Maha Ganapati Mula Mantra Pada Mala Stotram
Maha Ganapati Mula Mantra Pada Mala Stotram
mahA gaNapati mUla mantrAH (pAda mAlA stotram)
zloka 1
|| mUlamantram ||
|| OM hrIM zrIM klIM glauM gaM gaNapataye varavarada
sarvajanaM me vazamAnaya svAhA ||
|| atha stotram||
OM ityetadajasya kaNThavivaraM bhitvA bahirnirgataM
hyomityeva samastakarma RSibhiH prArabhyate mAnuSaiH |
omityeva sadA japanti yatayaH svAtamaikaniSThAH paraM
hyoGkArAkRtivaktraminduniTilaM vighnezvaraM bhavAye || 1||
zrImbIjaM zramaduHkhajanmamaraNavyAdhyAdhibhInAzakaM
mRtyukrodhanazAntibinduvilasadvarNAkRtizrIpradam |
svAntaHsvAtmazarasya lakSyamajarasvAtmAvabodhapradaM
zrIzrInAyakasevite bhavadanapremAspadaM bhAvaye || 2||
hrImbIjaM hRdayatrikoNavilasanmadhyAsanasthaM sadA
cAkAzAnalavAmalocananizAnAthArdhavarNAtmakam |
mAyAkAryajagatprakAzakamumArUpaM svazaktipradaM
mAyAtItapadapradaM hRdi bhaje lokezvarArAdhitam || 3||
klImbIjaM kalidhAtuvatkalayatAM sarveSTadaM dehinAM
dhAtRkSmAyutazAntibinduvilasadvarNAtmakaM kAmadam |
zrIkRSNapriyamindirAsutamanaHprItyekahetuM paraM
hRtpadme kalaye sadA kaliharaM kAlAriputrapriyam || 4||
glaumbIjaM guNarUpanirguNaparabrahmAdizaktermahA-
haGkArAkRtidaNDinIpriyamajazrInAtharudreSTadam |
sarvAkarSiNidevarAjabhuvanArNendvAtmakaM zrIkaraM
citte vighnanivAraNAya girijajAtapriyaM bhAvaye || 5||
gaGgAsutaM gandhamukhopacArapriyaM khagArohaNabhAgineyam |
gaGgAsutAdyaM varagandhatattvamUlAmbujasthaM hRdi bhAvaye'ham || 6||
gaNapataye varaguNanidhaye suragaNapataye natajanatataye |
maNigaNabhUSitacaraNayugAzritamalaharaNe caNa te namaH || 7||
varAbhaye modakamekadantaM karAmbujAtaiH satataM dharantam |
varAGgacandraM parabhaktisAndrairjanairbhajantaM kalaye sadA'ntaH || 8||
varada natajanAnAM santataM vakratuNDa
svaramayanijagAtra svAtmabodhaikaheto |
karalasadamRtAmbhopUrNapatrAdya mahyaM
garagalasuta zIghraM dehi madbodhamIDyam || 9||
sarvajanaM paripAlaya zarvaja
parvasudhAkaragarvahara |
parvatanAthasutAsuta pAlaya
kharvaM mA kuru dInamimam || 10 ||
medo'sthimAMsarudhirAntramaye zarIre
medinyabagnimarudambaralAsyamAne |
me dAruNaM madamukhAghamumAja hRtvA
medhAhvayAsanavare vasa dantivaktra || 11||
vazaM kuru tvaM zivajAta mAM te vazIkRtAzeSasamastaloka |
vasArNasaMzobhitamUlapadmalasacchriyA'liGtavAraNAsya || 12||
AnayAzupadavArijAntikaM mAM nayAdiguNavarjitaM tava |
hAnihInapadajAmRtasya te pAnayogyamibhavaktra mAM kuru || 13||
svAhAsvarUpeNa virAjase tvaM sudhAzanAnAM priyakarmaNIDyam |
svadhAsvarUpeNa tu pitryakarmaNyumAsutejyAmayavizvamUrte || 14||
aSTAviMzativarNapatralasitaM hAraM gaNezapriyaM
kaSTA'niSTaharaM caturdazapadaiH puSpairmanohArakam |
tuSTyAdipradasadguruttamapadAmbhoje cidAnandadaM
ziSTeSTo'hamanantasUtrahRdayA''baddhaM subhaktyA'rpaye || 15||
|| iti zrIanantAnandakRtaM zrIgurucidAnandanAthasamarpitaM
zrImahAgaNapatimUlamantramAlAstotram ||