Manyu Suktam

manyu sūktam

Śloka 1

atha manyusūktaṃ

ṛgveda saṃhitā; maṇḍalaṃ 10; sūktaṃ 83,84

yaste᳚ ma॒nyo-'vi̭dhad vajra sāyaka॒ saha॒ ojaḥ̭ puṣyati॒ viśva̭mānu॒ṣak |

sā॒hyāma॒ dāsa॒mārya॒-ntvayā᳚ yu॒jā saha̭skṛtena॒ saha̭sā॒ saha̭svatā || 1 ||

ma॒nyurindro᳚ ma॒nyure॒vāsa̭ de॒vo ma॒nyur hotā॒ varṷṇo jā॒tave᳚dāḥ |

ma॒nyuṃ-vi~śa̭ īlate॒ mānṷṣī॒ryāḥ pā॒hi no᳚ manyo॒ tapa̭sā sa॒joṣāḥ᳚ || 2 ||

a॒bhī᳚hi manyo ta॒vasa॒stavī᳚yā॒-ntapa̭sā yu॒jā vi ja̭hi śatrū᳚n |

a॒mi॒tra॒hā vṛ̭tra॒hā da̭syu॒hā ca॒ viśvā॒ vasū॒nyā bha̭rā॒ tva-nnaḥ̭ || 3 ||

tvaṃ hi ma᳚nyo a॒bhibhū᳚tyojā-ssvaya॒mbhūrbhāmo᳚ abhimātiṣā॒haḥ |

vi॒śvaca̭r-ṣaṇi॒-ssahṷri॒-ssahā᳚vāna॒smāsvojaḥ॒ pṛta̭nāsu dhehi || 4 ||

a॒bhā॒ga-ssannapa॒ pare᳚to asmi॒ tava॒ kratvā᳚ tavi॒ṣasya̭ pracetaḥ |

ta-ntvā᳚ manyo akra॒turji̭hīlā॒haṃ svāta॒nūrba̭la॒deyā᳚ya॒ mehi̭ || 5 ||

a॒ya-nte᳚ a॒smyupa॒ mehya॒rvāṅ pra̭tīcī॒na-ssa̭hure viśvadhāyaḥ |

manyo᳚ vajrinna॒bhi māmā va̭vṛtsvahanā᳚va॒ dasyū᳚n ṛ॒ta bo᳚dhyā॒peḥ || 6 ||

a॒bhi prehi̭ dakṣiṇa॒to bha̭vā॒ me-'dhā᳚ vṛ॒trāṇi̭ jaṅghanāva॒ bhūri̭ |

ju॒homi̭ te dha॒ruṇa॒-mmadhvo॒ agra̭mubhā ṷpāṃ॒śu pra̭tha॒mā pi̭bāva || 7 ||

tvayā᳚ manyo sa॒ratha̭māru॒janto॒ har​ṣa̭māṇāso dhṛṣi॒tā ma̭rutvaḥ |

ti॒gmeṣa̭va॒ āyṷdhā saṃ॒śiśā᳚nā a॒bhi praya᳚ntu॒ naro᳚ a॒gnirū᳚pāḥ || 8 ||

a॒gniri̭va manyo tviṣi॒ta-ssa̭hasva senā॒nīrnaḥ̭ sahure hū॒ta e᳚dhi |

ha॒tvāya॒ śatrū॒n vi bha̭jasva॒ veda॒ ojo॒ mimā᳚no॒ vimṛdho᳚ nudasva || 9 ||

saha̭sva manyo a॒bhimā᳚tima॒sme ru॒ja-nmṛ॒ṇa-npra̭mṛ॒ṇa-nprehi॒ śatrū᳚n |

u॒gra-nte॒ pājo᳚ na॒nvā rṷrudhre va॒śī vaśa᳚-nnayasa ekaja॒ tvam || 10 ||

eko᳚ bahū॒nāma̭si manyavīli॒to viśaṃ᳚​viśaṃ-yu॒dhaye॒ saṃ śi̭śādhi |

akṛ̭ttaru॒-ktvayā᳚ yu॒jā va॒ya-ndyu॒manta॒-ṅghoṣaṃ᳚-vi~ja॒yāya̭ kṛṇmahe || 11

vi॒je॒ṣa॒kṛdindra̭ ivānavabra॒vo॒(o)3̭-'smāka᳚-mmanyo adhi॒pā bha̭ve॒ha 3

pri॒ya-nte॒ nāma̭ sahure gṛṇīmasi vi॒dmātamutsaṃ॒-ya~ta̭ āba॒bhūtha̭ || 12 ||

ābhū᳚tyā saha॒jā va̭jra sāyaka॒ saho᳚ bibhar​ṣyabhibhūta॒ utta̭ram |

kratvā᳚ no manyo sa॒hame॒dye᳚dhi mahādha॒nasya̭ puruhūta saṃ॒sṛji̭ || 13 ||

saṃsṛ̭ṣṭa॒-ndhana̭mu॒bhayaṃ᳚ sa॒mākṛ̭tama॒smabhya᳚-ndattāṃ॒-va~rṷṇaśca ma॒nyuḥ |

bhiya॒-ndadhā᳚nā॒ hṛda̭yeṣu॒ śatra̭vaḥ॒ parā᳚jitāso॒ apa॒ nila̭yantām || 14 ||

dhanva̭nā॒gādhanva̭ nā॒jiñja̭yema॒ dhanva̭nā tī॒vrā-ssa॒mado᳚ jayema |

dhanu-śśatro᳚rapakā॒ma-ṅkṛ̭ṇoti॒ dhanva̭ nā॒sarvāḥ᳚ pra॒diśo᳚ jayema ||

oṃ śāntā̭ pṛthivī śi̭vama॒ntarikṣa॒-ndyaurno᳚ de॒vya-'bha̭yanno astu |

śi॒vā॒ diśaḥ̭ pra॒diśa̭ u॒ddiśo᳚ na॒-'āpo᳚ vi॒śvataḥ॒ pari̭pāntu sa॒rvata॒-śśānti॒-śśānti॒-śśāntiḥ̭ ||