Mantra Matruka Pushpa Mala Stava

মন্ত্র মাতৃকা পুষ্প মালা স্তব

শ্লোক 1

কল্লোলোল্লসিতামৃতাব্ধিলহরীমধ্যে বিরাজন্মণি-

-দ্বীপে কল্পকবাটিকাপরিবৃতে কাদম্ববাট্যুজ্জ্বলে ।

রত্নস্তম্ভসহস্রনির্মিতসভামধ্যে বিমানোত্তমে

চিন্তারত্নবিনির্মিতং জননি তে সিংহাসনং ভাবযে

শ্লোক 2

এণাঙ্কানলভানুমণ্ডললসচ্ছ্রীচক্রমধ্যে স্থিতাং

বালার্কদ্যুতিভাসুরাং করতলৈঃ পাশাঙ্কুশৌ বিভ্রতীম্ ।

চাপং বাণমপি প্রসন্নবদনাং কৌসুম্ভবস্ত্রান্বিতাং

তাং ত্বাং চন্দ্রকলাবতংসমকুটাং চারুস্মিতাং ভাবযে

॥ 1 ॥

শ্লোক 3

ঈশানাদিপদং শিবৈকফলদং রত্নাসনং তে শুভং

পাদ্যং কুঙ্কুমচন্দনাদিভরিতৈরর্ঘ্যং সরত্নাক্ষতৈঃ ।

শুদ্ধৈরাচমনীযকং তব জলৈর্ভক্ত্যা মযা কল্পিতং

কারুণ্যামৃতবারিধে তদখিলং সন্তুষ্টযে কল্পতাম্

॥ 2 ॥

শ্লোক 4

লক্ষ্যে যোগিজনস্য রক্ষিতজগজ্জালে বিশালেক্ষণে

প্রালেযাম্বুপটীরকুঙ্কুমলসত্কর্পূরমিশ্রোদকৈঃ ।

গোক্ষীরৈরপি নারিকেলসলিলৈঃ শুদ্ধোদকৈর্মন্ত্রিতৈঃ

স্নানং দেবি ধিযা মযৈতদখিলং সন্তুষ্টযে কল্পতাম্

॥ 3 ॥

শ্লোক 5

হ্রীং‍কারাঙ্কিতমন্ত্রলক্ষিততনো হেমাচলাত্সঞ্চিতৈঃ

রত্নৈরুজ্জ্বলমুত্তরীযসহিতং কৌসুম্ভবর্ণাংশুকম্ ।

মুক্তাসন্ততিযজ্ঞসূত্রমমলং সৌবর্ণতন্তূদ্ভবং

দত্তং দেবি ধিযা মযৈতদখিলং সন্তুষ্টযে কল্পতাম্

॥ 4 ॥

শ্লোক 6

হংসৈরপ্যতিলোভনীযগমনে হারাবলীমুজ্জ্বলাং

হিন্দোলদ্যুতিহীরপূরিততরে হেমাঙ্গদে কঙ্কণে ।

মঞ্জীরৌ মণিকুণ্ডলে মকুটমপ্যর্ধেন্দুচূডামণিং

নাসামৌক্তিকমঙ্গুলীযকটকৌ কাঞ্চীমপি স্বীকুরু

॥ 5 ॥

শ্লোক 7

সর্বাঙ্গে ঘনসারকুঙ্কুমঘনশ্রীগন্ধপঙ্কাঙ্কিতং

কস্তূরীতিলকং চ ফালফলকে গোরোচনাপত্রকম্ ।

গণ্ডাদর্শনমণ্ডলে নযনযোর্দিব্যাঞ্জনং তেঽঞ্চিতং

কণ্ঠাব্জে মৃগনাভিপঙ্কমমলং ত্বত্প্রীতযে কল্পতাম্

॥ 6 ॥

শ্লোক 8

কহ্লারোত্পলমল্লিকামরুবকৈঃ সৌবর্ণপঙ্কেরুহৈ-

-র্জাতীচম্পকমালতীবকুলকৈর্মন্দারকুন্দাদিভিঃ ।

কেতক্যা করবীরকৈর্বহুবিধৈঃ ক্লুপ্তাঃ স্রজো মালিকাঃ

সঙ্কল্পেন সমর্পযামি বরদে সন্তুষ্টযে গৃহ্যতাম্

॥ 7 ॥

শ্লোক 9

হন্তারং মদনস্য নন্দযসি যৈরঙ্গৈরনঙ্গোজ্জ্বলৈ-

-র্যৈর্ভৃঙ্গাবলিনীলকুন্তলভরৈর্বধ্নাসি তস্যাশযম্ ।

তানীমানি তবাম্ব কোমলতরাণ্যামোদলীলাগৃহা-

-ণ্যামোদায দশাঙ্গগুগ্গুলুঘৃতৈর্ধূপৈরহং ধূপযে

॥ 8 ॥

শ্লোক 10

লক্ষ্মীমুজ্জ্বলযামি রত্ননিবহোদ্ভাস্বত্তরে মন্দিরে

মালারূপবিলম্বিতৈর্মণিমযস্তম্ভেষু সম্ভাবিতৈঃ ।

চিত্রৈর্হাটকপুত্রিকাকরধৃতৈর্গব্যৈর্ঘৃতৈর্বর্ধিতৈ-

-র্দিব্যৈর্দীপগণৈর্ধিযা গিরিসুতে সন্তুষ্টযে কল্পতাম্

॥ 9 ॥

শ্লোক 11

হ্রীং‍কারেশ্বরি তপ্তহাটককৃতৈঃ স্থালীসহস্রৈর্ভৃতং

দিব্যান্নং ঘৃতসূপশাকভরিতং চিত্রান্নভেদং তথা ।

দুগ্ধান্নং মধুশর্করাদধিযুতং মাণিক্যপাত্রে স্থিতং

মাষাপূপসহস্রমম্ব সফলং নৈবেদ্যমাবেদযে

॥ 10 ॥

শ্লোক 12

সচ্ছাযৈর্বরকেতকীদলরুচা তাম্বূলবল্লীদলৈঃ

পূগৈর্ভূরিগুণৈঃ সুগন্ধিমধুরৈঃ কর্পূরখণ্ডোজ্জ্বলৈঃ ।

মুক্তাচূর্ণবিরাজিতৈর্বহুবিধৈর্বক্ত্রাম্বুজামোদনৈঃ

পূর্ণা রত্নকলাচিকা তব মুদে ন্যস্তা পুরস্তাদুমে

॥ 11 ॥

শ্লোক 13

কন্যাভিঃ কমনীযকান্তিভিরলঙ্কারামলারার্তিকা

পাত্রে মৌক্তিকচিত্রপঙ্ক্তিবিলসত্কর্পূরদীপালিভিঃ ।

তত্তত্তালমৃদঙ্গগীতসহিতং নৃত্যত্পদাম্ভোরুহং

মন্ত্রারাধনপূর্বকং সুবিহিতং নীরাজনং গৃহ্যতাম্

॥ 12 ॥

শ্লোক 14

লক্ষ্মীর্মৌক্তিকলক্ষকল্পিতসিতচ্ছত্ত্রং তু ধত্তে রসা-

-দিন্দ্রাণী চ রতিশ্চ চামরবরে ধত্তে স্বযং ভারতী ।

বীণামেণবিলোচনাঃ সুমনসাং নৃত্যন্তি তদ্রাগব-

-দ্ভাবৈরাঙ্গিকসাত্ত্বিকৈঃ স্ফুটরসং মাতস্তদাকর্ণ্যতাম্

॥ 13 ॥

শ্লোক 15

হ্রীং‍কারত্রযসম্পুটেন মনুনোপাস্যে ত্রযীমৌলিভি-

-র্বাক্যৈর্লক্ষ্যতনো তব স্তুতিবিধৌ কো বা ক্ষমেতাম্বিকে ।

সল্লাপাঃ স্তুতযঃ প্রদক্ষিণশতং সঞ্চার এবাস্তু তে

সংবেশো নমসঃ সহস্রমখিলং ত্বত্প্রীতযে কল্পতাম্

॥ 14 ॥

শ্লোক 16

শ্রীমন্ত্রাক্ষরমালযা গিরিসুতাং যঃ পূজযেচ্চেতসা

সন্ধ্যাসু প্রতিবাসরং সুনিযতস্তস্যামলং স্যান্মনঃ ।

চিত্তাম্ভোরুহমণ্টপে গিরিসুতা নৃত্তং বিধত্তে রসা-

-দ্বাণী বক্ত্রসরোরুহে জলধিজা গেহে জগন্মঙ্গলা

॥ 15 ॥

শ্লোক 17

ইতি গিরিবরপুত্রীপাদরাজীবভূষা

ভুবনমমলযন্তী সূক্তিসৌরভ্যসারৈঃ ।

শিবপদমকরন্দস্যন্দিনীযং নিবদ্ধা

মদযতু কবিভৃঙ্গান্মাতৃকাপুষ্পমালা

॥ 16 ॥

শ্লোক 18

ইতি শ্রীমত্পরমহংসপরিব্রাজকাচার্যস্য শ্রীগোবিন্দভগবত্পূজ্যপাদশিষ্যস্য শ্রীমচ্ছঙ্করভগবতঃ কৃতৌ মন্ত্রমাতৃকাপুষ্পমালা স্তবঃ ।