Meenakshi Pancha Ratna Stotram

mInAkSI paJca ratna stotram

zloka 1

udyadbhAnusahasrakoTisadRzAM keyUrahArojjvalAM

bimboSThIM smitadantapaGktirucirAM pItAmbarAlaGkRtAm |

viSNubrahmasurendrasevitapadAM tattvasvarUpAM zivAM

mInAkSIM praNato'smi santatamahaM kAruNyavArAnnidhim || 1 ||

muktAhAralasatkirITarucirAM pUrNenduvaktraprabhAM

ziJjannUpurakiGkiNImaNidharAM padmaprabhAbhAsurAm |

sarvAbhISTaphalapradAM girisutAM vANIramAsevitAM

mInAkSIM praNato'smi santatamahaM kAruNyavArAnnidhim || 2 ||

zrIvidyAM zivavAmabhAganilayAM hrIGkAramantrojjvalAM

zrIcakrAGkitabindumadhyavasatiM zrImatsabhAnAyakIm |

zrImatSaNmukhavighnarAjajananIM zrImajjaganmohinIM

mInAkSIM praNato'smi santatamahaM kAruNyavArAnnidhim || 3 ||

zrImatsundaranAyikAM bhayaharAM jJAnapradAM nirmalAM

zyAmAbhAM kamalAsanArcitapadAM nArAyaNasyAnujAm |

vINAveNumRdaGgavAdyarasikAM nAnAvidhAmambikAM

mInAkSIM praNato'smi santatamahaM kAruNyavArAnnidhim || 4 ||

nAnAyogimunIndrahRtsuvasatIM nAnArthasiddhipradAM

nAnApuSpavirAjitAGghriyugalAM nArAyaNenArcitAm |

nAdabrahmamayIM parAtparatarAM nAnArthatatvAtmikAM

mInAkSIM praNato'smi santatamahaM kAruNyavArAnnidhim || 5 ||