Mantra Matruka Pushpa Mala Stava

මන්ත්ර මාතෘකා පුෂ්ප මාලා ස්තව

කල්ලෝලෝල්ලසිතාමෘතාබ්ධිලහරීමධ්යේ විරාජන්මණි-

-ද්වීපේ කල්පකවාටිකාපරිවෘතේ කාදම්බවාට්යුජ්ජ්වලේ .

රත්නස්තම්භසහස්රනිර්මිතසභාමධ්යේ විමානෝත්තමේ

චින්තාරත්නවිනිර්මිතං ජනනි තේ සිංහාසනං භාවයේ .. 1 ..

ඒණාඞ්කානලභානුමණ්ඩලලසච්ඡ්රීචක්රමධ්යේ ස්ථිතාං

බාලාර්කද්යුතිභාසුරාං කරතලෛඃ පාශාඞ්කුශෞ බිභ්රතීම් .

චාපං බාණමපි ප්රසන්නවදනාං කෞසුම්භවස්ත්රාන්විතාං

තාං ත්වාං චන්ද්රකලාවතංසමකුටාං චාරුස්මිතාං භාවයේ .. 2 ..

ඊශානාදිපදං ශිවෛකඵලදං රත්නාසනං තේ ශුභං

පාද්යං කුඞ්කුමචන්දනාදිභරිතෛරර්ඝ්යං සරත්නාක්ෂතෛඃ .

ශුද්ධෛරාචමනීයකං තව ජලෛර්භක්ත්යා මයා කල්පිතං

කාරුණ්යාමෘතවාරිධේ තදඛිලං සන්තුෂ්ටයේ කල්පතාම් .. 3 ..

ලක්ෂ්යේ යෝගිජනස්ය රක්ෂිතජගජ්ජාලේ විශාලේක්ෂණේ

ප්රාලේයාම්බුපටීරකුඞ්කුමලසත්කර්පූරමිශ්රෝදකෛඃ .

ගෝක්ෂීරෛරපි නාරිකේලසලිලෛඃ ශුද්ධෝදකෛර්මන්ත්රිතෛඃ

ස්නානං දේවි ධියා මයෛතදඛිලං සන්තුෂ්ටයේ කල්පතාම් .. 4 ..

හ්රීං‍කාරාඞ්කිතමන්ත්රලක්ෂිතතනෝ හේමාචලාත්සඤ්චිතෛඃ

රත්නෛරුජ්ජ්වලමුත්තරීයසහිතං කෞසුම්භවර්ණාංශුකම් .

මුක්තාසන්තතියජ්ඤසූත්රමමලං සෞවර්ණතන්තූද්භවං

දත්තං දේවි ධියා මයෛතදඛිලං සන්තුෂ්ටයේ කල්පතාම් .. 5 ..

හංසෛරප්යතිලෝභනීයගමනේ හාරාවලීමුජ්ජ්වලාං

හින්දෝලද්යුතිහීරපූරිතතරේ හේමාඞ්ගදේ කඞ්කණේ .

මඤ්ජීරෞ මණිකුණ්ඩලේ මකුටමප්යර්ධේන්දුචූඩාමණිං

නාසාමෞක්තිකමඞ්ගුලීයකටකෞ කාඤ්චීමපි ස්වීකුරු .. 6 ..

සර්වාඞ්ගේ ඝනසාරකුඞ්කුමඝනශ්රීගන්ධපඞ්කාඞ්කිතං

කස්තූරීතිලකං ච ඵාලඵලකේ ගෝරෝචනාපත්රකම් .

ගණ්ඩාදර්ශනමණ්ඩලේ නයනයෝර්දිව්යාඤ්ජනං තේ(අ)ඤ්චිතං

කණ්ඨාබ්ජේ මෘගනාභිපඞ්කමමලං ත්වත්ප්රීතයේ කල්පතාම් .. 7 ..

කහ්ලාරෝත්පලමල්ලිකාමරුවකෛඃ සෞවර්ණපඞ්කේරුහෛ-

-ර්ජාතීචම්පකමාලතීවකුලකෛර්මන්දාරකුන්දාදිභිඃ .

කේතක්යා කරවීරකෛර්බහුවිධෛඃ ක්ලුප්තාඃ ස්රජෝ මාලිකාඃ

සඞ්කල්පේන සමර්පයාමි වරදේ සන්තුෂ්ටයේ ගෘහ්යතාම් .. 8 ..

හන්තාරං මදනස්ය නන්දයසි යෛරඞ්ගෛරනඞ්ගෝජ්ජ්වලෛ-

-ර්යෛර්භෘඞ්ගාවලිනීලකුන්තලභරෛර්බධ්නාසි තස්යාශයම් .

තානීමානි තවාම්බ කෝමලතරාණ්යාමෝදලීලාගෘහා-

-ණ්යාමෝදාය දශාඞ්ගගුග්ගුලුඝෘතෛර්ධූපෛරහං ධූපයේ .. 9 ..

ලක්ෂ්මීමුජ්ජ්වලයාමි රත්නනිවහෝද්භාස්වත්තරේ මන්දිරේ

මාලාරූපවිලම්බිතෛර්මණිමයස්තම්භේෂු සම්භාවිතෛඃ .

චිත්රෛර්හාටකපුත්රිකාකරධෘතෛර්ගව්යෛර්ඝෘතෛර්වර්ධිතෛ-

-ර්දිව්යෛර්දීපගණෛර්ධියා ගිරිසුතේ සන්තුෂ්ටයේ කල්පතාම් .. 10 ..

හ්රීං‍කාරේශ්වරි තප්තහාටකකෘතෛඃ ස්ථාලීසහස්රෛර්භෘතං

දිව්යාන්නං ඝෘතසූපශාකභරිතං චිත්රාන්නභේදං තථා .

දුග්ධාන්නං මධුශර්කරාදධියුතං මාණික්යපාත්රේ ස්ථිතං

මාෂාපූපසහස්රමම්බ සඵලං නෛවේද්යමාවේදයේ .. 11 ..

සච්ඡායෛර්වරකේතකීදලරුචා තාම්බූලවල්ලීදලෛඃ

පූගෛර්භූරිගුණෛඃ සුගන්ධිමධුරෛඃ කර්පූරඛණ්ඩෝජ්ජ්වලෛඃ .

මුක්තාචූර්ණවිරාජිතෛර්බහුවිධෛර්වක්ත්රාම්බුජාමෝදනෛඃ

පූර්ණා රත්නකලාචිකා තව මුදේ න්යස්තා පුරස්තාදුමේ .. 12 ..

කන්යාභිඃ කමනීයකාන්තිභිරලඞ්කාරාමලාරාර්තිකා

පාත්රේ මෞක්තිකචිත්රපඞ්ක්තිවිලසත්කර්පූරදීපාලිභිඃ .

තත්තත්තාලමෘදඞ්ගගීතසහිතං නෘත්යත්පදාම්භෝරුහං

මන්ත්රාරාධනපූර්වකං සුවිහිතං නීරාජනං ගෘහ්යතාම් .. 13 ..

ලක්ෂ්මීර්මෞක්තිකලක්ෂකල්පිතසිතච්ඡත්ත්රං තු ධත්තේ රසා-

-දින්ද්රාණී ච රතිශ්ච චාමරවරේ ධත්තේ ස්වයං භාරතී .

වීණාමේණවිලෝචනාඃ සුමනසාං නෘත්යන්ති තද්රාගව-

-ද්භාවෛරාඞ්ගිකසාත්ත්විකෛඃ ස්ඵුටරසං මාතස්තදාකර්ණ්යතාම් .. 14 ..

හ්රීං‍කාරත්රයසම්පුටේන මනුනෝපාස්යේ ත්රයීමෞලිභි-

-ර්වාක්යෛර්ලක්ෂ්යතනෝ තව ස්තුතිවිධෞ කෝ වා ක්ෂමේතාම්බිකේ .

සල්ලාපාඃ ස්තුතයඃ ප්රදක්ෂිණශතං සඤ්චාර ඒවාස්තු තේ

සංවේශෝ නමසඃ සහස්රමඛිලං ත්වත්ප්රීතයේ කල්පතාම් .. 15 ..

ශ්රීමන්ත්රාක්ෂරමාලයා ගිරිසුතාං යඃ පූජයේච්චේතසා

සන්ධ්යාසු ප්රතිවාසරං සුනියතස්තස්යාමලං ස්යාන්මනඃ .

චිත්තාම්භෝරුහමණ්ටපේ ගිරිසුතා නෘත්තං විධත්තේ රසා-

-ද්වාණී වක්ත්රසරෝරුහේ ජලධිජා ගේහේ ජගන්මඞ්ගලා .. 16 ..

ඉති ගිරිවරපුත්රීපාදරාජීවභූෂා

භුවනමමලයන්තී සූක්තිසෞරභ්යසාරෛඃ .

ශිවපදමකරන්දස්යන්දිනීයං නිබද්ධා

මදයතු කවිභෘඞ්ගාන්මාතෘකාපුෂ්පමාලා .. 17 ..

ඉති ශ්රීමත්පරමහංසපරිව්රාජකාචාර්යස්ය ශ්රීගෝවින්දභගවත්පූජ්යපාදශිෂ්යස්ය ශ්රීමච්ඡඞ්කරභගවතඃ කෘතෞ මන්ත්රමාතෘකාපුෂ්පමාලා ස්තවඃ .