Govindashtakam

govindASTakam

zloka 1

satyaM jJAnamanantaM nityamanAkAzaM paramAkAzam |

goSThaprAGgaNariGkhaNalolamanAyAsaM paramAyAsam |

mAyAkalpitanAnAkAramanAkAraM bhuvanAkAram |

kSmAmAnAthamanAthaM praNamata govindaM paramAnandam || 1 ||

mRtsnAmatsIheti yazodAtADanazaizava santrAsam |

vyAditavaktrAlokitalokAlokacaturdazalokAlim |

lokatrayapuramUlastambhaM lokAlokamanAlokam |

lokezaM paramezaM praNamata govindaM paramAnandam || 2 ||

traiviSTaparipuvIraghnaM kSitibhAraghnaM bhavarogaghnam |

kaivalyaM navanItAhAramanAhAraM bhuvanAhAram |

vaimalyasphuTacetovRttivizeSAbhAsamanAbhAsam |

zaivaM kevalazAntaM praNamata govindaM paramAnandam || 3 ||

gopAlaM prabhulIlAvigrahagopAlaM kulagopAlam |

gopIkhelanagovardhanadhRtilIlAlAlitagopAlam |

gobhirnigadita govindasphuTanAmAnaM bahunAmAnam |

gopIgocaradUraM praNamata govindaM paramAnandam || 4 ||

gopImaNDalagoSThIbhedaM bhedAvasthamabhedAbham |

zazvadgokhuranirdhUtodgata dhUlIdhUsarasaubhAgyam |

zraddhAbhaktigRhItAnandamacintyaM cintitasadbhAvam |

cintAmaNimahimAnaM praNamata govindaM paramAnandam || 5 ||

snAnavyAkulayoSidvastramupAdAyAgamupArUDham |

vyAditsantIratha digvastrA dAtumupAkarSantaM tAH

nirdhUtadvayazokavimohaM buddhaM buddherantastham |

sattAmAtrazarIraM praNamata govindaM paramAnandam || 6 ||

kAntaM kAraNakAraNamAdimanAdiM kAladhanAbhAsam |

kAlindIgatakAliyazirasi sunRtyantaM muhuratyantam |

kAlaM kAlakalAtItaM kalitAzeSaM kalidoSaghnam |

kAlatrayagatihetuM praNamata govindaM paramAnandam || 7 ||

bRndAvanabhuvi bRndArakagaNabRndArAdhitavandeham |

kundAbhAmalamandasmerasudhAnandaM suhRdAnandam |

vandyAzeSa mahAmuni mAnasa vandyAnandapadadvandvam |

vandyAzeSaguNAbdhiM praNamata govindaM paramAnandam || 8 ||

govindASTakametadadhIte govindArpitacetA yaH |

govindAcyuta mAdhava viSNo gokulanAyaka kRSNeti |

govindAGghri sarojadhyAnasudhAjaladhautasamastAghaH |

govindaM paramAnandAmRtamantasthaM sa tamabhyeti ||

iti zrI zaGkarAcArya viracita zrIgovindASTakaM samAptaM