గోపికా గీతా (భాగవత పురాణ)

గోపికా గీతా (భాగవత పురాణ)

శ్లోక 1

గోప్య ఊచుః ।

జయతి తేఽధికం జన్మనా వ్రజః

శ్రయత ఇన్దిరా శశ్వదత్ర హి ।

దయిత దృశ్యతాం దిక్షు తావకా-

స్త్వయి ధృతాసవస్త్వాం విచిన్వతే

శ్లోక 2

శరదుదాశయే సాధుజాతస-

త్సరసిజోదరశ్రీముషా దృశా ।

సురతనాథ తేఽశుల్కదాసికా

వరద నిఘ్నతో నేహ కిం వధః

॥ 1॥

శ్లోక 3

విషజలాప్యయాద్వ్యాలరాక్షసా-

ద్వర్షమారుతాద్వైద్యుతానలాత్ ।

వృషమయాత్మజాద్విశ్వతోభయా-

దృషభ తే వయం రక్షితా ముహుః

॥ 2॥

శ్లోక 4

న ఖలు గోపికానన్దనో భవా-

నఖిలదేహినామన్తరాత్మదృక్ ।

విఖనసార్థితో విశ్వగుప్తయే

సఖ ఉదేయివాన్సాత్వతాం కులే

॥ 3॥

శ్లోక 5

విరచితాభయం వృష్ణిధుర్య తే

చరణమీయుషాం సంసృతేర్భయాత్ ।

కరసరోరుహం కాన్త కామదం

శిరసి ధేహి నః శ్రీకరగ్రహమ్

॥ 4॥

శ్లోక 6

వ్రజజనార్తిహన్వీర యోషితాం

నిజజనస్మయధ్వంసనస్మిత ।

భజ సఖే భవత్కిఙ్కరీః స్మ నో

జలరుహాననం చారు దర్శయ

॥ 5॥

శ్లోక 7

ప్రణతదేహినాం పాపకర్శనం

తృణచరానుగం శ్రీనికేతనమ్ ।

ఫణిఫణార్పితం తే పదామ్బుజం

కృణు కుచేషు నః కృన్ధి హృచ్ఛయమ్

॥ 6॥

శ్లోక 8

మధురయా గిరా వల్గువాక్యయా

బుధమనోజ్ఞయా పుష్కరేక్షణ ।

విధికరీరిమా వీర ముహ్యతీ-

రధరసీధునాఽఽప్యాయయస్వ నః

॥ 7॥

శ్లోక 9

తవ కథామృతం తప్తజీవనం

కవిభిరీడితం కల్మషాపహమ్ ।

శ్రవణమఙ్గలం శ్రీమదాతతం

భువి గృణన్తి తే భూరిదా జనాః

॥ 8॥

శ్లోక 10

ప్రహసితం ప్రియ ప్రేమవీక్షణం

విహరణం చ తే ధ్యానమఙ్గలమ్ ।

రహసి సంవిదో యా హృదిస్పృశః

కుహక నో మనః క్షోభయన్తి హి

॥ 9॥

శ్లోక 11

చలసి యద్వ్రజాచ్చారయన్పశూన్

నలినసున్దరం నాథ తే పదమ్ ।

శిలతృణాఙ్కురైః సీదతీతి నః

కలిలతాం మనః కాన్త గచ్ఛతి

॥ 10॥

శ్లోక 12

దినపరిక్షయే నీలకున్తలై-

ర్వనరుహాననం బిభ్రదావృతమ్ ।

ఘనరజస్వలం దర్శయన్ముహు-

ర్మనసి నః స్మరం వీర యచ్ఛసి

॥ 11॥

శ్లోక 13

ప్రణతకామదం పద్మజార్చితం

ధరణిమణ్డనం ధ్యేయమాపది ।

చరణపఙ్కజం శన్తమం చ తే

రమణ నః స్తనేష్వర్పయాధిహన్

॥ 12॥

శ్లోక 14

సురతవర్ధనం శోకనాశనం

స్వరితవేణునా సుష్ఠు చుమ్బితమ్ ।

ఇతరరాగవిస్మారణం నృణాం

వితర వీర నస్తేఽధరామృతమ్

॥ 13॥

శ్లోక 15

అటతి యద్భవానహ్ని కాననం

త్రుటిర్యుగాయతే త్వామపశ్యతామ్ ।

కుటిలకున్తలం శ్రీముఖం చ తే

జడ ఉదీక్షతాం పక్ష్మకృద్దృశామ్

॥ 14॥

శ్లోక 16

పతిసుతాన్వయభ్రాతృబాన్ధవా-

నతివిలఙ్ఘ్య తేఽన్త్యచ్యుతాగతాః ।

గతివిదస్తవోద్గీతమోహితాః

కితవ యోషితః కస్త్యజేన్నిశి

॥ 15॥

శ్లోక 17

రహసి సంవిదం హృచ్ఛయోదయం

ప్రహసితాననం ప్రేమవీక్షణమ్ ।

బృహదురః శ్రియో వీక్ష్య ధామ తే

ముహురతిస్పృహా ముహ్యతే మనః

॥ 16॥

శ్లోక 18

వ్రజవనౌకసాం వ్యక్తిరఙ్గ తే

వృజినహన్త్ర్యలం విశ్వమఙ్గలమ్ ।

త్యజ మనాక్ చ నస్త్వత్స్పృహాత్మనాం

స్వజనహృద్రుజాం యన్నిషూదనమ్

॥ 17॥

శ్లోక 19

యత్తే సుజాతచరణామ్బురుహం స్తనేష

భీతాః శనైః ప్రియ దధీమహి కర్కశేషు ।

తేనాటవీమటసి తద్వ్యథతే న కింస్విత్

కూర్పాదిభిర్భ్రమతి ధీర్భవదాయుషాం నః

॥ 18॥

శ్లోక 20

ఇతి శ్రీమద్భాగవత మహాపురాణే పారమహంస్యాం సంహితాయాం

దశమస్కన్ధే పూర్వార్ధే రాసక్రీడాయాం గోపీగీతం నామైకత్రింశోఽధ్యాయః ॥