Hiranya Garbha Suktam

hiraṇya garbha sūktam

Śloka 1

(ṛ.10.121)

hi॒ra॒ṇya॒ga॒rbha-ssama̭varta॒tāgrḙ bhū॒tasya̭ jā॒taḥ pati॒reka̭ āsīt |

sa dā̭dhāra pṛthi॒vī-ndyāmu॒temā-ṅkasmai̭ de॒vāya̭ ha॒viṣā̭ vidhema || 1

ya ā̭tma॒dā ba̭la॒dā yasya॒ viśva̭ u॒pāsa̭te pra॒śiṣaṃ॒-ya~sya̭ de॒vāḥ |

yasya̭ chā॒yāmṛtaṃ॒-ya~sya̭ mṛ॒tyuḥ kasmai̭ de॒vāya̭ ha॒viṣā̭ vidhema || 2

yaḥ prā̭ṇa॒to ni̭miṣa॒to ma̭hi॒tvaika॒ idrājā॒ jaga̭to ba॒bhūva̭ |

ya īśḙ a॒sya dvi॒pada॒ścatṷṣpadaḥ॒ kasmai̭ de॒vāya̭ ha॒viṣā̭ vidhema || 3

yasye॒me hi॒mava̭nto mahi॒tvā yasya̭ samu॒draṃ ra॒sayā̭ sa॒hāhuḥ |

yasye॒māḥ pra॒diśo॒ yasya̭ bā॒hū kasmai̭ de॒vāya̭ ha॒viṣā̭ vidhema || 4

yena॒ dyauru॒grā pṛ̭thi॒vī ca̭ dṛ॒l​hā yena॒ svaḥ̭ stabhi॒taṃ-ye~na॒ nākaḥ̭ |

yo a॒ntari̭kṣe॒ raja̭so vi॒mānaḥ॒ kasmai̭ de॒vāya̭ ha॒viṣā̭ vidhema || 5

ya-ṅkranda̭sī॒ ava̭sā tastabhā॒ne a॒bhyaikṣḙtā॒-mmana̭sā॒ reja̭māne |

yatrādhi॒ sūra॒ udi̭to vi॒bhāti॒ kasmai̭ de॒vāya̭ ha॒viṣā̭ vidhema || 6

āpo̭ ha॒ yadbṛ̭ha॒tīrviśva॒māya॒-ngarbha॒-ndadhā̭nā ja॒naya̭ntīra॒gnim |

tato̭ de॒vānāṃ॒ sama̭varta॒tāsu॒rekaḥ॒ kasmai̭ de॒vāya̭ ha॒viṣā̭ vidhema || 7

yaści॒dāpo̭ mahi॒nā pa॒ryapa̭śya॒ddakṣa॒-ndadhā̭nā ja॒naya̭ntīrya॒jñam |

yo de॒veṣvidhi̭ de॒va eka॒ āsī॒tkasmai̭ de॒vāya̭ ha॒viṣā̭ vidhema || 8

mā no̭ hiṃsījjani॒tā yaḥ pṛ̭thi॒vyā yo vā॒ divaṃ̭ sa॒tyadha̭rmā ja॒jāna̭ |

yaścā॒paśca॒ndrā bṛ̭ha॒tīrja॒jāna॒ kasmai̭ de॒vāya̭ ha॒viṣā̭ vidhema || 9

prajā̭pate॒ na tvade॒tānya॒nyo viśvā̭ jā॒tāni॒ pari॒ tā ba̭bhūva |

yatkā̭māste juhu॒mastanno̭ astu va॒yaṃ syā̭ma॒ pata̭yo rayī॒ṇām || 10