Jagannatha Ashtakam

jagannAthASTakam

zloka 1

kadAcit-kAlindI taTavipina saGgItakaravo

mudAbhIrI nArIvadana kamalAsvAdamadhupaH |

ramA zambhu brahmAmarapati gaNezArcita pado

jagannAthaH svAmI nayanapathagAmI bhavatu me || 1 ||

bhuje savye veNuM zirasi zikhipiJchaM kaTitaTe

dukUlaM netrAnte sahacarakaTAkSaM vidadhate |

sadA zrImadvRndAvanavasatilIlAparicayo

jagannAthaH svAmI nayanapathagAmI bhavatu me || 2 ||

mahAmbhodhestIre kanakarucire nIlazikhare

vasan prAsAdAntassahaja balabhadreNa balinA |

subhadrA madhyasthassakalasura sevAvasarado

jagannAthaH svAmI nayanapathagAmI bhavatu me || 3 ||

kRpA pArAvArAssajala jalada zreNiruciro

ramAvANI rAmasphuradamala paGkèruhamukhaH |

surendrairArAdhyaH zrutigaNazikhA gIta carito

jagannAthaH svAmI nayanapathagAmI bhavatu me || 4 ||

rathArUDho gacchan pathi milita bhUdevapaTalaiH

stuti prAdurbhAvaM pratipadamupAkarNya sadayaH |

dayAsindhurbandhussakala jagatA sindhusutayA

jagannAthaH svAmI nayanapathagAmI bhavatu me || 5 ||

parabrahmApIDaH kuvalaya-dalotphullanayano

nivAsI nIlAdrau nihita-caraNo'nanta-zirasi |

rasAnando rAdhA-sarasa-vapurAliGgana-sakho

jagannAthaH svAmI nayanapathagAmI bhavatu me || 6 ||

na vai yAce rAjyaM na ca kanaka mANikya vibhavaM

na yAce'haM ramyAM nikhilajana-kAmyAM varavadhUm |

sadA kAle kAle pramatha-patinA gItacarito

jagannAthaH svAmI nayanapathagAmI bhavatu me || 7 ||

hara tvaM saMsAraM drutataramasAraM surapate

hara tvaM pApAnAM vitatimaparAM yAdavapate |

aho dIno'nAthe nihitacaraNo nizcitamidaM

jagannAthaH svAmI nayanapathagAmI bhavatu me || 8 ||

jagannAthASTakaM puNyaM yaH paThet prayataH zuciH |

sarvapApa vizuddhAtmA viSNulokaM sa gacchati ||

iti zrImad zaGkarAcAryaviracitaM jagannAthASTakaM sampUrNaM||