మహేన్ద్ర కృత మహాలక్ష్మీ స్తోత్రం

మహేన్ద్ర కృత మహాలక్ష్మీ స్తోత్రం

శ్లోక 1

మహేన్ద్ర ఉవాచ

నమః కమలవాసిన్యై నారాయణ్యై నమో నమః ।

కృష్ణప్రియాయై సారాయై పద్మాయై చ నమో నమః

శ్లోక 2

పద్మపత్రేక్షణాయై చ పద్మాస్యాయై నమో నమః ।

పద్మాసనాయై పద్మిన్యై వైష్ణవ్యై చ నమో నమః

॥ 1 ॥

శ్లోక 3

సర్వసమ్పత్స్వరూపాయై సర్వదాత్ర్యై నమో నమః ।

సుఖదాయై మోక్షదాయై సిద్ధిదాయై నమో నమః

॥ 2 ॥

శ్లోక 4

హరిభక్తిప్రదాత్ర్యై చ హర్షదాత్ర్యై నమో నమః ।

కృష్ణవక్షఃస్థితాయై చ కృష్ణేశాయై నమో నమః

॥ 3 ॥

శ్లోక 5

కృష్ణశోభాస్వరూపాయై రత్నాఢ్యాయై నమో నమః ।

సమ్పత్యధిష్ఠాతృదేవ్యై మహాదేవ్యై నమో నమః

॥ 4 ॥

శ్లోక 6

సస్యాధిష్ఠాతృదేవ్యై చ సస్యలక్ష్మ్యై నమో నమః ।

నమో బుద్ధిస్వరూపాయై బుద్ధిదాయై నమో నమః

॥ 5 ॥

శ్లోక 7

వైకుణ్ఠే చ మహాలక్ష్మీర్లక్ష్మీః క్షీరోదసాగరే ।

స్వర్గలక్ష్మీరిన్ద్రగేహే రాజలక్ష్మీర్నృపాలయే

॥ 6 ॥

శ్లోక 8

గృహలక్ష్మీశ్చ గృహిణాం గేహే చ గృహదేవతా ।

సురభిః సా గవాం మాతా దక్షిణా యజ్ఞకామినీ

॥ 7 ॥

శ్లోక 9

అదితిర్దేవమాతా త్వం కమలా కమలాలయే ।

స్వాహా త్వం చ హవిర్దానే కవ్యదానే స్వధా స్మృతా

॥ 8 ॥

శ్లోక 10

త్వం హి విష్ణుస్వరూపా చ సర్వాధారా వసున్ధరా ।

శుద్ధసత్త్వస్వరూపా త్వం నారాయణపరాయాణా

॥ 9 ॥

శ్లోక 11

క్రోధహింసావర్జితా చ వరదా చ శుభాననా ।

పరమార్థప్రదా త్వం చ హరిదాస్యప్రదా పరా

॥ 10 ॥

శ్లోక 12

యయా వినా జగత్సర్వం భస్మీభూతమసారకమ్ ।

జీవన్మృతం చ విశ్వం చ శవతుల్యం యయా వినా

॥ 11 ॥

శ్లోక 13

సర్వేషాం చ పరా త్వం హి సర్వబాన్ధవరూపిణీ ।

యయా వినా న సమ్భాష్యో బాన్ధవైర్బాన్ధవః సదా

॥ 12 ॥

శ్లోక 14

త్వయా హీనో బన్ధుహీనస్త్వయా యుక్తః సబాన్ధవః ।

ధర్మార్థకామమోక్షాణాం త్వం చ కారణరూపిణీ

॥ 13 ॥

శ్లోక 15

స్తనన్ధయానాం త్వం మాతా శిశూనాం శైశవే యథా ।

తథా త్వం సర్వదా మాతా సర్వేషాం సర్వవిశ్వతః

॥ 14 ॥

శ్లోక 16

త్యక్తస్తనో మాతృహీనః స చేజ్జీవతి దైవతః ।

త్వయా హీనో జనః కోఽపి న జీవత్యేవ నిశ్చితమ్

॥ 15 ॥

శ్లోక 17

సుప్రసన్నస్వరూపా త్వం మే ప్రసన్నా భవామ్బికే ।

వైరిగ్రస్తం చ విషయం దేహి మహ్యం సనాతని

॥ 16 ॥

శ్లోక 18

వయం యావత్త్వయా హీనా బన్ధుహీనాశ్చ భిక్షుకాః ।

సర్వసమ్పద్విహీనాశ్చ తావదేవ హరిప్రియే

॥ 17 ॥

శ్లోక 19

రాజ్యం దేహి శ్రియం దేహి బలం దేహి సురేశ్వరి ।

కీర్తిం దేహి ధనం దేహి పుత్రాన్మహ్యం చ దేహి వై

॥ 18 ॥

శ్లోక 20

కామం దేహి మతిం దేహి భోగాన్ దేహి హరిప్రియే ।

జ్ఞానం దేహి చ ధర్మం చ సర్వసౌభాగ్యమీప్సితమ్

॥ 19 ॥

శ్లోక 21

సర్వాధికారమేవం వై ప్రభావాం చ ప్రతాపకమ్ ।

జయం పరాక్రమం యుద్ధే పరమైశ్వర్యమైవ చ

॥ 20 ॥

శ్లోక 22

ఇత్యుక్త్వా తు మహేన్ద్రశ్చ సర్వైః సురగణైః సహ ।

ననామ సాశ్రునేత్రోఽయం మూర్ధ్నా చైవ పునః పునః

॥ 21 ॥

శ్లోక 23

బ్రహ్మా చ శఙ్కరశ్చైవ శేషో ధర్మశ్చ కేశవః ।

సర్వే చక్రుః పరీహారం సురార్థే చ పునః పునః

॥ 22 ॥

శ్లోక 24

దేవేభ్యశ్చ వరం దత్త్వా పుష్పమాలాం మనోహరామ్ ।

కేశవాయ దదౌ లక్ష్మీః సన్తుష్టా సురసంసది

॥ 23 ॥

శ్లోక 25

యయుర్దైవాశ్చ సన్తుష్టాః స్వం స్వం స్థానం చ నారద ।

దేవీ యయౌ హరేః క్రోడం హృష్టా క్షీరోదశాయినః

॥ 24 ॥

శ్లోక 26

యయతుస్తౌ స్వస్వగృహం బ్రహ్మేశానౌ చ నారద ।

దత్త్వా శుభాశిషం తౌ చ దేవేభ్యః ప్రీతిపూర్వకమ్

॥ 25 ॥

శ్లోక 27

ఇదం స్తోత్రం మహాపుణ్యం త్రిసన్ధ్యం యః పఠేన్నరః ।

కుబేరతుల్యః స భవేద్రాజరాజేశ్వరో మహాన్

॥ 26 ॥

శ్లోక 28

సిద్ధస్తోత్రం యది పఠేత్ సోఽపి కల్పతరుర్నరః ।

పఞ్చలక్షజపేనైవ స్తోత్రసిద్ధిర్భవేన్నృణామ్

॥ 27 ॥

శ్లోక 29

సిద్ధస్తోత్రం యది పఠేన్మాసమేకం చ సంయతః ।

మహాసుఖీ చ రాజేన్ద్రో భవిష్యతి న సంశయః

॥ 28 ॥

శ్లోక 30

ఇతి శ్రీబ్రహ్మవైవర్తే మహాపురాణే ద్వితీయే ప్రకృతిఖణ్డే నారదనారాయణసంవాదే ఏకోనచత్వారింశత్తమోఽధ్యాయే మహేన్ద్ర కృత శ్రీ మహాలక్ష్మీ స్తోత్రమ్ ।