Mooka Pancha Sathi 2

মূক পঞ্চ শতি 2 - পাদারবিন্দ শতকম্

শ্লোক 1

মহিম্নঃ পন্থানং মদনপরিপন্থিপ্রণযিনি

প্রভুর্নির্ণেতুং তে ভবতি যতমানোঽপি কতমঃ ।

তথাপি শ্রীকাঞ্চীবিহৃতিরসিকে কোঽপি মনসো

বিপাকস্ত্বত্পাদস্তুতিবিধিষু জল্পাকযতি মাম্

শ্লোক 2

গলগ্রাহী পৌরন্দরপুরবনীপল্লবরুচাং

ধৃতপাথম্যানামরুণমহসামাদিমগুরুঃ ।

সমিন্ধে বন্ধূকস্তবকসহযুধ্বা দিশি দিশি

প্রসর্পন্কামাক্ষ্যাশ্চরণকিরণানামরুণিমা

॥1॥

শ্লোক 3

মরালীনাং যানাভ্যসনকলনামূলগুরবে

দরিদ্রাণাং ত্রাণব্যতিকরসুরোদ্যানতরবে ।

তমস্কাণ্ডপ্রৌঢিপ্রকটনতিরস্কারপটবে

জনোঽযং কামাক্ষ্যাশ্চরণনলিনায স্পৃহযতে

॥2॥

শ্লোক 4

বহন্তী সৈন্দূরীং সরণিমবনম্রামরপুর়ী-

পুরন্ধ্রীসীমন্তে কবিকমলবালার্কসুষমা ।

ত্রযীসীমন্তিন্যাঃ স্তনতটনিচোলারুণপটী

বিভান্তী কামাক্ষ্যাঃ পদনলিনকান্তির্বিজযতে

॥3॥

শ্লোক 5

প্রণম্রীভূতস্য প্রণযকলহত্রস্তমনসঃ

স্মরারাতেশ্চূডাবিযতি গৃহমেধী হিমকরঃ ।

যযোঃ সান্ধ্যাং কান্তিং বহতি সুষমাভিশ্চরণযোঃ

তযোর্মে কামাক্ষ্যা হৃদযমপতন্দ্রং বিহরতাম্

॥4॥

শ্লোক 6

যযোঃ পীঠাযন্তে বিবুধমুকুটীনাং পটলিকা

যযোঃ সৌধাযন্তে স্বযমুদযভাজো ভণিতযঃ ।

যযোঃ দাসাযন্তে সরসিজভবাদ্যাশ্চরণযোঃ

তযোর্মে কামাক্ষ্যা দিনমনু বরীবর্তু হৃদযম্

॥5॥

শ্লোক 7

নযন্তী সঙ্কোচং সরসিজরুচং দিক্পরিসরে

সৃজন্তী লৌহিত্যং নখকিরণচন্দ্রার্ধখচিতা ।

কবীন্দ্রাণাং হৃত্কৈরববিকসনোদ্যোগজননী

স্ফুরন্তী কামাক্ষ্যাঃ চরণরুচিসন্ধ্যা বিজযতে

॥6॥

শ্লোক 8

বিরাবৈর্মাঞ্জীরৈঃ কিমপি কথযন্তীব মধুরং

পুরস্তাদানম্রে পুরবিজযিনি স্মেরবদনে ।

বযস্যেব প্রৌঢা শিথিলযতি যা প্রেমকলহ-

প্ররোহং কামাক্ষ্যাঃ চরণযুগলী সা বিজযতে

॥7॥

শ্লোক 9

সুপর্বস্ত্রীলোলালকপরিচিতং ষট্পদকুলৈঃ

স্ফুরল্লাক্ষারাগং তরুণতরণিজ্যোতিররুণৈঃ ।

ভৃতং কান্ত্যম্ভোভিঃ বিসৃমরমরন্দৈঃ সরসিজৈঃ

বিধত্তে কামাক্ষ্যাঃ চরণযুগলং বন্ধুপদবীম্

॥8॥

শ্লোক 10

রজঃসংসর্গেঽপি স্থিতমরজসামেব হৃদযে

পরং রক্তত্বেন স্থিতমপি বিরক্তৈকশরণম্ ।

অলভ্যং মন্দানাং দধদপি সদা মন্দগতিতাং

বিধত্তে কামাক্ষ্যাঃ চরণযুগমাশ্চর্যলহরীম্

॥9॥

শ্লোক 11

জটালা মঞ্জীরস্ফুরদরুণরত্নাংশুনিকরৈঃ

নিষিদন্তী মধ্যে নখরুচিঝরীগাঙ্গপযসাম্ ।

জগত্ত্রাণং কর্তুং জননি মম কামাক্ষি নিযতং

তপশ্চর্যাং ধত্তে তব চরণপাথোজযুগলী

॥10॥

শ্লোক 12

তুলাকোটিদ্বন্দ্বক্কণিতভণিতাভীতিবচসোঃ

বিনম্রং কামাক্ষী বিসৃমরমহঃপাটলিতযোঃ ।

ক্ষণং বিন্যাসেন ক্ষপিততমসোর্মে ললিতযোঃ

পুনীযান্মূর্ধানং পুরহরপুরন্ধ্রী চরণযোঃ

॥11॥

শ্লোক 13

ভবানি দ্রুহ্যেতাং ভবনিবিডিতেভ্যো মম মুহু-

স্তমোব্যামোহেভ্যস্তব জননি কামাক্ষি চরণৌ ।

যযোর্লাক্ষাবিন্দুস্ফুরণধরণাদ্ধ্বর্জটিজটা-

কুটীরা শোণাঙ্কং বহতি বপুরেণাঙ্ককলিকা

॥12॥

শ্লোক 14

পবিত্রীকুর্যুর্নুঃ পদতলভুবঃ পাটলরুচঃ

পরাগাস্তে পাপপ্রশমনধুরীণাঃ পরশিবে ।

কণং লব্ধুং যেষাং নিজশিরসি কামাক্ষি বিবশা

বলন্তো ব্যাতন্বন্ত্যহমহমিকাং মাধবমুখাঃ

॥13॥

শ্লোক 15

বলাকামালাভির্নখরুচিমযীভিঃ পরিবৃতে

বিনম্রস্বর্নারীবিকচকচকালাম্বুদকুলে ।

স্ফুরন্তঃ কামাক্ষি স্ফুটদলিতবন্ধূকসুহৃদ-

স্তটিল্লেখাযন্তে তব চরণপাথোজকিরণাঃ

॥14॥

শ্লোক 16

সরাগঃ সদ্বেষঃ প্রসৃমরসরোজে প্রতিদিনং

নিসর্গাদাক্রামন্বিবুধজনমূর্ধানমধিকম্ ।

কথঙ্কারং মাতঃ কথয পদপদ্মস্তব সতাং

নতানাং কামাক্ষি প্রকটযতি কৈবল্যসরণিম্

॥15॥

শ্লোক 17

জপালক্ষ্মীশোণো জনিতপরমজ্ঞাননলিনী-

বিকাসব্যাসঙ্গো বিফলিতজগজ্জাড্যগরিমা ।

মনঃপূর্বাদ্রিং মে তিলকযতু কামাক্ষি তরসা

তমস্কাণ্ডদ্রোহী তব চরণপাথোজরমণঃ

॥16॥

শ্লোক 18

নমস্কুর্মঃ প্রেঙ্খন্মণিকটকনীলোত্পলমহঃ-

পযোধৌ রিঙ্খদ্ভির্নখকিরণফেনৈর্ধবলিতে ।

স্ফুটং কুর্বাণায প্রবলচলদৌর্বানলশিখা-

বিতর্কং কামাক্ষ্যাঃ সততমরুণিম্নে চরণযোঃ

॥17॥

শ্লোক 19

শিবে পাশাযেতামলঘুনি তমঃকূপকুহরে

দিনাধীশাযেতাং মম হৃদযপাথোজবিপিনে ।

নভোমাসাযেতাং সরসকবিতারীতিসরিতি

ত্বদীযৌ কামাক্ষি প্রসৃতকিরণৌ দেবি চরণৌ

॥18॥

শ্লোক 20

নিষক্তং শ্রুত্যন্তে নযনমিব সদ্বৃত্তরুচিরৈঃ

সমৈর্জুষ্টং শুদ্ধৈরধরমিব রম্যৈর্দ্বিজগণৈঃ ।

শিবে বক্ষোজন্মদ্বিতযমিব মুক্তাশ্রিতমুমে

ত্বদীযং কামাক্ষি প্রণতশরণং নৌমি চরণম্

॥19॥

শ্লোক 21

নমস্যাসংসজ্জন্নমুচিপরিপন্থিপ্রণযিনী-

নিসর্গপ্রেঙ্খোলত্কুরলকুলকালাহিশবলে ।

নখচ্ছাযাদুগ্ধোদধিপযসি তে বৈদ্রুমরুচাং

প্রচারং কামাক্ষি প্রচুরযতি পাদাব্জসুষমা

॥20॥

শ্লোক 22

কদা দূরীকর্তুং কটুদুরিতকাকোলজনিতং

মহান্তং সন্তাপং মদনপরিপন্থিপ্রিযতমে ।

ক্ষণাত্তে কামাক্ষি ত্রিভুবনপরীতাপহরণে

পটীযাংসং লপ্স্যে পদকমলসেবামৃতরসম্

॥21॥

শ্লোক 23

যযোঃ সান্ধ্যং রোচিঃ সততমরুণিম্নে স্পৃহযতে

যযোশ্চান্দ্রী কান্তিঃ পরিপততি দৃষ্ট্বা নখরুচিম্ ।

যযোঃ পাকোদ্রেকং পিপঠিষতি ভক্ত্যা কিসলযং

ম্রদিম্নঃ কামাক্ষ্যা মনসি চরণৌ তৌ তনুমহে

॥22॥

শ্লোক 24

জগন্নেদং নেদং পরমিতি পরিত্যজ্য যতিভিঃ

কুশাগ্রীযস্বান্তৈঃ কুশলধিষণৈঃ শাস্ত্রসরণৌ ।

গবেষ্যং কামাক্ষি ধ্রুবমকৃতকানাং গিরিসুতে

গিরামৈদম্পর্যং তব চরণপদ্মং বিজযতে

॥23॥

শ্লোক 25

কৃতস্নানং শাস্ত্রামৃতসরসি কামাক্ষি নিতরাং

দধানং বৈশদ্যং কলিতরসমানন্দসুধযা ।

অলঙ্কারং ভূমের্মুনিজনমনশ্চিন্মযমহা-

পযোধেরন্তস্স্থং তব চরণরত্নং মৃগযতে

॥24॥

শ্লোক 26

মনোগেহে মোহোদ্ভবতিমিরপূর্ণে মম মুহুঃ

দরিদ্রাণীকুর্বন্দিনকরসহস্রাণি কিরণৈঃ ।

বিধত্তাং কামাক্ষি প্রসৃমরতমোবঞ্চনচণঃ

ক্ষণার্ধং সান্নিধ্যং চরণমণিদীপো জননি তে

॥25॥

শ্লোক 27

কবীনাং চেতোবন্নখররুচিসম্পর্কি বিবুধ-

স্রবন্তীস্রোতোবত্পটুমুখরিতং হংসকরবৈঃ ।

দিনারম্ভশ্রীবন্নিযতমরুণচ্ছাযসুভগং

মদন্তঃ কামাক্ষ্যাঃ স্ফুরতু পদপঙ্কেরুহযুগম্

॥26॥

শ্লোক 28

সদা কিং সম্পর্কাত্প্রকৃতিকঠিনৈর্নাকিমুকুটৈঃ

তটৈর্নীহারাদ্রেরধিকমণুনা যোগিমনসা ।

বিভিন্তে সম্মোহং শিশিরযতি ভক্তানপি দৃশাম্

অদৃশ্যং কামাক্ষি প্রকটযতি তে পাদযুগলম্

॥27॥

শ্লোক 29

পবিত্রাভ্যামম্ব প্রকৃতিমৃদুলাভ্যাং তব শিবে

পদাভ্যাং কামাক্ষি প্রসভমভিভূতৈঃ সচকিতৈঃ ।

প্রবালৈরম্ভোজৈরপি চ বনবাসব্রতদশাঃ

সদৈবারভ্যন্তে পরিচরিতনানাদ্বিজগণৈঃ

॥28॥

শ্লোক 30

চিরাদ্দৃশ্যা হংসৈঃ কথমপি সদা হংসসুলভং

নিরস্যন্তী জাড্যং নিযতজডমধ্যৈকশরণম্ ।

অদোষব্যাসঙ্গা সততমপি দোষাপ্তিমলিনং

পযোজং কামাক্ষ্যাঃ পরিহসতি পাদাব্জযুগলী

॥29॥

শ্লোক 31

সুরাণামানন্দপ্রবলনতযা মণ্ডনতযা

নখেন্দুজ্যোত্স্নাভির্বিসৃমরতমঃখণ্ডনতযা ।

পযোজশ্রীদ্বেষব্রতরততযা ত্বচ্চরণযোঃ

বিলাসঃ কামাক্ষি প্রকটযতি নৈশাকরদশাম্

॥30॥

শ্লোক 32

সিতিম্না কান্তীনাং নখরজনুষাং পাদনলিন-

চ্ছবীনাং শোণিম্না তব জননি কামাক্ষি নমনে ।

লভন্তে মন্দারগ্রথিতনববন্ধূককুসুম-

স্রজাং সামীচীন্যং সুরপুরপুরন্ধ্রীকচভরাঃ

॥31॥

শ্লোক 33

স্ফুরন্মধ্যে শুদ্ধে নখকিরণদুগ্ধাব্ধিপযসাং

বহন্নব্জং চক্রং দরমপি চ লেখাত্মকতযা ।

শ্রিতো মাত্স্যং রূপং শ্রিযমপি দধানো নিরুপমাং

ত্রিধামা কামাক্ষ্যাঃ পদনলিননামা বিজযতে

॥32॥

শ্লোক 34

নখশ্রীসন্নদ্ধস্তবকনিচিতঃ স্বৈশ্চ কিরণৈঃ

পিশঙ্গৈঃ কামাক্ষি প্রকটিতলসত্পল্লবরুচিঃ ।

সতাং গম্যঃ শঙ্কে সকলফলদাতা সুরতরুঃ

ত্বদীযঃ পাদোঽযং তুহিনগিরিরাজন্যতনযে

॥33॥

শ্লোক 35

বষট্কুর্বন্মাঞ্জীরকলকলৈঃ কর্মলহরী-

হবীংষি প্রৌদ্দণ্ডং জ্বলতি পরমজ্ঞানদহনে ।

মহীযান্কামাক্ষি স্ফুটমহসি জোহোতি সুধিযাং

মনোবেদ্যাং মাতস্তব চরণযজ্বা গিরিসুতে

॥34॥

শ্লোক 36

মহামন্ত্রং কিঞ্চিন্মণিকটকনাদৈর্মৃদু জপন্

ক্ষিপন্দিক্ষু স্বচ্ছং নখরুচিমযং ভাস্মনরজঃ ।

নতানাং কামাক্ষি প্রকৃতিপটুরচ্চাট্য মমতা-

পিশাচীং পাদোঽযং প্রকটযতি তে মান্ত্রিকদশাম্

॥35॥

শ্লোক 37

উদীতে বোধেন্দৌ তমসি নিতরাং জগ্মুষি দশাং

দরিদ্রাং কামাক্ষি প্রকটমনুরাগং বিদধতী ।

সিতেনাচ্ছাদ্যাঙ্গং নখরুচিপটেনাঙ্ঘ্রিযুগলী-

পুরন্ধ্রী তে মাতঃ স্বযমভিসরত্যেব হৃদযম্

॥36॥

শ্লোক 38

দিনারম্ভঃ সম্পন্নলিনবিপিনানামভিনবো

বিকাসো বাসন্তঃ সুকবিপিকলোকস্য নিযতঃ ।

প্রদোষঃ কামাক্ষি প্রকটপরমজ্ঞানশশিন-

শ্চকাস্তি ত্বত্পাদস্মরণমহিমা শৈলতনযে

॥37॥

শ্লোক 39

ধৃতচ্ছাযং নিত্যং সরসিরুহমৈত্রীপরিচিতং

নিধানং দীপ্তীনাং নিখিলজগতাং বোধজনকম্ ।

মুমুক্ষূণাং মার্গপ্রথনপটু কামাক্ষি পদবীং

পদং তে পাতঙ্গীং পরিকলযতে পর্বতসুতে

॥38॥

শ্লোক 40

শনৈস্তীর্ত্বা মোহাম্বুধিমথ সমারোঢুমনসঃ

ক্রমাত্কৈবল্যাখ্যাং সুকৃতিসুলভাং সৌধবলভীম্ ।

লভন্তে নিঃশ্রেণীমিব ঝটিতি কামাক্ষি চরণং

পুরশ্চর্যাভিস্তে পুরমথনসীমন্তিনি জনাঃ

॥39॥

শ্লোক 41

প্রচণ্ডার্তিক্ষোভপ্রমথনকৃতে প্রাতিভসরি-

ত্প্রবাহপ্রোদ্দণ্ডীকরণজলদায প্রণমতাম্ ।

প্রদীপায প্রৌঢে ভবতমসি কামাক্ষি চরণ-

প্রসাদৌন্মুখ্যায স্পৃহযতি জনোঽযং জননি তে

॥40॥

শ্লোক 42

মরুদ্ভিঃ সংসেব্যা সততমপি চাঞ্চল্যরহিতা

সদারুণ্যং যান্তী পরিণতিদরিদ্রাণসুষমা ।

গুণোত্কর্ষান্মাঞ্জীরককলকলৈস্তর্জনপটুঃ

প্রবালং কামাক্ষ্যাঃ পরিহসতি পাদাব্জযুগলী

॥41॥

শ্লোক 43

জগদ্রক্ষাদক্ষা জলজরুচিশিক্ষাপটুতরা

সমৈর্নম্যা রম্যা সততমভিগম্যা বুধজনৈঃ ।

দ্বযী লীলালোলা শ্রুতিষু সুরপালাদিমুকুটী-

তটীসীমাধামা তব জননি কামাক্ষি পদযোঃ

॥42॥

শ্লোক 44

গিরাং দূরৌ চোরৌ জডিমতিমিরাণাং কৃতজগ-

ত্পরিত্রাণৌ শোণৌ মুনিহৃদযলীলৈকনিপুণৌ ।

নখৈঃ স্মেরৌ সারৌ নিগমবচসাং খণ্ডিতভব-

গ্রহোন্মাদৌ পাদৌ তব জননি কামাক্ষি কলযে

॥43॥

শ্লোক 45

অবিশ্রান্তং পঙ্কং যদপি কলযন্যাবকমযং

নিরস্যন্কামাক্ষি প্রণমনজুষাং পঙ্কমখিলম্ ।

তুলাকোটিদ্বন্দং দধদপি চ গচ্ছন্নতুলতাং

গিরাং মার্গং পাদো গিরিবরসুতে লঙ্ঘযতি তে

॥44॥

শ্লোক 46

প্রবালং সব্রীলং বিপিনবিবরে বেপযতি যা

স্ফুরল্লীলং বালাতপমধিকবালং বদতি যা ।

রুচিং সান্ধ্যাং বন্ধ্যাং বিরচযতি যা বর্ধযতু সা

শিবং মে কামাক্ষ্যাঃ পদনলিনপাটল্যলহরী

॥45॥

শ্লোক 47

কিরঞ্জ্যোত্স্নারীতিং নখমুখরুচা হংসমনসাং

বিতন্বানঃ প্রীতিং বিকচতরুণাম্ভোরুহরুচিঃ ।

প্রকাশঃ শ্রীপাদস্তব জননি কামাক্ষি তনুতে

শরত্কালপ্রৌঢিং শশিশকলচূডপ্রিযতমে

॥46॥

শ্লোক 48

নখাঙ্কূরস্মেরদ্যুতিবিমলগঙ্গাম্ভসি সুখং

কৃতস্নানং জ্ঞানামৃতমমলমাস্বাদ্য নিযতম্ ।

উদঞ্চন্মঞ্জীরস্ফুরণমণিদীপে মম মনো

মনোজ্ঞে কামাক্ষ্যাশ্চরণমণিহর্ম্যে বিহরতাম্

॥47॥

শ্লোক 49

ভবাম্ভোধৌ নৌকাং জডিমবিপিনে পাবকশিখা-

মমর্ত্যেন্দ্রাদীনামধিমুকুটমুত্তংসকলিকাম্ ।

জগত্তাপে জ্যোত্স্নামকৃতকবচঃপঞ্জরপুটে

শুকস্ত্রীং কামাক্ষ্যা মনসি কলযে পাদযুগলীম্

॥48॥

শ্লোক 50

পরত্মপ্রাকাশ্যপ্রতিফলনচুঞ্চুঃ প্রণমতাং

মনোজ্ঞস্ত্বত্পাদো মণিমুকুরমুদ্রাং কলযতে ।

যদীযাং কামাক্ষি প্রকৃতিমসৃণাঃ শোধকদশাং

বিধাতুং চেষ্ঠন্তে বলরিপুবধূটীকচভরাঃ

॥49॥

শ্লোক 51

অবিশ্রান্তং তিষ্ঠন্নকৃতকবচঃকন্দরপুটী-

কুটীরান্তঃ প্রৌঢং নখরুচিসটালীং প্রকটযন্ ।

প্রচণ্ডং খণ্ডত্বং নযতু মম কামাক্ষি তরসা

তমোবেতণ্ডেন্দ্রং তব চরণকণ্ঠীরবপতিঃ

॥50॥

শ্লোক 52

পুরস্তাত্কামাক্ষি প্রচুররসমাখণ্ডলপুরী-

পুরন্ধ্রীণাং লাস্যং তব ললিতমালোক্য শনকৈঃ ।

নখশ্রীভিঃ স্মেরা বহু বিতনুতে নূপুররবৈ-

শ্চমত্কৃত্যা শঙ্কে চরণযুগলী চাটুরচনাঃ

॥51॥

শ্লোক 53

সরোজং নিন্দন্তী নখকিরণকর্পূরশিশিরা

নিষিক্তা মারারের্মুকুটশশিরেখাহিমজলৈঃ ।

স্ফুরন্তী কামাক্ষি স্ফুটরুচিমযে পল্লবচযে

তবাধত্তে মৈত্রীং পথিকসুদৃশা পাদযুগলী

॥52॥

শ্লোক 54

নতানাং সম্পত্তেরনবরতমাকর্ষণজপঃ

প্ররোহত্সংসারপ্রসরগরিমস্তম্ভনজপঃ ।

ত্বদীযঃ কামাক্ষি স্মরহরমনোমোহনজপঃ

পটীযান্নঃ পাযাত্পদনলিনমঞ্জীরনিনদঃ

॥53॥

শ্লোক 55

বিতন্বীথা নাথে মম শিরসি কামাক্ষি কৃপযা

পদাম্ভোজন্যাসং পশুপরিবৃঢপ্রাণদযিতে ।

পিবন্তো যন্মুদ্রাং প্রকটমুপকম্পাপরিসরং

দৃশা নানন্দ্যন্তে নলিনভবনারাযণমুখাঃ

॥54॥

শ্লোক 56

প্রণামোদ্যদ্বৃন্দারমুকুটমন্দারকলিকা-

বিলোলল্লোলম্বপ্রকরমযধূমপ্রচুরিমা ।

প্রদীপ্তঃ পাদাব্জদ্যুতিবিততিপাটল্যলহরী-

কৃশানুঃ কামাক্ষ্যা মম দহতু সংসারবিপিনম্

॥55॥

শ্লোক 57

বলক্ষশ্রীরৃক্ষাধিপশিশুসদৃক্ষৈস্তব নখৈঃ

জিঘৃক্ষুর্দক্ষত্বং সরসিরুহভিক্ষুত্বকরণে ।

ক্ষণান্মে কামাক্ষি ক্ষপিতভবসঙ্ক্ষোভগরিমা

বচোবৈচক্ষন্যং চরণযুগলী পক্ষ্মলযতাত্

॥56॥

শ্লোক 58

সমন্তাত্কামাক্ষি ক্ষততিমিরসন্তানসুভগান্

অনন্তাভির্ভাভির্দিনমনু দিগন্তান্বিরচযন্ ।

অহন্তাযা হন্তা মম জডিমদন্তাবলহরিঃ

বিভিন্তাং সন্তাপং তব চরণচিন্তামণিরসৌ

॥57॥

শ্লোক 59

দধানো ভাস্বত্তামমৃতনিলযো লোহিতবপুঃ

বিনম্রাণাং সৌম্যো গুরুরপি কবিত্বং চ কলযন্ ।

গতৌ মন্দো গঙ্গাধরমহিষি কামাক্ষি ভজতাং

তমঃকেতুর্মাতস্তব চরণপদ্মো বিজযতে

॥58॥

শ্লোক 60

নযন্তীং দাসত্বং নলিনভবমুখ্যানসুলভ-

প্রদানাদ্দীনানামমরতরুদৌর্ভাগ্যজননীম্ ।

জগজ্জন্মক্ষেমক্ষযবিধিষু কামাক্ষি পদযো-

র্ধুরীণামীষ্টে করস্তব ভণিতুমাহোপুরুষিকাম্

॥59॥

শ্লোক 61

জনোঽযং সন্তপ্তো জননি ভবচণ্ডাংশুকিরণৈঃ

অলব্ধবৈকং শীতং কণমপি পরজ্ঞানপযসঃ ।

তমোমার্গে পান্থস্তব ঝটিতি কামাক্ষি শিশিরাং

পদাম্ভোজচ্ছাযাং পরমশিবজাযে মৃগযতে

॥60॥

শ্লোক 62

জযত্যম্ব শ্রীমন্নখকিরণচীনাংশুকমযং

বিতানং বিভ্রাণে সুরমুকুটসঙ্ঘট্টমসৃণে ।

নিজারুণ্যক্ষৌমাস্তরণবতি কামাক্ষি সুলভা

বুধৈঃ সংবিন্নারী তব চরণমাণিক্যভবনে

॥61॥

শ্লোক 63

প্রতীমঃ কামাক্ষি স্ফুরিততরুণাদিত্যকিরণ-

শ্রিযো মূলদ্রব্যং তব চরণমদ্রীন্দ্রতনযে ।

সুরেন্দ্রাশামাপূরযতি যদসৌ ধ্বান্তমখিলং

ধুনীতে দিগ্ভাগানপি চ মহসা পাটলযতে

॥62॥

শ্লোক 64

মহাভাষ্যব্যাখ্যাপটুশযনমারোপযতি বা

স্মরব্যাপারের্ষ্যাপিশুননিটিলং কারযতি বা ।

দ্বিরেফাণামধ্যাসযতি সততং বাধিবসতিং

প্রণম্রান্কামাক্ষ্যাঃ পদনলিনমাহাত্ম্যগরিমা

॥63॥

শ্লোক 65

বিবেকাম্ভস্স্রোতস্স্নপনপরিপাটীশিশিরিতে

সমীভূতে শাস্ত্রস্মরণহলসঙ্কর্ষণবশাত্ ।

সতাং চেতঃক্ষেত্রে বপতি তব কামাক্ষি চরণো

মহাসংবিত্সস্যপ্রকরবরবীজং গিরিসুতে

॥64॥

শ্লোক 66

দধানো মন্দারস্তবকপরিপাটীং নখরুচা

বহন্দীপ্তাং শোণাঙ্গুলিপটলচাম্পেযকলিকাম্ ।

অশোকোল্লাসং নঃ প্রচুরযতু কামাক্ষি চরণো

বিকাসী বাসন্তঃ সময ইব তে শর্বদযিতে

॥65॥

শ্লোক 67

নখাংশুপ্রাচুর্যপ্রসৃমরমরালালিধবলঃ

স্ফুরন্মঞ্জীরোদ্যন্মরকতমহশ্শৈবলযুতঃ ।

ভবত্যাঃ কামাক্ষি স্ফুটচরণপাটল্যকপটো

নদঃ শোণাভিখ্যো নগপতিতনূজে বিজযতে

॥66॥

শ্লোক 68

ধুনানং পঙ্কৌঘং পরমসুলভং কণ্টককুলৈঃ

বিকাসব্যাসঙ্গং বিদধদপরাধীনমনিশম্ ।

নখেন্দুজ্যোত্স্নাভির্বিশদরুচি কামাক্ষি নিতরাম্

অসামান্যং মন্যে সরসিজমিদং তে পদযুগম্

॥67॥

শ্লোক 69

করীন্দ্রায দ্রুহ্যত্যলসগতিলীলাসু বিমলৈঃ

পযোজৈর্মাত্সর্যং প্রকটযতি কামং কলযতে ।

পদাম্ভোজদ্বন্দ্বং তব তদপি কামাক্ষি হৃদযং

মুনীনাং শান্তানাং কথমনিশমস্মৈ স্পৃহযতে

॥68॥

শ্লোক 70

নিরস্তা শোণিম্না চরণকিরণানাং তব শিবে

সমিন্ধানা সন্ধ্যারুচিরচলরাজন্যতনযে ।

অসামর্থ্যাদেনং পরিভবিতুমেতত্সমরুচাং

সরোজানাং জানে মুকুলযতি শোভাং প্রতিদিনম্

॥69॥

শ্লোক 71

উপাদিক্ষদ্দাক্ষ্যং তব চরণনামা গুরুরসৌ

মরালানাং শঙ্কে মসৃণগতিলালিত্যসরণৌ ।

অতস্তে নিস্তন্দ্রং নিযতমমুনা সখ্যপদবীং

প্রপন্নং পাথোজং প্রতি দধতি কামাক্ষি কুতুকম্

॥70॥

শ্লোক 72

দধানৈঃ সংসর্গং প্রকৃতিমলিনৈঃ ষট্পদকুলৈঃ

দ্বিজাধীশশ্লাঘাবিধিষু বিদধদ্ভির্মুকুলতাম্ ।

রজোমিশ্রৈঃ পদ্মৈর্নিযতমপি কামাক্ষি পদযোঃ

বিরোধস্তে যুক্তো বিষমশরবৈরিপ্রিযতমে

॥71॥

শ্লোক 73

কবিত্বশ্রীমিশ্রীকরণনিপুণৌ রক্ষণচণৌ

বিপন্নানাং শ্রীমন্নলিনমসৃণৌ শোণকিরণৌ ।

মুনীন্দ্রাণামন্তঃকরণশরণৌ মন্দসরণৌ

মনোজ্ঞৌ কামাক্ষ্যা দুরিতহরণৌ নৌমি চরণৌ

॥72॥

শ্লোক 74

পরস্মাত্সর্বস্মাদপি চ পরযোর্মুক্তিকরযোঃ

নখশ্রীভির্জ্যোত্স্নাকলিততুলযোস্তাম্রতলযোঃ ।

নিলীযে কামাক্ষ্যা নিগমনুতযোর্নাকিনতযোঃ

নিরস্তপ্রোন্মীলন্নলিনমদযোরেব পদযোঃ

॥73॥

শ্লোক 75

স্বভাবাদন্যোন্যং কিসলযমপীদং তব পদং

ম্রদিম্না শোণিম্না ভগবতি দধাতে সদৃশতাম্ ।

বনে পূর্বস্যেচ্ছা সততমবনে কিং তু জগতাং

পরস্যেত্থং ভেদঃ স্ফুরতি হৃদি কামাক্ষি সুধিযাম্

॥74॥

শ্লোক 76

কথং বাচালোঽপি প্রকটমণিমঞ্জীরনিনদৈঃ

সদৈবানন্দার্দ্রান্বিরচযতি বাচংযমজনান্ ।

প্রকৃত্যা তে শোণচ্ছবিরপি চ কামাক্ষি চরণো

মনীষানৈর্মল্যং কথমিব নৃণাং মাংসলযতে

॥75॥

শ্লোক 77

চলত্তৃষ্ণাবীচীপরিচলনপর্যাকুলতযা

মুহুর্ভ্রান্তস্তান্তঃ পরমশিববামাক্ষি পরবান্ ।

তিতীর্ষুঃ কামাক্ষি প্রচুরতরকর্মাম্বুধিমমুং

কদাহং লপ্স্যে তে চরণমণিসেতুং গিরিসুতে

॥76॥

শ্লোক 78

বিশুষ্যন্ত্যাং প্রজ্ঞাসরিতি দুরিতগ্রীষ্মসময-

প্রভাবেণ ক্ষীণে সতি মম মনঃকেকিনি শুচা ।

ত্বদীযঃ কামাক্ষি স্ফুরিতচরণাম্ভোদমহিমা

নভোমাসাটোপং নগপতিসুতে কিং ন কুরুতে

॥77॥

শ্লোক 79

বিনম্রাণাং চেতোভবনবলভীসীম্নি চরণ-

প্রদীপে প্রাকাশ্যং দধতি তব নির্ধূততমসি ।

অসীমা কামাক্ষি স্বযমলঘুদুষ্কর্মলহরী

বিঘূর্ণন্তী শান্তিং শলভপরিপাটীব ভজতে

॥78॥

শ্লোক 80

বিরাজন্তী শুক্তির্নখকিরণমুক্তামণিততেঃ

বিপত্পাথোরাশৌ তরিরপি নরাণাং প্রণমতাম্ ।

ত্বদীযঃ কামাক্ষি ধ্রুবমলঘুবহ্নির্ভববনে

মুনীনাং জ্ঞানাগ্নেররণিরযমঙ্ঘির্বিজযতে

॥79॥

শ্লোক 81

সমস্তৈঃ সংসেব্যঃ সততমপি কামাক্ষি বিবুধৈঃ

স্তুতো গন্ধর্বস্ত্রীসুললিতবিপঞ্চীকলরবৈঃ ।

ভবত্যা ভিন্দানো ভবগিরিকুলং জৃম্ভিততমো-

বলদ্রোহী মাতশ্চরণপুরুহূতো বিজযতে

॥80॥

শ্লোক 82

বসন্তং ভক্তানামপি মনসি নিত্যং পরিলসদ্-

ঘনচ্ছাযাপূর্ণং শুচিমপি নৃণাং তাপশমনম্ ।

নখেন্দুজ্যোত্স্নাভিঃ শিশিরমপি পদ্মোদযকরং

নমামঃ কামাক্ষ্যাশ্চরণমধিকাশ্চর্যকরণম্

॥81॥

শ্লোক 83

কবীন্দ্রাণাং নানাভণিতিগুণচিত্রীকৃতবচঃ-

প্রপঞ্চব্যাপারপ্রকটনকলাকৌশলনিধিঃ ।

অধঃকুর্বন্নব্জং সনকভৃগুমুখ্যৈর্মুনিজনৈঃ

নমস্যঃ কামাক্ষ্যাশ্চরণপরমেষ্ঠী বিজযতে

॥82॥

শ্লোক 84

ভবত্যাঃ কামাক্ষি স্ফুরিতপদপঙ্কেরুহভুবাং

পরাগাণাং পূরৈঃ পরিহৃতকলঙ্কব্যতিকরৈঃ ।

নতানামামৃষ্টে হৃদযমুকুরে নির্মলরুচি

প্রসন্নে নিশ্শেষং প্রতিফলতি বিশ্বং গিরিসুতে

॥83॥

শ্লোক 85

তব ত্রস্তং পাদাত্কিসলযমরণ্যান্তরমগাত্

পরং রেখারূপং কমলমমুমেবাশ্রিতমভূত্ ।

জিতানাং কামাক্ষি দ্বিতযমপি যুক্তং পরিভবে

বিদেশে বাসো বা শরণগমনং বা নিজরিপোঃ

॥84॥

শ্লোক 86

গৃহীত্বা যাথার্থ্যং নিগমবচসাং দেশিককৃপা-

কটাক্ষর্কজ্যোতিশ্শমিতমমতাবন্ধতমসঃ ।

যতন্তে কামাক্ষি প্রতিদিবসমন্তর্দ্রঢযিতুং

ত্বদীযং পাদাব্জং সুকৃতপরিপাকেন সুজনাঃ

॥85॥

শ্লোক 87

জডানামপ্যম্ব স্মরণসমযে তবচ্চরণযোঃ

ভ্রমন্মন্থক্ষ্মাভৃদ্ধুমুঘুমিতসিন্ধুপ্রতিভটাঃ ।

প্রসন্নাঃ কামাক্ষি প্রসভমধরস্পন্দনকরা

ভবন্তি স্বচ্ছন্দং প্রকৃতিপরিপক্কা ভণিতযঃ

॥86॥

শ্লোক 88

বহন্নপ্যশ্রান্তং মধুরনিনদং হংসকমসৌ

তমেবাধঃ কর্তুং কিমিব যততে কেলিগমনে ।

ভবস্যৈবানন্দং বিদধদপি কামাক্ষি চরণো

ভবত্যাস্তদ্দ্রোহং ভগবতি কিমেবং বিতনুতে

॥87॥

শ্লোক 89

যদত্যন্তং তাম্যত্যলসগতিবার্তাস্বপি শিবে

তদেতত্কামাক্ষি প্রকৃতিমৃদুলং তে পদযুগম্ ।

কিরীটৈঃ সঙ্ঘট্টং কথমিব সুরৌঘস্য সহতে

মুনীন্দ্রাণামাস্তে মনসি চ কথং সূচিনিশিতে

॥88॥

শ্লোক 90

মনোরঙ্গে মত্কে বিবুধজনসম্মোদজননী

সরাগব্যাসঙ্গং সরসমৃদুসঞ্চারসুভগা ।

মনোজ্ঞা কামাক্ষি প্রকটযতু লাস্যপ্রকরণং

রণন্মঞ্জীরা তে চরণযুগলীনর্তকবধূঃ

॥89॥

শ্লোক 91

পরিষ্কুর্বন্মাতঃ পশুপতিকপর্দং চরণরাট্

পরাচাং হৃত্পদ্মং পরমভণিতীনাং চ মকুটম্ ।

ভবাখ্যে পাথোধৌ পরিহরতু কামাক্ষি মমতা-

পরাধীনত্বং মে পরিমুষিতপাথোজমহিমা

॥90॥

শ্লোক 92

প্রসূনৈঃ সম্পর্কাদমরতরুণীকুন্তলভবৈঃ

অভীষ্টানাং দানাদনিশমপি কামাক্ষি নমতাম্ ।

স্বসঙ্গাত্কঙ্কেলিপ্রসবজনকত্বেন চ শিবে

ত্রিধা ধত্তে বার্তাং সুরভিরিতি পাদো গিরিসুতে

॥91॥

শ্লোক 93

মহামোহস্তেনব্যতিকরভযাত্পালযতি যো

বিনিক্ষিপ্তং স্বস্মিন্নিজজনমনোরত্নমনিশম্ ।

স রাগস্যোদ্রেকাত্সততমপি কামাক্ষি তরসা

কিমেবং পাদোঽসৌ কিসলযরুচিং চোরযতি তে

॥92॥

শ্লোক 94

সদা স্বাদুঙ্কারং বিষযলহরীশালিকণিকাং

সমাস্বাদ্য শ্রান্তং হৃদযশুকপোতং জননি মে ।

কৃপাজালে ফালেক্ষণমহিষি কামাক্ষি রভসাত্

গৃহীত্বা রুন্ধীথারস্তব পদযুগীপঞ্জরপুটে

॥93॥

শ্লোক 95

ধুনানং কামাক্ষি স্মরণলবমাত্রেণ জডিম-

জ্বরপ্রৌঢিং গূঢস্থিতি নিগমনৈকুঞ্জকুহরে ।

অলভ্যং সর্বেষাং কতিচন লভন্তে সুকৃতিনঃ

চিরাদন্বিষ্যন্তস্তব চরণসিদ্ধৌষধমিদম্

॥94॥

শ্লোক 96

রণন্মঞ্জীরাভ্যাং ললিতগমনাভ্যাং সুকৃতিনাং

মনোবাস্তব্যাভ্যাং মথিততিমিরাভ্যাং নখরুচা ।

নিধেযাভ্যাং পত্যা নিজশিরসি কামাক্ষি সততং

নমস্তে পাদাভ্যাং নলিনমৃদুলাভ্যাং গিরিসুতে

॥95॥

শ্লোক 97

সুরাগে রাকেন্দুপ্রতিনিধিমুখে পর্বতসুতে

চিরাল্লভ্যে ভক্ত্যা শমধনজনানাং পরিষদা ।

মনোভৃঙ্গো মত্কঃ পদকমলযুগ্মে জননি তে

প্রকামং কামাক্ষি ত্রিপুরহরবামাক্ষি রমতাম্

॥96॥

শ্লোক 98

শিবে সংবিদ্রূপে শশিশকলচূডপ্রিযতমে

শনৈর্গত্যাগত্যা জিতসুরবরেভে গিরিসুতে ।

যতন্তে সন্তস্তে চরণনলিনালানযুগলে

সদা বদ্ধং চিত্তপ্রমদকরিযূথং দৃঢতরম্

॥97॥

শ্লোক 99

যশঃ সূতে মাতর্মধুরকবিতাং পক্ষ্মলযতে

শ্রিযং দত্তে চিত্তে কমপি পরিপাকং প্রথযতে ।

সতাং পাশগ্রন্থিং শিথিলযতি কিং কিং ন কুরুতে

প্রপন্নে কামাক্ষ্যাঃ প্রণতিপরিপাটী চরণযোঃ

॥98॥

শ্লোক 100

মনীষাং মাহেন্দ্রীং ককুভমিব তে কামপি দশাং

প্রধত্তে কামাক্ষ্যাশ্চরণতরুণাদিত্যকিরণঃ ।

যদীযে সম্পর্কে ধৃতরসমরন্দা কবযতাং

পরীপাকং ধত্তে পরিমলবতী সূক্তিনলিনী

॥99॥

শ্লোক 101

পুরা মারারাতিঃ পুরমজযদম্ব স্তবশতৈঃ

প্রসন্নাযাং সত্যাং ত্বযি তুহিনশৈলেন্দ্রতনযে ।

অতস্তে কামাক্ষি স্ফুরতু তরসা কালসমযে

সমাযাতে মাতর্মম মনসি পাদাব্জযুগলম্

॥100॥

শ্লোক 102

পদদ্বন্দ্বং মন্দং গতিষু নিবসন্তং হৃদি সতাং

গিরামন্তে ভ্রান্তং কৃতকরহিতানাং পরিবৃঢে ।

জনানামানন্দং জননি জনযন্তং প্রণমতাং

ত্বদীযং কামাক্ষি প্রতিদিনমহং নৌমি বিমলম্

॥101॥

শ্লোক 103

ইদং যঃ কামাক্ষ্যাশ্চরণনলিনস্তোত্রশতকং

জপেন্নিত্যং ভক্ত্যা নিখিলজগদাহ্লাদজনকম্ ।

স বিশ্বেষাং বন্দ্যঃ সকলকবিলোকৈকতিলকঃ

চিরং ভুক্ত্বা ভোগান্পরিণমতি চিদ্রূপকলযা

॥102॥

শ্লোক 104

॥ ইতি পাদারবিন্দশতকং সম্পূর্ণম্ ॥