Mantra Matruka Pushpa Mala Stava

mantra mAtRRikA puShpa mAlA stava

shloka 1

kallolollasitAmRRitAbdhilaharImadhye virAjanmaNi-

-dvIpe kalpakavATikAparivRRite kAdambavATyujjvale |

ratnastambhasahasranirmitasabhAmadhye vimAnottame

chintAratnavinirmitaM janani te siMhAsanaM bhAvaye || 1 ||

eNA~NkAnalabhAnumaNDalalasachChrIchakramadhye sthitAM

bAlArkadyutibhAsurAM karatalaiH pAshA~Nkushau bibhratIm |

chApaM bANamapi prasannavadanAM kausumbhavastrAnvitAM

tAM tvAM chandrakalAvataMsamakuTAM chArusmitAM bhAvaye || 2 ||

IshAnAdipadaM shivaikaphaladaM ratnAsanaM te shubhaM

pAdyaM ku~NkumachandanAdibharitairarghyaM saratnAkShataiH |

shuddhairAchamanIyakaM tava jalairbhaktyA mayA kalpitaM

kAruNyAmRRitavAridhe tadakhilaM santuShTaye kalpatAm || 3 ||

lakShye yogijanasya rakShitajagajjAle vishAlekShaNe

prAleyAmbupaTIraku~NkumalasatkarpUramishrodakaiH |

gokShIrairapi nArikelasalilaiH shuddhodakairmantritaiH

snAnaM devi dhiyA mayaitadakhilaM santuShTaye kalpatAm || 4 ||

hrIM{}kArANkitamantralakShitatano hemAchalAtsanchitaiH

ratnairujjvalamuttarIyasahitaM kausumbhavarNAMshukam |

muktAsantatiyaj~nasUtramamalaM sauvarNatantUdbhavaM

dattaM devi dhiyA mayaitadakhilaM santuShTaye kalpatAm || 5 ||

haMsairapyatilobhanIyagamane hArAvalImujjvalAM

hindoladyutihIrapUritatare hemANgade kaNkaNe |

ma~njIrau maNikuNDale makuTamapyardhenduchUDAmaNiM

nAsAmauktikamaNgulIyakaTakau kAnchImapi svIkuru || 6 ||

sarvANge ghanasArakuNkumaghanashrIgandhapaNkANkitaM

kastUrItilakaM cha phAlaphalake gorochanApatrakam |

gaNDAdarshanamaNDale nayanayordivyAnjanaM te.anchitaM

kaNThAbje mRRiganAbhipa~NkamamalaM tvatprItaye kalpatAm || 7 ||

kahlArotpalamallikAmaruvakaiH sauvarNapa~Nkeruhai-

-rjAtIchampakamAlatIvakulakairmandArakundAdibhiH |

ketakyA karavIrakairbahuvidhaiH kluptAH srajo mAlikAH

sa~Nkalpena samarpayAmi varade santuShTaye gRRihyatAm || 8 ||

hantAraM madanasya nandayasi yairaNgairanaNgojjvalai-

-ryairbhRRi~NgAvalinIlakuntalabharairbadhnAsi tasyAshayam |

tAnImAni tavAmba komalatarANyAmodalIlAgRRihA-

-NyAmodAya dashA~NgaguggulughRRitairdhUpairahaM dhUpaye || 9 ||

lakShmImujjvalayAmi ratnanivahodbhAsvattare mandire

mAlArUpavilambitairmaNimayastambheShu sambhAvitaiH |

chitrairhATakaputrikAkaradhRRitairgavyairghRRitairvardhitai-

-rdivyairdIpagaNairdhiyA girisute santuShTaye kalpatAm || 10 ||

hrIM{}kAreshvari taptahATakakRRitaiH sthAlIsahasrairbhRRitaM

divyAnnaM ghRRitasUpashAkabharitaM chitrAnnabhedaM tathA |

dugdhAnnaM madhusharkarAdadhiyutaM mANikyapAtre sthitaM

mAShApUpasahasramamba saphalaM naivedyamAvedaye || 11 ||

sachChAyairvaraketakIdalaruchA tAmbUlavallIdalaiH

pUgairbhUriguNaiH sugandhimadhuraiH karpUrakhaNDojjvalaiH |

muktAchUrNavirAjitairbahuvidhairvaktrAmbujAmodanaiH

pUrNA ratnakalAchikA tava mude nyastA purastAdume || 12 ||

kanyAbhiH kamanIyakAntibhirala~NkArAmalArArtikA

pAtre mauktikachitrapa~NktivilasatkarpUradIpAlibhiH |

tattattAlamRRida~NgagItasahitaM nRRityatpadAmbhoruhaM

mantrArAdhanapUrvakaM suvihitaM nIrAjanaM gRRihyatAm || 13 ||

lakShmIrmauktikalakShakalpitasitachChattraM tu dhatte rasA-

-dindrANI cha ratishcha chAmaravare dhatte svayaM bhAratI |

vINAmeNavilochanAH sumanasAM nRRityanti tadrAgava-

-dbhAvairA~NgikasAttvikaiH sphuTarasaM mAtastadAkarNyatAm || 14 ||

hrIM{}kAratrayasampuTena manunopAsye trayImaulibhi-

-rvAkyairlakShyatano tava stutividhau ko vA kShametAmbike |

sallApAH stutayaH pradakShiNashataM sa~nchAra evAstu te

saMvesho namasaH sahasramakhilaM tvatprItaye kalpatAm || 15 ||

shrImantrAkSharamAlayA girisutAM yaH pUjayechchetasA

sandhyAsu prativAsaraM suniyatastasyAmalaM syAnmanaH |

chittAmbhoruhamaNTape girisutA nRRittaM vidhatte rasA-

-dvANI vaktrasaroruhe jaladhijA gehe jaganma~NgalA || 16 ||

iti girivaraputrIpAdarAjIvabhUShA

bhuvanamamalayantI sUktisaurabhyasAraiH |

shivapadamakarandasyandinIyaM nibaddhA

madayatu kavibhRRi~NgAnmAtRRikApuShpamAlA || 17 ||

iti shrImatparamahaMsaparivrAjakAchAryasya shrIgovindabhagavatpUjyapAdashiShyasya shrImachCha~NkarabhagavataH kRRitau mantramAtRRikApuShpamAlA stavaH |