Kanakadhara Stotram
Kanakadhara Stotram
kanakadhArA stotram
zloka 1
vande vandAru mandAramindirAnandakandalam |
amandAnandasandoha bandhuraM sindhurAnanam ||
aGgaM hareH pulakabhUSaNamAzrayantI
bhRGgAGganeva mukulAbharaNaM tamAlam |
aGgIkRtAkhilavibhUtirapAGgalIlA
mAGgalyadAstu mama maGgaladevatAyAH || 1 ||
mugdhA muhurvidadhatI vadane murAreH
prematrapApraNihitAni gatAgatAni |
mAlA dRzormadhukarIva mahotpale yA
sA me zriyaM dizatu sAgarasambhavAyAH || 2 ||
AmIlitAkSamadhigamya mudA mukundam-
AnandakandamanimeSamanaGgatantram |
AkekarasthitakanInikapakSmanetraM
bhUtyai bhavenmama bhujaGgazayAGganAyAH || 3 ||
bAhvantare madhujitaH zritakaustubhe yA
hArAvalIva harinIlamayI vibhAti |
kAmapradA bhagavato'pi kaTAkSamAlA
kalyANamAvahatu me kamalAlayAyAH || 4 ||
kAlAmbudAlilalitorasi kaiTabhAreH
dhArAdhare sphurati yA taTidaGganeva |
mAtussamastajagatAM mahanIyamUrtiH
bhadrANi me dizatu bhArgavanandanAyAH || 5 ||
prAptaM padaM prathamataH khalu yatprabhAvAt
mAGgalyabhAji madhumAthini manmathena |
mayyApatettadiha mantharamIkSaNArdhaM
mandAlasaM ca makarAlayakanyakAyAH || 6 ||
vizvAmarendrapadavibhramadAnadakSaM
AnandaheturadhikaM muravidviSo'pi |
ISanniSIdatu mayi kSaNamIkSaNArthaM
indIvarodarasahodaramindirAyAH || 7 ||
iSTA viziSTamatayo'pi yayA dayArdra
dRSTyA triviSTapapadaM sulabhaM labhante |
dRSTiH prahRSTa kamalodaradIptiriSTAM
puSTiM kRSISTa mama puSkaraviSTarAyAH || 8 ||
dadyAddayAnupavano draviNAmbudhArA-
masminna kiJcana vihaGgazizau viSaNNe |
duSkarmagharmamapanIya cirAya dUraM
nArAyaNapraNayinInayanAmbuvAhaH || 9 ||
gIrdevateti garuDadhvajasundarIti
zAkambharIti zazizekharavallabheti |
sRSTisthitipralayakeliSu saMsthitAyai
tasyai namastribhuvanaikagurostaruNyai || 10 ||
zrutyai namo'stu zubhakarmaphalaprasUtyai
ratyai namo'stu ramaNIyaguNArNavAyai |
zaktyai namo'stu zatapatraniketanAyai
puSTyai namo'stu puruSottamavallabhAyai || 11 ||
namo'stu nAlIkanibhAnanAyai
namo'stu dugdhodadhijanmabhUmyai |
namo'stu somAmRtasodarAyai
namo'stu nArAyaNavallabhAyai || 12 ||
namo'stu hemAmbujapIThikAyai
namo'stu bhUmaNDalanAyikAyai |
namo'stu devAdidayAparAyai
namo'stu zArGgAyudhavallabhAyai || 13 ||
namo'stu devyai bhRgunandanAyai
namo'stu viSNorurasisthitAyai |
namo'stu lakSmyai kamalAlayAyai
namo'stu dAmodaravallabhAyai || 14 ||
namo'stu kAntyai kamalekSaNAyai
namo'stu bhUtyai bhuvanaprasUtyai |
namo'stu devAdibhirarcitAyai
namo'stu nandAtmajavallabhAyai || 15 ||
sampatkarANi sakalendriyanandanAni
sAmrAjyadAnavibhavAni saroruhAkSi |
tvadvandanAni duritoddharaNodyatAni
mAmeva mAtaranizaM kalayantu mAnye || 16 ||
yatkaTAkSasamupAsanAvidhiH
sevakasya sakalArthasampadaH |
santanoti vacanAGgamAnasaiH
tvAM murArihRdayezvarIM bhaje || 17 ||
sarasijanilaye sarojahaste [sarasijanayanè]
dhavalatamAMzukagandhamAlyazobhe |
bhagavati harivallabhe manojJe
tribhuvanabhUtikari prasIda mahyam || 18 ||
digghastibhiH kanakakumbhamukhAvasRSTa
svarvAhinI vimalacArujalaplutAGgIm |
prAtarnamAmi jagatAM jananImazeSa
lokAdhinAtha-gRhiNIm-amRtAbdhiputrIm || 19 ||
kamale kamalAkSavallabhe tvaM
karuNApUrataraGgitairapAGgaiH |
avalokaya mAmakiJcanAnAM
prathamaM pAtramakRtrimaM dayAyAH || 20 ||
stuvanti ye stutibhiramUbhiranvahaM
trayImayIM tribhuvanamAtaraM ramAm |
guNAdhikA gurutara-bhAgya-bhAgino [bhAginah]
bhavanti te bhuvi budhabhAvitAzayAH || 21 ||
suvarNadhArAstotraM yacchaGkarAcArya nirmitam |
trisandhyaM yaH paThennityaM sa kuberasamo bhavet ||
iti zrImatparamahaMsaparivrAjakAcAryasya zrIgovindabhagavatpUjyapAdaziSyasya zrImacchaGkarabhagavataH kRtau kanakadhArAstotraM sampUrNam |