maNidvIpa varNana - 1 (devI bhAgavatam)

zloka 1

(zrIdevIbhAgavataM, dvAdaza skandhaM, dazamo'dhyAyaH, , maNidvIpa varNana - 1)

vyAsa uvAca –

brahmalokAdUrdhvabhAge sarvaloko'sti yaH zrutaH |

maNidvIpaH sa evAsti yatra devI virAjate || 1 ||

sarvasmAdadhiko yasmAtsarvalokastataH smRtaH |

purA parAmbayaivAyaM kalpito manasecchayA || 2 ||

sarvAdau nijavAsArthaM prakRtyA mUlabhUtayA |

kailAsAdadhiko loko vaikuNThAdapi cottamaH || 3 ||

golokAdapi sarvasmAtsarvaloko'dhikaH smRtaH |

naitatsamaM trilokyAM tu sundaraM vidyate kvacit || 4 ||

chatrIbhUtaM trijagato bhavasantApanAzakam |

chAyAbhUtaM tadevAsti brahmANDAnAM tu sattama || 5 ||

bahuyojanavistIrNo gambhIrastAvadeva hi |

maNidvIpasya parito vartate tu sudhodadhiH || 6 ||

marutsaGghaTTanotkIrNataraGga zatasaGkulaH |

ratnAcchavAlukAyukto jhaSazaGkhasamAkulaH || 7 ||

vIcisaGgharSasaJjAtalaharIkaNazItalaH |

nAnAdhvajasamAyuktA nAnApotagatAgataiH || 8 ||

virAjamAnaH paritastIraratnadrumo mahAn |

taduttaramayodhAtunirmito gagane tataH || 9 ||

saptayojanavistIrNaH prAkAro vartate mahAn |

nAnAzastrapraharaNA nAnAyuddhavizAradAH || 10 ||

rakSakA nivasantyatra modamAnAH samantataH |

caturdvArasamAyukto dvArapAlazatAnvitaH || 11 ||

nAnAgaNaiH parivRto devIbhaktiyutairnRpa |

darzanArthaM samAyAnti ye devA jagadIzituH || 12 ||

teSAM gaNA vasantyatra vAhanAni ca tatra hi |

vimAnazatasaGgharSaghaNTAsvanasamAkulaH || 13 ||

hayaheSAkhurAghAtabadhirIkRtadimmukhaH |

gaNaiH kilakilArAvairvetrahastaizca tADitAH || 14 ||

sevakA devasaGgAnAM bhrAjante tatra bhUmipa |

tasmiGkolAhale rAjannazabdaH kenacitkvacit || 15 ||

kasyacicchrUyate'tyantaM nAnAdhvanisamAkule |

pade pade miSTavAriparipUrNasarAnsi ca || 16 ||

vATikA vividhA rAjan ratnadrumavirAjitAH |

taduttaraM mahAsAradhAtunirmitamaNDalaH || 17 ||

sAlo'paro mahAnasti gaganasparzi yacchiraH |

tejasA syAcchataguNaH pUrvasAlAdayaM paraH || 18 ||

gopuradvArasahito bahuvRkSasamanvitaH |

yA vRkSajAtayaH santi sarvAstAstatra santi ca || 19 ||

nirantaraM puSpayutAH sadA phalasamanvitAH |

navapallavasaMyuktAH parasaurabhasaGkulAH || 20 ||

panasA bakulA lodhrAH karNikArAzca ziMzapAH |

devadArukAJcanArA AmrAzcaiva sumeravaH || 21 ||

likucA hiGgulAzcailA lavaGgAH kaTphalAstathA |

pATalA mucukundAzca phalinyo jaghanephalAH || 22 ||

tAlAstamAlAH sAlAzca kaGkolA nAgabhadrakAH |

punnAgAH pIlavaH sAlvakA vai karpUrazAkhinaH || 23 ||

azvakarNA hastikarNAstAlaparNAzca dADimAH |

gaNikA bandhujIvAzca jambIrAzca kuraNDakAH || 24 ||

cAmpeyA bandhujIvAzca tathA vai kanakadrumAH |

kAlAgurudrumAzcaiva tathA candanapAdapAH || 25 ||

kharjUrA yUthikAstAlaparNyazcaiva tathekSavaH |

kSIravRkSAzca khadirAzciJcAbhallAtakAstathA || 26 ||

rucakAH kuTajA vRkSA bilvavRkSAstathaiva ca |

tulasInAM vanAnyevaM mallikAnAM tathaiva ca || 27 ||

ityAditarujAtInAM vanAnyupavanAni ca |

nAnAvApIzatairyuktAnyevaM santi dharAdhipa || 28 ||

kokilArAvasaMyuktA gunjadbhramarabhUSitAH |

niryAsasrAviNaH sarve snigdhacchAyAstarUttamAH || 29 ||

nAnARtubhavA vRkSA nAnApakSisamAkulAH |

nAnArasasrAviNIbhirnadIbhiratizobhitAH || 30 ||

pArAvatazukavrAtasArikApakSamArutaiH |

haMsapakSasamudbhUta vAtavrAtaizcaladdrumam || 31 ||

sugandhagrAhipavanapUritaM tadvanottamam |

sahitaM hariNIyUthairdhAvamAnairitastataH || 32 ||

nRtyadbarhikadambasya kekArAvaiH sukhapradaiH |

nAditaM tadvanaM divyaM madhusrAvi samantataH || 33 ||

kAMsyasAlAduttare tu tAmrasAlaH prakIrtitaH |

caturasrasamAkAra unnatyA saptayojanaH || 34 ||

dvayostu sAlayormadhye samproktA kalpavATikA |

yeSAM tarUNAM puSpANi kAJcanAbhAni bhUmipa || 35 ||

patrANi kAJcanAbhAni ratnabIjaphalAni ca |

dazayojanagandho hi prasarpati samantataH || 36 ||

tadvanaM rakSitaM rAjanvasantenartunAnizam |

puSpasiMhAsanAsInaH puSpacchatravirAjitaH || 37 ||

puSpabhUSAbhUSitazca puSpAsavavighUrNitaH |

madhuzrIrmAdhavazrIzca dve bhArye tasya sammate || 38 ||

krIDataH smeravadane sumastabakakandukaiH |

atIva ramyaM vipinaM madhusrAvi samantataH || 39 ||

dazayojanaparyantaM kusumAmodavAyunA |

pUritaM divyagandharvaiH sAGganairgAnalolupaiH || 40 ||

zobhitaM tadvanaM divyaM mattakokilanAditam |

vasantalakSmIsaMyuktaM kAmikAmapravardhanam || 41 ||

tAmrasAlAduttaratra sIsasAlaH prakIrtitaH |

samucchrAyaH smRto'pyasya saptayojanasaGkhyayA || 42 ||

santAnavATikAmadhye sAlayostu dvayornRpa |

dazayojanagandhastu prasUnAnAM samantataH || 43 ||

hiraNyAbhAni kusumAnyutphullAni nirantaram |

amRtadravasaMyuktaphalAni madhurANi ca || 44 ||

grISmarturnAyakastasyA vATikAyA nRpottama |

zukrazrIzca zucizrIzca dve bhArye tasya sammate || 45 ||

santApatrastalokAstu vRkSamUleSu saMsthitAH |

nAnAsiddhaiH parivRto nAnAdevaiH samanvitaH || 46 ||

vilAsinInAM bRndaistu candanadravapaGkilaiH |

puSpamAlAbhUSitaistu tAlavRntakarAmbujaiH || 47 ||

prakAraH zobhito ejacchItalAmbuniSevibhiH |

sIsasAlAduttaratrApyArakUTamayaH zubhaH || 48 ||

prAkAro vartate rAjanmuniyojanadairghyavAn |

haricandanavRkSANAM vATI madhye tayoH smRtA || 49 ||

sAlayoradhinAthastu varSarturmeghavAhanaH |

vidyutpiGgalanetrazca jImUtakavacaH smRtaH || 50 ||

vajranirghoSamukharazcendradhanvA samantataH |

sahasrazo vAridhArA muJcannAste gaNAvRtaH || 51 ||

nabhaH zrIzca nabhasyazrIH svarasyA rasyamAlinI |

ambA dulA niratnizcAbhramantI meghayantikA || 52 ||

varSayantI cibuNikA vAridhArA ca sammatAH |

varSartordvAdaza proktAH zaktayo madavihvalAH || 53 ||

navapallavavRkSAzca navInalatikAnvitAH |

haritAni tRNAnyeva veSTitA yairdharA'khilA || 54 ||

nadInadapravAhAzca pravahanti ca vegataH |

sarAMsi kaluSAmbUni rAgicittasamAni ca || 55 ||

vasanti devAH siddhAzca ye devIkarmakAriNaH |

vApIkUpataDAgAzca ye devyarthaM samarpitAH || 56 ||

te gaNA nivasantyatra savilAsAzca sAGganAH |

ArakUTamayAdagre saptayojanadairghyavAn || 57 ||

paJcalohAtmakaH sAlo madhye mandAravATikA |

nAnApuSpalatAkIrNA nAnApallavazobhitA || 58 ||

adhiSThAtA'tra samproktaH zaradRturanAmayaH |

iSalakSmIrUrjalakSmIrdve bhArye tasya sammate || 59 ||

nAnAsiddhA vasantyatra sAGganAH saparicchadAH |

paJcalohamayAdagre saptayojanadairghyavAn || 60 ||

dIpyamAno mahAzRGgairvartate raupyasAlakaH |

pArijAtATavImadhye prasUnastabakAnvitA || 61 ||

dazayojanagandhIni kusumAni samantataH |

modayanti gaNAnsarvAnye devIkarmakAriNaH || 62 ||

tatrAdhinAthaH samprokto hemantarturmahojjvalaH |

sagaNaH sAyudhaH sarvAn rAgiNo raJjayannapaH || 63 ||

sahazrIzca sahasyazrIrdve bhArye tasya sammate |

vasanti tatra siddhAzca ye devIvratakAriNaH || 64 ||

raupyasAlamayAdagre saptayojanadairghyavAn |

sauvarNasAlaH samproktastaptahATakakalpitaH || 65 ||

madhye kadambavATI tu puSpapallavazobhitA |

kadambamadirAdhArAH pravartante sahasrazaH || 66 ||

yAbhirnipItapItAbhirnijAnando'nubhUyate |

tatrAdhinAthaH samproktaH zaizirarturmahodayaH || 67 ||

tapaHzrIzca tapasyazrIrdve bhArye tasya sammate |

modamAnaH sahaitAbhyAM vartate zizirAkRtiH || 68 ||

nAnAvilAsasaMyukto nAnAgaNasamAvRtaH |

nivasanti mahAsiddhA ye devIdAnakAriNaH || 69 ||

nAnAbhogasamutpannamahAnandasamanvitAH |

sAGganAH parivAraistu saGghazaH parivAritAH || 70 ||

svarNasAlamayAdagre muniyojanadairghyavAn |

puSparAgamayaH sAlaH kuGkumAruNavigrahaH || 71 ||

puSparAgamayI bhUmirvanAnyupavanAni ca |

ratnavRkSAlavAlAzca puSparAgamayAH smRtAH || 72 ||

prAkAro yasya ratnasya tadratnaracitA drumAH |

vanabhUH pakSinazcaiva ratnavarNajalAni ca || 73 ||

maNDapA maNDapastambhAH sarAnsi kamalAni ca |

prAkAre tatra yadyatsyAttatsarvaM tatsamaM bhavet || 74 ||

paribhASeyamuddiSTA ratnasAlAdiSu prabho |

tejasA syAllakSaguNaH pUrvasAlAtparo nRpa || 75 ||

dikpAlA nivasantyatra pratibrahmAnDavartinAm |

dikpAlAnAM samaSTyAtmarUpAH sphUrjadvarAyudhAH || 76 ||

pUrvAzAyAM samuttuGgazRGgA pUramarAvatI |

nAnopavanasaMyuktA mahendrastatra rAjate || 77 ||

svargazobhA ca yA svarge yAvatI syAttato'dhikA |

samaSTizatanetrasya sahasraguNataH smRtA || 78 ||

airAvatasamArUDho vajrahastaH pratApavAn |

devasenAparivRto rAjate'tra zatakratuH || 79 ||

devAGganAgaNayutA zacI tatra virAjate |

vahnikoNe vahnipurI vahnipUH sadRzI nRpa || 80 ||

svAhAsvadhAsamAyukto vahnistatra virAjate |

nijavAhanabhUSADhyo nijadevagaNairvRtaH || 81 ||

yAmyAzAyAM yamapurI tatra daNDadharo mahAn |

svabhaTairveSTito rAjan citraguptapurogamaiH || 82 ||

nijazaktiyuto bhAsvattanayo'sti yamo mahAn |

nairRtyAM dizi rAkSasyAM rAkSasaiH parivAritaH || 83 ||

khaDgadhArI sphurannAste nirRtirnijazaktiyuk |

vAruNyAM varuNo rAjA pAzadhArI pratApavAn || 84 ||

mahAjhazasamArUDho vAruNImadhuvihvalaH |

nijazaktisamAyukto nijayAdogaNAnvitaH || 85 ||

samAste vAruNe loke varuNAnIratAkulaH |

vAyukoNe vAyuloko vAyustatrAdhitiSThati || 86 ||

vAyusAdhanasaMsiddhayogibhiH parivAritaH |

dhvajahasto vizAlAkSo mRgavAhanasaMsthitaH || 87 ||

marudgaNaiH parivRto nijazaktisamanvitaH |

uttarasyAM dizi mahAnyakSaloko'sti bhUmipa || 88 ||

yakSAdhirAjastatrA''ste vRddhiRddhyAdizaktibhiH |

navabhirnidhibhiryuktastundilo dhananAyakaH || 89 ||

maNibhadraH pUrNabhadro maNimAnmaNikandharaH |

maNibhUSo maNisragvI maNikArmukadhArakaH || 90 ||

ityAdiyakSasenAnIsahito nijazaktiyuk |

IzAnakoNe samprokto rudraloko mahattaraH || 91 ||

anarghyaratnakhacito yatra rudro'dhidaivatam |

manyumAndIptanayano baddhapRSThamaheSudhiH || 92 ||

sphUrjaddhanurvAmahasto'dhijyadhanvabhirAvRtaH |

svasamAnairasaGkhyAtarudraiH zUlavarAyudhaiH || 93 ||

vikRtAsyaiH karAlAsyairvamadvahnibhirAsyataH |

dazahastaiH zatakaraiH sahasrabhujasaMyutaiH || 94 ||

dazapAdairdazagrIvaistrinetrairugramUrtibhiH |

antarikSacarA ye ca ye ca bhUmicarAH smRtAH || 95 ||

rudrAdhyAye smRtA rudrAstaiH sarvaizca samAvRtaH |

rudrANIkoTisahito bhadrakAlyAdimAtRbhiH || 96 ||

nAnAzaktisamAviSTaDAmaryAdigaNAvRtaH |

vIrabhadrAdisahito rudro rAjanvirAjate || 97 ||

muNDamAlAdharo nAgavalayo nAgakandharaH |

vyAghracarmaparIdhAno gajacarmottarIyakaH || 98 ||

citAbhasmAGgaliptAGgaH pramathAdigaNAvRtaH |

ninadaDDamarudhvAnairbadhirIkRtadimmukhaH || 99 ||

aTTahAsAsphoTazabdaiH santrAsitanabhastalaH |

bhUtasaGghasamAviSTo bhUtAvAso mahezvaraH || 100 ||

IzAnadikpatiH so'yaM nAmnA cezAna eva ca || 101 ||

iti zrIdevIbhAgavate mahApurANe dvAdazaskandhe maNidvIpavarNanaM nAma dazamo'dhyAyaH ||