Govindashtakam

govindAShTakam

shloka 1

satyaM j~nAnamanantaM nityamanAkAshaM paramAkAsham |

goShThaprANgaNariNkhaNalolamanAyAsaM paramAyAsam |

mAyAkalpitanAnAkAramanAkAraM bhuvanAkAram |

kShmAmAnAthamanAthaM praNamata govindaM paramAnandam || 1 ||

mRRitsnAmatsIheti yashodAtADanashaishava santrAsam |

vyAditavaktrAlokitalokAlokachaturdashalokAlim |

lokatrayapuramUlastambhaM lokAlokamanAlokam |

lokeshaM parameshaM praNamata govindaM paramAnandam || 2 ||

traiviShTaparipuvIraghnaM kShitibhAraghnaM bhavarogaghnam |

kaivalyaM navanItAhAramanAhAraM bhuvanAhAram |

vaimalyasphuTachetovRRittivisheShAbhAsamanAbhAsam |

shaivaM kevalashAntaM praNamata govindaM paramAnandam || 3 ||

gopAlaM prabhulIlAvigrahagopAlaM kulagopAlam |

gopIkhelanagovardhanadhRRitilIlAlAlitagopAlam |

gobhirnigadita govindasphuTanAmAnaM bahunAmAnam |

gopIgocharadUraM praNamata govindaM paramAnandam || 4 ||

gopImaNDalagoShThIbhedaM bhedAvasthamabhedAbham |

shashvadgokhuranirdhUtodgata dhUlIdhUsarasaubhAgyam |

shraddhAbhaktigRRihItAnandamachintyaM chintitasadbhAvam |

chintAmaNimahimAnaM praNamata govindaM paramAnandam || 5 ||

snAnavyAkulayoShidvastramupAdAyAgamupArUDham |

vyAditsantIratha digvastrA dAtumupAkarShantaM tAH

nirdhUtadvayashokavimohaM buddhaM buddherantastham |

sattAmAtrasharIraM praNamata govindaM paramAnandam || 6 ||

kAntaM kAraNakAraNamAdimanAdiM kAladhanAbhAsam |

kAlindIgatakAliyashirasi sunRRityantaM muhuratyantam |

kAlaM kAlakalAtItaM kalitAsheShaM kalidoShaghnam |

kAlatrayagatihetuM praNamata govindaM paramAnandam || 7 ||

bRRindAvanabhuvi bRRindArakagaNabRRindArAdhitavandeham |

kundAbhAmalamandasmerasudhAnandaM suhRRidAnandam |

vandyAsheSha mahAmuni mAnasa vandyAnandapadadvandvam |

vandyAsheShaguNAbdhiM praNamata govindaM paramAnandam || 8 ||

govindAShTakametadadhIte govindArpitachetA yaH |

govindAchyuta mAdhava viShNo gokulanAyaka kRRiShNeti |

govindA~Nghri sarojadhyAnasudhAjaladhautasamastAghaH |

govindaM paramAnandAmRRitamantasthaM sa tamabhyeti ||

iti shrI sha~NkarAchArya virachita shrIgovindAShTakaM samAptaM