Hiranya Garbha Suktam

ହିରଣ୍ଯ ଗର୍ଭ ସୂକ୍ତମ୍

ଶ୍ଲୋକ 1

(ଋ.10.121)

ହି॒ର॒ଣ୍ଯ॒ଗ॒ର୍ଭ-ସ୍ସମ॑ଵର୍ତ॒ତାଗ୍ରେ॑ ଭୂ॒ତସ୍ଯ॑ ଜା॒ତଃ ପତି॒ରେକ॑ ଆସୀତ୍ ।

ସ ଦା॑ଧାର ପୃଥି॒ଵୀ-ନ୍ଦ୍ଯାମୁ॒ତେମା-ଙ୍କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 1

ଯ ଆ॑ତ୍ମ॒ଦା ବ॑ଲ॒ଦା ଯସ୍ଯ॒ ଵିଶ୍ଵ॑ ଉ॒ପାସ॑ତେ ପ୍ର॒ଶିଷଂ॒-ଯଁସ୍ଯ॑ ଦେ॒ଵାଃ ।

ଯସ୍ଯ॑ ଛା॒ଯାମୃତଂ॒-ଯଁସ୍ଯ॑ ମୃ॒ତ୍ଯୁଃ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 2

ଯଃ ପ୍ରା॑ଣ॒ତୋ ନି॑ମିଷ॒ତୋ ମ॑ହି॒ତ୍ଵୈକ॒ ଇଦ୍ରାଜା॒ ଜଗ॑ତୋ ବ॒ଭୂଵ॑ ।

ଯ ଈଶେ॑ ଅ॒ସ୍ଯ ଦ୍ଵି॒ପଦ॒ଶ୍ଚତୁ॑ଷ୍ପଦଃ॒ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 3

ଯସ୍ଯେ॒ମେ ହି॒ମଵ॑ନ୍ତୋ ମହି॒ତ୍ଵା ଯସ୍ଯ॑ ସମୁ॒ଦ୍ରଂ ର॒ସଯା॑ ସ॒ହାହୁଃ ।

ଯସ୍ଯେ॒ମାଃ ପ୍ର॒ଦିଶୋ॒ ଯସ୍ଯ॑ ବା॒ହୂ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 4

ଯେନ॒ ଦ୍ଯୌରୁ॒ଗ୍ରା ପୃ॑ଥି॒ଵୀ ଚ॑ ଦୃ॒ଲ୍​ହା ଯେନ॒ ସ୍ଵଃ॑ ସ୍ତଭି॒ତଂ-ଯେଁନ॒ ନାକଃ॑ ।

ଯୋ ଅ॒ନ୍ତରି॑କ୍ଷେ॒ ରଜ॑ସୋ ଵି॒ମାନଃ॒ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 5

ଯ-ଙ୍କ୍ରନ୍ଦ॑ସୀ॒ ଅଵ॑ସା ତସ୍ତଭା॒ନେ ଅ॒ଭ୍ଯୈକ୍ଷେ॑ତା॒-ମ୍ମନ॑ସା॒ ରେଜ॑ମାନେ ।

ଯତ୍ରାଧି॒ ସୂର॒ ଉଦି॑ତୋ ଵି॒ଭାତି॒ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 6

ଆପୋ॑ ହ॒ ଯଦ୍ବୃ॑ହ॒ତୀର୍ଵିଶ୍ଵ॒ମାଯ॒-ନ୍ଗର୍ଭ॒-ନ୍ଦଧା॑ନା ଜ॒ନଯ॑ନ୍ତୀର॒ଗ୍ନିମ୍ ।

ତତୋ॑ ଦେ॒ଵାନାଂ॒ ସମ॑ଵର୍ତ॒ତାସୁ॒ରେକଃ॒ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 7

ଯଶ୍ଚି॒ଦାପୋ॑ ମହି॒ନା ପ॒ର୍ଯପ॑ଶ୍ଯ॒ଦ୍ଦକ୍ଷ॒-ନ୍ଦଧା॑ନା ଜ॒ନଯ॑ନ୍ତୀର୍ଯ॒ଜ୍ଞମ୍ ।

ଯୋ ଦେ॒ଵେଷ୍ଵିଧି॑ ଦେ॒ଵ ଏକ॒ ଆସୀ॒ତ୍କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 8

ମା ନୋ॑ ହିଂସୀଜ୍ଜନି॒ତା ଯଃ ପୃ॑ଥି॒ଵ୍ଯା ଯୋ ଵା॒ ଦିଵଂ॑ ସ॒ତ୍ଯଧ॑ର୍ମା ଜ॒ଜାନ॑ ।

ଯଶ୍ଚା॒ପଶ୍ଚ॒ନ୍ଦ୍ରା ବୃ॑ହ॒ତୀର୍ଜ॒ଜାନ॒ କସ୍ମୈ॑ ଦେ॒ଵାଯ॑ ହ॒ଵିଷା॑ ଵିଧେମ ॥ 9

ପ୍ରଜା॑ପତେ॒ ନ ତ୍ଵଦେ॒ତାନ୍ଯ॒ନ୍ଯୋ ଵିଶ୍ଵା॑ ଜା॒ତାନି॒ ପରି॒ ତା ବ॑ଭୂଵ ।

ଯତ୍କା॑ମାସ୍ତେ ଜୁହୁ॒ମସ୍ତନ୍ନୋ॑ ଅସ୍ତୁ ଵ॒ଯଂ ସ୍ଯା॑ମ॒ ପତ॑ଯୋ ରଯୀ॒ଣାମ୍ ॥ 10