନ୍ ।

ପ୍ରଚଣ୍ଡଂ ଖଣ୍ଡତ୍ଵଂ ନଯତୁ ମମ କାମାକ୍ଷି ତରସା

ତମୋଵେତଣ୍ଡେନ୍ଦ୍ରଂ ତଵ ଚରଣକଣ୍ଠୀରଵପତିଃ

॥50॥

ଶ୍ଲୋକ 52

ପୁରସ୍ତାତ୍କାମାକ୍ଷି ପ୍ରଚୁରରସମାଖଣ୍ଡଲପୁରୀ-

ପୁରନ୍ଧ୍ରୀଣାଂ ଲାସ୍ଯଂ ତଵ ଲଲିତମାଲୋକ୍ଯ ଶନକୈଃ ।

ନଖଶ୍ରୀଭିଃ ସ୍ମେରା ବହୁ ଵିତନୁତେ ନୂପୁରରଵୈ-

ଶ୍ଚମତ୍କୃତ୍ଯା ଶଙ୍କେ ଚରଣଯୁଗଲୀ ଚାଟୁରଚନାଃ

॥51॥

ଶ୍ଲୋକ 53

ସରୋଜଂ ନିନ୍ଦନ୍ତୀ ନଖକିରଣକର୍ପୂରଶିଶିରା

ନିଷିକ୍ତା ମାରାରେର୍ମୁକୁଟଶଶିରେଖାହିମଜଲୈଃ ।

ସ୍ଫୁରନ୍ତୀ କାମାକ୍ଷି ସ୍ଫୁଟରୁଚିମଯେ ପଲ୍ଲଵଚଯେ

ତଵାଧତ୍ତେ ମୈତ୍ରୀଂ ପଥିକସୁଦୃଶା ପାଦଯୁଗଲୀ

॥52॥

ଶ୍ଲୋକ 54

ନତାନାଂ ସମ୍ପତ୍ତେରନଵରତମାକର୍ଷଣଜପଃ

ପ୍ରରୋହତ୍ସଂସାରପ୍ରସରଗରିମସ୍ତମ୍ଭନଜପଃ ।

ତ୍ଵଦୀଯଃ କାମାକ୍ଷି ସ୍ମରହରମନୋମୋହନଜପଃ

ପଟୀଯାନ୍ନଃ ପାଯାତ୍ପଦନଲିନମଞ୍ଜୀରନିନଦଃ

॥53॥

ଶ୍ଲୋକ 55

ଵିତନ୍ଵୀଥା ନାଥେ ମମ ଶିରସି କାମାକ୍ଷି କୃପଯା

ପଦାମ୍ଭୋଜନ୍ଯାସଂ ପଶୁପରିବୃଢପ୍ରାଣଦଯିତେ ।

ପିବନ୍ତୋ ଯନ୍ମୁଦ୍ରାଂ ପ୍ରକଟମୁପକମ୍ପାପରିସରଂ

ଦୃଶା ନାନନ୍ଦ୍ଯନ୍ତେ ନଲିନଭଵନାରାଯଣମୁଖାଃ

॥54॥

ଶ୍ଲୋକ 56

ପ୍ରଣାମୋଦ୍ଯଦ୍ବୃନ୍ଦାରମୁକୁଟମନ୍ଦାରକଲିକା-

ଵିଲୋଲଲ୍ଲୋଲମ୍ବପ୍ରକରମଯଧୂମପ୍ରଚୁରିମା ।

ପ୍ରଦୀପ୍ତଃ ପାଦାବ୍ଜଦ୍ଯୁତିଵିତତିପାଟଲ୍ଯଲହରୀ-

କୃଶାନୁଃ କାମାକ୍ଷ୍ଯା ମମ ଦହତୁ ସଂସାରଵିପିନମ୍

॥55॥

ଶ୍ଲୋକ 57

ଵଲକ୍ଷଶ୍ରୀରୃକ୍ଷାଧିପଶିଶୁସଦୃକ୍ଷୈସ୍ତଵ ନଖୈଃ

ଜିଘୃକ୍ଷୁର୍ଦକ୍ଷତ୍ଵଂ ସରସିରୁହଭିକ୍ଷୁତ୍ଵକରଣେ ।

କ୍ଷଣାନ୍ମେ କାମାକ୍ଷି କ୍ଷପିତଭଵସଙ୍କ୍ଷୋଭଗରିମା

ଵଚୋଵୈଚକ୍ଷନ୍ଯଂ ଚରଣଯୁଗଲୀ ପକ୍ଷ୍ମଲଯତାତ୍

॥56॥

ଶ୍ଲୋକ 58

ସମନ୍ତାତ୍କାମାକ୍ଷି କ୍ଷତତିମିରସନ୍ତାନସୁଭଗାନ୍

ଅନନ୍ତାଭିର୍ଭାଭିର୍ଦିନମନୁ ଦିଗନ୍ତାନ୍ଵିରଚଯନ୍ ।

ଅହନ୍ତାଯା ହନ୍ତା ମମ ଜଡିମଦନ୍ତାଵଲହରିଃ

ଵିଭିନ୍ତାଂ ସନ୍ତାପଂ ତଵ ଚରଣଚିନ୍ତାମଣିରସୌ

॥57॥

ଶ୍ଲୋକ 59

ଦଧାନୋ ଭାସ୍ଵତ୍ତାମମୃତନିଲଯୋ ଲୋହିତଵପୁଃ

ଵିନମ୍ରାଣାଂ ସୌମ୍ଯୋ ଗୁରୁରପି କଵିତ୍ଵଂ ଚ କଲଯନ୍ ।

ଗତୌ ମନ୍ଦୋ ଗଙ୍ଗାଧରମହିଷି କାମାକ୍ଷି ଭଜତାଂ

ତମଃକେତୁର୍ମାତସ୍ତଵ ଚରଣପଦ୍ମୋ ଵିଜଯତେ

॥58॥

ଶ୍ଲୋକ 60

ନଯନ୍ତୀଂ ଦାସତ୍ଵଂ ନଲିନଭଵମୁଖ୍ଯାନସୁଲଭ-

ପ୍ରଦାନାଦ୍ଦୀନାନାମମରତରୁଦୌର୍ଭାଗ୍ଯଜନନୀମ୍ ।

ଜଗଜ୍ଜନ୍ମକ୍ଷେମକ୍ଷଯଵିଧିଷୁ କାମାକ୍ଷି ପଦଯୋ-

ର୍ଧୁରୀଣାମୀଷ୍ଟେ କରସ୍ତଵ ଭଣିତୁମାହୋପୁରୁଷିକାମ୍

॥59॥

ଶ୍ଲୋକ 61

ଜନୋଽଯଂ ସନ୍ତପ୍ତୋ ଜନନି ଭଵଚଣ୍ଡାଂଶୁକିରଣୈଃ

ଅଲବ୍ଧଵୈକଂ ଶୀତଂ କଣମପି ପରଜ୍ଞାନପଯସଃ ।

ତମୋମାର୍ଗେ ପାନ୍ଥସ୍ତଵ ଝଟିତି କାମାକ୍ଷି ଶିଶିରାଂ

ପଦାମ୍ଭୋଜଚ୍ଛାଯାଂ ପରମଶିଵଜାଯେ ମୃଗଯତେ

॥60॥

ଶ୍ଲୋକ 62

ଜଯତ୍ଯମ୍ବ ଶ୍ରୀମନ୍ନଖକିରଣଚୀନାଂଶୁକମଯଂ

ଵିତାନଂ ବିଭ୍ରାଣେ ସୁରମୁକୁଟସଙ୍ଘଟ୍ଟମସୃଣେ ।

ନିଜାରୁଣ୍ଯକ୍ଷୌମାସ୍ତରଣଵତି କାମାକ୍ଷି ସୁଲଭା

ବୁଧୈଃ ସଂଵିନ୍ନାରୀ ତଵ ଚରଣମାଣିକ୍ଯଭଵନେ

॥61॥

ଶ୍ଲୋକ 63

ପ୍ରତୀମଃ କାମାକ୍ଷି ସ୍ଫୁରିତତରୁଣାଦିତ୍ଯକିରଣ-

ଶ୍ରିଯୋ ମୂଲଦ୍ରଵ୍ଯଂ ତଵ ଚରଣମଦ୍ରୀନ୍ଦ୍ରତନଯେ ।

ସୁରେନ୍ଦ୍ରାଶାମାପୂରଯତି ଯଦସୌ ଧ୍ଵାନ୍ତମଖିଲଂ

ଧୁନୀତେ ଦିଗ୍ଭାଗାନପି ଚ ମହସା ପାଟଲଯତେ

॥62॥

ଶ୍ଲୋକ 64

ମହାଭାଷ୍ଯଵ୍ଯାଖ୍ଯାପଟୁଶଯନମାରୋପଯତି ଵା

ସ୍ମରଵ୍ଯାପାରେର୍ଷ୍ଯାପିଶୁନନିଟିଲଂ କାରଯତି ଵା ।

ଦ୍ଵିରେଫାଣାମଧ୍ଯାସଯତି ସତତଂ ଵାଧିଵସତିଂ

ପ୍ରଣମ୍ରାନ୍କାମାକ୍ଷ୍ଯାଃ ପଦନଲିନମାହାତ୍ମ୍ଯଗରିମା

॥63॥

ଶ୍ଲୋକ 65

ଵିଵେକାମ୍ଭସ୍ସ୍ରୋତସ୍ସ୍ନପନପରିପାଟୀଶିଶିରିତେ

ସମୀଭୂତେ ଶାସ୍ତ୍ରସ୍ମରଣହଲସଙ୍କର୍ଷଣଵଶାତ୍ ।

ସତାଂ ଚେତଃକ୍ଷେତ୍ରେ ଵପତି ତଵ କାମାକ୍ଷି ଚରଣୋ

ମହାସଂଵିତ୍ସସ୍ଯପ୍ରକରଵରବୀଜଂ ଗିରିସୁତେ

॥64॥

ଶ୍ଲୋକ 66

ଦଧାନୋ ମନ୍ଦାରସ୍ତବକପରିପାଟୀଂ ନଖରୁଚା

ଵହନ୍ଦୀପ୍ତାଂ ଶୋଣାଙ୍ଗୁଲିପଟଲଚାମ୍ପେଯକଲିକାମ୍ ।

ଅଶୋକୋଲ୍ଲାସଂ ନଃ ପ୍ରଚୁରଯତୁ କାମାକ୍ଷି ଚରଣୋ

ଵିକାସୀ ଵାସନ୍ତଃ ସମଯ ଇଵ ତେ ଶର୍ଵଦଯିତେ

॥65॥

ଶ୍ଲୋକ 67

ନଖାଂଶୁପ୍ରାଚୁର୍ଯପ୍ରସୃମରମରାଲାଲିଧଵଲଃ

ସ୍ଫୁରନ୍ମଞ୍ଜୀରୋଦ୍ଯନ୍ମରକତମହଶ୍ଶୈଵଲଯୁତଃ ।

ଭଵତ୍ଯାଃ କାମାକ୍ଷି ସ୍ଫୁଟଚରଣପାଟଲ୍ଯକପଟୋ

ନଦଃ ଶୋଣାଭିଖ୍ଯୋ ନଗପତିତନୂଜେ ଵିଜଯତେ

॥66॥

ଶ୍ଲୋକ 68

ଧୁନାନଂ ପଙ୍କୌଘଂ ପରମସୁଲଭଂ କଣ୍ଟକକୁଲୈଃ

ଵିକାସଵ୍ଯାସଙ୍ଗଂ ଵିଦଧଦପରାଧୀନମନିଶମ୍ ।

ନଖେନ୍ଦୁଜ୍ଯୋତ୍ସ୍ନାଭିର୍ଵିଶଦରୁଚି କାମାକ୍ଷି ନିତରାମ୍

ଅସାମାନ୍ଯଂ ମନ୍ଯେ ସରସିଜମିଦଂ ତେ ପଦଯୁଗମ୍

॥67॥

ଶ୍ଲୋକ 69

କରୀନ୍ଦ୍ରାଯ ଦ୍ରୁହ୍ଯତ୍ଯଲସଗତିଲୀଲାସୁ ଵିମଲୈଃ

ପଯୋଜୈର୍ମାତ୍ସର୍ଯଂ ପ୍ରକଟଯତି କାମଂ କଲଯତେ ।

ପଦାମ୍ଭୋଜଦ୍ଵନ୍ଦ୍ଵଂ ତଵ ତଦପି କାମାକ୍ଷି ହୃଦଯଂ

ମୁନୀନାଂ ଶାନ୍ତାନାଂ କଥମନିଶମସ୍ମୈ ସ୍ପୃହଯତେ

॥68॥

ଶ୍ଲୋକ 70

ନିରସ୍ତା ଶୋଣିମ୍ନା ଚରଣକିରଣାନାଂ ତଵ ଶିଵେ

ସମିନ୍ଧାନା ସନ୍ଧ୍ଯାରୁଚିରଚଲରାଜନ୍ଯତନଯେ ।

ଅସାମର୍ଥ୍ଯାଦେନଂ ପରିଭଵିତୁମେତତ୍ସମରୁଚାଂ

ସରୋଜାନାଂ ଜାନେ ମୁକୁଲଯତି ଶୋଭାଂ ପ୍ରତିଦିନମ୍

॥69॥

ଶ୍ଲୋକ 71

ଉପାଦିକ୍ଷଦ୍ଦାକ୍ଷ୍ଯଂ ତଵ ଚରଣନାମା ଗୁରୁରସୌ

ମରାଲାନାଂ ଶଙ୍କେ ମସୃଣଗତିଲାଲିତ୍ଯସରଣୌ ।

ଅତସ୍ତେ ନିସ୍ତନ୍ଦ୍ରଂ ନିଯତମମୁନା ସଖ୍ଯପଦଵୀଂ

ପ୍ରପନ୍ନଂ ପାଥୋଜଂ ପ୍ରତି ଦଧତି କାମାକ୍ଷି କୁତୁକମ୍

॥70॥

ଶ୍ଲୋକ 72

ଦଧାନୈଃ ସଂସର୍ଗଂ ପ୍ରକୃତିମଲିନୈଃ ଷଟ୍ପଦକୁଲୈଃ

ଦ୍ଵିଜାଧୀଶଶ୍ଲାଘାଵିଧିଷୁ ଵିଦଧଦ୍ଭିର୍ମୁକୁଲତାମ୍ ।

ରଜୋମିଶ୍ରୈଃ ପଦ୍ମୈର୍ନିଯତମପି କାମାକ୍ଷି ପଦଯୋଃ

ଵିରୋଧସ୍ତେ ଯୁକ୍ତୋ ଵିଷମଶରଵୈରିପ୍ରିଯତମେ

॥71॥

ଶ୍ଲୋକ 73

କଵିତ୍ଵଶ୍ରୀମିଶ୍ରୀକରଣନିପୁଣୌ ରକ୍ଷଣଚଣୌ

ଵିପନ୍ନାନାଂ ଶ୍ରୀମନ୍ନଲିନମସୃଣୌ ଶୋଣକିରଣୌ ।

ମୁନୀନ୍ଦ୍ରାଣାମନ୍ତଃକରଣଶରଣୌ ମନ୍ଦସରଣୌ

ମନୋଜ୍ଞୌ କାମାକ୍ଷ୍ଯା ଦୁରିତହରଣୌ ନୌମି ଚରଣୌ

॥72॥

ଶ୍ଲୋକ 74

ପରସ୍ମାତ୍ସର୍ଵସ୍ମାଦପି ଚ ପରଯୋର୍ମୁକ୍ତିକରଯୋଃ

ନଖଶ୍ରୀଭିର୍ଜ୍ଯୋତ୍ସ୍ନାକଲିତତୁଲଯୋସ୍ତାମ୍ରତଲଯୋଃ ।

ନିଲୀଯେ କାମାକ୍ଷ୍ଯା ନିଗମନୁତଯୋର୍ନାକିନତଯୋଃ

ନିରସ୍ତପ୍ରୋନ୍ମୀଲନ୍ନଲିନମଦଯୋରେଵ ପଦଯୋଃ

॥73॥

ଶ୍ଲୋକ 75

ସ୍ଵଭାଵାଦନ୍ଯୋନ୍ଯଂ କିସଲଯମପୀଦଂ ତଵ ପଦଂ

ମ୍ରଦିମ୍ନା ଶୋଣିମ୍ନା ଭଗଵତି ଦଧାତେ ସଦୃଶତାମ୍ ।

ଵନେ ପୂର୍ଵସ୍ଯେଚ୍ଛା ସତତମଵନେ କିଂ ତୁ ଜଗତାଂ

ପରସ୍ଯେତ୍ଥଂ ଭେଦଃ ସ୍ଫୁରତି ହୃଦି କାମାକ୍ଷି ସୁଧିଯାମ୍

॥74॥

ଶ୍ଲୋକ 76

କଥଂ ଵାଚାଲୋଽପି ପ୍ରକଟମଣିମଞ୍ଜୀରନିନଦୈଃ

ସଦୈଵାନନ୍ଦାର୍ଦ୍ରାନ୍ଵିରଚଯତି ଵାଚଂଯମଜନାନ୍ ।

ପ୍ରକୃତ୍ଯା ତେ ଶୋଣଚ୍ଛଵିରପି ଚ କାମାକ୍ଷି ଚରଣୋ

ମନୀଷାନୈର୍ମଲ୍ଯଂ କଥମିଵ ନୃଣାଂ ମାଂସଲଯତେ

॥75॥

ଶ୍ଲୋକ 77

ଚଲତ୍ତୃଷ୍ଣାଵୀଚୀପରିଚଲନପର୍ଯାକୁଲତଯା

ମୁହୁର୍ଭ୍ରାନ୍ତସ୍ତାନ୍ତଃ ପରମଶିଵଵାମାକ୍ଷି ପରଵାନ୍ ।

ତିତୀର୍ଷୁଃ କାମାକ୍ଷି ପ୍ରଚୁରତରକର୍ମାମ୍ବୁଧିମମୁଂ

କଦାହଂ ଲପ୍ସ୍ଯେ ତେ ଚରଣମଣିସେତୁଂ ଗିରିସୁତେ

॥76॥

ଶ୍ଲୋକ 78

ଵିଶୁଷ୍ଯନ୍ତ୍ଯାଂ ପ୍ରଜ୍ଞାସରିତି ଦୁରିତଗ୍ରୀଷ୍ମସମଯ-

ପ୍ରଭାଵେଣ କ୍ଷୀଣେ ସତି ମମ ମନଃକେକିନି ଶୁଚା ।

ତ୍ଵଦୀଯଃ କାମାକ୍ଷି ସ୍ଫୁରିତଚରଣାମ୍ଭୋଦମହିମା

ନଭୋମାସାଟୋପଂ ନଗପତିସୁତେ କିଂ ନ କୁରୁତେ

॥77॥

ଶ୍ଲୋକ 79

ଵିନମ୍ରାଣାଂ ଚେତୋଭଵନଵଲଭୀସୀମ୍ନି ଚରଣ-

ପ୍ରଦୀପେ ପ୍ରାକାଶ୍ଯଂ ଦଧତି ତଵ ନିର୍ଧୂତତମସି ।

ଅସୀମା କାମାକ୍ଷି ସ୍ଵଯମଲଘୁଦୁଷ୍କର୍ମଲହରୀ

ଵିଘୂର୍ଣନ୍ତୀ ଶାନ୍ତିଂ ଶଲଭପରିପାଟୀଵ ଭଜତେ

॥78॥

ଶ୍ଲୋକ 80

ଵିରାଜନ୍ତୀ ଶୁକ୍ତିର୍ନଖକିରଣମୁକ୍ତାମଣିତତେଃ

ଵିପତ୍ପାଥୋରାଶୌ ତରିରପି ନରାଣାଂ ପ୍ରଣମତାମ୍ ।

ତ୍ଵଦୀଯଃ କାମାକ୍ଷି ଧ୍ରୁଵମଲଘୁଵହ୍ନିର୍ଭଵଵନେ

ମୁନୀନାଂ ଜ୍ଞାନାଗ୍ନେରରଣିରଯମଙ୍ଘିର୍ଵିଜଯତେ

॥79॥

ଶ୍ଲୋକ 81

ସମସ୍ତୈଃ ସଂସେଵ୍ଯଃ ସତତମପି କାମାକ୍ଷି ଵିବୁଧୈଃ

ସ୍ତୁତୋ ଗନ୍ଧର୍ଵସ୍ତ୍ରୀସୁଲଲିତଵିପଞ୍ଚୀକଲରଵୈଃ ।

ଭଵତ୍ଯା ଭିନ୍ଦାନୋ ଭଵଗିରିକୁଲଂ ଜୃମ୍ଭିତତମୋ-

ବଲଦ୍ରୋହୀ ମାତଶ୍ଚରଣପୁରୁହୂତୋ ଵିଜଯତେ

॥80॥

ଶ୍ଲୋକ 82

ଵସନ୍ତଂ ଭକ୍ତାନାମପି ମନସି ନିତ୍ଯଂ ପରିଲସଦ୍-

ଘନଚ୍ଛାଯାପୂର୍ଣଂ ଶୁଚିମପି ନୃଣାଂ ତାପଶମନମ୍ ।

ନଖେନ୍ଦୁଜ୍ଯୋତ୍ସ୍ନାଭିଃ ଶିଶିରମପି ପଦ୍ମୋଦଯକରଂ

ନମାମଃ କାମାକ୍ଷ୍ଯାଶ୍ଚରଣମଧିକାଶ୍ଚର୍ଯକରଣମ୍

॥81॥

ଶ୍ଲୋକ 83

କଵୀନ୍ଦ୍ରାଣାଂ ନାନାଭଣିତିଗୁଣଚିତ୍ରୀକୃତଵଚଃ-

ପ୍ରପଞ୍ଚଵ୍ଯାପାରପ୍ରକଟନକଲାକୌଶଲନିଧିଃ ।

ଅଧଃକୁର୍ଵନ୍ନବ୍ଜଂ ସନକଭୃଗୁମୁଖ୍ଯୈର୍ମୁନିଜନୈଃ

ନମସ୍ଯଃ କାମାକ୍ଷ୍ଯାଶ୍ଚରଣପରମେଷ୍ଠୀ ଵିଜଯତେ

॥82॥

ଶ୍ଲୋକ 84

ଭଵତ୍ଯାଃ କାମାକ୍ଷି ସ୍ଫୁରିତପଦପଙ୍କେରୁହଭୁଵାଂ

ପରାଗାଣାଂ ପୂରୈଃ ପରିହୃତକଲଙ୍କଵ୍ଯତିକରୈଃ ।

ନତାନାମାମୃଷ୍ଟେ ହୃଦଯମୁକୁରେ ନିର୍ମଲରୁଚି

ପ୍ରସନ୍ନେ ନିଶ୍ଶେଷଂ ପ୍ରତିଫଲତି ଵିଶ୍ଵଂ ଗିରିସୁତେ

॥83॥

ଶ୍ଲୋକ 85

ତଵ ତ୍ରସ୍ତଂ ପାଦାତ୍କିସଲଯମରଣ୍ଯାନ୍ତରମଗାତ୍

ପରଂ ରେଖାରୂପଂ କମଲମମୁମେଵାଶ୍ରିତମଭୂତ୍ ।

ଜିତାନାଂ କାମାକ୍ଷି ଦ୍ଵିତଯମପି ଯୁକ୍ତଂ ପରିଭଵେ

ଵିଦେଶେ ଵାସୋ ଵା ଶରଣଗମନଂ ଵା ନିଜରିପୋଃ

॥84॥

ଶ୍ଲୋକ 86

ଗୃହୀତ୍ଵା ଯାଥାର୍ଥ୍ଯଂ ନିଗମଵଚସାଂ ଦେଶିକକୃପା-

କଟାକ୍ଷର୍କଜ୍ଯୋତିଶ୍ଶମିତମମତାବନ୍ଧତମସଃ ।

ଯତନ୍ତେ କାମାକ୍ଷି ପ୍ରତିଦିଵସମନ୍ତର୍ଦ୍ରଢଯିତୁଂ

ତ୍ଵଦୀଯଂ ପାଦାବ୍ଜଂ ସୁକୃତପରିପାକେନ ସୁଜନାଃ

॥85॥

ଶ୍ଲୋକ 87

ଜଡାନାମପ୍ଯମ୍ବ ସ୍ମରଣସମଯେ ତଵଚ୍ଚରଣଯୋଃ

ଭ୍ରମନ୍ମନ୍ଥକ୍ଷ୍ମାଭୃଦ୍ଧୁମୁଘୁମିତସିନ୍ଧୁପ୍ରତିଭଟାଃ ।

ପ୍ରସନ୍ନାଃ କାମାକ୍ଷି ପ୍ରସଭମଧରସ୍ପନ୍ଦନକରା

ଭଵନ୍ତି ସ୍ଵଚ୍ଛନ୍ଦଂ ପ୍ରକୃତିପରିପକ୍କା ଭଣିତଯଃ

॥86॥

ଶ୍ଲୋକ 88

ଵହନ୍ନପ୍ଯଶ୍ରାନ୍ତଂ ମଧୁରନିନଦଂ ହଂସକମସୌ

ତମେଵାଧଃ କର୍ତୁଂ କିମିଵ ଯତତେ କେଲିଗମନେ ।

ଭଵସ୍ଯୈଵାନନ୍ଦଂ ଵିଦଧଦପି କାମାକ୍ଷି ଚରଣୋ

ଭଵତ୍ଯାସ୍ତଦ୍ଦ୍ରୋହଂ ଭଗଵତି କିମେଵଂ ଵିତନୁତେ

॥87॥

ଶ୍ଲୋକ 89

ଯଦତ୍ଯନ୍ତଂ ତାମ୍ଯତ୍ଯଲସଗତିଵାର୍ତାସ୍ଵପି ଶିଵେ

ତଦେତତ୍କାମାକ୍ଷି ପ୍ରକୃତିମୃଦୁଲଂ ତେ ପଦଯୁଗମ୍ ।

କିରୀଟୈଃ ସଙ୍ଘଟ୍ଟଂ କଥମିଵ ସୁରୌଘସ୍ଯ ସହତେ

ମୁନୀନ୍ଦ୍ରାଣାମାସ୍ତେ ମନସି ଚ କଥଂ ସୂଚିନିଶିତେ

॥88॥

ଶ୍ଲୋକ 90

ମନୋରଙ୍ଗେ ମତ୍କେ ଵିବୁଧଜନସମ୍ମୋଦଜନନୀ

ସରାଗଵ୍ଯାସଙ୍ଗଂ ସରସମୃଦୁସଞ୍ଚାରସୁଭଗା ।

ମନୋଜ୍ଞା କାମାକ୍ଷି ପ୍ରକଟଯତୁ ଲାସ୍ଯପ୍ରକରଣଂ

ରଣନ୍ମଞ୍ଜୀରା ତେ ଚରଣଯୁଗଲୀନର୍ତକଵଧୂଃ

॥89॥

ଶ୍ଲୋକ 91

ପରିଷ୍କୁର୍ଵନ୍ମାତଃ ପଶୁପତିକପର୍ଦଂ ଚରଣରାଟ୍

ପରାଚାଂ ହୃତ୍ପଦ୍ମଂ ପରମଭଣିତୀନାଂ ଚ ମକୁଟମ୍ ।

ଭଵାଖ୍ଯେ ପାଥୋଧୌ ପରିହରତୁ କାମାକ୍ଷି ମମତା-

ପରାଧୀନତ୍ଵଂ ମେ ପରିମୁଷିତପାଥୋଜମହିମା

॥90॥

ଶ୍ଲୋକ 92

ପ୍ରସୂନୈଃ ସମ୍ପର୍କାଦମରତରୁଣୀକୁନ୍ତଲଭଵୈଃ

ଅଭୀଷ୍ଟାନାଂ ଦାନାଦନିଶମପି କାମାକ୍ଷି ନମତାମ୍ ।

ସ୍ଵସଙ୍ଗାତ୍କଙ୍କେଲିପ୍ରସଵଜନକତ୍ଵେନ ଚ ଶିଵେ

ତ୍ରିଧା ଧତ୍ତେ ଵାର୍ତାଂ ସୁରଭିରିତି ପାଦୋ ଗିରିସୁତେ

॥91॥

ଶ୍ଲୋକ 93

ମହାମୋହସ୍ତେନଵ୍ଯତିକରଭଯାତ୍ପାଲଯତି ଯୋ

ଵିନିକ୍ଷିପ୍ତଂ ସ୍ଵସ୍ମିନ୍ନିଜଜନମନୋରତ୍ନମନିଶମ୍ ।

ସ ରାଗସ୍ଯୋଦ୍ରେକାତ୍ସତତମପି କାମାକ୍ଷି ତରସା

କିମେଵଂ ପାଦୋଽସୌ କିସଲଯରୁଚିଂ ଚୋରଯତି ତେ

॥92॥

ଶ୍ଲୋକ 94

ସଦା ସ୍ଵାଦୁଙ୍କାରଂ ଵିଷଯଲହରୀଶାଲିକଣିକାଂ

ସମାସ୍ଵାଦ୍ଯ ଶ୍ରାନ୍ତଂ ହୃଦଯଶୁକପୋତଂ ଜନନି ମେ ।

କୃପାଜାଲେ ଫାଲେକ୍ଷଣମହିଷି କାମାକ୍ଷି ରଭସାତ୍

ଗୃହୀତ୍ଵା ରୁନ୍ଧୀଥାରସ୍ତଵ ପଦଯୁଗୀପଞ୍ଜରପୁଟେ

॥93॥

ଶ୍ଲୋକ 95

ଧୁନାନଂ କାମାକ୍ଷି ସ୍ମରଣଲଵମାତ୍ରେଣ ଜଡିମ-

ଜ୍ଵରପ୍ରୌଢିଂ ଗୂଢସ୍ଥିତି ନିଗମନୈକୁଞ୍ଜକୁହରେ ।

ଅଲଭ୍ଯଂ ସର୍ଵେଷାଂ କତିଚନ ଲଭନ୍ତେ ସୁକୃତିନଃ

ଚିରାଦନ୍ଵିଷ୍ଯନ୍ତସ୍ତଵ ଚରଣସିଦ୍ଧୌଷଧମିଦମ୍

॥94॥

ଶ୍ଲୋକ 96

ରଣନ୍ମଞ୍ଜୀରାଭ୍ଯାଂ ଲଲିତଗମନାଭ୍ଯାଂ ସୁକୃତିନାଂ

ମନୋଵାସ୍ତଵ୍ଯାଭ୍ଯାଂ ମଥିତତିମିରାଭ୍ଯାଂ ନଖରୁଚା ।

ନିଧେଯାଭ୍ଯାଂ ପତ୍ଯା ନିଜଶିରସି କାମାକ୍ଷି ସତତଂ

ନମସ୍ତେ ପାଦାଭ୍ଯାଂ ନଲିନମୃଦୁଲାଭ୍ଯାଂ ଗିରିସୁତେ

॥95॥

ଶ୍ଲୋକ 97

ସୁରାଗେ ରାକେନ୍ଦୁପ୍ରତିନିଧିମୁଖେ ପର୍ଵତସୁତେ

ଚିରାଲ୍ଲଭ୍ଯେ ଭକ୍ତ୍ଯା ଶମଧନଜନାନାଂ ପରିଷଦା ।

ମନୋଭୃଙ୍ଗୋ ମତ୍କଃ ପଦକମଲଯୁଗ୍ମେ ଜନନି ତେ

ପ୍ରକାମଂ କାମାକ୍ଷି ତ୍ରିପୁରହରଵାମାକ୍ଷି ରମତାମ୍

॥96॥

ଶ୍ଲୋକ 98

ଶିଵେ ସଂଵିଦ୍ରୂପେ ଶଶିଶକଲଚୂଡପ୍ରିଯତମେ

ଶନୈର୍ଗତ୍ଯାଗତ୍ଯା ଜିତସୁରଵରେଭେ ଗିରିସୁତେ ।

ଯତନ୍ତେ ସନ୍ତସ୍ତେ ଚରଣନଲିନାଲାନଯୁଗଲେ

ସଦା ବଦ୍ଧଂ ଚିତ୍ତପ୍ରମଦକରିଯୂଥଂ ଦୃଢତରମ୍

॥97॥

ଶ୍ଲୋକ 99

ଯଶଃ ସୂତେ ମାତର୍ମଧୁରକଵିତାଂ ପକ୍ଷ୍ମଲଯତେ

ଶ୍ରିଯଂ ଦତ୍ତେ ଚିତ୍ତେ କମପି ପରିପାକଂ ପ୍ରଥଯତେ ।

ସତାଂ ପାଶଗ୍ରନ୍ଥିଂ ଶିଥିଲଯତି କିଂ କିଂ ନ କୁରୁତେ

ପ୍ରପନ୍ନେ କାମାକ୍ଷ୍ଯାଃ ପ୍ରଣତିପରିପାଟୀ ଚରଣଯୋଃ

॥98॥

ଶ୍ଲୋକ 100

ମନୀଷାଂ ମାହେନ୍ଦ୍ରୀଂ କକୁଭମିଵ ତେ କାମପି ଦଶାଂ

ପ୍ରଧତ୍ତେ କାମାକ୍ଷ୍ଯାଶ୍ଚରଣତରୁଣାଦିତ୍ଯକିରଣଃ ।

ଯଦୀଯେ ସମ୍ପର୍କେ ଧୃତରସମରନ୍ଦା କଵଯତାଂ

ପରୀପାକଂ ଧତ୍ତେ ପରିମଲଵତୀ ସୂକ୍ତିନଲିନୀ

॥99॥

ଶ୍ଲୋକ 101

ପୁରା ମାରାରାତିଃ ପୁରମଜଯଦମ୍ବ ସ୍ତଵଶତୈଃ

ପ୍ରସନ୍ନାଯାଂ ସତ୍ଯାଂ ତ୍ଵଯି ତୁହିନଶୈଲେନ୍ଦ୍ରତନଯେ ।

ଅତସ୍ତେ କାମାକ୍ଷି ସ୍ଫୁରତୁ ତରସା କାଲସମଯେ

ସମାଯାତେ ମାତର୍ମମ ମନସି ପାଦାବ୍ଜଯୁଗଲମ୍

॥100॥

ଶ୍ଲୋକ 102

ପଦଦ୍ଵନ୍ଦ୍ଵଂ ମନ୍ଦଂ ଗତିଷୁ ନିଵସନ୍ତଂ ହୃଦି ସତାଂ

ଗିରାମନ୍ତେ ଭ୍ରାନ୍ତଂ କୃତକରହିତାନାଂ ପରିବୃଢେ ।

ଜନାନାମାନନ୍ଦଂ ଜନନି ଜନଯନ୍ତଂ ପ୍ରଣମତାଂ

ତ୍ଵଦୀଯଂ କାମାକ୍ଷି ପ୍ରତିଦିନମହଂ ନୌମି ଵିମଲମ୍

॥101॥

ଶ୍ଲୋକ 103

ଇଦଂ ଯଃ କାମାକ୍ଷ୍ଯାଶ୍ଚରଣନଲିନସ୍ତୋତ୍ରଶତକଂ

ଜପେନ୍ନିତ୍ଯଂ ଭକ୍ତ୍ଯା ନିଖିଲଜଗଦାହ୍ଲାଦଜନକମ୍ ।

ସ ଵିଶ୍ଵେଷାଂ ଵନ୍ଦ୍ଯଃ ସକଲକଵିଲୋକୈକତିଲକଃ

ଚିରଂ ଭୁକ୍ତ୍ଵା ଭୋଗାନ୍ପରିଣମତି ଚିଦ୍ରୂପକଲଯା

॥102॥

ଶ୍ଲୋକ 104

॥ ଇତି ପାଦାରଵିନ୍ଦଶତକଂ ସମ୍ପୂର୍ଣମ୍ ॥