Lakshmi Narasimha Ashtottara Sata Nama Stotram

lakSmI narasiMha aSTottara zata nAma stotram

zloka 1

nArasiMho mahAsiMho divyasiMho mahAbalaH |

ugrasiMho mahAdevasstambhajazcogralocanaH || 1 ||

raudrassarvAdbhutaH zrImAn yogAnandastrivikramaH |

hariH kolAhalazcakrI vijayo jayavardhanaH || 2 ||

paJcAnanaH parabrahma cA'ghoro ghoravikramaH |

jvalanmukho jvAlamAlI mahAjvAlo mahAprabhuH || 3 ||

niTilAkSassahasrAkSo durnirIkSaH pratApanaH |

mahAdaMSTrAyudhaH prAjJazcaNDakopI sadAzivaH || 4 ||

hiraNyakazipudhvaMsI daityadAnavabhaJjanaH |

guNabhadro mahAbhadro balabhadrassubhadrakaH || 5 ||

karAlo vikarAlazca vikartA sarvakartRkaH |

ziMzumArastrilokAtmA Izassarvezvaro vibhuH || 6 ||

bhairavADambaro divyazcA'cyutaH kavi mAdhavaH |

adhokSajo'kSarazzarvo vanamAlI varapradaH || 7 ||

vizvambharo'dbhuto bhavyaH zrIviSNuH puruSottamaH |

anaghAstro nakhAstrazca sUryajyotissurezvaraH || 8 ||

sahasrabAhuHssarvajJassarvasiddhipradAyakaH |

vajradaMSTro vajranakho mahAnandaH parantapaH || 9 ||

sarvamantraikarUpazca sarvayantravidAraNaH |

sarvatantrAtmako'vyaktassuvyakto bhaktavatsalaH || 10 ||

vaizAkhazuklabhUtotthaH zaraNAgatavatsalaH |

udArakIrtiH puNyAtmA mahAtmA caNDavikramaH || 11 ||

vedatrayaprapUjyazca bhagavAnparamezvaraH |

zrIvatsAGkaH zrInivAso jagadvyApI jaganmayaH || 12 ||

jagatpAlo jagannAtho mahAkAyo dvirUpabhRt |

paramAtmA paraJjyotirnirguNazca nRkesarI || 13 ||

paratattvaH parandhAma saccidAnandavigrahaH |

lakSmInRsiMhassarvAtmA dhIraH prahlAdapAlakaH || 14 ||

idaM zrImannRsiMhasya nAmnAmaSTottaraM zatam |

trisandhyaM yaH paThedbhaktyA sarvAbhISTamavApnuyAt || 15 ||

iti zrInRsiMhapUjAkalpe zrI lakSmInRsiMhASTottarazatanAma stotram |