Kanakadhara Stotram
Kanakadhara Stotram
Kanakadhara Stotram
kanakadhArA stotram
shloka 1
vande vandAru mandAramindirAnandakandalam |
amandAnandasandoha bandhuraM sindhurAnanam ||
a~NgaM hareH pulakabhUShaNamAshrayantI
bhRRiNgANganeva mukulAbharaNaM tamAlam |
aNgIkRRitAkhilavibhUtirapANgalIlA
mANgalyadAstu mama maNgaladevatAyAH || 1 ||
mugdhA muhurvidadhatI vadane murAreH
prematrapApraNihitAni gatAgatAni |
mAlA dRRishormadhukarIva mahotpale yA
sA me shriyaM dishatu sAgarasambhavAyAH || 2 ||
AmIlitAkShamadhigamya mudA mukundam-
AnandakandamanimeShamana~Ngatantram |
AkekarasthitakanInikapakShmanetraM
bhUtyai bhavenmama bhujaNgashayANganAyAH || 3 ||
bAhvantare madhujitaH shritakaustubhe yA
hArAvalIva harinIlamayI vibhAti |
kAmapradA bhagavato.api kaTAkShamAlA
kalyANamAvahatu me kamalAlayAyAH || 4 ||
kAlAmbudAlilalitorasi kaiTabhAreH
dhArAdhare sphurati yA taTida~Nganeva |
mAtussamastajagatAM mahanIyamUrtiH
bhadrANi me dishatu bhArgavanandanAyAH || 5 ||
prAptaM padaM prathamataH khalu yatprabhAvAt
mA~NgalyabhAji madhumAthini manmathena |
mayyApatettadiha mantharamIkShaNArdhaM
mandAlasaM cha makarAlayakanyakAyAH || 6 ||
vishvAmarendrapadavibhramadAnadakShaM
AnandaheturadhikaM muravidviSho.api |
IShanniShIdatu mayi kShaNamIkShaNArthaM
indIvarodarasahodaramindirAyAH || 7 ||
iShTA vishiShTamatayo.api yayA dayArdra
dRRiShTyA triviShTapapadaM sulabhaM labhante |
dRRiShTiH prahRRiShTa kamalodaradIptiriShTAM
puShTiM kRRiShIShTa mama puShkaraviShTarAyAH || 8 ||
dadyAddayAnupavano draviNAmbudhArA-
masminna kinchana vihaNgashishau viShaNNe |
duShkarmagharmamapanIya chirAya dUraM
nArAyaNapraNayinInayanAmbuvAhaH || 9 ||
gIrdevateti garuDadhvajasundarIti
shAkambharIti shashishekharavallabheti |
sRRiShTisthitipralayakeliShu saMsthitAyai
tasyai namastribhuvanaikagurostaruNyai || 10 ||
shrutyai namo.astu shubhakarmaphalaprasUtyai
ratyai namo.astu ramaNIyaguNArNavAyai |
shaktyai namo.astu shatapatraniketanAyai
puShTyai namo.astu puruShottamavallabhAyai || 11 ||
namo.astu nAlIkanibhAnanAyai
namo.astu dugdhodadhijanmabhUmyai |
namo.astu somAmRRitasodarAyai
namo.astu nArAyaNavallabhAyai || 12 ||
namo.astu hemAmbujapIThikAyai
namo.astu bhUmaNDalanAyikAyai |
namo.astu devAdidayAparAyai
namo.astu shAr~NgAyudhavallabhAyai || 13 ||
namo.astu devyai bhRRigunandanAyai
namo.astu viShNorurasisthitAyai |
namo.astu lakShmyai kamalAlayAyai
namo.astu dAmodaravallabhAyai || 14 ||
namo.astu kAntyai kamalekShaNAyai
namo.astu bhUtyai bhuvanaprasUtyai |
namo.astu devAdibhirarchitAyai
namo.astu nandAtmajavallabhAyai || 15 ||
sampatkarANi sakalendriyanandanAni
sAmrAjyadAnavibhavAni saroruhAkShi |
tvadvandanAni duritoddharaNodyatAni
mAmeva mAtaranishaM kalayantu mAnye || 16 ||
yatkaTAkShasamupAsanAvidhiH
sevakasya sakalArthasampadaH |
santanoti vachanA~NgamAnasaiH
tvAM murArihRRidayeshvarIM bhaje || 17 ||
sarasijanilaye sarojahaste [sarasijanayanè]
dhavalatamAMshukagandhamAlyashobhe |
bhagavati harivallabhe manoj~ne
tribhuvanabhUtikari prasIda mahyam || 18 ||
digghastibhiH kanakakumbhamukhAvasRRiShTa
svarvAhinI vimalachArujalaplutA~NgIm |
prAtarnamAmi jagatAM jananImasheSha
lokAdhinAtha-gRRihiNIm-amRRitAbdhiputrIm || 19 ||
kamale kamalAkShavallabhe tvaM
karuNApUrataraNgitairapANgaiH |
avalokaya mAmaki~nchanAnAM
prathamaM pAtramakRRitrimaM dayAyAH || 20 ||
stuvanti ye stutibhiramUbhiranvahaM
trayImayIM tribhuvanamAtaraM ramAm |
guNAdhikA gurutara-bhAgya-bhAgino [bhAginah]
bhavanti te bhuvi budhabhAvitAshayAH || 21 ||
suvarNadhArAstotraM yachCha~NkarAchArya nirmitam |
trisandhyaM yaH paThennityaM sa kuberasamo bhavet ||
iti shrImatparamahaMsaparivrAjakAchAryasya shrIgovindabhagavatpUjyapAdashiShyasya shrImachCha~NkarabhagavataH kRRitau kanakadhArAstotraM sampUrNam |