Mahendra Kruta Mahalakshmi Stotram

මහේන්ද්ර කෘත මහාලක්ෂ්මී ස්තෝත්රං

ශ්ලොක 1

මහේන්ද්ර උවාච

නමඃ කමලවාසින්යෛ නාරායණ්යෛ නමෝ නමඃ .

කෘෂ්ණප්රියායෛ සාරායෛ පද්මායෛ ච නමෝ නමඃ .. 1 ..

පද්මපත්රේක්ෂණායෛ ච පද්මාස්යායෛ නමෝ නමඃ .

පද්මාසනායෛ පද්මින්යෛ වෛෂ්ණව්යෛ ච නමෝ නමඃ .. 2 ..

සර්වසම්පත්ස්වරූපායෛ සර්වදාත්ර්යෛ නමෝ නමඃ .

සුඛදායෛ මෝක්ෂදායෛ සිද්ධිදායෛ නමෝ නමඃ .. 3 ..

හරිභක්තිප්රදාත්ර්යෛ ච හර්ෂදාත්ර්යෛ නමෝ නමඃ .

කෘෂ්ණවක්ෂඃස්ථිතායෛ ච කෘෂ්ණේශායෛ නමෝ නමඃ .. 4 ..

කෘෂ්ණශෝභාස්වරූපායෛ රත්නාඪ්යායෛ නමෝ නමඃ .

සම්පත්යධිෂ්ඨාතෘදේව්යෛ මහාදේව්යෛ නමෝ නමඃ .. 5 ..

සස්යාධිෂ්ඨාතෘදේව්යෛ ච සස්යලක්ෂ්ම්යෛ නමෝ නමඃ .

නමෝ බුද්ධිස්වරූපායෛ බුද්ධිදායෛ නමෝ නමඃ .. 6 ..

වෛකුණ්ඨේ ච මහාලක්ෂ්මීර්ලක්ෂ්මීඃ ක්ෂීරෝදසාගරේ .

ස්වර්ගලක්ෂ්මීරින්ද්රගේහේ රාජලක්ෂ්මීර්නෘපාලයේ .. 7 ..

ගෘහලක්ෂ්මීශ්ච ගෘහිණාං ගේහේ ච ගෘහදේවතා .

සුරභිඃ සා ගවාං මාතා දක්ෂිණා යජ්ඤකාමිනී .. 8 ..

අදිතිර්දේවමාතා ත්වං කමලා කමලාලයේ .

ස්වාහා ත්වං ච හවිර්දානේ කව්යදානේ ස්වධා ස්මෘතා .. 9 ..

ත්වං හි විෂ්ණුස්වරූපා ච සර්වාධාරා වසුන්ධරා .

ශුද්ධසත්ත්වස්වරූපා ත්වං නාරායණපරායාණා .. 10 ..

ක්රෝධහිංසාවර්ජිතා ච වරදා ච ශුභානනා .

පරමාර්ථප්රදා ත්වං ච හරිදාස්යප්රදා පරා .. 11 ..

යයා විනා ජගත්සර්වං භස්මීභූතමසාරකම් .

ජීවන්මෘතං ච විශ්වං ච ශවතුල්යං යයා විනා .. 12 ..

සර්වේෂාං ච පරා ත්වං හි සර්වබාන්ධවරූපිණී .

යයා විනා න සම්භාෂ්යෝ බාන්ධවෛර්බාන්ධවඃ සදා .. 13 ..

ත්වයා හීනෝ බන්ධුහීනස්ත්වයා යුක්තඃ සබාන්ධවඃ .

ධර්මාර්ථකාමමෝක්ෂාණාං ත්වං ච කාරණරූපිණී .. 14 ..

ස්තනන්ධයානාං ත්වං මාතා ශිශූනාං ශෛශවේ යථා .

තථා ත්වං සර්වදා මාතා සර්වේෂාං සර්වවිශ්වතඃ .. 15 ..

ත්යක්තස්තනෝ මාතෘහීනඃ ස චේජ්ජීවති දෛවතඃ .

ත්වයා හීනෝ ජනඃ කෝ(අ)පි න ජීවත්යේව නිශ්චිතම් .. 16 ..

සුප්රසන්නස්වරූපා ත්වං මේ ප්රසන්නා භවාම්බිකේ .

වෛරිග්රස්තං ච විෂයං දේහි මහ්යං සනාතනි .. 17 ..

වයං යාවත්ත්වයා හීනා බන්ධුහීනාශ්ච භික්ෂුකාඃ .

සර්වසම්පද්විහීනාශ්ච තාවදේව හරිප්රියේ .. 18 ..

රාජ්යං දේහි ශ්රියං දේහි බලං දේහි සුරේශ්වරි .

කීර්තිං දේහි ධනං දේහි පුත්රාන්මහ්යං ච දේහි වෛ .. 19 ..

කාමං දේහි මතිං දේහි භෝගාන් දේහි හරිප්රියේ .

ජ්ඤානං දේහි ච ධර්මං ච සර්වසෞභාග්යමීප්සිතම් .. 20 ..

සර්වාධිකාරමේවං වෛ ප්රභාවාං ච ප්රතාපකම් .

ජයං පරාක්රමං යුද්ධේ පරමෛශ්වර්යමෛව ච .. 21 ..

ඉත්යුක්ත්වා තු මහේන්ද්රශ්ච සර්වෛඃ සුරගණෛඃ සහ .

නනාම සාශ්රුනේත්රෝ(අ)යං මූර්ධ්නා චෛව පුනඃ පුනඃ .. 22 ..

බ්රහ්මා ච ශඞ්කරශ්චෛව ශේෂෝ ධර්මශ්ච කේශවඃ .

සර්වේ චක්රුඃ පරීහාරං සුරාර්ථේ ච පුනඃ පුනඃ .. 23 ..

දේවේභ්යශ්ච වරං දත්ත්වා පුෂ්පමාලාං මනෝහරාම් .

කේශවාය දදෞ ලක්ෂ්මීඃ සන්තුෂ්ටා සුරසංසදි .. 24 ..

යයුර්දෛවාශ්ච සන්තුෂ්ටාඃ ස්වං ස්වං ස්ථානං ච නාරද .

දේවී යයෞ හරේඃ ක්රෝඩං හෘෂ්ටා ක්ෂීරෝදශායිනඃ .. 25 ..

යයතුස්තෞ ස්වස්වගෘහං බ්රහ්මේශානෞ ච නාරද .

දත්ත්වා ශුභාශිෂං තෞ ච දේවේභ්යඃ ප්රීතිපූර්වකම් .. 26 ..

ඉදං ස්තෝත්රං මහාපුණ්යං ත්රිසන්ධ්යං යඃ පඨේන්නරඃ .

කුබේරතුල්යඃ ස භවේද්රාජරාජේශ්වරෝ මහාන් .. 27 ..

සිද්ධස්තෝත්රං යදි පඨේත් සෝ(අ)පි කල්පතරුර්නරඃ .

පඤ්චලක්ෂජපේනෛව ස්තෝත්රසිද්ධිර්භවේන්නෘණාම් .. 28 ..

සිද්ධස්තෝත්රං යදි පඨේන්මාසමේකං ච සංයතඃ .

මහාසුඛී ච රාජේන්ද්රෝ භවිෂ්යති න සංශයඃ .. 29 ..

ඉති ශ්රීබ්රහ්මවෛවර්තේ මහාපුරාණේ ද්විතීයේ ප්රකෘතිඛණ්ඩේ නාරදනාරායණසංවාදේ ඒකෝනචත්වාරිංශත්තමෝ(අ)ධ්යායේ මහේන්ද්ර කෘත ශ්රී මහාලක්ෂ්මී ස්තෝත්රම් .